كل الامان في حُبك وكل الاماني قربك

B 28

نزلوا البنات كامل كشختهم و جمالهم ،، ابتسمت ام طارق وقالت : بسم الله ماشاء الله ، كاملات و الكامل الله
ابتسموا البنات بحب وقالت نجد : حياتي والله
-
عند العيال بـ المجلس جالسين بـ آمان الله يسولفون و يضحكون مع بعض تكى سالم على الوساده الي وراه و تنهد وهو يحس بكتمه ف صدره ، زفر وهمس لـ وليد : وليد امشي شوي برا معاي
ابتسم وليد وقال : ابشر ، مشينا
طلعوا و جلس سالم على الجلسه اخذ شهيق و زفر بهدوء : اهخ ي وليد قسم بالله انكتمت
تنهد وليد وحط يده على كتفه : شنسوي مالك الا الصبر يخوك إذا البنت م تبيك تجي غيرها صدقني م بتوقف عليها الدنيا زي م راحت الجوهره و جت نجد بتروح و يجي غيرها لا تستعجل نفداك
سالم : وليد قسم بالله مانيب قاوي !! والله ان قلبي يوجعني ليه كل ذا يصير معاي ؟
ابتسم وليد وحط يده فوق يد سالم وقال : خيره ويكفينا شرها وشر ما بعده ، خلك إيجابي يولد
م حسوا الا بـ صوت البنات وهم طالعين للـحوش
زفر سالم بقرف و صد وهو يستغفر ، وليد : شبلاك لا تهتم ياخي سوو نفسك م تشوفها !
نطت اميره عندهم وقالت : ليه منتم داخل ؟
وليد بصوت مسموع : ولد اخونناا ي اميره ضايق(ن) صدرره يبي يشم الهوا
زفرت نجد وهي تحس ب تأنيب الضمير : بنات ندخل ؟
سُميه : وي تونا طلعنا اهجدي بس
اتجهوا البنات لـ الجلسه الخلفيه و جلسوا هناك
انفال ابتسمت بـ استفزاز : تصدقين والله ان بنات عمار وحده منهم لـ سلوم يزينهم كلهم ماشاء الله
سُميه ضحكت وقالت : نيلوو
بيان شهقت وقالت : لا مستحيل ! سالم و نيلان مره م يجي احس مع ريفاان
عضت شفايفها بغيره وقالت : مين هُما ريفان و نيلان ؟
اميره : بنات عمارر نفداهم ، بنات من جماعتنا
نجد : ليه هوا يحُب احد فيهم ؟
بيان : لا وين بس قد شافهم صدفه مرتين يمكن
نجد : بينهم شيء من قبِل ؟
سُميه : علامتس تسألين مو انتي ل طارق خلاص ؟
شهقت نجد وقالت : طارق بعينِك ي مجنونه !!!!
ضحكت ريهام وهي داخله : السالفه فيها بنات عمار و طارق و مدري منهو شعندكم بدونيي
ضحكوا البنات و جلسوا يسولفون ..
-
و بـ الصاله عند ام سلطان و البنات متجمعين
خلف : اسمعوا الحين الرجال يبي يخطب اميره وانتم الله يهداكم ناويين تطولون هنا وش نقول له ؟
ام فهد : طيب م عليه هو يجي ؟!
ضحك وقال : و الشركه !!
ام سلطان : الشركه م عليها شر اخوياك الباقي هناك مو معقوله كلكم جايين !!
حك شعره و قال : ايه زين بشوفه إذا رجعت
ام سلطان : طيب ناد اميره علمها
خلف : وينهي؟
ام خلف : وينهي بعد شف ف الحوش ولا المجلس
طلع و اتجه للـحوش و لقى البنات جالسين قال بصوته الثقيل : احم
قطبت بيان حواجبها وقالت : عسى ما شر ؟
خلف : ابد قولي ل اموّر تجي لي الصاله ابيها
بيان : زين
رجعت بيان للجلسه و قالت ل اميره ان خلف يبيها
دخلت اميره و ابتسمت بـ توتر وقالت : خلوف شتبي؟
ام سلطان : قربي يمه اجلسي
جلست اميره و قالت : عسى ما شر؟
خلف : اسمعي ي الاميره بقولتس شي انا هالحين و ركزي معاي زين !! ، اميره : يمه شصار؟ احد فيه شي؟
خلف : لا لا غيث غيث
فتحت عيونها بخوف وقالت : فيه شي؟؟
خلف : ورعه اسمعي انتي لا تقاطعين
اميره : اخخخلصص
خلف : بيجي يتقدم لتس
اميره بصدمه : متى !!
خلف : م ادري متى بس خليتس جاهزه فـ اي وقت ، الرجال شاريتس و يبيتس ولا يبي غيرتس
ابتسمت وقالت : ان شاء الله خير
خلف : هالحين خلي هالموضوع بينا لين يصير خير
اميره : ابشر
طلعت اميره مو مستوعبه انها صدق بتنخطب للشخص الي حبته من اول م شافته !! طلعت للجلسه عندهم ، بيان : عسى ما شر ؟؟
اميره : ابد م صار شي
ريهام : تستهبلين الابتسامه شاقه وجهتس و تقولين م فيه شي ،
ضحكت أديم وقالت : كذابه م تبغى تقول لكم هيا اصلاََ
اميره : وجعاه و ليه اتسذذبب
ريهام : علمينا علمينا
ضحكت ب غرور وقالت : خليفان قال لي م أعلم احد
بيان : اما
اميره : اييه
بيان : شوره معاي بعدين
ضحكت ريهام وقالت : عليتس فييه !
اميره : اعلمكم بس لا تعلمون احد !!!
أديم : يلا يلا
اميره : غيثث
قاطعتها ريهام وقالت : شفيييه
اميره : بسم الله اصبري ، الرجال يبي يعجل الخطبه يمكن يجي هنا ويخطبني
شهقت بيان وقالت : اماانه
اميره : ايه والله
ضحكت ريهام وقالت : الله يكتب لس الخير
اميره : اميين اميين
-
اخر الليل عنـد بيان بـ غرفتها
دخل عليها خلف و لقاها تصيح وقف مصدوم وقال : افا ي ذا العلم بياني تصيح !! علامتس
بيان بصوت متذبذب : امسك ولدك تعبت منه
فتح عيونه و ضحك : اوف ذا كله عشان سيف !!!
بيان : اييه امسكه ابي اناام
ابتسم يبي يستفزها وقال : اجل بنزل للعيال اقعدي معاه انتي ، جلست على الكرسي وقالت بصوت عالي : خللففف !! تطلع والله ازعل منك
ضحك و قرب جلس جمبها و تركها فحضنه : ليه ليه ذا كله هو واحد تحمليه بعدين تراس حامل نسيتي ولا وشو م يحتاج ذا الصياح ي دهر قلبي ان تعبتي دقي علي اجيس ، تنهدت وقالت : وانا شدراني إذا أنت فاضي ولا مشغول ؟ زفر وقال : لو وراي مليون شغله دقي
قرب سيف من بيان و عبس بـ ملامحه وهو يشوف امه تصيح قرب وقال : ما..ماا
ضحك خلف وقال : حرام عليتس حتى هو حس عليتس
ابتسمت و أخذته عندها : هاه يعيون ماما
خلف : بعد صياح تقوله يعيون ماما عطيني عطيني وليدي ، ضحكت وهي تمسح وجهها و اخذ خلف سيف لعنده و انسدح على الكرسي : وش تسوين لحين ؟
بيان : البنات يبوني انزل لهم وانا مدري انزل او لا
خلف : ايوا ايوا و رجلّتس ماله وجود وشو
ضحكت وقالت : الا م عليك له وجود بس شسوي
ضحك وقال : اجل روحي لهم لا رجعت للديره لا تقولين اشتقت لك وانتي طول يومتس معاهم
قعدت وقالت : ليه انت متى رايح ؟؟
تنهد وقال : بكره المساء ان شاء الله ، و يمكن نجي انا و غيث الرجال يبي يخطب اميره
بيان : ياخي شسوي بجدتي تبينا نقعد وانا الود ودي ارجع ، و اذا رجعت وش اسوي لحالي
خلف : عندس البنات ف الديره بنات عمار و زوجة محمد و زوجة ذياب كلهم هناك
حكت شعرها تفكر : تهقى خالتي بتوافق ؟
خلف : اسمعي انا بكره راجع و اذا جينا انا و غيث بأذن الله نشوف الوضع كيف
بيان : خلاص تم
قربت تبي تاخذ سيف وقالت بصوت خفيف : عطني ياه بنومه من الصبح قايم
انسدحت على السرير و سيف جمبها ضحكت تسولف وقالت : ايه وش مسوي ف البيت بدوني
خلف : ابد والله من الدوام للبيت و نطلع نتمشى شوي و ينعاد الجدول ، انتي وش تسوين هنيا عاجبس الجو ولا
بيان : يجي منه ، خلف : تطلعون ولا ؟
ضحكت وقالت : حدنا البقاله أقرب شي
قطب حاجبه وقال : البقاله بعد و مع منهو ان شاء الله
بيان : يوه خليّف مو وقتك صدق ترا هنا مو بعيده
خلف : يويلتس اسمع انس طالعه البقاله اخر الليل !!
بيان : ترا البنات معاي شفيك
خلف : واذا هم معاتس خلهم يولون انتي شعليتس فيهم خلهم يطلعون انتي لا تطلعين معاهم اخر الليل و م معاكم احد بعد وش مقصرين فيه العيال ، ان بغيتي شي علمي سعود
زفرت وقالت : طيب طيب نم نم بس
ضحك وقال : وش فيتس م عجبتس الكلام ؟
شمقت له بمزح وقالت : إذا تغار لذيك الدرجه لا تسأل
ضحك وقال : وش اسوي عندي ذا الزين كله م تبيني اغار عليه !
ضحكت وقالت : ياخي احبك
ابتسم وقال : عيديها عيديها
ضحكت وقالت : احبك احبكك
قرب يبي يوضح مشاعره لها و حُبه الكبير الي بداخله باسها على ثغرها وقال :
أحب حبتس حتى لو به مضره
محلى المضره دامها تجيب شرواتس
ابتسمت وقالت : صح لسانك يـ شاعر قلبّي !!
ابتسم وقال : صح بدنس يعيون شاعرتس
-
و عنـد ريهام الفهد بـ غرفتهم
دخلت للغرفه بعد سهره طويله مع البنات تحت لقت فهد قاعد بـ الغرفه منسدح يفرفر ع جواله ، ابتسمت وقالت : انا جييت
فز فهد وقال : والله الي مرححبا ينوم عيني
ابتسمت وقالت : حبيبي والله
قربت و جلست جمبه وقالت : هاه شقاعد تسوي
فهد : ابد والله ، بتنامين ؟
جلست بتعب وقالت : اي والله مره تعبانه
ابتسم وقال : زين بدلي و تعالي
قامت بدلت ملابسها و غسلت وجهها و لبست لبس نوم و لمت شعرها لفوق ، قربت انسدحت جمبه و ابتسمت تقول : غريبه منت عند العيال !
ابتسم يلف عليها وهو حاير فـ جمالها : ابد العيال قاعدين ع البلاستيشن و الخلف طلع لـ حرمته قلت انتظر حبيبتي لين تخلص السهره !
ضحكت وقالت : عسى م طولت ان شاء الله
ابتسم وقال : ابد فداس الوقت والله لو تطولين
ابتسمت بـحُب وقالت : يحبيبي انت
-
اليوم الثاني تـحديداََ فـ الديره عند ديم و محمد ب غرفتهم ، فز على ضوء الشمس الي دخل عينه و لقى ديم باقي نايمه ابتسم يبوسها على خدها : ديمي
فزت بهدوء وهي تهمهم : همم
محمد : يلا يلا قومي
فتحت عينها اليمين بعدها مو مستوعبه شي : هاه شفيك ؟ ، محمد : قومي قومي نبي نطلع
غطت على وجهها وقالت : حمود تكفى والله نعسانه
ضحك وقال : دييمووه يالله عاد
عبست بملامح وجهها وقالت : مقدر والله م نمت شي خلنا نطلع بعد أذان العصر
انسدح وقال : عشاني طيب بتلحقين ع النوم
قربت لـ حضنه وقالت : شوي شوي بس والله بنطلع والله ، ابتسم يلعب بـ شعرها القصير الي يجذبه وقال : زين شوي يلا نامي بصحيتس بعد شوي
ضحكت بمزح وقالت : طيب خلني بحضنك
ضحك يشد عليها وقال : ابشري
-
بـ بيت الجده بشرى تحديداََ
متجمعين بـ الحوش
خلف : اميروه خلتس جاهزه ف اي يوم و وقت بقولتس جايين انا و غيث  طيب !!
اميره : ان شاء الله
ام فهد : يالله سلوم اجهز الدور جايك
شهق ب الشاي وقال : يمه بسم الله باقي باقي
أديم : اشبك بسم الله م قالت شي أُمك
بيان : فيه احد فبالتس ؟
ام فهد : اييه كثيريين
ريهام : شفري لنا منن
ضحك فهد وقال : عز الله راح فيها السويلم
قطبت ام فهد حاجبها وقالت : وجع وليه راح فيها
فهد : ابد يمه كملي كملي م عليتس
أديم ضحكت وقالت : ايوا ي خاله م قُلتي لنا مين هُما؟
صدت ام فهد و قامت تدخل للصاله
سالم : يويل حالي بس
ضحك خلف وقال : م عليك دامها من خالتي اكيد كامله و الكامل الله و ..
ناظرته بيان بطرف عين وقالت : ايه كمل ؟
ضحك سالم وقال : غارت غارت هههههههههههههههههههههههههههههههههههههههههههههههههههههههههههههه
ابتسم وقال : تغار ليه و هي داريه عيني م تشوف غيرها
ضحكت وقالت : يحظي بس
أديم : ايوا بدينا ؟
سالم : وشو بدينا اهجدي ترا زوجها
أديم : للأسف ادري
بيان : الله يعينتس ع نفستس بس
ريهام : أديم وارا م تتزوجين و تفكينا من شرتس؟
ضحكت وقالت : باقي م لقيت الي فبالي
طاح سعود يضحك وهو خارج لهم وقال : الله يعينه بس
أديم : سعود م يضحك ترا ! مجانين انتوا ولا ايش !!!
فهد : والله مهب منكم من الي يجي عندكم
دخلت عليهم نجد وقالت : السلام
ردوا كلهم بصوت واحد : عليكم السلام و الرحمه
دقايق و نطق سعود وقال : ايه متى راجعين انتم ؟
فهد : بعد شوي
سالم : خذوني معكم
قطب خلف حاجبه وقال : يوم جيت قلت رجعوني شصار الحين وش مغير رايك
سالم : لا تسأل بتاخذني ولا !!
خلف : ابد ابشر بس شف إذا هم موافقين
-
فـ الشركه تحديداََ ، ف مكتب النادر متجمعين عنده
احمد : ليه هدوء شبلاكم وش تفكرون فيه
ذياب : منتظرين غيوث يعلمنا شصار
دخل عليهم مسعود وقال : سلامننن عليكم
ردوا بصوت واحد : عليكم السلام
مسعود : خليف راجع هاليوم تدرون؟
مُلهم : الله يستر بس
مسعود : ان شاء الله كل خير
ذياب : تهقون البنت تبيه
ضحك احمد وقال : ليه وش حنا عشان ندري
نادر : يوه تكفون اسكتوا بس ان شاء الله يخطبها و تتيسر أمورهم ، بعدين م ظنتي ترفضه غيث ذيك الفترة كلها عندهم يروح و يجي معقوله م شافته
مسعود : والله مدري شدخل بس صح كلامك
طاحوا يضحكون وقال احمد : انت م ادري ربك وين حاطك بس
مسعود : الله يعين بس
-
و فـ الديره عند محمد و ديم ، نام بدون م يحس بنفسه و م صحى الا على صوت ضحكاتها : حموديي
ابتسم وهو يشوفها تضحك وقال : يـ عيونه
ضحكت وقالت : حنا مو عساس طالعين والله ي انت راحت علينا نومه م بعدها نومه ، ضحك وقال : كله منس تبين تنامين و نمت وراتس ، ابتسمت وهي تعدل شعرها وقالت : م عندك دوام ؟
محمد : لا ماخذ اجازه
ديم : طيب نفطر و نطلع ولا ؟
محمد : لا يعيوني بنفطر برا
ديم : تمام
دخلت للحمام ( يُكرم القارئ ) تاخذ لها شور سريع ، طلعت و اخذت لها بنطلون واسع لونه بنفسجي فاتح مع توب ابيض و فوقه جكيت كذلك لونه بنفسجي فاتح و سوت بشعرها ذيل حصان ، نزلت للصاله تاخذ لها قهوه ،
نزل عليها محمد مسرع وقال : هاه مشينا ؟
ديم : طيب ثواني بتحجب وجايه
محمد : طيب
'
ركبوا للسياره ، محمد : وش خاطرس فيه ؟
ديم : والله مدري
ضحك وقال : وشلون مدري
ضحكت معاه وقالت : نبي نتمشى عادي
محمد : بعدين تعالي وش ذا الجمال
ابتسمت وقالت : ماخذته منك والله
ابتسم يحط يده على يدها : ي بعد عينه ، انشهد ان الله عطاني جمالاََ احسدني عليه
غطت وجهها بخجل وقالت : حمود بس استحي استحي
ضحك وقال : يلبى الي يستحي
ابتسمت وهي تشد على يده : احبك احبك
ارتعش قلبه وهو يسمعها منها و ابتسم يبوسها على يدها : اههواتس يـ روحه
-
يُتبع
-
( ارحبوا ي شيّوخ قلبي شحالكم عساكم بخير وصحة وسلامة ، معليش والله اختفيت فتره بس الدراسه و غيره البارتات ذي الفتره قصيره ان شاء الله بحاول اطولها و هذا الي قدرت عليه لنا لقاء آخر شدوا دعمكم ي حلويني عشان نكمل مع بعض 💗. )