علاقات مشبوهة

علاقات مشبوهة 2

#علاقات_مشبوهة
#بقلمي  : #مشاعر_مبعثره
الجزء الأول
الفصل الأول  (سعاده لحظيه)
الحلقه (2)
قالت لي دا منو قلت لها ولا زول عاوزه امشي مسكت يدي وقالت لي دا حبيبك صح؟  : يا امي قلت لك ولا زول ما تعمليها قصه  : لو ما وريتيني بكلم ابوك انا ما عندي مانع تحبي واحد غني بس اعملي حسابك السلوك العملتيه دا ما بسمح لك به اوعا تضيعي نفسك  :  الفي بالك دا كله غلط  :  طيب مخليه ضيوفك وطالعه له برا مالك؟ وليه هو ما يدخل جوا ويلاقيك قدام الناس  : لانه مافي شي بيننا اصلا  : تمام اقنعي ابوك  : امي عليك الله ما تكلميه خلاص بحكي لك بعدين في البيت
رجعت معاه جوا وبعد الحفله اتصورنا رجعت هلكانه ونمت طوالي بس امي ما ريحتني مصره الا تعرف صحتني من النوم عشان احكي لها قلت لها ملحت في عربيتو يأمي وبالصدفه ظهر في البث بتاعي قامو الناس ألفو القصص دي  : والجابو الحفله شنو  : هو زاتو اتفاجأ زيي بأنو ظاهر في بث ما كان عارف اني بصور والشي دا ازعجو قام اتواصل معاي  : وعزمتيه للحفله؟  : ياامي الكلام دا حصل امس اعزمو كيف الليله قال عاوز يشوفني ضروري  : وانتي طوالي مشيتي له اها قال لك شنو  : ما قال شي سألني عن الحصل بس وانا اعتزرت له  : سمر ما تكذبي  : دا كل الحصل هو بس عاوز يكذب الشائعات ويوضح سؤ الفهم : لو بقى جادي معاك اوعا تضيعيه من يدك  : انا بقول شنو وانتي في شنو  : هسسس اسمعي كلامي احسن لك  : ما عاوزه اسمع كلامك تاني عاوزه انوم  : اصلك غبيه ذي ابوك  : ما تتكلمي عن ابوي : اوف اتخمدي خلاص بلا ياخدك
خلتني ومشت على علياء قالت لها الولد دا جاي يتقدم لك متين كمان ؟ ما بقدر اغطي عليك اكتر من كدا  : تغطي شنو هو انتي العرفتيني عليه  : المهم جاي متين  : قال بتصل بابوي  : الحمدلله امورك ظبطت خلاص باقي الحيوانه ديك كمان  : انتي عاوزه تتخلصي مننا يعني؟ : عاوزه اطمن عليكم لو تابعتو ابوكم دا بتتمرمطو ومافي اولاد اغنياء بعاينو لكم  : ضروري يعني نتزوج من اغنياء  : ايوا دا شرطي بعد امي مشت منها تلفونا دقا صحاني صوت انينا قلت لها علياء مالك  : مافي شي  : لا في الدموع دي ما ساي  : فوزي اتصل بي  : ومنتظره شنو ردي عليه وريه انو امي هي البتضغط عليك وانتي ما عاوزه اسامه  : ما بقدر امي بتقتلني  : انتي بتخافي منها ليه؟ ما علي كيفا تزوجك للراجل البعجبا هي انتي بتحبي فوزي تخليه عشان ما عندو قروش وتتزوجي صاحبو الغني بتعليمات امي؟ هي حياة ولا لعبه؟ : اسكتي ما يسمعنا ابوي  : ما دي الحقيقه بتخافو منها ليه؟؟ انا لو مكانك ما بتنازل عن حبي ابدا ردي يلا اعملي حاجة صاح
قفلت التلفون ونامت وانا اتغظت منها  امي مصره تمشي حياتنا على كيفا هي عاوزانا نكون في مكان اكبر مننا وطبقه بقينا ما ننتمي لها فوزي حاول يتواصل معاي كتير وعلياء بتقول لي اوعك تتكلمي معاه بس انا لاقيتو ووريتو انو علياء بتحبو بس امي ضاغطاها
دي منو المزه دي كمان  : رأيك شنو  : حلوه بس يأمجد انت مرتبط  : ارتباط شنو كمان ههههه خليها تعرف انا منو وما تعشم ساي بابا جاء ولا لسه؟  : لا انت الحاتستلم البضاعه؟  : طبعا نحن بنخاف كمان؟
علياء قالت لفوزي انها حاتنفصل عنو لو ما جاء طلبا بشكل رسمي وهو طوالي اتصل بأبوي وحدد موعد
البيت كان جايط امي ترفع وتخت عاوزه تبيض وشها قدام الجماعه اما علياء ممثله انها مبسوطه قلت لها بكرا تندمي لانك  انتي البتعيشي معاه ماأمي وما حاتكوني مبسوطه  : عاوزاني اعمل شنو يعني  : اتصلي به واعتزري لسه عندك زمن لو وصلو البيت وابوي وافق تاني ما عندك مفر وخاصة لو علاء الدين اخوي عرف انتي عارفاه متهور كيف
طبعا علاء الدين دا اخونا الكبير شغال في بورتوسودان امي سمعتني بتكلم مع علياء لمت فيني نبذ وشكل قالت لي غيرانه منها عشان لقت راجل غني وعاوزه تحرشيها عليه يا حاقده يلا اطلعي من هنا بعد طلعت قفلت الباب وقالت لها اوعك تسمعي كلام اختك الموهومه الجماعه جايين اتصرفي زي بنات الناس وما تصغرينا قدامهم يلا امسحي دموعك دي وظبطي مكياجك
في مكان تاني اتلاقو فوزي واسامه اسامه قال له خير يازول ماشي معانا ولا شنو  : انا العرفتك على البنت تقوم تمشي تخطبا انت؟  : انتو مافي شي بينكم علياء بنفسا قالت لي كدا هي ما بتحبك  : لا لسه بتحبني امها هي الجابراها عليك  : انت بأي حق بتتكلم عن خطيبتي  : ما تقول خطيبتك علياء حبيبتي انا قعدو يتضاربو وفوزي اتصل بها
عاوز مني شنو انا الليله خطوبتي ما تعمل لي مشاكل  : انا ضربت اسامه وهو اسي في المستشفى  : في المستشفى؟ عملت له شنو اصلو كانت بتتكلم بصوت عالي لمن كلنا مشينا عليها وعاوزه تطلع ابوي قال لها ماشه وين؟  : اسامه في المستشفى  : شنو؟ عمل حادث؟ هي ما ردت الا بعد وصلنا المستشفى حتى فهمنا الحصل وفوزي برضو كان معوق ابوي غضب شديد من علياء صرخ فيها لأول مره قرب يضربا عديل قال لي سوقيها وارجعو البيت اما امي تشاكل في فوزي وتكذب كلامو اهل اسامه طبعا استصغرونا شديد وقالو له البنت دي تنساها
انا انتهيت خلاص يا سمر لا ابوي حايرحمني ولا امي لمن تجي  : حاتعمل لك شنو يعني انتي ما عندك ذنب  : حاتفتكر انو انا الخليتهم يتصادمو وانا ما عملت كدا هو عرف من وين انو خطوبتنا الليله الوراه منو عاينت لي وقالت لي ولا تكوني انتي سمر انتي العملتيها صح؟  : عملت كدا عشانك  : انتي قلبتي الدنيا علي مافي زول غيري حيتأذى حرام عليك يا سمر قعدت تبكي قلت لها انتي ما غلطتي  : امشي مني يا سمر خلاص ماعاوزه اسمع صوتك
امي وابوي جو اليوم داك واتشاكلو شكله كبيره ابوي طلع من البيت حاولت اتواصل مع علاءالدين واكلمو رقمو ما بدخل معاي وامي ولا هماها الحصل انو المشكله دي فتحت جروح قديمه ما كانت إلتأمت لسه كل واحد طلع الجواه وتفقو انهم يتطلقو قدر ما حاولنا نصلح بينهم ما قدرنا  علياء قالت لي انتي السبب يا سمر انتي كل الناس خاته اللوم علي  في حين انو انتي السبب في الحصل بين ابوي وامي ولو اتطلقو انتي المسؤوله  : انا ما قلت لهم اتشاكلو  : وليه وريتي فوزي لو ما حصلت المشكله دي كان انا انخطبت وامي وابوي قاعدين معانا  : قعادهم احسن عدمو غير النقاش والخصام مافي شي حلو بينهم دي كلها تراكمات مافي شي جديد اما بالنسبه لك انتي اسامه قدامك امشي اقنعيه ذي ما عملتي من اول مره  : ماشه وين اسي  : ما عندكم فيني سبب امي صادفتني في الباب قالت لي طالعه وين  : ماغرضك بي  : احترمي نفسك ما تقولي عشان ابوك مافي انا ما بقدر عليك احترمي نفسك احسن لك وامشي اقعدي مع اختك جوا  : اوامرك دي ما بتمشي علي هديك بنتك المطيعه امشي اتسلي بها طلعت خليتا وهي بتنادي فيني مشيت لابوي وقعدت احنس فيه قال لي انا وأمك ما متفقين دا الكان مفروض يحصل من زمان  : بس نحن محتاجين لكم على الاقل انا ما بقدر اعيش في البيت دا مع امي وانت مافي  : انتو ما صغار اسي ماشاءالله كبرتو وكل واحد عارف مصلحتو  : الا انا انا محتاجاك ياأبوي  : انا قاعد هدا كل ما تحتاجيني تعالي لي  : ابوي انا عاوزه اتعرف لك بحاجه  : سامعك  : انا السبب في الحصل دا لأني حكيت لفوزي عن مشاعر علياء تجاهه وانو امي هي الاجبرتا تعرس اسامه كنت دائماً بحرضا عشان ترفضو انا خربت حياتا وحياتكم  : لا انتي اتصرفتي صاح علياء جبانه ما بتفكر في بكرا اصلا لو اتزوجتو كان حاينتهي بهم المطاف ذينا انا وامك
المهم قعدت مع ابوي لبليل بعداك طلعت طبعا هو كان قاعد في فندق وانا طالعه من غرفة ابوي سمعت صوت زول بصفر اتلفت لقيتو امجد لمن انخلعت قلت له انت قاعد تراقبني يعني؟  : ابدا انا زيي زيك جيت لشغل  : اوف ما فاضيه لك
مشيت خليتو وهو متابعني بعيونو لمن طلعت اول ما جيت البيت امي استقبلتني بالشتايم وعاوزه تضربني قلت لها انتي فاكراني واحده غبيه ولا جاهله؟ انا بعرف احافظ على نفسي كويس كنت مع ابوي الشغال يسأل ليل ونهار على علاء الدين  يا ترى جايبه خبرو انتي؟  :  علاء الدين مالو؟ : مالو كيف يعني له كم يوم مفقود وماعارفين عنه حاجه انتو باردين كدا كيف
بعد اسبوع مشيت الجامعه عشان اعمل إجراءات الشهاده في الرجعه صادفت محل اكسسوارات حلوه شديد شكلو فتح جديد دخلت واتفرجت عليه فيه تصاميم روعه وما موجوده في السوق بس الاسعار غاليه تلفوني دق لقيتو أمجد
الو  : منوره المحل  : شنو  : شايفك في الفرع بتاعنا  : انت بتراقبني يعني؟  : انا وراك مباشرة  : بسم الله الرحمن الرحيم  : ههههه كنت حابي اتأكد انو انتي  : لا انت بتراقب فيني  : والله صدفه  : المحل دا تابع لشركتكم يعني؟  : ايوا  : افتكرتكم ملابس وأحذيه بس : مش دخلنا عالم التصميم خلاص؟ رأيك شنو  : حلوات بس الاسعار غاليه  : لانو ما متوفرات غير هنا عندنا فريق خاص بتاع تصميم  : انت الشغال هنا يعني؟  : ايوا انا البياع هههههههه حسيت كلامي سخيف وهو استهزاء بي
جيت ماري وقلت اشوف الحاصل اعتبري انو نحن بنتلاقى لاول مره
مد يدو وقال لي أمجد النصري  : سمر الفاتح سلمت عليه في يدو وقلت له اتشرفنا قال لي خلينا نتواصل تمام  : رقمي معاك اصلا  : اخدتو من غير إذنك دي ما محسوبه فتح تلفونو وقال لي هاك سجلي رقمك بعد سجلتو له وطلع تلفوني رن لقيتو هو البياعه كانت مراقبه الوضع وابتسمت لي قلت لها خير  : مش انتي سمر بتاعة البث  : لسه القصه دي ماانتهت يعني انا نسيتا  : بس هو ما نكر العلاقه دي  والدليل انو نشر صورة لكم مع بعض يوم تخريجك على حسابو انتي خجلانه من شنو  : اوف
ابوي اتصل وصوتو ما عجبني نهائي قلت له في شنو ياأبوي  : صاحب علاء الدين لقو جثتو في البحر  : شنو؟ اوعا يكون دا الشغال معاه : ياهو زاتو واخوك مافي خبر عنو قالو لقو مجموعه كبيره من الجثث
انا طلعت برا ورجولي ما شايلاني لقيت امجد لسه واقف ماتحرك قلت له ممكن تاخدني معاك  : اخدك وين
قعدت ابكي كنت مهبطه عديل وتلفوني برن قام فتح الباب وانا ركبت معاه ورا قال لي انا ما بحب جو البكاء والدموع دا احكي مالك  : اخوي سافر لشغل مع اصحابو قبل شهور واليوم قالو لقو مجموعه من الجثث في البحر من ضمنهم صاحبو  : سافرو بالسمبك؟؟  : سمبك شنو اخوي شغال في بورتوسودان  : طيب خلينا نشوف
اتصل بواحد واتكلم معاه وبعدها نزل تلفونو وبقى يعاين له مسافه لمن لقاني مركزه معاه قال لي في شباب سودانين سافرو بالسمبك عن طريق كينيا  : شنو  : القال لك منو  : بعرف الطرق دي انا شوفي دي مجموعه من الصور الشباب ديل غرقو كلهم مافي زول فيهم  قد يوصل
يتبع