"ترياق_قلبي"

البارت العاشر

المتصل:..........
علاء: ازاي ده حصل وانتو كنتو فين والامن فين ازاي تسيبو الدنيا كده انتو مستهترين ومش مسؤلين بالمره انا غلطان اني اعتمدت عليكم ف حاجه ه.. ه... ه
نوران بخضه: علاء علاء قوم في اي ياعلاء ياربي
احمد: انا هشيله انزله ونروح المستشفى بسرعه اوعي
نوران بخوف: طيب بسرعه بالله عليك
مرام بحزن: انا مش فاهمه اي اللي بيحصلنا الفتره دي والله اخلص يااحمد بسرعه
ــــــــــــــــــــــــــــــــــــــــــــــــــ
في منزل هناء:
هناء بتوتر: النتيجة المفروض ظهرت بس الواي فاي فصل وانا خايفه اكون شايله ولا ساقطه ولا زفت الامتحانات كانت وحشه اوي بجد وانا خايفه بالله يامصطفي انزل اشحن الواي فاي خليني اشوف انا هببت اي
مصطفى بهدوء: اهدي ياحبيبتي انتي عملتي اللي عليكي واللي يكتبه ربنا خير اهدي بس عشان متتعبيش وانا هروح اشحن الواي فاي ومش هتاخر عليكي واهدي عشان ماما متقلقش وانا مش هتاخر
بعد مرور ربع ساعه عاد مصطفى للمنزل ورأي اخته ناظرة لشاشة الموبايل في صدمة وتبكي بكاء شديد وحينما رأته حضنته بشده وظلت تبكي وهي في حضنه وتتمتم بكلماات غير مفهومه وهو يبدو عليه عدم الفهم لسبب بكاءها
مصطفى بعدم فهم: طيب اهدي طيب بس وقوليلي بتعيطي لي
هناء بصوت مخنوق: منجحتش يامصطفي هعيد
مصطفى بشفقه على حال اخته: ياحبيبتي لعله خير الخير دايما بيكون في الابتلاءات والامور بتختلط علينا عشان مش فاهمين الحكمه من اللي بيحصل بس ربنا مرتب امورنا وعالم بالأصلح والخير لينا حتى لو يبان انه شر وانه عذاب وانه حاجة مؤذيه بس صدقيني ربنا رحيم ومبيأذيش عباده بأي شكل من الأشكال ودايما اقداره بيكون فيها خير مستخبي بنعرفه ف وقته حتى لو يبان انه اسوء حاجه ممكن تحصل فاهدي ووحدي الله وارضي باللي ربنا كتبه ومتيأسيش كملي وهتعدي والله بس متقعيش دلوقتي دا خلاص الرحله بتنتهي فاضل سنتين بس
هناء بحزن وبكاء: الحمدلله على كل شيء اكيد خير بس هقول اي لماما وبابا يامصطفي هيزعلو اوي ومعرفش هتكون اي ردة فعلهم انا مكنتش حابه يحصل كده لكن قدر الله وماشاء فعل بس اقولهم اي
مصطفى بحنان: متقوليش حاجه ياقلب اخوكي انا هكلمهم واقول لماما وهي تبقا تعرف بابا بقا وانتي اهدي وقومي صلي واحمدي ربنا
هناء بدموع: انا بحبك اوي ياديشا
مصطفى: وانا كمان بحبك بس هتفضلي مكلبشه ف امي زي مااكون حرامي وقفشتيه! مش ناويه تسيبيني اخرج
هناء وهي تمسح دموعها: سيبتك اهو خلاص انا رايحه اتوضي
مصطفى: ماشي ياحبيبتي تقبل الله لو احتاجتي حاجه انا موجود
ذهب الي غرفة أمه ليخبرها لكنها كانت في نوم عميق فلم يفضل ايقاظها وتركها نائمه وذهب للقاء صديقه المقرب والذي يدعى ياسين

مصطفى: يااااه يااخي واخيرا نزلت دانت كنت عامل بيات شتوي ومبتطلعش من بيتكم ياجدع عاش من شافك
ياسين بضحك: يعني اسم الله عليك انت اللي خروجك مقطع بعضه
مصطفى: ياعم انا فاضي اصلا اما هروح اخرج دا كويس اني عرفت اقابلك اساسا
ياسين بتنهيدة: الله يعينك ياصاحبي
مصطفى: احكيلي بقا مالك اي مدايقك ومن غير ماتحور ولا تلف وتدور عشان انا عارف ان في حاجه مدايقاك فخليك دايريكت وقول في اي
ياسين بابتسامه حزينه: والله ياصاحبي الدنيا مقفله من كل جوانبها مش عارف في اي كل ماقول هتتعدل تسوء وكل ماتسوء واقول هتفرج تسوء اكتر لحد ماخلاص جبت اخري ومش قادر اكمل حاسس بضعف ويأس وخيبة امل وقد اي انا قليل حيله مش عارف بتتعقد من كل الجوانب ليه
مصطفى بهدوء: طيب ماتيجي نفكر بالعقل كده ربنا جل وعلا خلق سبع سموات من غير عمد وخلق فضاء وكواكب ونجوم وملائكه وجنه ونار ومخلوقات لحددلوقتياحنا لاشوفناها ولا نعرف عنها حاجه وهيعجز عن انه ييسر امورك؟ حاشا لله طبعا دا ارحم الراحمين والكريم والمجيب هو الذي لا يعجزه شيء في السماء ولا في الارض ربنا ليه حكمته احنا عقلنا محدود ميستوعبش امور الغيب ولا يعلمها ولا يدركها اصلا احنا بنبص لكل حاجه بمنظور خاطيء مع اننا عارفين ان كل حاجه كده كده مكتوبه ومع ذلك شايلين هم اللي جاي كله بس والله ياياسين مافي طريق خير بيتسد في وشك اما تسعي وتلاقي الدنيا بتتعقد تتعقد جامد فالطريق ده مش بتاعك ومش ليك ومفيش فيه خير ليك اصلا ومع ذلك ممكن يبقا متهيألك انه الخير كله وانه لو كملت الطريق ده الدنيا هتظبط وتحلو مع ان الواقع غير كده تماما
حاول تانى احنا في دنيا فطبيعي نقع مرة واتنين وعشره ونقوم بعدها عادي الحياه كلها حفر الحفره لو مطلعتش منها لوحدك محدش هيطلعك ولا حد هيدور عليك كل واحد بيسعي ويحاول لنفسه مش هيروح يسعي لغيره ويساعده فحاول تاني ومابين كل الطرق ال اتقفلت ف وشك هتلاقي طريق مناسب ربنا كاتبلك فيه الخير وتقدر تمشيه وتكمله للاخر وهتعرف وقتها حكمة ربنا اي ف إنه يقفل كل الطرق اللي فاتت دي
في مقوله بحبها اوي بتهون عليا اي حاجه احس انها واخده حيز كبير من تفكيري وقلبي وبقيت شاحب بسببها
ياسين بارتياح وابتسامه: اي هي
مصطفى: مش حقووولك
ياسين بضحك: اقسم بالله فصيل اخلص
مصطفى: لو محلفتنيش بس
احم خلاص هقولك، الجمله هي "هون عليك فهي لازالت *دنيا* ولك أن تستوعب مدى دنو الكلمه"
متديهاش اكبر من حجمها كمل واسعي ومتقفش خبط في الدنيا وسيب الدنيا تخبط فيك واهو يوم تغلبها وعشره تغلبك وادينا مكملين سيبها لله ياصاحبي وكمل ووالله هتتحل من عنده بس انت سلمله امرك وتوكل عليه ومتيأسش
ياسين بحب: حاضر، تعرف
مصطفى: لا معرفش
ياسين: مانا عارف، من ساعة مااتخرجنا وكل واحد فينا انشغل في حياته وحواراتها وبطلنا نتقابل كتير او بطلنا نتقابل اصلا بس اليوم اللي بقابلك فيه بتزيح فيه هموم سنين والله مش متخيل الحياة من غيرك كانت هتمشي ازاي ربنا احيانا بيبعت رحمته علي هيئة اشخاص تهون علينا الدنيا وانا اقتنعت بكدا من ساعة ماعرفتك كل مره نتقابل بتكون نفس الغلاوة والمحبه ويمكن اكتر وعمرها ماقلت حتى لو توهنا ف رحلتنا عن بعض
وقت مابنرجع بنكمل
بعاد بس قلوبنا مترابطه ودا اللي بيخلي المشوار والرحله الطف، من غيرك ياصحبي الدنيا هتكون وحشة اوي
مصطفى: مش عارف اي كلام الناس الحكيمه اللي مش لايقلك ده بس الحياة اهون طول مافيها ونيس في الرحله ربنا يديمك يارجوله ويجعلنا مع بعض لاخر العمر
ياسين بضحك: مش قولتلك فصيل مش عارف تسيبني اخد دور الحكيم تلات دقايق في الدنيا لي مستكتره عليا لي يااخي
مصطفى: يعم خده انا بقولك الحقيقه بس
ياسين: طحن خواطر ياجدع قوم يالا روح بيتكم انا راجل حيوان اني قولتلك نتقابل اصلا..
ـــــــــــــــــــــــــــــــــــــــــــــــــــــــــــــــ
في المستشفى:
نوران بلهفه: خير يادكتور طمني في اي مالو واي سبب اللي حصل
الطبيب: هو اتعرض لصدمه او حصل حاجه اثرت على نفسيته بشكل سلبي؟
نوران: والدته توفت من يومين وانهارده جاله مكالمه واتعصب جامد ومعرفش يكمل كلام ووقع في الارض معرفش في اي
الطبيب: طيب هو اتعرض لصدمه شديدة جدا اثرت على حالته النفسيه والجسديه بالشكل ده
نوران: طيب هو كويس ولا في اي
الطبيب: مش هقدر اقولك حاجه دلوقتي غير اما يفوق الاول وبعد كده هقولك حالته الصحيه بالظبط
مرام ببكاء وحزن: يارب يارب انت العالم بعبادك الطف بينا وارحمنا احنا مش قد كل اللي بيحصل ده والله احنا قلوبنا مش مستحمله حاجه تاني بجد
عادل بحزن:الحمدلله دائما وابدا، اه صح بالمناسبه المكالمه اللي جاتله كان خبر من الشركه حصل حريق بس الحمدلله لحقوه قبل ماتكون الخساير كبيرة النار ملحقتش تبهدل الدنيا هم جابو المطافي وبلغونا بعد مالدنيا هديت انا يومين بإذن الله وهنزل الشركه استلم شغلها واشوف هعمل اي في الملفات اللي اتحرقت والدنيا واصله لفين هناك لحد ماعلاء يكون بخير ونطمن عليه
نوران: لا حول ولاقوة الابالله العلي العظيم اللهم اني استغفرك واتوب اليك... يارب يارب انت العالم بقلوبنا وحالنا صبرنا يارب على اللي بيحصل ده
تأخر الوقت ولم يُسمح لاحدهم بالبقاء في المستشفى فذهب الجميع لمنازلهم وظلت نوران تدعو الله ان يتولاهم وان لا يبكيها حزنا على زوجها وان يرد له عافيته في القريب العاجل وبعدها نامت لتستيقظ مبكرا حتى تذهب وتطمئن عليه..

مرت الليلة بمرارتها وحل الصباح وذهبت نوران هي وعادل إلى المستشفى لكن لم تكن اخبار الطبيب جيدة أبدًا..

يتبع....