"أثر الهناء حلم يا حمد"

البارت الثاني والعشرين

افترقوا حمد وعذبه بداعي النوم ولكن محد منهم نام ليلتها والأبتسامة لازمتهم للفجر بس يا سرع ما تلاشت لما سمعو صوت ابو متعب وهو ينادي للصلاة ويصحي البيت كله وطلع للحوش يطق باب فايز يناديه الصلاة واتجه للمسجد، جميع من في البيت صحو بحب زايد عن العادة صحو بنشاط وحيويه وفرحة والسبب "متعب الليلة عريس" كانت اجواء زواج متعب مختلفه عن زواج فلاح ، كلهم ببيت واحد وتجهيزاتهم وحده وقومتهم وقعدتهم مع بعض والعروس منهم وفيهم فكانت فرحة متعب غيييييييير غير ، صحو وكأنه صباح عيد ! الكل مبسوط ومروق والجو مغيم وقاعده ترش برا التوتر كان مختفي في البيت من كثر السعادة والراحة
الجده منيره قامت تهلل وتكبر وتتجه لكرسيها تصلي وزينه انطلقت للمطبخ تجهز القهوه بكل حبببب ونشااااط ( بكرها عريس!) يحق لها ، والهنوف طارت على باب البيت الداخلي وشرعته لأخره وفتحت درايش البيت كامل وانتشرت ريحة المطر في البيت مع قهوة زينه اما ساره بعد ماصلت وخلصت راحت تغسل ثياب اخوانها الشتويه وبشوتهم وتجهز كل مستلزماتهم وضروري العصر يكون كل شيء جاهز وساره ما بتفضى حزتها فبدأت من بدري وهنا زاد على ريحة المطر والقهوة ، ريحة الصابون المنعش ومزون وبدور نزلو يساعدون خالتهم زينه بالفطور ودلال راحت تعجن كمية بسيطة من الحناء عشان تعيد على اصابع امها وحصه كانت مع بناتها في بيتهم يجهزون اخر اغراض هيا ويضبطون امورها كامله ويطلعونها لغرفتها اللي بزاوية الحوش أما شنطة السفر فحطوها عند باب البيت وهذا أكثر منظر حزّن البنات كلهم وأدركو جدية اللحظة ...
الهنوف من طاقة المطبخ وهي تكلم مزون:احس ودي اصيح صدق! شوفي
مزون رفعت انظارها للحوش وشافت شنطة هيا:اسكتتتي ساكته تراي ماسكه نفسي من الليل افففففف
دلال ناظرتهم بابتسامه:ياحظكم يومنكم كثير وتصيحون على بعض من محبة وغلا تدرون بعرسي ما كان عندي الا زينه وامي! الوحشه كانت كبيره على صدري وهالحين هيا عندها ستة خوات وامها وعمتها وام زوجها وجدتها كلٍ يبي يصيح عليها ويدعي لها
الهنوف مسحت عيونها بطرف قميصها الروز:شهالسوالف ياعميمه! صارت الدنيا تمطر برا وداخل -طلعت من المطبخ تفرش في المشب للفطور وتشب-
بدور:بعمري ماشفت الهنوف تصيح
مزون:ومحد بيصيح اليوم والليله خاصه نبي نستانسسسسس يلا قومي معي ساعديني انتي
بعد صلاة الفجر رجعو الرجال البيت لكن سعود كعادته ومرحه سبقهم وهو ماسك طرف ثوبه بيد ويد متعب بيد ويدخله للبيت لين وصله لجدته وهو يرقص مثل الحريم ويغني: ويا معععررسنننااا تهنننيييتتت وخذيييت اللي تمنننيييت
الجده منيره طلعت من المشب للحوش وتحت النخله(عشان المطر) وقفت غصب عنها وهي تعيد ورا سعود وتصفق شوي زينه طلعت من المطبخ للحوش وهي تدخل بالجو وتصفق معهم ودلال طلعت وهي تلفح بشعرها قدام امها وتحت الرش وتعيد ورا سعود وتضحك والبنات كانو يناظرون سعود من داخل البيت ويناظرون خجل متعب المتصنع "يقلد العروس"
الجده منيره: يا جعل فوالته ولدد
متعب بصوت جهوري: امينن امييين الله يجيب سيف
دلال وسعود: والثاني والثالث بعدد
زينه وهي تصفق:والرابع بالمجلس قعد
متعب رفع يدينه:بس بس بس وقفو انتم تبون كرت العايله كله صبيان؟ ابي لي بينه عيدو الاغنيه وحطو الرابع بنت يلا وارقص لكم
زينه:ههههههههههههههههههههههههههههههههه انت تبي تصير ابو على هالسوالف! الله يخلف
سعود وهو يغير نبرته:ابشر يا وليدي ابدعي لك بالذريه الصالحه مير انت اعرس وروح
دلال ضربت كتف سعود:انا مدري شلون تعرف سوالفنا يا هالملسون!!
سعود غمز:اعرررف اعررررف
الجده منيره بعبره واضحه بصوتها:الله يوفقك يا شبيه ابوك وبعد تسبدي انا
دخل ابو متعب وباقي العيال وهم مبتسمين: كأنكم صحتو بدري!
زينه دخلت داخل عشان فايز وعياله
دلال:الله يوفقك يا متعب ومبروك يا اخوي مبروك والله وكبرتو يا اخواني! الاسبوع اللي راح فليح وهالحين متعب!
ابو متعب:والجاي سوير بحول الله وقوته
تلاشت ابتسامة ساره وهي داخل وتسمع ابوها وراحت تساعد امها والهنوف بالفطور تبي تشغل نفسها وماتتنكد بهاليوم بالذااااات
متعب باس راس جدته : حفينا بدعواتس الطاهره يا جده وادعي لنا بالتوفيق هذي تكفيني وتسعدني اي والله
فايز بثقل ولا كأنه زواج بنته أو كأنه مغصوب: الله يبارك للمعاريس ، مافيه فطور؟
ابو متعب: فيه فطور وفيه خير وفيه بركة وانت يا ابوك دامها رشت وامطرت الدنيا بيوم عرسك فهذا فال زين بإذن الله وبشارة خير، الله يوفقك ويبني بيتك ويجعلها زواجة العمر تقاربو للفطور باقي ورانا الخيمه والتجهيزات
حمد طق صدره: يبشر بي اخو حمد وشيخ الطايل كل ابوهم الله يسعدك يا ابو سيف
متعب ابتسم بحب لأسم ولده المستقبلي:ابيض وجه يا حمد عساني ما ابكيك
سعود وركان باسو راس متعب: ازهلنا يا متعب يبي يصير لك عرس مابعد صار بالديرة كلها
(كلماتهم البسيطة هذي كانت تسوى الدنيا ومافيها عند سيف ، شاف نتيجة تربيته شاف الحب والاحترام اللي رباهم عليه والتعاون والأُلفه ،و ما كان منه إلا نزول دمعتين سريعه محد انتبه لها )
باقي العيال كملو على نهج اخوان متعب وقامو يباركون ويدعون بس فز هزاع وقال
هزاع:ادري انه بدري مير شفت ابوي ساكت وطارق قلت انا اوصيك الله الله بهيا يا متعب اعرفك ابو بطين لاتخليها تطبخ لك اربعه وعشرين ساعه! حنا بعد نبيها تأكلنا عاد انت لاتاخذ كل شيء
الكل: ههههههههههههههههههههههههههههههههههههههههههههههههههههههههههههههههههه
عمر:سكتو الحمار ذا لعد تخلونه يهرج .. العذر والسموحة يا خالي
ابو متعب:اليوم كل شيء مسموح لكم
فارس:حتى السمره برا؟
ابو متعب سكت شوي
الجده منيره:سو اللي تبون انتم في وجهي
العيال ارتفعت اصواتهم بالتصفير والتصفيق والضحك والتعزيز لقوة الجده منيره
متعب: ايا الخونه ! بتسمرون يوم اعرست!!
فارس:الخلا بس محد قالك تعرس
نادت زينه ركان ياخذ الحليب والفناجيل واستمرو بالسوالف وهم يفطرون والبنات حضرو فطورهم عند باب المطبخ والباب مفتوح والرش يوصلهم على خفيف وهيا بينهم وعذبه وجازي وحصه جو من بيتهم وافطرو معهم
عذبه وهي مبتسمه:هاه ياعروس علامتس ساكته؟ كل ذا توتر؟
مزون:الظاهر انسدت نفسها يوم جاء الصدق
زينه:وليش تنسد!!! بالعكس ياحلو العرس سكينه واستقرار
هيا وهي تناظر السفره:لا والله منيب يمكم انا افكر ابدأ بالبيض ولا القرص والسمن؟
حصه مسكت راسها:يافشلتي منتس يا زينه يافشلتي
زينه ضحكت من قلبها:ياحلوتس ياهههيا ياحلوتس والله
البنات:ههههههههههههههههههههههههههههههههههههههههههههههههههههههههههههههههههه
الهنوف:اييييييه هذي بنت عمي اللي اعرفها مهب راعية الصياح ما خلتنا نذوق النوم
دلال: اعوذ بالله اي صياح؟
هيا:يارب يارب ما اتهاوش مع متعب قدام الهنوف ولا تشهد لنا لحظة يااارب ، وش هالحلق عندتس؟ تمشين وتنشرين انتي!!!!
الهنوف رفعت كتوفها: والله عاد انتبهي مني انتي
عذبه: اسكتي بس، هيا تكفين شلون نمتي بعدها!!!! هذا اللي عجزنا نفسره
دلال: هو ! قولو لنا السالفه
مزون قالت السالفه كاملة وماتو الامهات من الضحك على هيا وحالاتها الغريبه ، حتى في ضيقتها وتوترها تضحك
زينه: والله المحظوظ من عرفتس يا هيا الحمدلله انتس من نصيب متعب وهو والله حليّل ويستاهل شراوتس وانتي تستاهلينه الله يوفقكم يارب ويعدي هالعرس على خير وستر وسعاده يارب العالمين
الكل أمّن بحب وسعادة وهم يناظرون هيا وهي تاكل ومستحيه
هيا: خلاص عاد نزلو عيونكم! ابفطر انا وراي عرس ودنيا خلوني اشبع لا ادوخ بالزفه!!
عذبه:ههههههههههههههههههههههههههههههههههههههههه لو عرسي والله ما اسوي سواتس!
ساره:اذكروا الله عاد وخلصو فطوركم ورانا حلا العرس والفطاير والقهوه وباقي نبي ندور مكان العوده وبخور الاعراس من غرفة جده مدري وين توزيها
دلال:هذي بسيطه خلوها علي
الهنوف:يازينتس يا عميمه والله انتس نعمه من الله.. مير عليتس سوالف! اهخ
دلال ضحكت وهي تعرف الهنوف ماتحب الدراما: وياحلو اخواني وبناتهمممم العسولات ، يلا يلا خلصو
ساره خلصت فطورها وطلعت فوق في المقلط لمّت فُرش وطراحات العيال ورا الباب وسفطت البطانيات ولمت الغسيل كله وفتحت دريشة المقلط وناظرت الديرة والمطر يطق والعيال ينصبون الخيمه بنششششاط وفرحه فرحه فرحه كبييييره ، ابتسمت لهم وقامت تكنس المقلط ثم لمت ثياب اخوانها وجمعتها حولها وتربعت ، شبكت المكوى في الجدار وبدأت تبت قطعة قماش الكوي وتحط الثياب فوقها وتكوي ثوب ثوب ثم تعلقها على الباب وبعدها بدأت بالبشووت ثم بالاشمغه وجهزت الطواقي وكل اغراض اخوانها وهي تغني في المقلط وتجهز مر تركي متجهة للمخيم يساعد العيال وسمع الصوت اللي يميزه زييييين ورافع راسه للطاقه ثم نزل راسه وكمل طريقة والحسرة تاكل قلبه أكل ما بيده شيء وحيل الله اقوى، قابله منصور وهو متجه للخيمه:تركي؟
تركي ناظر منصور
منصور:مريت بيتهم؟ياتركي دربٍ مايعز ممشاك اقصر خطاويك عنه! لعد تمر بيتهم ولاتناظرهم ولا تاخذ اخبارهم! انت علامك
تركي:ماتفهم اللي في جوف صدري يا منصور أنت وين وبلاوي الحب وين! قلبك خالي يا منصور
منصور ناظر تركي بتعجب:الله يصلح حالك ياخوي، الليله عرس متعب خوينا وفرحه لاتكدر خاطرك
تركي تنهد:هذاني احاول.. مشينا نعاون العيال (وصل تركي للخيمه وبدأ يسترجع ذكريات عرس فلاح ووشلون كان يساعدهم عشان يكبر في عيونهم وياخذ ساره وتذكر يوم لمحها وتذكر كل شيء ، حاول يطلع من الجو اللي هو فيه قدر الأمكان وعساه يقدر بس)
اما الهنوف وعذبه دخلو المطبخ وبدو يسوون حلا الكاسات بكمية كبيرة ويجهزون فناجيل الزواج في طوفرية كبيره ومزون معاهم وبدور كانت مع امها تلم العطور الفخمه والعود والبخور وتجهزها مع المباخر وجازي كانت تغسل مواعين الفطور وترتب المطبخ وتشطب بعد عذبه والهنوف
سعود وهو يطق الباب برجله:افتححححوووووو
طلعت الهنوف وقميصها يهفهف من براد المطر ويدينها مليانه بقايا بسكوت وشوكلاته:هااااه ياسعووود هااااه !!! حتى بالعرس تكرفني!
سعود دخل ويدينه مليانه اكياس كبار :طريييق يا ولللد طررريق
نزلت ساره بعد ماخلصت الثياب وشافت سعود:سعود؟ وش انت جايب!!!
سعود نزلها ورفع راسه يمسح وجهه: قضيت لبان الدكان كله لعيون متعب
الهنوف:هذاااا ككككلللهههه لهههييياااا ومتتتعععببببب !!! اهههب واحنا؟؟؟
سعود:يا بقرره يا بقره انا ابيكم تفرحون البزارين عاد سوير سوي حركات بركات ومدري شلون شتسمونها؟؟؟
ساره بابتسامه:توزيعات؟
سعود:اااييي هذا هو سووويه خليهم يعرفون عيال الطايل مايبخلون بالفرحة على الكبير والصغير والله الله بالشغل السنع ما اوصيتس يا سوير
الهنوف شاتت ساق سعود:كل تراب بس تراي موجوده ! ولا والله لا اعلم ابوي هاه !
سعود حك ساقه : اقول سوير عطيها من هاللي شاريه ان شاء الله تسكت
ساره: ههههههههههههههههههههههههههههههههههههههه ياحبكم للمناقر!! يلاا مافيه وقت وانت ارجع عاون حمد تلقاه محتاس
زينه تقدمت للصاله بعد ما طلع سعود مسرع وهو يبوس راس امه ويطلع:وش جايب هالمهبول؟ طار رزقه بهالعلوك!
ساره:من فرحته بمتعب يبي يفرح البزارين
زينه ناظرت الاكياس بحنيه:الله يجمع قلوبكم ولايفرقكم ياربيييي
الهنوف وساره:امين يمه
ساره: عذذذذبه
عذبه جاتها من المطبخ وهي تزين الحلا:وراتس تصارخين؟
ساره تربعت وهي تقص قطعة قماش روز عندها واخذت شرايط من الدرج اللي تحت التلفزيون:تعالي عاونيني سعود جايب توزيعات
ركان دخل: ياااولد !
ساره فزت:سم رويكن شعندك؟
ركان نزل كيس اصفر شفاف كبير:سوير طلبتس يا عين اخوتس
ساره ناظرت الكيس وضحكت:عطيتك وتم وازهل
ركان:وش مدريتس وش ابي؟
ساره عطته مجال يناظر الصاله:تو سعود مسوي سواتك ، هذي فرحتكم بمتعب اجل ان جاء سيف ان شاء الله وش بتسوون؟
ركان قام ينقز:ابطيييييييير يا ساره بطير بجيب له لكزس
ساره ضحكت من قلب:هههههههههههههههههههههههههههههههههههههههه لكزس!!! الحق الحق اخوانك وعاونهم ، لحد يخلي حمد لحاله!!! (كان خوف ساره الأكبر أنه يطيح بهوشه مع رايد من جديد)
ركان اشر على خشمه:ابششششري ابشري ، ما اوصيتس! تكفين الهنوف لاتدري بها
الهنوف من المطبخ وهي ماسكه باقي الكاسات بدل عذبه:سمعتك يا الخسييس والله لو منيب مشغوله لا اجيك
ركان:الخلا الخلا تراتس بنيه(يستفز الهنوف قبل يطلع)
الهنوف صارخت:رررررككككككاااااااااانننننننن
طلع ركان وهو يضحك ويركض تحت المطر منطلق للخيمه
ساره رجعت تتربع ونادت الجازي بعد ماخلصت المواعين:تعالي عاونينا ، العروس وين يا بنات؟ يااااا ههههههيييييياااااااا
هيا وهي تناظر اللبسه اللي جابتها لمتعب من الشرقيه وقام يطقطق عليها اول ما وصلوا وتبتسم ما توقعت متعب بيلبسها وهو زوجها وبهالسرعه ! وشوي وصلها صوت ساره: انا مدري شلون بعيش رومانسيتي بهالبيت!!! ههههههاااععععههههههه
ساره سدّت اذانها: ابوتس والحنجره!!!!
عذبه دمعت من الضحك:هههههههههههههههههههههههههههههههههههههههههههه اذا هذا العرس ببيت عمي سيف انا ابيييييههه
ساره:يابنت الحلال انتي تبينه باللي هو به خلي عنتس بس (وقفت عند الدرج وناظرت فوق) هيا!!!! انتي شلون تبين تروحين على اخوي وهذا صوتس؟ نعميه نعمممممييه
هيا نزلت:انا والله اني كنت في بطن النعومه والرومانسيه مير قطعتي علي وعساه شيء مهم!
ساره:انزلي انزلي سوي توزيعات عرستس نبي نلفهن بهالقماش ونوزعهن على البزارين اخلصي ! مافيه وقت
الجازي: ساره! تو الساعه ثمانيه الصبح!
ساره: ويعني؟ مافيه وقتتتت!!!
هيا ضحكت وتربعت جنب عذبه:هاتو لي مقص انا بقص مربعات وساره تعبي وعذبه وجازي يربطون يلااا
(في المشب كانت العمه دلال تحني الجده منيره وصوتها يصدح بالبيت كله وهي تجر القصايد في متعب وهيا وشوي تدعي تدعي لهم وشوي تميل راسها وتنطرب مع الجو اللي يهيضها ودقايق وجيزه ودخلت أم جابر وأم منصور كل خويات الجده منيره واتجهو للمشب على طول يشاركون خويتهم فرحتها العظيمه في حفيدها ولد سيف الطايل)
ام سيف:والله اللي مرحبا ومسهلا بخويات تسبدي وعيني
أم جابر: مرحبٍ باقي وعساها فرحة ما تغيب عن محياتس يا ام سيف
دلال ابتسمت وهي تناظر اصابع امها:امين
أم منصور: عاد والله ما جرنا لتس الا قصيدتس وفرحتس تقل يوم العيد ! وهذا حن عندتس نشاركتس
الجده منيره ابتسمت وهي تناظرهم: عساني اردها لكم بالافراح واشارككم كل ما تودون ، اي بالله يوم عييد يا ام منصور ووناستي مهب بتنحكى مير اقول
في مساءٍ لجل عينه يرفل بثـوبٍ جديـد
و اشرق مثل السعاده لا ضوت قلب الهموم
او مثل فجرٍ صباحه للخلايق يـوم عيـد
اشهد ان اليوم يسوا من غلاته الف يـوم
اشهههههههد بالله ! يا كبر غلاة متعب بصدري،هالحين هيا ومتعب حلال ملال لبعضهم؟ تخبرين يا ام جابرهاك النهار يومنهم هالطول واقول ابلحق بعرس احفادي هيا ومتعب وعذبه حمد والباقين؟
ام جابر وهي مبتسمه: اي بالله اخبر كانه البارحه، عقبال حمد وعذبه وعيال دليل يا كريم
ام منصور:صح الله لسانتس يامنيره والله يوفقهم ويوفق بناتنا يارب
دلال:امين ، وانا بينكم مغير أأمن؟ تقهوو تقهوو يالله حيهم

-في الديرة المجاوره واللي تعتبر كأنها حارة ثانيه-
شريفه سكرت باب البيت ودخلت لرايد المنسدح عشان بطنه وصقر اللي يصلح راديو امه: ياحليله هالصغيرون،، تعرفون الطايل؟جيراننا ذولاك اللي بالديـ...
رايد اعتدل بألم: يعقبون!!!! لاهم بجيران ولا اخوان لنا حتى !!!
شريفه:اعوذ بالله منك ؟ وش مسوين لك الضعوف؟ اخذ مسكنك يمه!
صقر وهو لازالت عيونه على الراديو:اسكت يا ولد علامهم يمه؟
شريفه:تو سيف الطايل مرسل مرسول وعازم اهل الديرتين بعرس ولده متعب عاد هههااااه! ..دبرو غداكم وعشاكم انا معزومه ههههههههه-وقفت وفكت شعرها تناظره-شلون ازين عمري عقب هالعمر؟ مبطيه من العروس مير خلوني اقوم ادور لي لبس من مات ابوكم ما طلعت ولا شريت لي شيء ان شاء الله القى شيء زين بس الله يوسع صدير هالسيف بالعافيه كأن عزيمته بوقتها ! تدرون؟ بطلع لكم فساتين وانتم قولو لي وش يلوق علي
رايد وقف بعصبيه يبي يعترض على روحة امه ووقف صقر قباله على طول ومسك ذراعه وهو يتحلف فيه بهمس:والله ماتنطق بحرف ينكد صدرها ! تفهم؟(التفت لأمه) حنا نحتريتس هنيا بالصاله يمه هاتي ثيابتس نختار معتس وان ما جاز لتس شيء اشتري لتس من اطلق محل بنجد كلها زين انه عزم من الصبح يمدينا نعاونتس
شريفه ناظرت صقر وعيونها مغورقه: ياحنية قليبك يا صقر! عسى ربي يكبر حظك ويوفقك مع هالمطر والصبح ويرزقك ببنت الحلال اللي تحوفك حوف مثل ما انت شايل اميمتك وخاطرها قل امين وانت يمه بعد
رايد ناظر امه بعصبيه وسكت وصقر ابتسم لأمه اللي راحت تجمع افضل فساتينها عشان تعرضها لعيالها ويختارون لها واحد تواجه به (الطايل) وهو رجع يصلح الراديو اللي أفكاره بهالحظه بذات لو يدخلها بالراديو اللي ما يسكت! بينفجر ! شلون امه تحضر عرس عايله قاتل ابوه وزوجها ؟ ووشلون امه تحضر عرس نسابته مستقبلاً ؟ كيف يصارحها ؟ كيف يبد أ؟ الود وده يكنسل الشغلة كلها لكن حرقة قلب رايد ومنظره وهو منسدح من الطعنه يزيده تشويش ولخبطة وعزيمه على الانتقام
انتهى💗