_مشهد رومانسي؟
تعجب علي فأشارت داليدا ضاحكة نحو حائط آخر ظهرت عليه جمل: وبص دة كمان
فقرأ علي ولا زال يتعجب: مشهد رومانسي من ارتجالنا بينتهي إني ألبسك الدبلة بعد ما تقبلي الزواج؟!
ضحكت داليدا بقوة بينما ابتسم علي منزعجًا يردف: يعني لو كنت أنا وهشام دخلنا الاوضة دي كان هينطلب مننا طلب زي دة!
فوضعت داليدا يدها على فمها تكتم ضحكاتها ليسخر هو آخذًا الدبلة من على الأرض: هو الواحد كان بيتقدم ازاي اللهم صل ع النبي؟
"الباب مش هيفتح إلا لما حد فيكم يقتل التاني"
صعقتهم تلك العبارة وتقدم هشام يجثو على ركبتيه يتفحص السلاح ليراه عامرًا بالذخيرة فابتسم ساخرًا وقالت ليلة متوجسة: لو ضربت نار ع الباب مينكسرش؟
فنهض هشام ينفي مردفًا: الأبواب المصفحة اللي زي دي.. لو انضرب عليها من غير ما ناخد ساتر.. ممكن الطلق يرد فينا.. وزي مانت شايفة كدة الستار ربنا مفيش أي حاجة في الغرفة نتحامى فيها أصلا
نظرت ليلة أرضًا ولمح هشام أنبوبة مدرجة معلقة على قفل الباب.. سمع صوت ليلة تقرأ جملة رأتها على الجدران: عشان تكمل الطريق لازم تملاه دم الأول
استنكرت ليلة: أنا مش فاهمة حاجة من كلام المخبول دة
فتنهد هشام يقول: بس أنا فاهم.. ليلة أنا آسف
لم تعلم علاما يعتذر إلا حين التفتت له فوجدته يرفع صوبها السلاح في يده!
سخرت داليدا من طلب علي ضاحكة: أنت عايز تتجوزني يا دكتور؟
فضحك هو بسخرية مماثلة: أمر الله يا فندم.. ايدك ألبسك الدبلة خلينا نخلص
فطلبت متدللة: طب سيبني أفكر شوية
ليضحك هو: يا داليدا والله ما قادر أقف.. انجزي زمان هشام وليلة بيصوروا تاريخي فيلم جنبنا
_أنت هتقتلني؟!
سألت بخوف بان في اهتزاز عينيها فقال هو ساخرًا: وليه لأ مش عشان نخرج من هنا؟
نظرت له بصدمة شديدة وكأنها خُدعت فيه فأنزل هو سلاحه يضحك: أكيد مش هعمل كدة.. أنا ظابط مش سفاح
رمقت ضحكاته بضيق بينما قال هشام بخصوص ما قرأته على الحائط: عشان تكمل الطريق لازم تملاه دم الأول
الضمير في يملاه مش عائد ع الطريق دة عائد على الأنبوب دة.. هباب البرك عايز واحد فينا يقتل التاني عن طريق أنه يسببله جرح عميق ويعبي من دمه خمسين مللي في الأنبوبة دي عشان الباب يتزفت يفتح!
قال جملته الأخيرة بضيق جلي فقالت ليلة بيأس: اعمل اللي تعمله مابقتش فارقة.. أنا كدة كدة هبقى عبء عليكم في الفريق يعني عدم وجودي أفضل
فقال هو بسخرية: والله؟..ومين قالك المعلومة المريعة دي
لترد مهمومة: من غير ما حد يقول.. أنا ماليش مكان برة.. وطالما جوة صعب كدة فخلاص هنمسك في الدنيا ليه
أنت تقرأ
الفشلة ينجحون (مكتملة♡•)
Pertualanganضابط غير كفؤ خياطة تتحامى أجسام العارضات دكتور البهائم روائية بئر السلم أسماء تعريفية وجدوا أنهم سُموا بها ليتيقنوا أن الشيء الوحيد المشترك بينهم هو الفشل!
