حبطو لعندها في زوج وهدرو في نفس الوقت
أنس :راكي مليحة ؟
أمير : راكي مليحة ؟
قمرة : راني مليحة (جبدت موس هداك صغير وتيراتو لأنس شدو ) هاك هدا شوف وين يخدموه وشكون
أنس : أوكي دوك نشوف
راح أنس وبقا أمير يشوف فيها حتى جات تتحرك حتى توجعت ودارت يدها على الجرح وشاف الدم
أمير : وشبيك ؟
تقدم ليها يجري وسندها وهي حكات بلعقل
قمرة : أديني للعيادة
كي شافها هكاك رفدها وهي رخفت يديها وحطت رأسها على كتفو ودخلها للعيادة تاعهم سبيسيال
بعد نص ساعة كانت راقدة في بيتها وحوايجها مبدلين بعد ما عاونتها الممرضة ، دقدق الباب ودخل أمير لقاها مزالها راقدة راح قعد فالبيرو حتى تفطن و صح فطنت كي سمعت الحس
أمير : راكي مليحة دوك ؟
قمرة : إيه صحا
أمير: كيفاش صرات ؟ ياك خليتك خارجة
قمرة : كي كنت خارجة شفت باب سري مايبانش مليح بصح كي دققت لقيت بلي كاين مسمار نهبطو يتفتح كي درت هكاك دار حس كبير وسمعوني وكانو هابطين زوج واحد فيهم قاسني بالموس هداك من بعد قتلتهم وهربت على الغابة باش يتشتتوا ومايقدروش يحكموك
أمير : صحا أنا قتلك نولو كيفكيف علاه ما قلتيليش ؟ لوكان كشما صرالك ؟
قمرة : يرحم باباك ما تبداناش ، أنا موالفة نخدم وحدي ونسلك وحدي تسما مكالاه
أمير : دوكا رانا فريق واحد حبيتي ولا كرهتي وملزوم عليك تتحدي معايا كيما ملزوم عليا ، أنا نخليك
ناض وخرج وخلاها قاعدة تشوف وين كان قاعد وتخمم في الهدرة تاعو ، عندو حق لازم تتحد معاه راهم إيكيب ، قعدت تخدم بالتلفون من بعد رقدت بسك عيات
نهار جديد
كان إسلام في البيرو يخدم ويشوف في الملفات حتى دخل أمير
أمير : صباح الخير ولد العم
إسلام: صباح الخير خو
أمير : سمعت بلي كاين إجتماع مع شركة أريس ؟
إسلام : إيه صح
أمير : من وقتاش ولاو يحملونا ؟
إسلام : ماليوم ومدابيك اخطينا مالمشاكل معاهم نعرفك
أمير : خسارة عليك أنا تع مشاكل ؟ (قالها وهو يجياح وضحكو كيفكيف )
إسلام : لبارح فليل شفتك خرجت كشما صرى ؟
أمير: والو خرجت ندور برك تقلقت
إسلام : وقيل توحشت الغربة
أمير: توحشت واش كاين لتم
ضحكوا مرة أخرى وخرج أمير راح للبيرو تاعو
عند قمرة ناضت وكانت تحس روحها مليحة شوية ، دوشت وغطات الجرح باش ما يتقاسش ، بدلت حوايجها وعيطتلها أماني لي كانت في شهر العسل تاعها في اليونان
أماني : صباح الخير كلبة ما تعيطي ما تسقسي ما تقولي عندي صحبتي
قمرة : ماشي راكي شهر العسل يا طفلة لاه نعيطلك ؟
أماني : صار هكا يا الجلبانة
قمرة : نتي جلبانة ، إيه كيفاه الحالة عندكم ؟ كاش بحر ؟ كاش حب ؟
أماني : وي باينة كاين كلش ، خص غير نتي
قمرة: نجي ماشي خسارة فيك
أماني : واش واقيل أمنتي غير ريحي وين راكي
قمرة : صار هكا ياكلبة اصبري كي تولي شوفي معامن ديري ميموار
أماني : ديريه معايا بلا جدك ، واش كنت رح نسقسيك لحكاية تاعك كيفاه صرالها ؟
قمرة: خليك منها
أماني : قمرةةة احكي
قمرة : تكشفت ، كشفتها جداك
أماني : كيفاه هادي ؟ شكون قاللها ؟؟
قمرة : ما علاباليش (حكاتلها واش صرى نهار العرس كي راحت ) هاو واش صرى انا لتم خرجت ورحت لدار ماني لقاني فراس وقعد معايا ودوكا راني عندي خالو تيم
أماني : ما تزعفيش مازال نزيدو نديرولها قوالب كيفكيف ولا غير هي دير
قالت هكاك باش تضحكها من بعد هدرت شوية مع عصام وضحكو
خرجت من بيتها رايحة لبيرو تع خالها
تيم : ادخلي قمرة
قمرة : صباح الخير ، كيفاه عرفت بلي أنا ؟
تيم : نعرفك نتي ، بسك علابالي جاية تقوليلي علاه لبارح جيتي روطار وكيفاه تبليسيتي
قلبت قمرة عينيها وقعدت مقابلاتو
قمرة : ما تراطي والو ياك ؟
تيم : والو ، ازرع ينبت واش درتي
قمرة : كلش جاز مليح برك كي جيت خارجة درت شوية حس وسمعوني هدا مكان
تيم : هدا مكان ؟ وجرح تع خصرك ؟
قمرة: واحد ملي قتلتهم تيرا عليا بموس برك ماصرالي والو جرح خفيف
تيم : تمسخري بيا تيرا عليك بموس خسرتي دم تقوليلي جرح خفيف ؟ راكي مليحة في مخك نتي ولا واش ؟ اسمعي ماشي كي خليتك تدخلي معايا تخدمي معنتها ديري واش تحبي ، حياتك مش مسؤولة عليها وحدك كاين باباك ويماك وكاين أنا خمي فيها مليح ، ودوكا راكي معفية
ناض خرج وخبط الباب وهي غمضت عينيها ، تيم هكا كل ما تصرى حاجة ليها يخاف ويتقلق
ناضت راحت لبيتها داتها كابتها رافدتها بسيف تلاقات أمير شافها رافدتها وباينة عيانة راح رفدها عليها
أمير : وين بيها ؟
قمرة : واش دخلك ؟
أمير : قلت نوصلك هدا مكان معلوم راكي مريضة
قمرة : شوف روح إلعب بعيد مرانيش فارغتلك شغل
وصلت لطونوبيلتها حطلها كابة فلامال وراح وقف قدامها
أمير : كشما يخصك عيطيلي برك (غمزلها وراح 😉 )
ركبت هي بلعقل كانت عيانة بصح تقدر تسوق ماشي لهاديك الدرجة ، راحت ديراكت لدار جدتها ماشي حابة تروح لدارهم يقلقوها جيرانهم بزاف يقرعجو علابيها كي ما يكونوش دارهم تبقى لتم
دخلت للدار حطت كابتها في البيت وراحت للصالون قعدت
قمرة : جعت ، كيفاش ندير دوكا ؟ نكموندي ماكلة خيرر
كموندات ماكلة عبارة عن شخشوخة مع صوص بيضاء ولحم كانت متشهيتها وماتعرفش ديرها . لحقت الماكلة وخلصت ودخلت وجدت الطابلة تع صالون مقابلة تلفزيون وحطت كلش وشعلت تشوف مسلسلها وتاكل حتى صونا تلفونها أبال فيديو من عند فراس
فراس : واش زيني صافا ؟
قمرة : لاباس الحمد الله ونتا ؟
فراس : الحمد الله، راكي تاكلي شخشوخة بصحتك
قمرة :يسلمك لوكان راك هنا خير ، كيفاه الخدمة لي رحت وخليتني علاجالها ؟
فراس : مليحة راهي على شعرة ، راح نطول بصح واحد سمانة هكاك ونولي
قمرة : اممم مليح الله يعاونك اتهلا فروحك
فراس : الله يسلمك زيني مام نتي راني نعاود نتفقدك وديجا لاه راكي وحدك ؟ لوكان كشما يصرالك ؟ غدوة يسموك في القصر ما نحوسش نفهم
قمرة : علاه تحب تزيد عليها ؟ لي يشوف يقول رح نموت دخت خطرة رجعتها دراما
فراس : يا ونحكمك يا قمرة
قمرة: ما عندك مادير
فراس : ياخي قردة ياخي
قمرة: هيا كثرت على ما وصاوك الزين
فراس : هيا إمالا اتهلاي فروحك زيني ما تخلينيش نتقلق عليك وروحي لعند أمينة
قمرة : خلاص استسلم والله استسلم
فراس ضحك : مليح هيا باي
قمرة : باي
هلووو 👀👀
أنت تقرأ
قمر الإنتقام
Randomالقصة باللهجة الجزائرية 🇩🇿 القصة من تأليفي وهي قصة خيالية لاتمد للواقع بصلة ، كل الأفكار من عندي . لا أقبل بأي شكل من الأشكال أخذ أي جملة ونسبها لنفسك أو عملك ، أتمنى أن تستمتعوا في قراءتها بالنسبة للشخصيات يمكنكم تخطي فصل الشخصيات وتخيل أي ممثل...
