رواية |غموض جارُنا|
الكاتبة سناريآ
قناة التلي https://t.me/nurse2_4
أذا اعجبك البارت لا تنسى التصويت وترك تعليق جميل
حزيران:من گالت هيج من الصدمة ما گدرت احجي فقدت توازني ورت اوگع بس بسرعة لزمت الباب
انتبهت سمر علي وبسرعة اتقربت مني وگالت بقلق
_شبيج حبيبتي
باوعت لزهراء ردتها تنقذني وهي بسرعة فهمت نظراتي اتقربت سندتني ووجهت كلامها لسمر
_يمكن تعبانة لان ما متريگة ولا متغدية واخذو محاضرات هواي
_ ها مابيج غير العافية حبيبتي ديري بالج على صحتج لان هي اهم من كلشي
هزيتلها راسي وضحكت بگلبي باستهزاء ما تدري بسبب اخوها مشاكلي النفسية وحزني
رادت تساعدني علمود ادخل البيت بس زهراء گالتلها لا حبيبتي هسة اني ادخلها ودعتنا وراحت دخلت بيتها بعد ما حطمت داخلي وكل مشاعري
زهراء سندتني ودخلتني البيت رحت گعدت بالصالة وهي راحت جابتلي مي
گعدت يمي وگالت
_شبيج جان فضحتي نفسج
جاوبتها واني منزلة راسي
_ مو بيدي صارلي احبة اربع سنين وهو ابد ما مهتم يعني شلون تريدين اتصرف وشاسوي الشخص الاحبة راح يزوج غيري ويصير الها گوليلي شلون اتحمل بس فمهيني صعبة والله صعبةةةةة
كملت كلامي وما اتحملت اكثر وطگيتها بالبجي والغصة احسها تشگ صدري مثل السجين
حضنتني زهراء وصارت تواسيني وتحاول تخفف علي مسحت على شعري وگالت بتنهيدة
_نصيحة لا تفكرين بعد بي ولا ادورين اي امل لان هو راح يخطب لا تعذبين نفسج بسبب شخص ما داري بيج والله راح يختارلج الاحسن دائما
رفعت راسي وگتلها بحزن
_ونعم بالله راح احاول
عفتها وصعدت فوگ دخلت لغرفتي وراسا ذبيت نفسي عالجرباية ودفنت وجهي بالمخدة ابجي بقوة ليش ليش ياربي الشخص الاحبة راح يتزوج غيري شنو ذنبي بس لان حبيت لو ادري هيج يصير جان دفنت هذا الحب قبل سنين بس جان عندي امل صغير بس كل هذا اتحطم بهذا اليوم وهاي اللحظة
بقيت كل اليوم بغرفتي ثاني يوم ما رحت عالداوم ويوم الخميس امي گالت نروح نشتري ملابس علمود حفلة الخطوبة اني گتلها ما اروح بس هي گالت لازم تروحين وزهراء گالت امشي عالاقل نغير جو بدال ما حابسة نفسج بالغرفة
