موضوع حلقتنا اليوم بتكلم عن العنوسه و أسبابها و كيفية معالجتها ، اتصلوا علينا و شاركونا بإقتراحاتكم أو حلولكم و نسعد بمداخلاتكم 💜
أسامه قال نستقبل أول إتصال و نقول آلو :
_ آلو السلام عليكم
= و عليكم السلام أهلاً بيك
_ معاكم دفع الله من الحاج يوسف .....أسامه قال ليهو أهلا و سهلا بيك يا دفع الله و بكل ناس الحاج يوسف ، أكيد عارف موضوع حلقتنا اليوم بتكلم عن شنو ....فإنت رأيك شنو ؟
_ والله يا أستاذ أسامه العنوسه بقت كتيره شديد في السودان و أنا شايف إنو السبب في دا تكاليف الزواج ، يعني الوحده كما اتفشخرت و اتبوبرت في عرسها تقول ما عرست ....ف أنا من هنا بناشد كل البنات بإنهم يبطلوا أنانيه و يراعوا للمسكين الجا و اتقدم ليهم دا ، راعوا لبعض يا أخوان و عرسوا بالمستطاع عليه ....أسامه قال ليهو كلامك جميل ... شكرا على مداخلتك ، بعدها استقبلنا اتصالين و أحدنا فاصل و رجعنا تاني ، معظم المتصلين سواء كانوا رجال أو نساء قالوا انو البنات هم سبب عنوستهم ، أسامه قال بما إنو كل الناس قالت أرائها فأنا حابب اقول وجهة نظري....أنا شايف إنو أم العروس أو الترس زي ما بقولوا عليها هي برضو قد تكون سبب في عنوسة بتها ، مرات كتيره بتكون البت راضيه و ما عندها مشكله في وضع و ظروف الزول الجا يتقدم ليها دا و مستعده تعرسوا بالفي و المافي بس الأم هي البتقيف بالمراصد ، لأنها بتفتكر انو كدا بترخص بتها و غير كدا أي أم بتحب تتبوبر بعرس بتها و الحاجات الحابوها ل بتها في الشيله ، عشان كدا أنا من هنا بناشد كل الأمهات البسمعونا بإنهم يوقفوا البعملوا فيهو دا و يراعوا لمشاعر البناتهم العايزات بس الستره و راجل كريم و حنون يحبهم و يعطف عليهم بغض النظر عن وضعو المادي....قال كلامو دا و قال لي عايزا تقولي حاجه يا مها ؟؟
قلت ليها أيوه ...فيكم الشايف انو البنت و متطلباتها هي سبب العنوسه و فيكم الشايف انو الأمهات هم سبب العنوسه و انا شايفه إنو المجتمع هو سبب العنوسه ....أقرب مثال لو مثلاً في وحده قبلت ب عريس بسيط و إتزوجتو في كلام كتير حيتقال عنها ، زي جملة : "دا عرس رخصه والله " البنسمعها كتير ضمن القطيعه البتكون حاصله يوم العرس و كتير بنسمع أمهاتنا أو أخواتنا في البيوت الوحده بتقول ليك عرس فلانه ديك لو ما عملتو في الصاله أنا ما ماشه ، نحنا ناس صالات بس ، كمان صحبات العروس الكل وحده بتوسوس ليها و بتقول ليها خليهو يدفع دم قلبو عشان يتحصل عليك ، أوعك تتمسكني ليهو ، ما شفتي فلانه صحبتنا راجلها عزاها كيف !؟مالك انتي أقل منها يعني ؟؟
ببساطه يعني الناس ذاتها بقت تتحشر في أمور الناس و تدي رايها في حاجه ما بتخصها ، ياريت يعني الناس تحترم روحها شويه و تبطل توسوس و تضغط على العروس عشان تضغط على العريس و تسل روحو ، الزواج ما معناهو شيله طول و عرض ، ما معناهو صاله كبيره ، ما معناهو تسريف و تبذير تحت شعار "شوفوا عرسي كيف " لأنو دا كلو ما حتستفيدي منو بعدين لمن ينقفل عليكم باب واحد ، الود و الإلفه و تقديركم لبعض و مراعاتكم لظروف بعض هم الح يخلوا الزواج دا يستمر ، ف من البدايه أدعموا بعض و خففوا التكاليف دا و خلوا سعيد يتهنى بسعيده ....ما عايزا أطيل عليكم بس انا نفسي مجتمعنا السوداني يكون مجتمع فاهم و واعي و ما يحاول يأثر تأثير سلبي على الفرد و يصعب عليهو الحياة ....دا العايزا اقولو في نهاية مشاورنا دا و يارب تكون الحلقه نالت الرضى و الإستحسان.....أسامه قال لي نعم كلامك صحيح ، اتمنى يكون مجتمعنا واعي و مراعي لظروف الفرد ...و بكدا مستمعينا الأعزاء نكون قد وصلنا لنهاية الحلقه ، شكراً كتير شديد لكل الناس الإتصلت و شاركتنا أرائها ، و شكراً لكم أنتم لحسن الإستماع ....إلى جديد اللقاء تقبلوا تحياتي...🌷💜
لمن خلصنا أسامه قال لي و إنت سبب عنوستك أو بورتك شنو ؟😂😂
قلت ليهو نفس سبب بورتك ، ضحك و قال لي أصلو الزول ما يهاظر معاك ، جات الاء و قالت ليهو و هي بتضحك بوره في عينك يا أسامه ، مها دي يا دوب عمرها 22 سنه الكلام انت يا عمو ، قال ليها خلاص بقيتوني عمو !!
المهم اتكلمنا شويه كدا و طوالي طلعت ....سبحان الله أنا متعوده اني أجي بالميدان لمن أكون راجعه بيتنا بس في اليوم دا ساي و من دون سبب غيرت شارعي و مشيت بشارع تاني ، أثناء ما أنا ماشه كدا لمحت اتنين بت و ولد واقفين و بتضاحوا و الولد مديني ضهرو .... قلت ديل شنو الما بخجلوا ديل ، المهم لمن جيت ماره بجنبهم ، اتفاجأت لمن لقيت انو الولد دا فارس! هو ما أبدا أي ردة فعل بس أنا إتخلعت ! ما وقفت كتير طوالي مشيت و هو جا لاحقني ، كان شغال لي ممكن تقيفي ؟...مها بتكلم معاك أنا !....ما رديت عليهو واصلت لحد ما جا وقف قدامي و قال لي بزهج : بتكلم مع حيطه أنا !!!؟ ما سامعاني يعني ؟؟
ما رديت عليهو ...قال لي المهم البت دي كانت زميلتي في الجامعه و هسي لاقيتها بالصدفه ف وقفت سلمت عليها و إتونست معاها شويه....قلت ليهو ما بهمني ! قال لي متأكده ! لأني حسيتك اتضايقتي !....,قلت ليهو انت موهوم ولا شنو ؟! اتضايق منو شنو يعني ؟ يعني شنو لو وقفت و اتكلمت معاها ما انت من زمان بتكلم بنات و أصلك بتاع بنات و عمرك ما حتتغير و......سكته لمن لقيتو بعاين لي جوه عيوني و هو مبتسم ....ياداب إنتبهت على نفسي و إنفعالي الغير مبرر !! ما عارفه نفسي مالي !!؟ قال لي دا كلو و ما متضايقه !....مها انتي حبيتيني ولا شنو ؟
قلت ليهو تف من خشمك ياخ ! احب ليك شنو فهمني بس ! انت واحد ....قاطعني و قال لي : عاطل و عديم موضوع ، مش كنت عايزا تقولي لي كدا ؟!!
ما رديت عليهو بس أول ما إتحركت من جنبو قال لي احيييييا أنا من البغار.....إتلفت عليهو و قلت ليهو بغيظ : ربنا يشفيك ، قال لي بالمناسبه الشاي حقك كان تحفه ، مش شطه ، عشانك مستعد أشرب السم ، قلت ليهو تكون ما قصرت ، اشربو عشان أرتاح منك ....قال لي طلباتك أوامر .... طبعاً إحترت فيهو ! إتحركت من جنبو و أنا بحاول اضبط نفسي و أكون عاديه بس ماف شي فيني كان عادي ، حسيت بإحساس غريب كدا و فجأه حسيت بالبرد ....ما عارفه ليه اتضايقت لمن شفتو واقف مع البت المايعه ديك مع إني أساساً ما بطيقو.....شكلو عاداني بهبالتو و عوارتو....رجعت البيت و أنا ما طبيعيه ، عقلي كان مشغول و المشكله انو كل فكري كان بدور حولين العاطل داك ، كلامو و حركاتو بقت مسيطره على أفكاري ، عديت أسبوع بالحاله دي و كل ما أقابلو بجهجهني زياده و بكبر الصراع الداخلي الجواي .....أنا ما بتاعة الأمور دي ، الحب و الحاجات دي بتخلي الزول عوير و أهبل و بتفقدو هيبتو .....بس أنا أكيد ما بحبو صح ؟؟؟!!
المهم بعد الأسبوع دا كان رمضان و مرة أبوي و أولادها جونا تاني يوم ل رمضان ، يومها. ساهرنا للساعه 12 مع أخوانا من أبوي ، هم كانوا عايزين يمشوا بس أمي قالت ليهم الزمن أتأخر بيتو معانا ، أمجد قال لي كويس إنك اليوم فكيتي التلفون و قعدتي اتونستي معانا ، أحمد قال ليهو شياطينها مربطه عشان كدا .... طبعاً كلهم ضحكوا على كلامو ، مروه قالت ليهو لا لا أصلاً ليها كم يوم كدا ما طبيعيه ، ملاذ قالت ليهو فعلاً و مرات كتيره بلقاها بتتبسم براها ، داليا قالت ليهم بتكون وقعت في الحب لأنو دي أعراض الحب ذاتها ، قلت ليهم كلكم ما عندكم موضوع ، غلطانه أنا لأني قعدت معاكم ، قلت كدا و طوالي قمت منهم و مشيت دخلت جوه الأوضه و رميت نفسي على السرير و بقيت أعاين للسقف ، قلت لا لا يا مها ما تهبلي بنفسك للدرجه دي ! ليه ما قادره اتحكم في نفسي !!؟ كلو بسبب العاطل داك !!
المهم اليوم البعدو مشيت الشغل بدري عشان اسجل الحلقه الحتنعرض بعدين المساء ، و لأننا في رمضان و ما بقدر أطلع المسا من البيت و افطر برا البيت إخترت إني أحي الصباح و أسجل الحلقه ، لمن كنت راجعه و نزلت في إفريقيا دخلت السوق و إشتريت فواكه و خضروات و الشمس دي في نص راسي ، استعجلت و اشتريت بسرعه و لمن جيت الزلط لمحت خليل من بعيد و هو شافني ، طبعاً ما إستغربت بشوفتو لأنو دائماً بكون متواجد هنا و كذا مره لمحتو بس كنت بغطي وشي منو عشان ما يقول لي تعالي أوصلك ، بس المره دي هو شافني ، جا سلم علي و قال لي رمضان كريم ، قلت ليهو الله أكرم ، قال لي وينك مختفيه ياخ ولا رمضان دخل العضم ؟! قلت ليهو أبدآ والله بس ما إتلاقينا ، طبعاً بتكلم معاي و هو شايل من الأكياس ، مشى قدامي دخلهم في عربيتو و جا فتح لي الباب ، حسسني كأني حاجه عظيمه كدا و صراحة معاملتو دي أنا ما بحبها ....ايوه أصلي ما زي البنات البحبوا يدلعوهم و يعملوا ليهم الحركات دي ، المهم طول الطريق كان بتكلم معاي لحد ما وصلني ، نزلت و شلت حاجاتي و شكرتو ، قال لي ح أزعل منك لو شكرتيني تاني ، قلت ليهو طيب...المهم هو مشى و أنا قبل ما أدخل كدا فارس طلع في وشي و ملامحو كانت ما بتتفسر ، قال لي أنا ما ضغطت عليك و ما طلبت منك تحبيني و كنت ح اتقبلك زي ما إنتي و بنفس أسلوبك بس على الأقل إحترمي مشاعري 😊
قلت ليهو ما فاهمه ! مشاعرك مالا يعني ؟! قال لي انتي فاهماني كويس ....ماف سبب يخليك تسمحي ل خليل يوصلك......لأول مره في حياتي انبسط بسبب كلامو ....صح ما أظهرت ليهو الحاجه دي بس جواي كان في كميه من الأحاسيس ، ما عارفه ليه بس فجأه قلت ليهو مش قلت حتشرب السم و قلت لي طلباتك أوامر ؟
قال لي ايوه فكرت اشربو بس إتراجعت في آخر لحظه و إتذكرت إني لو مت إنتي ما حتستحملي الصدمه بالإضافه لإني ما عايزا أدي خليل أي فرصه فيك ..... طبعاً ما عرفت اقول ليهو شنو ! لأول مره في حياتي ما اقدر أرد عليهو ، دخلت البيت و أنا قلبي شغال دق دق لمن جاتني رعشه خفيفه كدا ، طبعاً أمي و مآب و عمتو إجلال كانوا نايمين في المظله ، رشوها كويس و ناموا فيها و كالعاده هيثم ماف ، لمن دخلت المطبخ عشان أخت الحاجات اتفاجأت لمن لقيت مروه و ملاذ مدخلات سرير و نايمات فيهو الإتنين و كل وحده راشه توبها بالمويه ، ختيت الحاجات و صحيتهم الإتنين و قلت ليهم ليه نايمين هنا ؟الأوضه و المكيف مالهم قصروا معاكم في شنو ؟؟
مروه قالت لي نعمل شنو ما الكريهين ديلك نايمين لينا جوه أوضة الكيف !!
قلت ليها منو ديل ؟ ملاذ قالت لي منو غير أولاد خالتو إجلال
يعني أنا بستغرب كيف أولاد كبار كدا ما شفع يتصرفوا تصرف بايخ زي دا ؟! قلت ليها كالعاده أمي ما قالت حاجه صح ؟ قالت لي أمي ما عارفه لأنها نامت قبل ما هم يجوا ، قلت ليها هم أساساً انتوا ليه تطلعوا ليهم من الأوضه ؟؟
مروه قالت لي نعمل شنو ؟ جوا داخلين فجأه و قالوا عايزين يحضروا ، شويه شويه لحد ما كل واحد إستلم ليهو سرير و نام و ما قدرنا نقول ليهم حاجه .... طبعاً غضبت غضب ما عادي و من مكاني داك مشيت عليهم و مروه جاريه وراي و هي شغاله لي ماشه وين يا مجنونه...
يتبع.....
