كان اسمه حبيبى

الثامن عشر

(18)

كل شئ يمر بحياتها سريعا حتى انها لم  تعد تستوعب ، والان قد   تحدد موعد زفافها بعد ثلاثة ايام.،، لرجل لا تعرفه ولا تعلم عنه شئ ،  شعرت بضيق فى صدرها فاخذت نفسا عميقا زفرته على مهل ، وقررت مهاتفة  صديقتها بسمة لتدلو لها بمكنونات صدرها

هتفت بسمة بصدمة
_بتقولى ايه ياروان معقول هتتجوزى اخو سيف .طب ازاى ده حصل  ؟
تنهدت روان بضيق
وبدات تروى  لها ماحدث من سيف ونيرمين
لم تصدق بسمة ماسمعته
_معقول نيرمين تعمل كده ؟ ، دى اكيد اتجننت ،وكل ده علشان الزفت اللى اسمه سيف
هتفت روان بالم
_.ارجوكى يابسمة متجبليش سيرتها هى والكلب ده .انا بكرههم بكرههم بجد
لاتدرى اتواسيها ام تواسى نفسها فهى الاخرى وقعت ضحيه لتعنت الاهل وعادتهم  البالية التى تجبرها على الزواج من شخص لا ترغبه
_ياعينى على حظى انا وانتى ، صح المثل اللى قال اتلم المتعوس على خايب الرجا
روان بتساؤل
_ليه وانتى مالك انتى كمان ؟
انفجرت بسمه فى الحديث
_انا لازم افسخ الخطوبة دى ياروان ، انا خلاص مش قادرة استحمل،  ده انسان بخيل مش بخيل فلوس بس لا بخيل فى مشاعره كمان
صدقينى انا حاولت ااقرب منه زى ماوعدتك،  لكن هو مدنيش فرصة وشكله مغصوب على الجواز هو كمان
تخيلى انى كل مابخرج معاه  فى مكان اول ما يشوف الجرسون جاى ياخد الحساب يعمل نفسه مشغول بالتليفون ويطلع يتكلم برا لغاية مااحاسب.انا ، ولسه امبارح خلانى ادفعله حق بنزين العربية بحجة انه معاهوش فلوس وهما مبياخدوش فيزا ثم تابعت بتهكم
ولا يوم ماجه زارنا جاب 4 قطع جاتوه بالعدد
ليا انا واختى وبابا وماما واول ماقعد قالى ماتقومى ياعروسة تحطلينا حتتين جاتوه من اللى انا جايبه
انفجرت روان  بالضحك رغما عنها
_.يااا ده نتن اوى
غمغمت بحزن
_انتى بتضحكى ياروان ب،نضحكى على المصيبة اللى انا واقعة فيها
_طب ما تحكى لوالدك الكلام ده
ضحكت بتهكم
_قلتله ياختى اتريق عليا وقالى انتى بتتوهمى  ، ده سيد الرجالة ومتجبيش سيرة فسخ الخطوبة دى على لسانك تانى ،احنا بناتنا مابتخرجش برا العيلة  ولا عايزة جدك يزعل مننا ، دى عادات فى عيلتنا من سابع جد يابنتى
تنهدت روان بحرارة 
._ ربنا يحلها من عنده  ، صلى انتى بس وادعي كتير ان ربنا يبعد عننا اى شر ويوفقنا لما يحب ويرضى  وانا كمان هدعى
رفعت بسمة يديها  لاعلى
_ياارب ثم تابعت
_.هكلمك يوم الفرح فيديو اباركلك واشوفك وانتى بفستان الفرح ، .الف مبروك يا رورو ربنا يخلف ظنك ويطلع احمد ده ابن حلال وغير الزفت اخوه  ده خالص
اغلقت روان معاها الخط وهى تامن على كلامها
طرقت والدتها عليها الغرفة
_انتى لسه صاحية ياروان ؟
مسحت دموعها سريعا
_ايوة ياماما مش جايلى نوم
ربتت نعمة على شعرها
._طب قومى ياحبيبتى اتوضى وصلى ركعتين قضاء حاجة وسيبيها على ربنا هو يختارلك اللى فيه الخير
أهذه علامة لها  فهى بالفعل كانت تنتوى ذلك 
نهضت وتوضت وصلت واخذت تدعى بخشوع
وشعرت بالفعل بعدها بالراحة والطمانينة
_________________
كان قد فاض به الكيل من افعاله ليصيح فيها بغضب
_ابنك الحيلة فين ياهانم، بقاله اكتر من اسبوعين مختفى من ساعة عملته المنيلة
تطلعت عليه بلا مبالاة وهى تطلى اظافرها بطلاء الاظافر
_مانا قلتلك ياعصام انه فى رحلة مع اصحابه
ضحك بتهكم
_اه طبعا رايح يتفسح بعد ماخربها ولا على باله .
البيه ابنك ياهانم مزور فى حسابات المحل ولاهف اكتر من خمسين الف جنيه  ، لسه المحاسب قافل معايا ومعرفنى ، وكله من دلعك فيه
تاففت ببرود
_وماله يعنى مارحوش لحد غريب .امال يعنى عايز صحابه هما اللى يصرفوا عليه ،ترضاها  لابنك ؟
_على اساس انى حرمه ،ده انا بديله مرتب مايحلمش بيه وكيل وزارة رغم انه مابيعتبش المحل اصلا الا لو محتاج فلوس