طالبه سادس مجاهده 💜

طالبة سادس مجاهده 💜

بدايه القصه اعرفكم عن نفسي انا اسمي اية ، وانا من العراق.
راح احجيلكم قصتي بلسادس الاحيائي وشنو عانيت بس بقيت مستمره حتى احقق الهدف لبراسي ماتراجعت ابد وماخليت شي يأثر بيه.
المغزه من قصتي اوصل للقارئ فكرة عدم التخلي عن هدفه وحلمه الي يطمح اله مهمه واجه امور تمنعه.
نبلش...
بأوضاع كورونا جنت صف رابع علمي وبنصف سنه بعد ما امتحنه انتشر الوباء ف بوكتها سوو النا عبور اعتماد على نجاحنا بنصف السنه يعني الي نجح يعبر والي رسب يرسب هل سنه.
ف انا جنت ناجحه وعبرت السنه بعدين صرت خامس ايظا جانت أوضاع كورونا وكالو عساس يعتمدون على نصف سنه ف انا كلت خل ابلش اقره كمياء بما انو هي اكثف ماده بلسادس ف بلشت ويه استاذه تصير خالة صديقتي، احنه حالتنه ماديه جانت مو زينه ف صديقتي كالتلي على خالتها ادرسنه وتاخذ شي قليل مهم امي قبلت ف بلشت اقره كمياء بشهر ال١١ تقريبا من انا كنت خامس ف قريت خامس وماده من سادس سوه وجنت لازم انجح من خامس بنصف سنه..

ومن متحنت نصف سنه لخامس نجحت بمعدل ٩٠ ف وراها كبل بلشت بلعطله نصف سنه أقره للسادس.
ف قريت مواد السادس، على اليوتيوب، الفزياء على استاذ حسن عبد الكاظم، والعربي حسين الغريب كلش استاذ ستفاديت علي، واستاذ احمد فوزي الي اعتبره قدوه سواء بنصايحه للطلاب ودراسته للماده وابد ماعاف طلابه للنهايه ويانه، واستاذ علي صادق وحيدر عبد الأئمه كلش شرحهم روعه بلرياضيات، واستاذ فلاح حسن جان مدرسي بلمدرسه ستفاديت كلش الله يذكرهم بلخير واسلاميه ايظا قريته ع كتاب المدريسه بلمدرسه جان الها دور وستاذ حسين غريب هم شارح الماده حتستفادون علي كلش بس باليوتيوب تحتاجون تمتحنون نفسكم حتى تضبطون الماده.
وهسه نكمل لمسيره وراها اعتمدو على نصف السنه ونجحت ف كملت قرايه للسادس وهنا بلشت الصعوبه.....
بديت اعاني من الماده ك مواد علميه صعبه
جنت احتاج احد يمتحني وينطيني نصائح ملكيت هل شخص ف هسه انا راح انصحكم بلي اعرفه حتى تلكون الي نصحكم اولا لازم تسوي جدول على حسب نظامك انت لازم تستغل كل الوقت ماتضيعه على لاشيئ، سوي الك دفتر صغير وقسمه على كل لمواد الرئيسيه هاذ الدفتر تجي تكتب بي كل غلط تغلطه اثناء الامتحانات حتى لاتكررها بعدين.
ثانيا امتحن نفسك بل اسئله لوزاريه حل شكد ماتكدر حتى تتقوى لان ذا ماتحل بيدك ماتكدر تجاوب راح تتوقف بلحل.
ثالثا ماكلك امنع نفسك عن كلشي بس قلل من كلشي هواي وخصصه للدراسه.
اني خلال هل مده عانيت من مشاكل ك عائله وعديتها صح تأزمت نفسيتي بس عديتها وبقيت ستمريت بالدراسه جنت اذا اضوج او انقهر من شي ف اروح ادرس اكول بس هاذ حيفيدني اني سويته ك تحدي الي.
مريت بظروف سواء نفسيه او ماديه بس ماخليت هلشي يسيطر عليه (الضعف) لا اني الي سيطرت علي سويته (قوه) ف الي دا يقره  القصه وانت طالب سادس او حتصير سادس الي اريده منك استمر انت كدها✌️
بعد ماخلصت العطله بلش الدوام والمدرسة الي جنت اداوم بيها جانت حكوميه ف داومت تقريبا سبوعين وحولت لغير مدرسه...
بوكتها خالتي خلت بنتها ب مدرسه اهليه ف شافت اعلان الي معدلهم بل ٩٠ وفوك يقبلونهم مجاني ف خالتي اني جيت ابالها وطرحتلي الفكره...

اتعب تلعب..
بعد ماطرحتلي الفكره ولهلي ف وافقنه ورحنا حتى نسجل وهنا كالو لازم توقعون على تعهد وبلتعهد مكتوب اذا ماطلعت معدل95 بنصف السنه ف ياخذون نصف المبلغ يعني 800 وبأخير سنه ذا ماطلعت فوك معدل ال 90 ياخذون لمبلغ كامل ف اهلي شافو تعهد وجانوا واثقين بيه اطلع هاذ لمعدل وماخيب ظنهم ف وافقوا وقدمنا..  ثم بلشت دوام جانت ك مدرسه اهليه مطورين بس من ناحيه لبنات ولموبايلات الايفون بيدهن ولمخالفات ومديره متحجي جانت مو خوش من هل ناحيه بس هلشي مالي دخل بي جنت مركزه على دراستي والاساتذه جانو زينين عديت مرحلة بس انا جنت كلش خايفه لا ماطلع معدل وياخذون فلوس من اهلي وهمه ماعدهم وخالتي هي كفيلتي حتصير بوجها بس توكلت على الله وربكم حلها اجت نتائج نصف سنه وطلعت معدل 98 جنت كلش فرحانه بنفسي وفخوره لان مخيبت ظن اهلي وخالتي ف انا جنت امتحن هواي واقره هواي بنفس وقت صح لحفظ ماجنت احفظ ورقه وقلم كل مواد بس انا عقليتي جانت هيج جنت اسمع يكولون لازم ورقه وقلم بس لا مو شرط بس انا لنكليزي جنت احفظه ورقه وقلم وقصائد الادب..
بتالي بلشت مراجعه بعد ماخلصت لتراكم ذا جان عدكم لان لازم مخلصين مواد وفقط تجون تراجعونها ف بلشت بتاريخ 4/15 قبل لمتحانات كل لمواد انا سويت جدول لنفسي لان كل شخص وحسب الي يكدرله ف بلشت علميات بعدين حفظيات وخليت شي اسمه ساعه ذهبيه هاي لساعه كل يوم جنت اقره بيها لو احياء لرسومات لو انكليزي الانشاء وشي الي ينسي وجنت اقره ادب كل يوم على طوال فتره المراجعه لان ينسي وهم خصصتله من لمراجعه من قريت قواعد بعدين أجلو لمتحانات لبعد العيد ف صار عدي مجال اسوي مراجعه ثانية وركزت على مواد الي جنت احس نفسي احتاج اقراهن اكثر بعدها بلشت لمتحانات بين يوم ويوم جان اصعب متحان عندي العربي ومن ما أجلته كمت ما أجل اي ماده لان اكول ماتسوه بعد الصعب وما أجلته واصلا انا جنت مخليه بالي اطلع من اول دور والحمدلله طلعت منا وخلصت.
مر شهر تقريباا على تصحيح المواد  وبهل شهر لقلق وتوتر وتفكير يدمر بعدين بتاريخ 8/28 علنو نتائج وشفت نتيجة مالتي بجيت لان كلت استحق اكثر بعدين ستغفرت ربي وحمدته وشكرته وفرحت بنتيجتي وفتخرت بنفسي ولفخر الاكثر جان لهلي وبوكتها لعصر جتي خالتي وجابتلي كيكه مكتوب مبروك النجاح اية وهم باركولي وصديقه امي جتي وطشت جكليت عليه وهلهلت جانت فرحه متنوصف ابد..
سويت حفله تخرج وحضرن خالاتي واهلي وسويت كله بلون بنفسجي وفستاني جان هديه من امي وجان يوم كلش ممتع وحبيته كلش.
بعدين اجه التقديم.. وقدمنا على الاستماره خليت اكثر شي صيدله واسنان جنت رايده صيدله بس مصارت..
ونتظرت القبولات شهر تقريبا لو شهر ونص وجان اصعب وقت كلش انكس من انتظار نتائج وبتالي من طلعن قبولات طلع قبولي كليه تمريض...
اني مجنت رايده هل اختيار ف من نفتحت استماره التقديم على موازي قدمت وكلولي اكيد تنقبلين صيدله لو اسنان بس..
لمن قدمت كتبت طب اسنان ثم صيدله وعلى اخير شي كلت خل يكتب تحليلات هم جان ابن جيرانه وصديقه امي هو يدرس طب اسنان ف يعرف بهل امور وجان متاكد انقبل..
بتالي من طلعت قبولات نقبلت مختبرات طبيه ب الكليه الطبيه كلت الحمدلله وعسى ان تكرهوا شيئآ وهو خيراً لكم ورضيت بقسمتي وداومت مرحله اولى ونحجت وحاليا اني هسه مرحله ثانيه بعدني مامداومه بلعطله صيفيه ومبقه شي على دوام وكل شي نمر بي لابد يخلص...
ف ياسادسيون ارفعو راس اهلكم وراسكم واقرو وخلو هدف بالكم وطمحوله وخلو من ضعفكم قوه ووصلو لرساله لكل شخص اجتهد الله ماراح يضيع تعبكم يعرف بكل شخص اجتهد وتعب ودمتو سالمين. 🌹

الكاتبة: اية صالح