رجال لكن ظرفاء

حكاية علي و بتول(١)

_ينهاري!
=اهدى خلاص حصل خير
_أنا فاشلة!
=اهدي عادي
_متقولش لماما هتكدرني عشان خاطري
=ابتسم :ماشي اهدي بس، و قوليلي الحمام منين؟

طول عمري مجنونة و تصرفاتي غير متوقعة
مع أول مقابلة أوقع العصير عليه!
بس لطيف تقبلها رغم إنه حاسة إنه بيشتمني في سره
بس عادي يعني إيه المشكلة!
دلق العصير خير و بعدين يعني لون الفراولة على قميصه الأبيض قمر و مدياه شكل خطر كدا...
أوف!
ماما مش هتحلني!

_آسفة مرة تانية على الموقف الزفت دا
=حصل خير
_ها نبدأ!

ضحك
و أنا انتبهت على نفسي
أنا فعلا لا أطاق و ماما من حقها تكدرني
أوف!
ابتدى يتكلم
و انا اشاركه الكلام
كان هادي جدا
و كلامه موزون
بس حسيته كدا رغم الابتسامة اللي على وشه إنه عملي اوي
و لا كأني قاعدة مع روبوت
ميكس غريب كدا!
و مشي و بعد فترة اتقابلنا تاني
و نفس الاحساس و نفس الشخصية رغم إنه كل الشواهد بتقول إنه عريس مناسب...

و اتخاطبنا و لأنه شخص دوغري و عيلته كمان اقترحوا الخطوبة تتحول لكتب كتاب عشان يكون حلال اكتر في التعامل و احنا وافقنا...

رغم إنه كان آه كويس
و أحيانا لطيف
بس...
عصبي جدا و مجنون
و...
دايما بحس حاجة غريبة
نفس شعور إنه بيتعامل بروبيتة
و كأنه واجب و السلام!

و مع ذلك كان بيتسرب لقلبي بطريقة غريبة!

و خصوصاً لما ماقدرتش اتحمل عصبيته في يوم:
_بقولك إيه أنت طالق!
=إيه!
_مهو انت لا تطاق ياخي!
لقيته ضحك بعدم تصديق:
=والله مجنونة!
_احترم نفسك!
=حاضر
_و متزعقليش تاني!
=حاضر
_و تبطل رخامة
=حاضر
_و تجيبلي بونبوني و وشكليت كتير تصالحني
=حاضر
_أنت بتاخدني على قد عقلي!
اتنهد و بصلي بهدوء:
=اهدى ممكن! أنا عارف إني زودتها شوية حقك عليا و اللي انتِ عايزاه أنا هعمله عشان ترضي

و حقك عليا دي قالها بلطافة تخطف القلب الماكر دا

و كان يكفي قلبي المهزأ إنه بيعترف بغلطه رغم إنه عصبي جدا و مبيفكرش وقت الغضب و بيطيح بس جميل سبحان الله!
صحيح مراية الحب عامية
و القلب مهزأ اقسم بالله
بس يظل الاحساس المريب جوايا موجود ومع ذلك مكنتش بهتم أوي

لحد مافيوم قافشته و انا رايحة أزور مامته العيانة و هو واقف على السلم و بيتكلم في التليفون مع حد و من غير ماياخد باله اني موجودة :

_عادي يعني جوازة و السلام القلب خلاص قفل و اللي عايزها مش موجودة يبقى خلاص بقا أي واحدة تنفع تكون زوجة و خلاص...
يتبع...
#رجال_لكن_ظرفاء(حكاية علي و بتول)
#غادة_عادل