في عرين الاسد

في عرين الأسد1

#في_عرين_الأسد
#بقلمي  :  #مشاعرمبعثره
الحلقه (1)
هاجر انا ماشه اشغليهم عني شويه  :  ما جاده طبعا  :  جاده والله ما حاالقى فرصه أحسن من كدا  :  بقيتي تخوفيني والله يا بنت صحي تفتيحة المغمض كعبه  :  ما تنسي اني الوحيده البغطي عليك عمايلك بقت علي يعني؟   :  خلاص امشي ما تضيعي الزمن وريتك هدي ساعه ما تذيدي عليها لانو لو اتأخرتي انا الحافتنك قبل يسألوني  :  الله يقدرك على فعل الخير
في عز الجوطه ومع النقاب مافي زول انتبه لي ابوي كان مشغول مع ضيوفو اللهم اخوانو واولادهم لانو اغلبهم مغتربين ونادر ما يتجمعو نفس الشي امي واخواني وحتى جيرانا جو يسلمو المهم اتسحبت لحدي ما وصلت الباب
اااااي عيني  :  انا انا اسف ما كنت فاكر في زول ورا الباب  :  مالك عميان اصلا البخليك تدخل البيت كدا شنو ما بتعرف تستأذن وتدق الباب؟   : 
انتي ............... سكت مسافه وعاين لي باستغراب قال لي الباب فاتح وانا ما محتاج استأذن انتي الشكلك طالعه من دون اذن  :  نعم؟  هو انا منو اصلا؟   :  عايني مش لو لبستي نقاب لو اتكلمتي ساي انا بعرف صوتك وبعرف افرق بين المنقبه والمدعيه عاوزه اتكلم زح من قدام الباب ومشى خلاني واقفه بعد انتبهت لنفسي طلعت
طبعا دا ود عمي اسمو الزبير راجل مليان قروش ومفتري لا مدلع بس اهلو دلعو اكتر من اللازم عشان ابوه متوفي بقى متسلط شديد على امو واخوانو حتى الاكبر منو بكرهو من زمان وفي كل مره بخليني اكرهو زياده بمواقفو معاي وانا ما فاضيه له حاليا تلفوني كان حاينفجر من كترة الاتصالات
نعم  : حبيبي : انتي غيرتي رايك ولا شنو  : مازن انا جايه عشان نتناقش  : ما كعب كونك قبلتي النقاش في تغيير يلا انا منتظر من ساعات  : ما حااتأخر ما قدرت انتظر المواصلات بعد ما قال انو كان منتظر وطوالي ركبت ترحال ووصلتو بسرعه غضيت نظر عن تصرفاتو ذي كل مره ومشيت الموضوع عادي
وفيها شنو يعني لو حضنتك ليه بتنفري مني كدا ذي النكره : لانو ما ليك حق تلمسني كل مره بنبهك  :  وانا دا اسلوبي انتي عارفه ولازم تتجاوبي معاي او ننفصل  : ماشي يا مازن ما عندي اي مانع بس ما ترجع تعتزر لي ذي كل مره  :  خلينا في الجد انا اختصرت عليك المسافه كتير ووريتك الحل المناسب لي وليك  :  مازن تاني حانرجع للموضوع دا؟   :  ما لاقتني انسانه زيك كدا بالحرام وبالحلال رافضاني دا حب شنو دا  :  حلال وحرام انت جادي؟   : ايوا حلال ومستعد انتي بس ادينا فرصه وما تخافي انا مرتب كل شي والله حتى البيت  :  بس يا مازن انا  :  ما عاوز اسمع بس تاني عاوز اسمع موافقه حبيبتي خليني اجهز نفسي للخطوات الجايه في حياتنا
با بنت اختك دي عاوزه تطلع خواجيه من الحمام دا ولا شنو ما ممكن ياخ ساعه منتظرنها للأكل  : خلاص يا امي خليها تاكل براها بعدين ارح علي الضيوف  :  لالا مافي كلام ذي دا كل مره بسألو منها طفله هي؟  ما بتقعد مع الناس ولا بتتونس كمان اكل ما عاوزه تاكل مع الضيوف كدي زحي لي امشي عليها  : خلاص يا امي
ماشه لها انا  : لو بتسمع منك دي المره الرابعه  : بقول لها ابوي بناديك  : اي قولي لها كدا اصلا ما بتخاف من زول غيرو في البيت دا
الله يجازيك يا سمر كمان قافله تلفونك كأني ما حزرتك  : جايه  : ما تقولي جايه قولي لي انا وصلت البيت خلاص مافي حاجه بتحلك غير كدا  : قربت والله العظيم   : انتي حره بعد دا
اختك وين يا هاجر شبعنا  ونحن منتظرنها  :  اكلو ساي دي اصلا متعوده تجي بعد يرفعو الصينيه  : معقوله يا بنتي ما شفناها زاتو زي الناس من جينا وهي قاعده جوا ما جات مارقه علينا  :  والله ما عارف البنت دي اعمل معاها شنو  : عرس لها بس قعدو يضحكو بصوت عالي
والله افتكرتا حاتتغير بعد اتخرجت وتبقى اجتماعات بس شايفا ذي ما هي من زمان هاديه وانطوائيه  :  أحسن من ناس كدا دا اخوي طبعا وهو قاصد هاجر لأنها عكسي تماما  : قصدك شنو يا احمد  : اسي انا جبت سيرتك؟   : بالجد كدا اختكم دي دايما بتقعد في
الغرفه وما بتطلع ولا لمن يكون في ضيوف بس امي طبعا خجلت شديد بعد كلام الزبير دا  قالت له لا والله يا ولدي وانتو اصلا ما ضيوف البيت بيتكم  : عاوزه تشغلينا عنها بس لسه مصرين نتغدا معاها  :  قومي يا هاجر امشي نادي اختك دي : والله شكلك عاوز تمارس سلطتك عليها من اسي  : جدو ما قلنا الكلام دا ما وقتو  : لالا وقتو انت ما بتخجل ولا شنو مافينا زول غريب امي ما كانت فاهمه حاجه  وبقت تعابن لابوي غمز لها
بالنسبه لانو ولدنا الزبير طالب يد بتنا سمر يا كوثر الفرحه كانت ظاهره في وشا وحاولت تخفيها قالت له سمر ولا هاجر؟  :  عشان عافين هاجر بتجيبو براها عاوزين تورطوني صح الزبير قال الكلام دا شكل هظار بس كان جادي وقعد مع ابوي طرف قال له يا عمو ما اكذب عليك جدو هو الاقترح الموضوع دا وانا والله ما عاوز ادخل في احراج لو خلانا انا وهي نتفاهم برانا كان احسن اسي تكلموها كيف؟  :  عادي دي بنت عمك الا لو انت ما موافق : انا لالا يا عمو انت ما عندك بنت بتترفض ماشاءالله كلهم  : معناها ربنا يقدم الفيه الخير وما تخاف انا حاافكر في كلامك واخليك تقعد معاها
بعدين هدي جات طالعه
لمن شافني عاين لي نظرتو كان فيها احتقار وانا ما اشتغلت له  ابوي قال لي جبنتك وين يا بنت  :  جاهزه  : يلا بسرعه مشيت بعد تعبي داك اعمل لهم الجبنه طبعا لمن جيت دخلت بباب الصالون وعلى الحمام طويل هاجر لمن جات بحجة انو تناديني لقتني جوا وطلعت ذي الما حصل شي
بسرعه يا بنت لك ساعه جيت وزعت الجبنه عليهم لمن جاء دور الزبير قال لي ما قاعد اشربا بهبهان  : انت لسه ما شربتها على فكره القال لك منو فيها هبهان  : من ريحتا ابوي نهرني ما تكتري كلامك يا بنت قال لك ما عاوز هبهان يلا امشي اعملي له واحده بدون هبهان  :  بس يا ابوي  : يا بنتي اتحركي  شلت الكبايه بزعل قال لي ما تعملي لها حاجه غير عرق ابيض وياريت ما تكون خفيفه  حمرت له ومشيت جاء لاقني قال لي انشاءالله انبسطتي في مشوارك اكتر من قعدتنا دي  : نعم؟  :  نسيتي انو نحن اتلاقينا في الباب؟   : ما بخصك فاهم؟ : لابسه النقاب وماشه تقابلي  :  الزبير اطلع برا لو سمحت  : بتطردين؟  : ايوا انا ما عاوزه اتكلم معاك
لو فاكر انك بتقدر تتحكم في تصرفاتي ذي ما بتعمل مع امك واخواتك انسى  : احترمي نفسك  : انا ما قلت حاجه غلط انا عندي ابو وهدا عايش هو الوحيد المسؤول عني  :  استأذنتي منو لمن طلعتي؟  :  والله أحسن استأذن منك انت زاتك  :  انتي ليه ما عندك اسلوب كدا؟  : انت السألتني اول جاي عاوز مني شنو  : انا بالجد عاوز افهم مشكلتك معاي شنو انا ما قلت حاجه غلط غير اني ما بشرب قهوه بهبهان حتى لمن اتلاقينا قبيل في الباب اعتزرت لك بس انتي  طولتي لسانك واجبرتيني اعلي صوتي عاوز افهم مشكلتك شنو  : مافي حاجه بتربطني بك اصلا عشان يكون بيننا مشاكل فشنو بطل تحشر نفسك في تفاصيل حياتي وتعمل نفسك مهم  : انا؟ :  قايلني  ما ملاحظه لك انت ما عندك سلطه علي فاهم؟  : والله انتي مجنونه فاكراني بحبك ولا شنو انتي جاده؟ هههههههههه بالمناسبه ما انا الطلبتك ذي ما فهموك اهلك جدو هو العرض الفكره وصرح بها بدون علمي واصلا انا ما موافق واقترحت انو نقعد مع بعض عشان نفهمهم اننا ما موافقين انا مستحيل اقبل ارتبط بواحده زيك  :  دا فيلم هندي ولا شنو اطلع برا عليك الله اطلع من هنا قال جدو طلبك لي  : يابنت الناس انتي بتفهمي كيف  :
ما عاوز افهم اختاني  : ممكن تحترمي نفسك شويه وتنتبهي لكلامك  : ما ممكن حاتعمل شنو يلا طير من وشي عيونو بقت ذي الجمر من الزعل وما باقي له الا يضربني انا متأكده انو فكر يعملا بس مسك نفسو طلع بسرعه ولمن جبت له القهوه قدام الناس قال ما عاوزا شيليها من قدامي احرجني بس برضو ما زعلانه لاني جرحتو
دا شنو البتعملي فيه دا يا بنت اسي الزبير دا عمل لك شنو عشان تتكلمي معاه بالاسلوب المابشبهك دا انا سامعاكم في المطبخ ما صاح منك الراجل دا بكرا ببقى راجلك عاوزه تتعاملي معاه كيف بعدين؟  : راجلي؟  :  ايوا هو طلبك  : وفاكر اني حااوافق يعني؟  : ايوا ابوي موافق وانتي عارفاه سمح كلمتو واحده  : انا ما حااتزوج الحيوان دا  : مالو كدي عيبيه لي زول تقي شديد وانصار سنه  وعندو قروش  : ودقنو واصل لبطنو  : يابنت متين الزبير دقنو واصل بطنو دا في السماحه اسمح منك  : انتو ما بتدو الحقيقه بتعاينو للقروش بي وناسين الاخلاق  : والله انا ما شايفه له عيب لافي خلقتو ولا اخلاقو دا بإذن في الجامع وبصلي
بالناس  : لانو اكبرمنافق وبالطريقه دي فارض نفسو ورأيو عليكم  : دا ما سبب لك فتشي غيرو لابوي لمن يسألك  : ما محتاجه لسبب ما عاوزاه وخلاص الكلام انتهى حياتي وانا ما عاوزاه فيها مش انا حره؟   :  سمر  : ما تعايني لي كدا اعرسو كيف انا ما بقدر اعيش معاه عاينت لي قلت لها انتي ما شفتيه قبيل عاوز يضربني على شنو يعني ومتحكم في امو واخواتو ينهر الواحده ذي الطفله دا بعامل الناس ذي العبيد انا لمن اتكلم معاه بحس بتوتر عديل  : بتخافي منو؟  : اخاف ليه  : دا الفهمتو من كلامك انك بتخافي منو بس عادي هو اصلا طبعو كدا واكيد لمن تبقي زوجتو حايعاملك بطريقه مختلفه وحايحبك ويدلعك حاتشوفيه بصوره تانيه وممكن تغيريه كمان  : في المسلسلات ممكن بس دا الواقع يعني مستحيل انسان ذي دا يتغير انا ما عاوزاه وخلاص عندي اسبابي : على كيفك
بعد المغرب جيت قعدت في التلفزيون امي وقفت قدامي وجدعت لي ملابس في الكنبه قلت لها دا شنو يا امي  : ملابس الزبير امشي غسليها له سريع بكرا مسافر  : انا مالي حبشيتو عشان اغسل له  :  ما عاوزه معاك كلام كتير لا اخير يقعد يغسلهم براه وانتي المرا
قاعده  : قومي يلا  : يا امي انتو بتكبرو له راسو زياده بالتصرفات دي  : بكرا لمن تمشو بيتكم حلوها بالمشاركه  :  بيتنا؟ دا كلام شنو يا امي  :  ما تعملي نفسك ما فاهمه امشي يا بنتي قبل الكهرباء تقطع لك وتضطري تغسليهم في الطش مشيت غسلتهم وانا بلعن فيه جاني اتصال من مازن
يعني مصره ما تسمعي كلامي : مازن  : ما مازن ياخ يا سمر انتي ما بتحسي؟  لمتين كدا انتي ما بتحبيني صح؟  ولا عندك زول تاني وناويه تتزوجيه هو؟  انا ما شايف سبب تاني لرفضك لي  : لا بحبك   والله بحبك في اللحظه ديك جاء الزبير يشيل ملابسو وانا حسيت كانو وقعت صخره قي راسي
دا السبب يعني؟  واكيد طلعتي تقابليه والله صحي انتي بنت عديمة تربيه  : ما عندك شغله بي ما مسؤول مني  : انتي ما خجلانه من نفسك يعني ما عارفه انو البتعملي فيه دا حرام؟  : للمره التانيه ما عندك شغله بي قايل نفسك منو انت لو فاكر انو البتعمل فيه دا بخليني اتزوجك ما تحلم ما بتزوجك لو بقيت أخر راجل في الدنيا  : شايفاني مموت نفسي عليك يعني انا لو بقيت
مجنون  زاتو بعاين لواحده زيك؟   تافهة وبتاعة اولاد طوالي رميت ملابسو في الارض قلت له طير من وشي ما عاوزه معاك كلام ما عاوزه اشوفك ما بتفهم طوالي لوا لي يدي قال لي انتي ما لاقيه زول يلمك ولا شنو ارفعي الملابس دي قبل ما اكسر لك يدك يدي  دي وجعتني شديد قربت ابكي قلت له ارفعهم كيف وانت ماسك يدي فكاني طوالي رفعتهم وهو بعاين لي ويحمر
امشي من وشي  : الملابس دي تتغسل وتتكوي فاهمه ولالا؟   : عامل لي نفسك شيخ وكمان جاي تديني نصائح وانت اكبر تافه مافي واحد محترم بمسك يد مرا من غير محارمو ولا نسيت كلامك ما قلت ما بتصافح النسوان؟  ولا داك عرض ساي قدام الناس؟ قعد يضحك بأعلى صوتو لمن غاظني قال لي يعني انتي شايلا معاي من اليوم داك؟ عشان رفضت اصافحك  : طير من وشي  ما كان باقي لي الا اقتلو انا اول مره في حياتي انفعل كدا لانو بطبعي هاديه عكس اخواتي ما بسبب مشاكل ما بعلي صوتي بس دا الانسان الوحيد البخليني اطلع من المألوف مستفز شديد طبعا الموقق البتكلم عنو دا حصل زمان اول مره اشوفو وهو كبير كدا كان جاي من بلجيكا ومديت يدي عشان اسلم عليه قدام
الناس احرجني خت يدو في صدرو وقال ما بصافح قربت ادفن نفسي تحت الارض الواقفه عليها بليل ابوي ناداني وفي قدامهم كلهم سألني وقلت له ما موافقه بدون تردد قال لي ليه مالو الزبير ود عمك عيبيه لي  : مافيه كلمه يا ابوي بس انا  ..............  الزبير قاطعني امكن في زول تاني في حياتا يا عمي ما تضغط عليها خليها على راحتا  : زول شنو كمان انا بنتي ما بتعمل كدا ولا شنو يا سمر؟  جدو قال له ما فيها حاجه لو هي لو الزبير العندو زول في حياتو يجيبو لينا اسي دي ونحن معاه وعاين للزبير الزبير اتوتر ابوي قال لي اها؟  :  يا ابوي دا كلام شنو مافي حاجه ذي دي  : معناها تعرسي ود عمك نحن بنعرف مصلحتكم ولو ما الحاجه فيها خير ليك ما بنختارا  : انتو بتهينوني بكلامكم دا كأنو ما بتعرفوني يعني؟ دموعي كانت قريبه ونزلت على طول امي قالت لهم ما تضغطو عليها كدا سمر دي من كانت بتقرا في الجامعه ما عندا كلام ذي دا من الجامعه للبيت ولا بالغلط ما شفنا عليها حاجه الكلام دا بالعقل ولا ساي؟ لو هاجر ممكن  : انا واثق من تربيتا وبنت جوهره زيها ما بتستاهل واحد يبهدلا والزبير احسن خيار وهو الوحيد البقدر يصونا ويسعدا انا طوالي مشيت الغرفه وبديت ابكي لاني اتختيت في
خيار صعب والموافقه على الزبير دا انتحار دا ما بعيد يقتلني هاجر حاولت تتكلم معاي بس ما اديتا اي فرصه لاني خلاص اخدت قراري
حاولي اتكلمي معاها يا بنتي اختك دي غبيه وما عارفه مصلحتا اصلا مستحيل اكون عندها زول هي بتعاند بس عشان ما تتزوج الزبير  : خلاص يا امي فهمت : مدام فهمتي قاعده تعملي شنو ما تمشي عليها  : خليني اخلص الفيلم دا  : بلا فيلم معاك  : منتظراه من امس والله ما بخليه.  : يا بنت الرجال نامو انتي قاعده راجيه لي فيلم ذي الشيطان  : بمشي خليه ينتهي  :  بكرا احضري الاعاده  : عليك الله يا امي ما تمسخيه علي انا حااعمل الانتي عاوزاه ومن الفيلم يخلص بمشي عليها لو نايمه بصحيها ارتحتي؟ 
اول ما هاجر مشت ابوي جاء لقى امي قاعده قال لها انتي يا مرا جنيتي ولا شنو دا شنو القلتيه للبنت دا  : ما قلت حاجه غلط  : اوعا يكون صدقتي القلناه انا و ابوي قبيل دا : قالو كلام كتير اخدت منو المهم : وهو شنو  :
عرس سمر بنتي قعد يضحك لفتره طويله قال له دي أكبر لعبه في الموضوع نحنا عملنا كدا عشان الزبير يتزوج : نعم؟ : دا كلام ابوي وعشان عارفو ما بتفق مع سمر ومستحيل يرضى يعرسا عايزو يطلع صوت ويورينا البنت العاوزا : والقال لكم منو هو ما عاوز بنتي سمر؟  ولا اصلا في واحده تانيه : لا في امو متأكده وهي ما عندها مانع ايا كانت البنت المهم هو يتزوج  لانو كبر بعد دا وعاوزه تشوف اولادو : والبنت العشمتوها دي : قصدك سمر؟ هي دي رافضه عشم شنو ما سمعتيها انتي؟  : غلط واكبر غلط ياخ بتبالغو عديل دا كلام بهاظرو فيه؟ اسي خليتونا كلنا نصدق بعدين تقولو للناس شنو : ياتو ناس مافي غير اخواني واصلا كلهم عارفين باللعبه دي وكانو بتغامزو ويضحكو لو لاحظتي كنت فاكرك فهمتي والله  معقول يا كوثر تصدقي نحن نقول كلام ذي دا؟ نجبر اولادنا؟ ولا انا برخص سمر بنتي لزول انتي عارفاها دي القريبه للقلب كمان
هاجر هاجر يا بنت  : خليها يا كوثر اصلا ما حاتقدر تقنعا لو زنت في راسا دا للصباح  : انت البديت يا الفاتح بعدين اتحمل العواقب : هو انا اصلا منتظر العواقب دي
من زمان بكرا الزبير حايورينا البنت الهو دايرا  : شاحده الله تكون  سمر بنتك  : ههههههههههههه والله انتي غايتو؟  : دا منو البرا دا كمان امي طلعت بسرعه وكانت هاجر بتتسحب
ماشه وين يا بنت نص الليل كدا؟  :  انا ما ماشه  : ومالك عرقانه كدا ما تخوفيني اختك حصل لها شي؟  : لالا ما حصل  : طيب مالك ماشه وين  : ال الفيلم  :  الفيلم انتهى قبيل تاني شنو  :  واحد تاني  :  ولا تاني ولا تالت  مافي اي تلفزيون ذي الزمن دا يلا امشي نومي عاوزه تمشي وقفتا اسمعي هنا  : ايوا  : مافي داعي تتكلمي اختك في موضوع الزبير خليها تنوم ساي ابوك قال دا كلو هظار اتخيلي؟  : نعم؟  : انا زاتي انصدمت زيك كدا؟  : امي بتبالغو والله والله بتبالغو وما فكرتو في سمر والحايحصل لها  : حايحصل شنو يعني غير تنبسط لمن تعرف
مازن  : ما تخافي حبيبتي يلا انتي مش واثقه فيني؟ ما تشتغلي باالتلفون دا اسي انا ما قلت لك اقفليه؟  : تمام  : يلا جيبيه  : مازن انت مش قلت في ماذون
وشهود؟ 
يتبع