يوم الخطوبه شجن جاتني من الصباح و داليا و دانيه أصلاً كانوا بايتين معانا ، ف من أصحبت هم بدوا يعملوا الكيك و الحاجات دي ، طبعاً فستان الخطوبه جابتو لي داليا هديه و كان حلو شديد ، صراحة ما عرفت أشكرها كيف ، يمكن أيام ما قبل الخطوبه دي أكتر أيام اتعاملت فيها مع أخواتي من أبوي ، زمان غير السلام ماف شي تاني بينا ، بس هسي بقينا نضحك نتونس و هم يشغلوها لي ، قلت ليهم هسي انتوا مالكم متحمسين أكتر مني ؟؟😂نوموا نوم ينفعكم الدنيا رمضان !! فاطرين انتوا ولا شنو ؟
دانيه قالت لي شكينا ليك ؟! لا يبقى تسكتي خالص و تخلينا نشوف شغلنا ، طبعاً داليا و شجن كان فاتحين النت و يتفرجوا على تسريحات شعر لي و ليهم ، قلت ليهم ان شاء الله قايلني عايزا أفك شعري قدامهم ؟؟
شجن و داليا بصوت واحد قالوا لي يوووم واحد بس عليك الله ، قلت ليهم نووو و ألف نووو ، بقوا يحنسوا فيني و يصرعوا علي لحد ما اقتنعوا إني ما ح أفك شعري ، قلت ليهم في حاجات ما مفروض نتنازل عنها خالص لا في يوم خطوبه لا يوم عرس لا غيرو و أنا مبادئ و إلتزامي ما حيتغير لا بسبب الخطوبه دي لا بسبب حاجه تانيه ، مروه قالت ليهم خلوها على راحتها ياخ!! المهم بعد ما جهزوا الكيك و الحلويات و صلوا الضهر جوني راجعين كلهم جوه الأوضه ، شغلنا المكيف و كل إتنين في سرير ، نومنا نومه واحده ما صحينا إلا العصر ، صلينا و دخلنا المطبخ مع أمي ، مآب جات و قالت ل مروه أميره قالت ليك ما بتقدر تجيك هسي إلا بعد الإفطار !! مروه قالت ليها أميره دي عندها زهايمر ولا شنو ؟!! يعني ما عارفه إنو خطوبة مها الليله و هي عايزا تجينا بعد الإفطار !!...قلت ليها عايزا منها شنو إنتي ؟؟ قالت لي عايزنها ترسم ليك ، داليا قالت ليها ما مشكله أنا برسم ليها رسلي مآب تجيب لينا بيقن ، فعلاً مآب مشت جابت لينا البيقن و جات و داليا بدت ترسم لي و شجن و دانيه مسكوا الحوش رشوا و قشوا ، طبعاً سلوى بت عمتو إجلال تعاين لينا ساي و لو عملت حاجه بتعملها من دون نفس ، من جواي قلت ليها عارفاك يا عفنه خاته عينك على فارس ، المهم شويه كدا عمتي نوره جات و بقت تساعد أمي في المطبخ و هيثم رسلناهو يجيب بارد ، و أبوي كل دقيقتين يجينا داخل و يقول لينا ها الناقصكم شنو ، طبعاً كل ما الزمن يقرب أنا بتوتر أكتر و حوطة ناس البيت و حركتهم الكتيره كانت بتزيد توتري ، بعد ربع ساعه كدا ، جوا أخواني أمجد و أحمد و أمهم ، طبعاً ما قصروا ما خلوا شي ما جابوا معاهم من الفواكه و غيرها حتى الزينه جابوها و بدوا يعلقوا الأضواء في الحيط و بين الأوض ، قلت ليهم حسستوني كأنو عرس ! أمجد قال لي دي خطوبة أختنا عايزاها تكون عاديه ؟؟ أكيد لا ...الوقت داك رسمتي جفت و غسلتها ، أمجد قال لي كدا ياداب بقيتي تشبهي البنات 😂 ضربتو في كتفو و قلت ليهو حيوان ، فجأه جا أحمد و قال لأمجد عيب البتعمل فيهو دا ؟؟! ما بتخجل تضايق الضيوف ؟؟ طبعاً أنا و أمجد استغربنا فيهو !! أمجد قال ليهو ضيوف ؟؟؟ وين ؟؟
أحمد قال ليهو دي ما ضيفه ؟! إتلفت علي و قال لي آسف بالنيابه عنو ، إتفضلي يا أخت ولا خليني أنادي ليك وحده من أخواتي ، طبعاً فهمتو قاصد شنو و أمجد دا مات من الضحك ، قلت ليهو يعني عامل فيها ما عارفني ؟؟
قال لأمجد سبحان الله صوتها زي صوت مها بس أكيد دي ما هي ، قلت ليهو سخيف شديد ، قال لي إنتي صحبتها ولا شنو ؟؟
قلت ليهو احمدددد !! ضحك و قال لي بهظر والله عملتو شنو لمن بقيتي سمحه كدا ؟؟ قلت ليهو موية الوضو و رضا الوالدين 😎 قال لي يعني زمان كنتي بتتيممي ؟😂😂 ضحكني ضحك بكلامو ، أمجد قال شكلو نفسيات الخطوبه دي سمحه عقبالي 😂
أمجد قال لي كدي أحكي لينا عن أبو النسب دا شويه ، كيف قدر يقنعك و يوقعك في شباكو ، أحمد قال ليهو الله يسامحك ، قول ليها كيف خليتيهو يقع في شباك و سيطرتي عليهو لحد ما وصل البيت .... طبعاً خجلت من كلامهم ، قلت ليهم و أنا بحاول اخفي إبتسامتي : ما عندكم موضوع بس و طوالي مشيت منهم ، المهم لمن جا موعد الإفطار حللنا صيامنا بس و صلينا و بدينا نرص في الحاجات ، هم قالوا بجوا الساعه 9 أو 8 و حاجه ، ناس مروه مشوا التروايح و أنا أصلاً عندي عذر من 3 أيام ، المهم على بال ما هم يجوا بيتنا إتملى ناس ، طبعاً أمجد و أحمد جابوا بنات عشان يدقوا دلوكه !! قلت ليهم بتبالغوا والله و طبعاً البيت كان ملان زغاريد ! المهم لمن ناس مروه جوا راجعين من المسجد ، دانيه جاتني جاريه و قالت لي بعد دا لازم ابدا ليك المكياج يلا سرعه سرعه ، طبعاً كنت لابسه الفستان و شعري عملوهو لي من قبيل ، قالت لي اول شي لازم أرطب ليك بشرتك ، معاك مرطب شنو ؟؟
قلت ليها ما عندي ، قالت لي كيف ما عندك !!؟ مروه قالت ليها عادي ما تستغرب في جعفر دي ، المهم أنا معاي مرطب بانثينول ، بعدها بدت ترسم لي في حواجبي و تحتهم عملت كونتور ، بعدها عملت بلايمر بعدو طوالي فاونديشن ، وزعتو في وشي و بدت تحدد و تخطط فيهو ب بدرة أفتح للأماكن العايزه تبرزها مع شوية "شيمر" يلي هي لمعه أقل ، كانت عايزا تركب لي لينسيز بس أنا رفضت ف بس ركبت لي ال لاشز مع إيلاينر و آيشادو ، بعدها استخدمت الليب لاينر و قلم الحمره يلي هو ليب ستيك ، آخر حاجه هي الفيكس بلاس ، يلي هو مثبت المكياج ، لمن خلصت بقت تقول وااااي أنا ما بصدق طلعتي تحفه !! نادت مروه و الباقين عشان يشوفوني و طبعاً كلهم اتصدموا و إنبهروا لأنو دي كانت أول مره أعمل فيها ميك اب ، بعدها هم بقوا يزينوا في نفسهم و أنا لبست باقي الإكسسوارات و انا لحد لحظة ما لبست الطرحه ما قادره أصدق إنو الفي المرآيه دي أنا !! انصدمت شديد والله و حسيت القدامي دي وحده تانيه !!.
المهم شويه كدا و سامعه صوت الزغاريد زادت و ناس بقت شغاله تقول جوا جوا ، طوالي ناس مروه طلعوا بإستعجال و خلوني ، بعد مسافه جوني دانيه و شجن و هم شغالات لي ووووب من سماحة فارس ! ما معقوله الحلاوه دي كلها ! ما شفتيهو لابس قميص كحلي و بنطلون بيجي كيف و العجب ضحكتو 😂😭😂😭😂واي بس حظك يا مها و ربنا يهنيكم ب بعض ، مروه جات و قالت لي رايك شنو نتبادل ، انتي شيلي عثمان و أنا ح أشيل فارس ، قلت ليها امشي قولي ليهو الكلام دا ، طوالي شجن و دانيه و داليا شبكوني ليك اشششي على الثقه ، شويه كدا أمي جات داخله لمن شافتني وقفت قبلها 😂😂بقت مره تعاين لي و مره تعاين لناس مروه ، شجن قالت ليها لا لا يا خالتو بتك ما هربت دي ياها ذاتا ، أمي قالت ليها عملتن ليها شنو بقت سمح كدا ! قلت ليهم محسسني اني كنت نحاس مصدي ما كلو حبة ميك اب كدا و الجمال رباني ، داليا الهبله قدامي أمي قالت لي الثقه دي جبتيها من فارس ولا شنو و قعدوا يضحكوا بس لمن حمرت ليهم سكتوا ، أمي قالت لي اطلعي ليهم بعد دا .... طبعاً قلبي عمل شحححح و قربت أتراجع و اقول ليهم لا لا ما عايزا أطلع ، دقات قلبي بقت ماشه في زياده و أطرافي بقت بارده حسيت اني ما بقدر أطلع و اقيف قدامهم و ما بقدر أخت عيوني في عيون فارس ، المهم ناس مروه طلعوني برا و هم بزغرتوا و أنا شغاله ليهم بصوت واطي : اسكتوا ياخ و هم ما شغالين بي لمن وصلنا الحوش الزغاريد زادت زياده و أول ما عيني وقعت على فارس حسيت قلبي وصل رجليني ، طبعاً هو كان قاعد و أول ما شافني وقف على حيلو ، أصحابوا بقوا يضحكوا عليهو و هم ذاتهم كانوا مصدومين فيني ، يعني لمن كنت بشاكلهم و بجوط فيهم و أنا زهجانه و الشمس ضارباني كيف و هسي عامله كيف ، أول ما قعدت في واحد من الكراسي المخصصين لينا أنا و فارس هو طوالي جا قعد جنبي بس ما قال حاجه لكن وترني بنظراتو دي !! ما قدرت احدد نظراتو دي نوعها شنو ! أمو و خالتو و عماتو جوا سلموا علي و اتكلموا معانا شويه كدا و رجعوا ل ورا ، بعدها جابوا الخواتم و أنا لحد اللحظات اللبسني فيها فارس الخاتم و لبستو خاتم ما قدرت تاني أخت عيني في عينو ، رغم اني كنت طايره من الفرح بس التوتر و الخجل خلوني اتمنى إنو الحاصل دا ينتهي بسرعه ، بعدها جا أبوي بارك لينا و بعدو باقي الناس ، آخر حاجه جوني أخواتي و أخواني و إتلموا فينا و بقوا يشغلوها لينا و مره يتونسوا معانا ، أمجد قال ل فارس استعجل عشان تخلصنا من النكديه دي ....فارس كان سرحان و ما رد عليهو إلا لمن أمجد عاد ليهو السؤال تاني ...قال ليهو إن شاء الله....مع إنو رد بس أنا للحظه حسيت انو ما طبيعي بس تاني إتراجعت و قلت لا لا يمكن في شغل أو حاجه مهمه شديد شاغلاهو و حاولت قدر الإمكان إني ما أعكر صفو مزاجي و ما أخرب اللحظه الجميله دي بأفكاري و شكوكي الما ليها أساس دي ، فجأه جوا الاء و أسامه و باركوا لينا ، طبعاً عزمت زملائي في الشغل ، ما اتوقعتهم يجوا بس اتفاجأت و فرحت في نفس الوقت لمن جوا و عرفتهم على أهلي ، المهم ديك كانت أجمل و اطول ليله في حياتي ، قضيتها كلها ونسه و ضحك لدرجة اني فجأه كدا بقيت اضحك لمن أخواني يشغلوها لينا أنا و فارس المهم اليوم داك كان يوم رهيب و جميل بالمعنى الحرفي ، خلاني أكون مبسوطه و مبتسمه على طول ، أمي قالت لي لو كنا عارفين إنو العرس ببسطك كدا كان عرسنا ليك من زمان 😂😂
المهم بعد أسبوع من الكلام دا ، يوم كنت راجعه من الشغل ، من بعيد لمحت فارس مع أصحابو و كان بشرب في سجاير !! طبعاً اتضايقت شديد ، فتحت تلفوني و إتصلت عليهو ، لمن رد قلت ليهو فارس أنا واقفه ليك جنب شجرة ناس عم الماحي تعالني سريع ، قال لي تمام و فعلاً ما تميت دقيقه إلا و لقيتو واقف قدامي ، سلم علي و قال لي أخبارك شنو ؟
قلت ليهو خليك مني ، فارس انت مش اتغيرت !! قال لي ايوه اتغيرت ....قلت ليهو طيب ليه بتشرب سجاير ؟؟ ما صايم يعني؟؟!!اتنهد و قال لي زهجان بس والله و لمن أزهج بشرب سجاير ، قلت ليهو ما تشربها تاني لأنها ما صحيه و حاول تتخلص من زهجك دا بطرق تانيه ، قال لي تمام ، قلت ليهو المزهجك شنو ؟؟
قال لي ما تشغلي بالك ، قلت ليهو عايزا اشغل بالي عشان كدا أحسن تحكي لي ، قال لي ماف شي يتحكي و هسي امشي بيتكم لأنو وقفتنا كدا ما حلوه ، قلت ليهو فارس.....قاطعني و قال لي ما عايز اتناقش كتير أمشي البيت قلت ليك ، طبعاً زعلت منو قدرت و طوالي مشيت البيت و أنا زهجانه ، لمن وصلت لقيت عمتي نوره معانا و ناس عمتو إجلال مشوا المستشفى عندهم مقابله ، سلمت عليهم و رقدت في السرير الجنبهم و قلت ليهم نعسانه أنا ماف زول يصحني ، المهم غمضت عيوني بس كنت سامعه كلام أمي و عمتي نوره الكانت بتقول ليها إنو ولدها عثمان حيرجع في نهاية رمضان يعني بعد 5 أيام و قالت ليها عشان كدا من هسي خلونا نبدا نجهز للعرس، أمي قالت ليها ربنا يوصلو بالسلامه ، كنت مفتكره انو مروه لمن تسمع بالخبر دا حتنبسط بس لمن صحيت من نومتي و كلمتها قالت لي عارفه و ما كان ظاهر إنو هي مبسوطه ، قلت ليها مروه في شنو ؟؟ مالك مع عثمان ؟؟ قالت لي ولا شي ، قلت ليها ماف حاجه اسمها ولا شي ، انتي عثمان دا كنتي لو سمعتي اسمو ساي بتجيك رعشه ! هسي مالك ؟ قالت لي ماف شي بس لمن أصريت عليها ، قالت لي انو عثمان بقى يسفهه و ما شغال بيها و هي في البدايه إفتكرت أنها زعلتو في حاجه و سألتو أكتر من مره إذا هي عملت حاجه بتزعل بس كان بقول ليها ماف شي و لسه متغير عليها ، قالت لي بعد محاولات كتيره مني قنعت و فهمت إنو عايز ليهو سبب بس عشان يحصل خلاف بيناتنا و يفركش الخطبه دي ! و أنا يا مها ما عايزا ألصق و هو ما عايزني ، ما معروف يمكن لقى ليهو وحده هناك و عجبتو عشان كدا عايز يتخلص مني !!.... طبعاً اتغظت غيظ من عثمان ! نهاي ما اتوقعتو كدا الحيوان ، قلت ليها كدي خليهو لمن يجي و لو فعلاً كلامك طلع صح ف صدقيني هو الخسران ....المهم زي الساعه 9كدا كنت خاشه الواتس منتظره فارس يدخل و لمن دخل بقيت متردده ارسل ليهو ولا لا و مع اني ما الزوله البتتنازل ديك و ترسل ل زول بس مع فارس أنا ببقى إنسانه تانيه خالص ، يمكن هو استثنائي الوحيد ، رسلت ليهو و قلت ليهو فارس كيفك ؟
_تمام و انتي ؟
قلت ليهو كويسه الحمدلله ، قال لي آسف شديد على الحصل قبيل ، قلت ليهو عادي ولا يهمك ف بقينا نتكلم لحد ما جبت ليهو سيرة عثمان ولد عمتي نوره ، طبعاً أنا عشان كدا محروقه منو بقيت اتكلم عنو ، قلت ليهو طلع حيوان و ما قدر كلمتو ! هسي في داعي يعلق مروه فيهو و في الآخر يقعد يعمل ليها في الحركات البايخه دي ؟
قال لي ما معروف يمكن عندو عذر ! قلت ليهو زي شنو مثلاً ؟؟ صدقني ماف أي حذر يخليهو يتغير عليها خاصة انو هي ما غلطت في حقو و هو بلسانو قال ليها كدا ، قال لي برضو ما معروف ، قلت ليهو نشوف لمن يجي راجع حيقول شنو....استلم رسالتي دي و ما رد عليها و طلع من الواتس ، قلت يمكن النت حقو خلص او انشغل بحاجه خلتو يطلع من الواتس ....المهم بعدها بدينا نجهز للعيد ، مشينا السوق اشترينا لينا ملابس و ملايات و ستاير و قدامات و الأوضاع كانت عسل في عسل ، قبل يومين من العيد خبزنا في بيتنا بعدها مشينا خبزنا ل عمتي و آخر حاجه مشينا ل مرة أبوي و خبزنا معاهم و كلو عشان خاطر أخواني والله 💜
طبعاً كلنا اشترينا ملابس جديده إلا مروه قالت بتمشي السوق على راحتها و هي دائماً بتمشي يوم الوقفه التقول بتحب الزحمه ، المهم أنا مشيت معاها السوق ، بعد ما أشترت قالت لي تعالي و ساقتني مكان بتاع ملابس رجاليه ، قلت ليها يعني فجأه كدا قررتي تلبسي ملابس رجاليه ولا الأوضاع سلكت بينك و بين عثمان و عايزا تشتري ليهو ؟!😂
قالت لي بري بري ، جبتك هنا عشان تختاري ليك حاجه ل فارس تهديها ليهو يوم العيد ، قلت ليها مفلسه أنا و بعدين هو شكى ليك و قال ليك ما عندي ملابس !؟ قالت لي اسكتي يا سخيفه و طوالي بقت تختار في ملابس و قلت دقيقتين بتقول لي عايزا نشتري ليهو دا ولا دا و أنا بس بقول ليها ما عارفه رغم اني من جواي كنت عايزا اعمل ليهو حاجه زي دي بس خفت من التشغيلات في الآخر اخترت ليهو طقم جلابيه مع ساعه و عطر و مركوب ، لمن مروه جات تدفع طلعت قروشي و أديتهم ل بتاع المحل ، لمن مروه عاينت لي قلت ليها ما تعايني لي ساي ، عملت كدا عشان بكرا ما تقولي ليهم أنا كسيت فارس ، ضحكت قدرتها و قالت لي صدقتك صدقتك 😂😂
المهم لمن رجعنا البيت براحه شلت الطقم و دخلت بيهو جوه و بقيت اشوف فيهو و اتخيل فارس و هو لابسو ، فجأه كدا جات ملاذ داخله و أنا إتلبشت ، عاين الطقم و قالت لي اششششي عليه دا ل فارس ولا شنو ؟...إبتسمت ليها بس ، المهم فتحت الدولاب و اتمسحت ب اللوشن حقها و عملت مرطب في وشها و ليب قلوس و ماسكرا ! قلت ليها ماشه وين انتي ؟؟ قالت ل ماشه ل حنين ، قلت ليها يا بت الدنيا رمضان ما تزعجي الناس ساي !! قالت لي أنا ما شافعه عشان أزعجهم ! ماشه انضف معاها نضافة العيد و هي حتجي تنضف معاي بعدين ! قلت ليها و النضافه محتاجه كل العملتيهو دا ؟؟
قالت لي أنا من زمان بعمل كدا الجد شنو يعني ؟؟ و بعدين انتي مالك و مالي ! قايله عشان خطبوك معناها حتتحكمي فيني ؟!!
قالت كدا و طوالي طلعت و خلتني مستغربه !! اجي علاقة الخطوبه شنو بالموضوع ! البت دي بقت طاشه شبكه و أصلاً ليها فتره متغيره !!
يتبع......
