جاكيت اصفر

المقبرة

كنت بقرأ لسه بس لقيت حد جه ورايا و شد مني المذكرات دي بلف عشان اشوف مين اللي سحب من المذكرات لفيت واتخضيت لقيت شاهندا واقفة ورايا .

بس المرة دي كانت شاهندا بتعيط عياط هستيري و اول مرة شاهندا توقف و تتكلم معايا .

شاهندا : انا مش زي ما انتِ فكراني علي فكرة .... انا ضحية ... انا ضحية خيانة وغدر .
انا : بس انتِ قتلتي سلمي .
شاهندا : مين قالك أن سلمي ماتت ؟
انا : ايوه سلمي ماتت واخدنا العزا بتاعها كمان .
شاهندا : سلمي عايشة مش ميتة .
انا : ده ازاي ده امال صابر محبوس في ايه ؟
شاهندا : صابر ده لازم يتحبس .
انا : طب ليه ؟ .... ده معملش حاجة .
شاهندا : هتعرفي قريب ... بقولك ايه ... انا عايزاكي تساعدني في حاجة كده و اول ما تعمليها اوعدك انك هتفهمي كل حاجة والا هتموتي.
انا : ايه ! ... طب ولو مقدرتش اعملها هموت بردو ؟
شاهندا : اه امال انتِ فاكرة ايه ... مش انتِ اللي عماله تلفي و دوري ورايا يبقي خلاص لازم تساعديني والا هيكون ده عقاب ليكي .
انا : طب خلاص ماشي انا موافقة...بس انا هعمل ايه ؟
شاهندا : تروحي تدوري علي اهل واحدة اسمها ولاء وتقولي ليهم انك لقيتي بنتهم .
انا : طب انا اصلا معرفش فين بنتهم .. ده كده انا ممكن اروح فيها .
شاهندا : روحي انتِ بس قوليلهم كده و امشي .
انا : ده علي اساس الناس هتسبني امشي كده عادي .
شاهندا : انتِ شكلك مش عايزة تساعديني ؟
انا : لا طبعا عايزة اساعدك ... بس دي حاجة مش منطقية خالص ... الناس دي اكيد بدور علي بنتهم يعني اكيد مش هيسبوني امشي كده عادي .
شاهندا : قولي كده بس و ميهمكيش حاجة .
انا : طب خلاص ماشي بس اروحلهم امتي ؟
شاهندا : بكرة الصبح لازم تروحلهم .
انا :

بعد ما اتفقنا انا و شاهندا لقيتها مرة واحدة اختفت روحت و طلعت الشقة بتاعتي و كنت عايزة النهار يجي بفارغ الصبر عشان اعرف ايه اللي مستخبي .

صحيت الصبح و بصيت جنبي علي السرير لقيت ورقة مكتوب فيها عنوان و مكتوب فيها انها من ولاء و كمان في كلام لازم اقوله لأهلها روحت قومت بسرعة اجهز و اورح العنوان ده علي طول .

روحت العنوان بسرعة و لقيت البيت فعلا و روحت خبطت علي الباب فتحتلي واحدة من الخدم .

انا : هو ده بيت اهل ولاء ؟
الخدامة : اه .
انا : طب انا عايزاكي تبلغيهم برسالة .
الخدامة : هي ايه الرسالة ؟
انا : انهم يفتحوا مقابر بتاعت صبحي ابراهيم و يشوفوا الجثة اللي ادفنت من 4 سنين ويعملوا تحليل D N A  و يشوفوا النتيجة.
الخدامة : حاضر هبلغهم بالرسالة .

مشيت بسرعة قبل ما تبلغهم الرسالة عشان انا معنديش كلام تاني اقوله لو جم يسألوني لان الكلام اللي انا قولته ده هو اللي موجود في الورقة اللي لقيتها جنبي  علي السرير و طبعا معنديش اي أستفسار تاني .

بعد فترة كانت الحياة طبيعية خالص و مكنش في حد بيظهر خالص و جالي خبر انهم فتحوا المقبرة و طلعوا الجثة وبعد التحاليل اكتشفوا ان الجثة اللي كانت موجودة في المقبرة طلعت جثة ولاء مش جثة شاهندا و اشتغلت التحقيقات عشان يعرفوا ايه اللي حصل .