နေခြည်ရဲ့ အလံနီများ (၄)

262 28 0

by dumbhan

by dumbhan

အလံနီ (၄)

နေခြည့်ဟာ အမွန့်ကို တခြားလူတစ်ယောက် ဖြစ်သွားအောင် ပြောင်းလဲနိုင်ပါတယ်။

*****

အမွန်က နေခြည့်ကို ချစ်တယ်။ နေခြည်ကလည်း အမွန့်ကို ချစ်တယ်လို့ ပြောပါတယ်။ တကယ်လည်း အချစ်ခံရသလို၊ တစ်သက်လုံးလည်း အချစ်ခံသွားချင်တယ်။

ဒါပေမယ့် သူငယ်ချင်းတစ်ယောက်က ပြောလာတယ်။ အမွန် အရင်လို မဟုတ်တော့ဘူးတဲ့။

ဒါပေါ့။ အချစ်နဲ့တွေ့ရင် ဘယ်သူကမှ အရင်ကလို မဟုတ်တော့ဘူးလေ။ ပိုကောင်းတဲ့လူ ဖြစ်ချင်တယ်။ ပိုဂရုစိုက်နွေးထွေးတတ်တဲ့လူ ဖြစ်ချင်တယ်။ သူလိုသမျှ အရာရာကို ဖြည့်ဆည်းပေးနိုင်ချင်တယ်။ ဒီလိုပဲ အမွန်လည်း နေခြည်နဲ့ ပတ်သက်လာရင် အကုန်ပြောင်းလဲသွားတာပဲလေ။

သူငယ်ချင်းက ခေါင်းတခါခါ။

သေချာပြန်စဥ်းစားကြည့်ပါဦး အမွန်။ နင် နေခြည့်ဆီကနေ အချစ်ခံနေရလား၊ အထိန်းချုပ်ခံနေရတာလား။

ဒီမေးခွန်းကိုကြားတော့ အမွန့် ရင်ထဲမယ် ထင့်ခနဲ။ နေခြည့်ကို လူတွေက ချစ်ခင်ကြပေမယ့် ဘာလို့အမြင်မကြည်တတ်ကြတာလဲ။

အမွန့် စဥ်းစားခန်းကို သူငယ်ချင်းကပဲ ဝင်ထောက်ပြပြန်တယ်။

နင့်မှာ ကိုယ်ပိုင်ဘဝ မရှိတော့ဘူး အမွန်ရဲ့။ သူပေးတဲ့ဘဝ၊ သူထားတဲ့ နေရာ၊ သူလိုချင်တဲ့ ပတ်ဝန်းကျင်ပဲ နင့်မှာရှိတော့တယ်။ ရိုးရိုးသားသား ခင်ပါတယ်ဆိုတဲ့ သူငယ်ချင်းတွေနဲ့တောင် နင် အဆက်အသွယ် မလုပ်ရတော့ဘူးမလား။ ဖုန်းပြောတာ၊ အပြင်သွားတာတွေမှာတောင် သူ့မျက်နှာရိပ် မျက်နှာကဲကို လိုက်ကြည့်နေရတယ်မလား။

ငါပြောတာက ချစ်သူနှစ်ယောက်ကြားမှာ တစ်ခုခုလုပ်မယ်ဆို အသိပေးသင့်တာ မှန်တယ်။ တိုင်ပင်သင့်တာ မှန်တယ်။ ဒါပေမယ့် နင်လုပ်ချင်နေတဲ့ အရာတစ်ခုကို၊ နင်လုပ်ဖို့လိုအပ်တဲ့ အရာတစ်ခုကို သူစိတ်ဆိုးသွားမှာ ကြောက်လို့၊ သူမကြိုက်မှာ စိုးရိမ်လို့ဆိုတဲ့ အကြောင်းပြချက်တစ်ခုတည်းနဲ့ မလုပ်ဘဲ၊ မသွားဘဲ၊ မလာဘဲ နေလိုက်လို့ မရဘူးလေ သိလား။

နင့်မှာ နင့်ကိုယ်ပိုင် ဆုံးဖြတ်ချက်နဲ့ လုပ်ချင်တာကို လုပ်ပိုင်ခွင့်ရှိတယ်။ နေခြည့်ကို စော်ကားနေတာမှ မဟုတ်တာ။ ဘယ်လောက်ပဲ ချစ်တယ်ပြောပြော အမွန်၊ နင့်တစ်ဘဝလုံးကို သူတစ်ယောက်တည်းနဲ့ ဖြတ်သန်းသွားလို့ မရဘူး။

နောက်ပြီး နင့်ကိုယ်နင်လည်း ပြန်ကြည့်ဦး။ အချစ်မျက်ကန်းကိုမှ စုံလုံးဖြစ်နေပြီ။ သူဖုန်းဆက်ရင် ချက်ချင်းကိုင်ရ၊ သူတွေ့ချင်ရင် ချိန်းထားတာတွေ အကုန်ဖျက်ပြီး သွားတွေ့ရနဲ့။ နင့်မှာ အကြောင်းတစ်ခုခုရှိလို့ သူဆက်သွယ်တာ မကြုံလိုက်ရင်တောင် စိတ်ထင့်နေပြီမလား။ နင်ကမရည်ရွယ်ပေမယ့် သူက နင့်ကို ရည်ရွယ်ချက်ရှိရှိ ပြန်ပစ်ထားလိုက်ရင် အရူးမီးဝိုင်းပြီး တငိုငို တရယ်ရယ် ဖြစ်နေပြီလေ။

ငါ့စိတ်ထဲ ဒါက Healthy Relationship နဲ့ မတူတော့ဘူးနော်။ နင်က ပါဝင်ပတ်သက်နေသူမို့ သတိထားမိပါ့မလား မသိပေမယ့် ငါကတော့ ဘေးလူမို့လို့ အလံနီတွေကို မြင်နေရတာဖြစ်မယ်။ သတိထား အမွန်။

အမွန့်မှာ ပြန်ပြောစရာ စကားလုံးရယ်လို့ သေချာမရှိခဲ့ပါဘူး။ နေခြည့်ရဲ့ ချစ်ခြင်းတွေကိုပဲ ပြန်စဥ်းစားနေမိပါတယ်။