انصدم الجميع من سماع صوت الصراخ والضجيج فبدؤا بالصعود لأعلي وكان هلال في المقدمة،وعندما دخلوا غرفة أمجد كانت الفوضي تملأها والاشياء مبعثرة في كل مكان وأمجد يقف في إحدي زوايا الغرفة منغلق علي نفسه ويكرر نفس الكلمات(صوت عالي..عالي)ووجدوا وائل يقف بجانبه يحاول تهدأته ويمسك بيده المجروحة فتقدم هلال نحو أخيه بلهفة وخوف شديد واتجه كمال وريهام نحو ولدهم.
اقترب هلال من أخاه قائلا/وائل..ايه اللي حصل،ايدك مالها.
أخفي وائل يده خلف ظهره وهو يقول/مفيش حاجة روح شوف أمجد.
هلال/هاشوفه بس وريني ايدك.
اتجه كمال جهة وائل هو أيضا قائلا/ايه اللي حصل في ايدك ياوائل.
وائل/مفيش..أمجد بعد ماجاتله النوبة بدأ يكسر في كل حاجة ورمي الكوباية عليا بالغلط وجات في ايدي.
هلال/طب وريني ايدك بسرعة ممكن الجرح خطير..وريني ايدك.
وائل/مش خطير ولا حاجة..ده جرح بسيط.
هلال/طب وريني علشان أتأكد.
وائل/لأ أنت ماينفعش تشوفها.
هلال(بغضب)/بلاش عناد ياوائل ووريني ايدك.
وائل/أنت لو شوفتها هايغمي عليك.
كمال/أخوك معاك حق ياهلال أنت لو شفت الدم هايغمي عليك روح أنت أنا هشوفها وأساعده.
هلال/بس ياعمي...
كمال/هلال اسمع مني وماتخفش أنا هاأساعد وائل....تعالا ياوائل معايا.
ذهب وائل مع عمه وهو يقول لأخيه/اوعي تيجي ورايا.
وبعد خروج وائل وكمال اقترب هلال من أمجد وريهام ثم قال/هو هيفضل عالحالة دي كتير.
ريهام/شوية كده وهايهدأ..اطمن.
هلال/هو ازاي حصل كده.
ريهام/ممكن سمع صوت عالي .
هز هلال رأسه مؤيدا،وفي هذه اللحظة دخلت نوران عليهم قائلة/هو ايه اللي حصل.
ريهام/أخوكي دخل في نوبة ورمي كوباية علي وائل ووالدك خده علشان يعالجه.
نوران/شوفتهم وهما طالعين.
ظل هلال يفكر في أخيه للحظات والتوتر واضح علي وجهه ثم التفت إلي أمجد وظل ينظر إليه في صمت.
🕳🕳🕳🕳🕳🕳🕳🕳🕳🕳🕳🕳🕳🕳🕳🕳
ومع مرور الوقت كان هلال وريهام ونوران يجلسون ينتظرون قدوم وائل وكمال من المستشفي،كان هلال يجلس في توتر وقدميه تهتز ويديه ترجف،وبعد لحظات وصل كل من كمال ووائل فقام كل من ريهام وهلال الذي اتجه مسرعا نحو أخيه قائلا/ايه الاخبار.
كمال/الحمد لله جات سليمة أربع غرز بس.
هلال/أربع غرز؟!
كمال/الحمد لله انها جات لحد كده.
أنت تقرأ
لِما افترقنا؟!
Tiểu Thuyết Chungكُتب لهم الفراق رغماً عنهم،ليذهب كل منهم في طريق غير طريق الأخر،علي أمل أن يلتقوا مرة أخري،ليتجمعوا ثانية ويصبحون معاً،ويبحثون علي من ضاعت منهم وتركتهم يعيشون في ألم الفراق والفقد لسنوات. ثلاثة إخوة افترقوا نتيجة لطلاق أبويهما... منهم من عاش يقول نع...
