علاقات مشبوهة

علاقات مشبوهة 19

#علاقات_مشبوهة
#بقلمي  : #مشاعر_مبعثره
الجزء الأول
الفصل الرابع  (الحرب الباردة)
الحلقه (19)
امي خلت الاولاد في بيت إياد وجاتني لقت الباب فاتح ومن دخلت تنبذ فيني ما خلت كلمه جات غرفتي رزعت الباب ولمن لقتني في الارض خافت بقت تهز فيني مافي حركه شافت شريط الحبوب قعدت تصرخ وانا مافي حركه نهااائي الجيران سبحان الله اقرب الناس لينا عملو نفسهم ما سامعين قامت اتصلت بشاكر قالت له لقيت بنتي غمرانه وما عارفه اعمل شنو قال لها بنتك دي ما بتخصني خليها تموت زعلت زعل طلعت الشارع وقفت عربيه وخلت السواق يجي يرفعني من البيت ودتني المستشفى الدكتور قال لها كويس انها استفرغت انا لمن فتحت وشفتها خفت خوف جاتني قالت لي دا شنو العملتيه دا عيونا كانت وارمه من البكاء قالت لي جيتي من هناك عشان تنتحري؟ وما بتوريني انك جايه كمان قلت لها انا ما انتحرت : انتي كيف اسي في حاجه واجعاك؟ قلت لها عاوزه أغير ملابسي  : بس انا ما جبت لك حاجه اسي بخرجوك خليه بعد نمشي : ديل اتوسخو يا امي معاي بيريود  : ايوااا خلاص بمشي اجيب لك بسرعه الدكتوره جات تكشف علي وتعمل لي فحص واظنها عرفت اني اجهضت قالت لي لو ما لحقناك في الوقت المناسب كان رحتي فيها قلت لها انا متشاكله مع زوجي وما عاوزه امي تعرف  : شنو؟  : نزلتو قاصده لاني عاوزه اتطلق من زوجي وهم مصرين يرجعوني له عشان حامل المهم قدرت استعطفا امي في الطريق فكرت تاخد الاولاد من بيت شاكر بعد الكلام القالو لها دا اول ما وصلت لقت إياد في وشها يداب جاء البيت طبعا قالت له نادي لي الاولاد سايقاهم معاي  : ليه مالكم  : خلاص راجعين بيتنا  : بس ما وريتو بابا  : ما مضطرين ناخد اذنو  : خلاص خليني اوصلكم  : لالا مؤجره عربيه خليهم بستعجلو عشان واقفه لي  : طيب ادخلي  : مستحيل  : تمام لمن مشا لقاهم ما جاهزين واخوهم الصغير نايم قال لها خلاص امشي انتي انا بجيبهم لك بعد يجهزو  : بعملو في شنو اصلو  : والله قالو لسه انتي ما تخلي بتاع العربيه يمشي واقعدي انا بوديكم  : ما عندي زمن انا ماشه بعد يخلصو خليهم يطلبو ترحال معاهم قروش ومشت طوالي لانها ما عاوزه تتأخر علي مشت البيت جابت لي ملابس وجاتني قمت مشيت الحمام لبست ما كان في شي طلعت الدكتورة كتبت لي ادويه وكان عندي درب قالت لي بعد يخلص نمشي
مالا مكتره لك الحبوب كدا شلت كيس الادويه منها وسكت إياد ساق الاولاد وداهم بيتنا لقى غرفتي فاتحه وافتكرني قاعده قام دخل جوا شاف شريط الحبوب الفاضي على الأرض ومنظر الاستفراغ وجلبابي المليان دم لمن انخلع الاولاد طبعا مشو قعدو في التلفزيون واختهم الكبيرة رحيق قاعده تعمل اندومي جاء ماري بالحمام برضو دخل لقى ملابسي على الارض وفيها دم بكمية كبيره وفي مقعد الحمام فك فيه المويه والصابون بقى محتار قال لرحيق سمر قاعده في البيت؟؟ : ما بعرف : وخالتكم كوثر مشت وين؟  : ما قالت لي  : اتصلي اسأليها رحيق لمن اتصلت بها قالت لها سمر حصل لها تسمم وانا وديتا المستشفى اسي راجعين ما تخافو وهي كلمت إياد قلبو بقى يدق وراسو ضرب منى اتصلت به ولمن قال لها وديت الاولاد بيت خالتهم كوثر زعلت قالت له يعني مشيت لها تاني انت ما بتتعظ غلطانه انا الاديتك فرصه تانيه بعد خنتني هو طوالي ركب عربيتو وجرى عشان يصالحا ويفسر لها اصلو بحبها الخائن اما نحن اول ما وصلنا انا دخلت غرفتي رفعت الجلباب ختيتو في الحمام مع باقي الملابس ديلك امي قالت لي ارتاحي  مسافة احضر لك حاجه  تاكليها  : ما عاوزه شي خلوني براي  : خلاص نومي وارتاحي بعداك نتكلم قفلت الباب ورقدت كان بالي مشغول بحاجه واحده بعد الحصل لي دا انا لسه بكرة ولا خلاص ضعت فكرت امشي للدكتور داك بس خايفه من الكلام الحاأسمعو منو
#إياد
ما صدقت رجعنا واول حاجه عملتها مشيت لها  : انا شرحت لك الوضع كم مره ليه ما عاوزه تفهمي  : وما كان تطلب لهم ترحال مشيت البيت داك ليه؟ اشتقت لها صح؟؟  : انتي ما بتعرفي تسامحي ولا تغفري ما حصل بينا شي والله العظيم انا حلفت لك وانا خاتي يدي في المصحف اعتزرت لك وخليتك على راحتك لمن اتقبلتيني براك تاني مالك انا متزوجك انتي حاليا لو عندي لها حاجه بخليها واتزوجك؟؟  : امشي من هنا ما عاوزه اشوفك  : منى  : ما منى انا حاليا زعلانه منك وصورة وشك بتعصبني يلا اطلع من الغرفه  : ماشي حبيبي حأخليك  لمن تهدي ونتفاهم
طلعت خليتا ما تخلق مشكله جديده وانا ما صدقت سامحتني بس كان في بالي 100 سؤال بخصوص الشفتو دا كل الدلائل بتأشر على حاجه واحده انها أجهضت والمحير اكتر انو علاقتنا ما طولت وانا متاكد اني ما عملت معاها حاجه ياربي الحصل معاها شنو بلعت كميه من الحبوب عشان تنزل الفي بطنا معقول امجد له علاقه بالموضوع ولا زول تاني انا ما فاهم شي مشيت لأمجد في بيتهم طبعا لسه العداء مستمر بيننا قابلني ببرودو المعتاد قال لي جاي توريني انك مبسوط يعني تعبت نفسك انت كلك انا ما شايفك  : امجد انت عملت علاقه مع سمر في الفتره دي  : سمر؟؟  انت ما خجلان من نفسك بعد عرست والمشاكل الحصلت بتفكر فيها لا وكمان بتسألني انا منها ما امها معاكم في البيت كان تسألا  : انت عارف اني بحب منى وطلعت الزوله دي زمان من حياتي  : طيب ليه بتسأل عنها ما من حقك  : البنت دي أجهضت الليلة كانت في المستشفى بلعت شريط كامل بتاع حبوب ونازفه كمية كبيره  : وجاي تسألني انا كانت مع منو اخر مره جاوب عملت عملتك وجاي ترميها فيني  : انا متأكد انها ما حامل مني  : وانا اخر مره كنت معاها قبل سنه وانا الاستغنيت عنها امشي اسألا : طيب حامل من منو  : ما امكن لقت لها واحد جديد في السعودية اصلا هي سافرت من انت اتزوجت  : معقوله في الفتره البسيطه دي اتعرفت على واحد تاني لمن حملت منو؟ ابتسم لي بخباثه وقال لي دي ياها سمر ولا تكون صدقت انها بتحبك وحاتقعد تبكي عليك نحن الاتنين بنشبه بعض لدرجة كبيره سمر دي النسخه المؤنثه مني
طوالي مشيت خليتو سمر البتكلمو عنها  الناس دي ما بتشبه سمر العرفتا وعاشرتا معقول تكون قادره تتلون بسهوله كدا وتخدع الناس طيب والبراءة والخوف والحب الكانو في عيونا دي كيف كيف بتدعي التلقائيه في التعامل معاي يعني كانت بتجذبني لها بقصد وتخليني اتهور واقرب منها وتبعد ما قادر افهما ولا انسى الحصل ما قادر اعتبرا نزوه او فتره عابره في حياتي اتصلت بها ابت ترد رجعت البيت صالحت منى وما أحلانا الصباح تاني ضربت بوز وقامت تنبذ وفتحت لي موضوع سمر بعد قفلناه قالت ما نسيتا ومتواصل معاها وبتاع لمن طلعت خليت لها البيت جاتا مناسك اختا
منى انتي غبيه؟؟ عاوزه تضيعيه منك وتخليه لها  : قلت لك متواصلين مع بعض  : خليك من متواصلين دي انتي لمن تشاكليه كدا وتطرديه من الغرفه تتوقعي يعمل شنو اكيد حايمشي لها فكري ياغبيه البنت دي ما ساهله ابدا خلتني اكبر راس مع امجد لمن عمل العملو فيني وجات هي ببساطه اصطادتو  : بس هم منفصلين من زمان  : القال لك منو انتي فاكره العداوة بين إياد وامجد دي بسبب منو  : بالجد؟  : اكيد  وامجد الغبي شكلو حابيها خلاني عشانا عشان كدا يا منى انا ما عاوزاك تغلطي نفس غلطتي مع إياد وتنفصلو من وراها  : دقيقه دقيقه ما تقارنيني بك ولا تقارني إياد بأمجد انتي براك سلمتي نفسك لامجد وكمان حملتي منو بس انا ما زيك وما جريت ورا إياد ذي ما عملتي انتي مع امجد بالعكس هو الجرا وراي لمن حفى حتى قبلت اتزوجو ولمن خاني معاها مرمطتو انتي ما عارفه حاجه ساي اصلا إياد بحبني ومن زمان وانتي امجد ما بحبك فهمتي الوضع؟  : كتر خيرك  : ما تزعلي دي الحقيقه
مناسك اتغاظت شديد وقامت منها منى قالت لها اقيفي احكي الحصل امس بليل  : اتأخرت على شغلي وطالعه  : خلاص تمام تعالي بدري
انا تاني اتصلت بسمر ما دخل معاي حأنها عامله لي حظر طوالي اتصلت برحيق وسألتا عن الحاصل قالت لي سمر ما اتسممت هي حاولت تنتحر  : شنو؟؟ : سمعت امها بتتكلم معاها وتبكي قالت لها الانتحار ما بحل لك مشاكلك  : يعني كانت عاوزه تنتحر عديل
انا افكاري جاطت تاني وما عرفت ارتبا بابا لمن جاء سأل من كوثر واولاد الصديق قلت له مشو قعد يشاكل وقال  لي انت ليه منعتهم قلت له يا بابا سمر حاولت تنتحر وامها ساقت الاولاد ومشت لها عشان ما تخليها براها  : ما تنتحر ولا تتحرق نحن علاقتنا بها شنو ولا تكون لسه بتحبا  : انا بقول في شنو وانت بتقول شنو  : امشي سريع جيب الاولاد ديل ولو كوثر عاوزه تقعد مع بنتها هي حره اما هم لا ديل مسؤوليه ولو حصلت لهم حاجه انا الملام  : وتحصل لهم حاجه ليه وليه ابوهم ما رجع لحدي اسي دا شغل هو وانا ما بعرفو  : شغل في الشركه التانيه انت علاقتك شنو  : مهما كان ما رجع ليه ولا مره  : انا ما عاوز اتكلم بس هو مسجون في قطر  : مسجون؟؟؟  : الغبي ضرب له واحد بالعربيه دا ما موضوعنا اسي هو وصاني على اولادو امشي سريع جيبهم
انا اصلا كنت عاوز سبب عشان امشي مشيت وفتحت لي الباب رحيق قلت لها خالتك كوثر قاعده؟  : لالا مشت السوق  : لازمكم حاجه؟ لو محتاجين شي اتصلو بي بس : ما ناقصنا شي الحمدلله هي مشت تشتري بيتزا وايسكريم لسمر لانها ما بتاكل شي نفسا مقفوله قالت تجيبب لها ديل بتحبهم امكن تاكل منهم  : تمام رحيق انا عاوز اتكلم مع سمر شويه انتي راقبي الباب لو خالتك كوثر جات كلميني قبل تدخل  : حاضر
عرفت انها حاتكون في غرفتا دقيت الباب ما فتحت لي تاني دقيت قالت بضجر ما عاوزه حاجه يا امي ياخ خليني براي تاني دقيتو قامت زهجانه وفتحتو لمن شافتني لزت الباب عاوزه تقفلو بس انا سبقا بيدي الاتنين دفعتو براحه ودخلتا اصلا هي ما عندها مروه تقاويني وظاهر عليها الإعياء قفلت الباب وراي هي جرت على الدولاب وقعدت تنزل في الملابس لمن طلعت لها توب لبستو عشان تستر نفسا لانها ما كانت لابسه كويس لفتو كدا ونصو كاري
#سمر
اصلو ما توقعت يكون بالجراءة والوقاحه دي حاولت ادفرو واطلعو برا لاني ما طايقاه بس ما بقدر وهو مسك يدي الاتنين بعد محاولاتي اليائسه دي قرفتو شديد وقلت له فكني عاوز مني شنو تاني انت نسيت العملتو فيني : اهدي لو عاوزاني افكك خلاص ارحمي نفسك شويه انتي ما قادره تقيفي  : وانت مالك بي فكاني مشيت قعدت في السرير عشان راسي لف قال لي وما بتاكلي ليه دي طريقتك الجديدة في الانتحار يعني قلعت عيوني قال لي سمر انتي حملتي من منو  : ما حامل ولا زفت طير من هنا  : انا امس جيت البيت وشفت اي حاجه ملابسك والحبوب الاستخدمتيها عشان تسقطي
انا ساعتا حسيت بهبوط عام في جسمي وخفت لمن قعدت ارجف وغلبني ارد له قال لي واضحه يا سمر ماتنكري حملتي كيف ومتين ومن منو حسيت بغصه في حلقي بلعتها وقلت له ما انا واحده لافه ما بنسأل سؤال ذي دا قعد يحك راسو ويقول سمر سمر سمر ما تجننيني يا سمر  هو نحن متين انفصلنا  : انت قضيت زمنك وعملت حاجه انا عاوزه في شنو تاني خلاص انتهينا جاي ليه  : انا انا ما قادر استوعب قربت اجن لمن شفت غرفتك وحمامك امس واتصلت بك ما رديتي ولا حتى كلفتي نفسك ترجعي لي : ما التلفون كان مع مرتك اسألا انا رجعت ولالا : م منى ردت لك  : ما تجيب لي سيرتا شوف نفسك بترجف كيف وانت بتقول اسما وخايف
حسيت اني عاوزه انفجر من سماع اسما واسلوبو في اللفظ خايف شديد من ردة فعلها عصبت شديد وقلت له انت فاكرنى عاوزه منك شي؟ انا اصلا ماسحه رقمك ولمن رجعت على اساس رقم غريب ما كنت فاكراك انت بس شكلك انت المحتفظ برقمي لانها عرفتني على طول ومسحت بكرامتي الارض ما خلت كلمه قزره ما سمعتني لها : يا الله اتكلمت معاك عشان كدا كانت متغيره معاي الصباح
كلامو كل مره بنرفزني اكتر شلت المخده فلقتو بها في غضب وصرخت فيه اطلع برا ما عاوزه اشوفك تاني اطلع من حياتي خلاص ما كفاك العملتو قعدت ابكي وهو بحا ول يهدي فيني وانا بدفعو بقوه  قال لي خلاص انا طالع بس اهدي اهدي لو سمحتي ما تعذبي نفسك كدا مع طلعتو رحيق جات جاريه قالت له خالتو كوثر جات
يتبع