وَليسَ الذي يجري من العين ماؤها...
ولكنها نفس تذوب وتقطر....
هيا:- سمعت العياط جاي من بيت عيالي احس كلبي توقف عن النبض كمت ارجف وأبجي اخاف ابوي قتله شويه اجه ابوي ضايج ويعيط الحمدلله ماقتله لان عمر جبان من شايف ابوي شارد نتهت العركه والعالم رجعو للبيتهم اجاني ابوي ضايج كلش..
يعقوب:- رحت اريد اقتله بس مالحكت بي شرد...
هيا:- يابه عوفه خل يولي لتوصخ ايديك بدمه..كعدت ارتاحيت للعصر احس نفسي تلعب قبل كم يوم شكيت بنفسي حامل كلت خلي أحلل اني توني زعلانه خاف ابقه ما أحلل الحمل وبعدين اطلع حامل والناس تاكل وجهي لأن زعلانه عد اهلي ..رحت على امجد وكتله يجيبلي تحليل حمل راح جابه واجه حللت طلعت حامل فرفحت من البجي وحاولت بأقصى الطرق انو انزل الطفل بس محاولاتي بائت بالفشل طشيت خبر بأنو اني حامل حتى ليمر الوقت وميصدكون انو اني حامل من عمر راسلت سرى وكلتله تكلهم ومثل ماتوقعت محد يصدك اني حامل يكلوله جذابه مو حال وعمر يكول مو مني حامل نصدمت وضليت ابجي حاولت انزل الجنين مخليت شي مسويته اخذت براسيتول وشراب كحه وابرة اجهاض صار عندي نزيف يومين فرحت كلت اكيد نزل هسه رحت ركض ل رغد بنت عمي هيه صيدلانيه حجيتله الي صار وياي..
رغد صار عندي نزيف صارلي يومين..
رغد:- شسويتي بروحج انت صدك تحجين...
هيا:- شسوي متشوفين وضعي انت ويني وين الحمل والطفل ومحد مصدك انو اني حامل من عمر..
رغد:- شنو هذا الحجي لعد منين حامل يعني الله ليوفقهم أن شاء الله...
هيا:- هسه كوليلي شسوي نزل الطفل لو لا ...
رغد:- ماعرف اذا ضليتي تنزفين هيج ينزل الطفل ..
هيا:- اي افضل ..
رغد:- حرام هيا هاي روح شلون هيج تسوين ..
هيا:- رغد انت تدرين بيه وبوضعي واتمنى رب العالمين يعذرني ويسامحني...نقهرت كلش من الي سويته بس مو بيدي ..ثالث يوم رحت كلت لامي انو اني أنزف تخبلت وكلتلي يله امشي للدكتورة اخذج..رحنه للدكتورة وحولتني على السونار رحت سويت سونار ورجعت للدكتورة نطيته السونار شافته ..
-ماما هذا جنين بعده بالرحم مالتج بس ماكو لانفس ولاحركه...
هيا:- من كلتلي هيج رتاحيت ..امي كلتله شسويت اني حتى انزل الجنين وحجتله شنو السبب الدكتورة مقبلت ..
- ماما انت صح وضعج تعبان بس هذا طفل ميصير هيج رب العالمين يحاسبج علي انت قتلتي روح تعرفين شنو روح يعني انسان ..
هيا:- حجت وياي وقنعتني انو ميصير هيج اسوي انطتني علاج التشوهات وعلاج حتى يرجع نبض الطفل حتى يعيش ...
-ماما اساسا الجنين ميت بس بلكت ترجع بي الروح وتطلعين من خطيبته أمام رب العالمين..اسبوع وارجعيلي ...
هيا:- رجعت للبيت واني مأيسه انو يعيش الطفل اخذت العلاج لمدة أسبوع ورجعت للدكتورة حولتني على السونار سويت سونار وأخذته اله شافت السونار...
-صلوات على محمد وال محمد الطفل رجع بي النبض وصحته تمام الحمدلله...
هيا:- امي فرحت كلش واني ماعرف افرح لو اضوج حمدت ربي وكلت هاهيه مقسوم هذا الطفل ..رجعت للبيت وكلت لأخواتي ورغد ونسوان اخوتي الكل تفاجأ شلون مقسوم يجي للدنيا ومتمسك بالحياة هذا الطفل مر اسبوع على زعلتي ابوي راح المحكمه وكمل دعوة النفقه واستلمت ٥٠٠ بالشهر من استلمت ممصدكه عندي هلكد فلوس لان بعمري مانطاني عمر هلكد فلوس ولاشايفتهن رحت للسوك واشتريت ملابس الي ولجهالي ومخليت شي بنفسي رجعت من السوك محمله علاليك لجهالي كلش فرحانه اول مره اجيبلهم شي طبيت للبيت وتلكوني يركضون فرحانين بالملابس والالعاب سوده عليه جهالي محرومين من دون الجهال ماشافو حنان الاب من شفتهم هيج فرحانين فرحت كلش ..لليل راسلتني سرى...
سرى:- ولج هيا لحكي عمر راح يموت...
هيا:- خير ياستار شكو...
سرى:- يكول قاطعين من راتبي ٧٠٠ هيا اخذتهن...
هيا:- اي صح استلمت ٧٠٠ ...
سرى:- ولج اجه يدك على راسه ولكمه ماخله بحلكه من القهر ...
هيا:- على الفلوس هيج راح يموت عبالي علينه اني والجهال لان بعيد عنه المهم حيل ويا بعد وبعد أن شاء الله...
سرى:- لا هيا خطيه ولج...
هيا:- ليش خطيه لعد اني وجهاله مو خطيه محرومين من اللبس والله ميهمني ويستاهل أكثر وأن شاءالله بحياته ميشوف راحه...
سرى:- زين اكلج ليش استلمتي ٧٠٠ انت مو مسجله ٥٠٠ عليه...
هيا:- هاي متراكم مالت الهجرة لان هاجرني وراح ينطوني ٧٠٠ مؤقت بس شهرين نوب ينطوني ٥٠٠ ...
سرى:- ها خوش الله يرزقج ...ولج لو تشوفين امه وخواته شلون يدعن عليج ويدعن على الفلوس الي اخذتيهن..
هيا:- يطبهن مرض عشتو...نهيت المحادثه اني وياهه ورحت للبنات اضحك سولفتلهن على عمر ونضحك علي شمتانين بي هاي الي تكول حيل يستاهل وهاي الي تكول أن شاء الله بعد وبعد المهم بقينه سهرانين ضحك وسوالف تونسنه للصبح اجت فهيمه هاده علينه وتصيح...
سحر:- هل شكو خيرج من الصبح طبي جوه لتصيحين برا عيب منا عالم...
هيا:- طبت للبيت سلمت عليه ماردت السلام...
فهيمه:- ليش ولج هيج تسوين ليش عمر راح يموت من وراج ليش ...
هيا:- حيل يستاهل...
فهيمه:- ليش ماخذه راتبه كله ..
هيا:- منو كلج كله اخذته..
فهيمه:- هو كال اخذته كله...
هيا:- لايجذب عليج حتى مينطيج مصرف...
فهيمه:- لا لا كله ماخذته راح يموت لا اكل ولا شرب قبيلكم الحسين لازمه بنات الحسن عليكم ..
هيا:- على الحق مو على الباطل....
فهيمه:- لا اني اريد الحق ..
هيا:- اكيد اني هم اريد الحق..صيحت وبجت ماهتميتله خلت ومشت بكل عين صلفه جايه فوك الي سوو ..فرحت من كل كلبي على قهرتهم مثل ماقهروني وعذبوني اني هم اخذت حقي منهم وبعد مو كامل اخذته ومابرد كلبي بيهم بعده النار شابه بكلبي مارتاح كلبي...لليل راسلتني سرى...
سرى:- هيا عمر يريد يحجي وياج...
هيا:- لو يموت ما احجي ويا كوليله هيج تكول هيا ما احجي ويا وخل يطك راسه بميت حايط...راحت شويه ورجعت...
سرى:- هيا عمر كام يصيح ويغلط لان مقبلتي تحجين ويا ...
هيا:- حيل يستاهل وبعد مو عباله هيا القديمه اني بكلشي أرضه لا غلطان...كطعت بي نهائياً وأهله هم كطعو بيه ولا اجوني ولا وصل حجي منهم الي ..جهالي يروحون ويرجعوني وحدهم محد يوصلهم ولايردوهم بس عمي يجيني يشوفني ويشوف الجهال ويروح مرت اسابيع على زعلتي ونسيت ورتاحيت كمت اطلع ويه امي للسوك وللزيارة وفرحانه من بعد سنين اشوف الزيارة واشوف الطلعه من بعد ماجنت محرومه ..اروح للدكتورة بين فترة وفترة اتطمن على الحمل ..مره شهر اجه الراتب الثاني رحت استلمت اني وامي ومناك طبيت للسوك وشتريت الي محتاجته والي اريده فرحانه كلش لان ماطابه السوك صار فترة طويلة..حتاريت شنو اشتري وماكو ممنوع كملت من السوك ورجعنه للبيت تلكوني الجهال اخذو غراضهم الي شتريته فرحانين بيه والي بقه من الراتب ضميته لان قررت المهن واشتري قطعة ذهب اريد اعوض ذهبي الي باعه عمر علمود يسوي سحر ويرجع عشيقته ..مر شهرين واني مرتاحه بين اهلي وخواتي ونسوان اخوتي وبنات عمي ..من اروح استلم راتب تعرفت على بنات نفس وضعي تقريباً وهم مسويات نفقه وأخذت ارقامهن وضليت اتواصل وياهن ..تغيرت كلش مو هيا القديمه الي تخاف من كلشي ومحرومه من كلشي حتى لبسي تغير وشكلي وكل الي يشوفني يتفاجأ بيه ..شفت حياتي وتونست ونسيت عمر ..بيوم جنت كاعده اتفرج بالموبايل وصلني طلب صداقه بالفيس ..اني بالعادة ما اوافق على اي طلب صداقه وساده الخاص ما احب احد غريب يراسلني ..رحت على الفيس شفت الصفحه الي دازتلي طلب صداقه بنيه كلت خلي اوافق هسه اني شنو الي راح اخسره هيه بنيه وتصير صديقتي ...اول ماوافقت وصلتني رساله..
-شلونج..
هيا:- تمام الحمدلله..منو انت...
- منو يمج...
هيا:- ماكو احد ليش ...
- اني احمد هيا شلونج..
هيا:- نصدمت ونزلت دمعتي ..احمد شذكره بيه ...ها احمد اني زينه الحمدلله..ليش راسلتني منين جبت حسابي وشتريد مني...
احمد:- هيا مو مهم منين جبت حسابج ...
هيا:- ها لعد شتريد...
احمد:- هيا اني بعدني احبج ومانسيتج ابد شنو نسيتيني انت...
هيا:- اوف ماكدر اكله نسيتك ولا اكدر احجي ويا لان بعدني على ذمة رجال ثاني ...
احمد:- هيا شبيج ليش متحجين نسيتيني ولج اني احمد حبيبج ولج راح اموت بدونج تخبلت والله ومن سمعت بيج زعلانه فرحت كلش ..هيا فدوه لترجعين تطلكي اني اريدج بس تطلكين اتزوجج والله...
هيا:- احمد ميصير هذا الكلام اني متزوجه وعندي جهال بعديش اتزوج...
احمد:- بعد هذا العذاب وتكولين متزوجه شبيج هيا والله لسه منسيتج حسي بيه يوميه اموت الف موته بسببج اريدج تفهمين شنو يعني اريدج ماكدر بلياج...
هيا:- يعني تريدني اتطلك وتزوجني...
احمد:- اي والله اتزوجج وجهالج أخذهم اني اربيهم واعوضهم حنان الاب الي ماشافو بحياتهم اني متأكد..
هيا:- لا مستحيل ...
احمد:- هيا ماكو مستحيل والله اخذج انت وجهالج...
هيا:- احمد ماعرف شنو احجي والله...
احمد:- كلشي لاتحجين هيا عليج العباس لتعوفيني بعد والله اموت بدونج...
هيا:- لا ماكدر احجي وياك اني على ذمة رجال حرام عليه...
احمد:- لا مو حرام هو ضالمج وهاجرج حتى مينحسب حرام عليج..
هيا:-احمد اسفه ماكدر احجي وياك ..بقه يحلف بيه ويتوسل انو ابقه ويا ..تقبلت الوضع وبقيت احجي ويا ..اعرف انو حرام ابقه ويا بس اني احس بنقص بداخلي احس محتاجه شخص يحس بيه ويفهمني ويحبني وماحسيت بهذا الشي ويه عمر وأحمد حسسني بهذا الشي صرت أنانية اريد شخص يعوضني لان كلبي مكسور ..بقينه على تواصل وحجيتله كلشي صار وانو اني حامل كلي نزلي الطفل وسولفتله شنو صار وليش ماكدر أنزله نقهر كلش بس باقي عنده امل انو اصير اله بعد كل هذا الي صار..بقينه نحجي بالأيام الي فاتت وشلون تحملنه واحد بعيد عن الثاني ..هو متزوج وعنده اطفال وبعده يحبني مانساني ..نساني همومي ومشاكلي ويه عمر بقينه على تواصل اصر عليه ماعوفه ..لحد ماطبيت بالشهر التاسع من حملي تركته حسيت على نفسي شنو دا اسوي وانو حرام عليه وخواتي ضلن يحجن عليه ميصير وحرام عليج عفته وغيرت حسابي اكيد نقهر لان عفته بدون ما اكله أو اوضحله شي واني مقدرة وضعه بس ميصير واني مو بيدي الي دا يصير ويانه ...كملت الشهر التاسع وتأخرت ولادتي رحت للدكتورة فحصتني وسوتلي سونار كلتلي ولادتج متأخره راح انطيج إبرة محفز للولاده واذا ما جبتي اسويلج عملية..خفت كلش ماريد اسوي عملية رجعنه للبيت واني ضايجه ومقهوره ..لليل بديت اطلك اخذوني للمستشفى دخلوني على صالة الولاده ولدت بنت الحمدلله وسميته ليان طلعوني من المستشفى ورجعت للبيت ماحس اجت عمتي وسلمت عليه تفاجئنه بيه وخيريه دزتلي ريوك وسرى هم اجت سلمت عليه ورجعت الأمور طبيعيه ورجعنه مثل قبل اجت حماتي ليلى سلمت عليه وضلن يحجن عليه يردوني ارجع عمتي صارت يوميه تجي الصبح تشوفني وترجع اني ماهتميتلها على كد السلام وسؤال وجواب..لليل اتصل عليه رقم غريب فتحت خط...الو منو...
عمر:- اني عمر هيا ..شلونج...
هيا:- زينه الحمدلله...
عمر:- سمعت بيج جبتي الحمدلله على سلامتج...
هيا:- الله يسلمك...
عمر:- شنو جبتي...
هيا:- ليش متدري شولدت ...
عمر:- أساسا مادري بيج حامل لمن جبتي ..
هيا:- ها حقك متعرفنه ولاتسأل علينه ...
عمر:- لا اسأل عليكم دائماً...
هيا:- ها خطيه والله تسأل متقصر حجيته بأستهزاء...
عمر:- اي شلونج اخبارج وين ناوين...
هيا:- والله عايشه بالدنيا منو مهتملي ...
عمر:- اني اهتملج اني زوجج..
هيا:- هههههه زوجي ليش انت رايدني مفكر بيه ...
عمر:- اي اريدج واحبج غير ام جهالي انت...
هيا:- ها هيج صار الحجي تسأل علينه وتحبنه ....
عمر:- اتصلي عليه ماعندي رصيد...
هيا:- اني هم ماعندي رصيد...
عمر:- ليش شعجب متخلين رصيد مو عندج فلوس وين تودين فلوسج...
هيا:- لجهالك والله الفلوس...
عمر:- اي صدكت جهالي شجايبتلهم مجرودين ...
هيا:- هههاي احسن من قبل والله..وسلمت علي وسديت الموبايل..مصدومه شعجب عمر تذكرني اكيد علمود الفلوس مو غريبه عليه ..ضل يوميه يتصل عليه ويحجي وياي ويقنعني ارجع واني رافضه ما اقبل ارجع بقه يحلفلي اريدج واحبج ..
عمر:- هيا كولي لاهلج راح اجي ارجعج..
هيا:- ماشي..فعلا رحت كلت لاهلي انو ناوي يرجعني اخوتي مقبلو بس امي وابوي فرحو علمود الجهال مستخطيهم لان رايحين رادين لهلهم ويخافون عليهم ..مر ٣ اشهر من جايبه وعمر ما اجه رجعني خايف من ابوي ..اجه عمي بالليل..
خليل:- خويه ابو سيف عمر يستحي منك وماكدر يجي وهو دزني عليك يريد مرته...
يعقوب:- شوف ابو خلدون اني ارجعه بس بمسؤليتك انت ...
خليل:- ميخالف بعيني اخليه لاتخاف ابو سيف...
هيا:- اجه ابوي عليه وكلي ارجعي هاي آخر مره تزعلين واذا مره ثانيه زعلج اطلكج منه ما ابقيج على ذمته...اني كمت ابجي ونقهرت كلش خواتي يبجن لان رجعت تعودن عليه بوقته جانت غزل يمنه توه جايبه نقهرت كلش وضلت عينه وراي ..سلمت عليهن وشلت غراضي ورجعت..امي ماموجوده جانت طالعه..من رجعت امي ومالكتني تخبلت وضلت تدك وتلطم وتبجي ..
رجعت لبيت عيالي عمر ماجان موجود بالدوام سلمت عليهم وطبيت لغرفتي نصدمت بيه لكيته مبهذله كلش وصخه اجيت اريد افتح الكنتور اخلي غراضي لزمت الباب وكع عليه 😂 مجلبينه هيج كعدت وشبعت ضحك الغرفه صايره عبارة عن هوسه و وصخ وخشب مكسر فتحت الباب الثاني الي مخليه بي ملابسي لكيتهن عباره عن تراب وصخ من غير الريحه تلعب النفس نزلت فراشات من فوك نكثتهن من التراب وفرشت لجهالي ونيمتهم ونمت اني على الجربايه صايرة صفحه وصفحه الدوشك مالته مفلش 😂 متحملت شلون انام بهيج وصاخه وقذارة والأرض كله تراب البيت كله سيراميك بس غرفتي تراب حتى صبه ممسويله حاولت انام مكدرت كوه نمت لان مكاني تغيير وتعودت يم اهلي صارت الساعه ب١٢ توني غفيت حسيت اكو شي يم راسي فتحت عيوني شفت شي خلاني اكعد على حيلي من الصدمه.....
....يتبع....
