في عرين الاسد

في عرين الاسد 2

#في_عرين_الأسد
#بقلمي  :  #مشاعرمبعثره
الحلقه (2)
اكيد في بس شوفي انتي جايه متين انا اصلا مخطط لاي حاجه وجهزت نفسي بس انتي رفضتي وكسرتيني جايه اسي بعد خلاص فاتو  :  انا اسفه والله لأني سمعت كلامك وجيت اسي بمشي اديني تلفوني  :  سمر سمر سمر عشان عارفاني بحبك بجنون كدا بتتعمدي تعملي الحركات دي لو واحد غيري ما كان قبل بعد الكلام السمعتيني له قبيل دا والزله بس عشان عاوزك بالحلال  :  واسي  دا حلال؟  :  سمر انتي باعتبارك
هاربه من بيتكم وبخشمك قلتيها لو قعدت ثانيه واحده في البيت دا حاالقاهم عقدو لي من غير علمي واحسن حاجه نسبقهم بخطوه ونختهم قدام الأمر الواقع  :   انا لجئت لك انت  :  وانا قبلت بس برايك جايه انو نقعد مع بعض ومافي علاقه تربطنا  : بس اليوم  :  ولا ثانيه يا سمر ما ممكن من غير زواج  يلا هاك وقعي اسمك هنا  :  بس دا زواج عرفي  :  بكرل بنجيب المأذون  :  مازن دا مستقبلي وانا الحااضطر اواجه المجتمع بالغلط دا انت ما بتتأثر  :  دا ما غلط دا تصحيح لغلط انتي هربتي من البيت  : معناها لازم ارجع طلعت جاء لاحقني ومصر على الزواج العرفي بعد عاوزه اركب مسك يدي فكني يا مازن زواج عرفي ما بتزوج انتي فاكرني بنت شوارع؟  ولابنت صغيره وطايشه  : خلاص انزلي  :  ما نازله  :  سمر  :  مازن  :  طيب زي ما عاوزه بس الماذون ما حايجينا في الوقت دا  : نمشي له  :  اوف اوف يا سمر خلاص ارح  سأل صاحبو قال له امام الجامع دا شغال مأذون مشينا وهو طبعا اتردد بس مازن قدر يقنعو حتى الشهود ناس ما بنعرفهم كان في الجامع بس ولا شايلين رقم وطني ولا شي عقد لينا بس وقال لينا تجو تجيبو الارقام الوطنيه عشان تستلمو القسيمه على كدا مشينا
وصلنا انا كنت خايفه شديد ما عارفه عواقب العملتو دا راسي لمن صدع من التفكير خت يدو في كتفي سمر؟  قلعت عيوني عاوز يحضني دفرتو لمن انخلع
مالك  : انت بتعمل في شنو  : بحضنك بس انتي مرتي عاوز اقول لك مبروك علينا وربنا يسعدنا  : دا ما زواج يا مازن انت عارف كدا كويس انا قبلت بس عشان الوضع الاتختيت فيه اليوم بس لسه مصره على رأيي الزواج في السر ومن غير علم الأهل انا ما بقبل به  : طيب خلاص ما تنفعلي حبيبي امشي نومي عاينت في السرير قال لي ما تخافي ما حااقرب عليك ابدا قبل ما نكلم اهلنا لو قبلو خلاص نعمل عرس وزفاف ذي الناس ولو ما قبلو نشوف لينا مكان نقعد فيه ونعيش حياتنا ولا رايك شنو  :  انت حاتنوم وين  : برا في الحوش اصلا دا أخر لي يوم هنا دا بيت ناس صاحبي وانا كنت حارسو لهم لانهم سافرو بس بكرا راجعين وانا حاامشي السكن  : وانا؟  : حاتجي معاي طبعا  : بس كيف  : زميلي في الغرفه خلص امتحاناتو ورجع اهلو اصلا معظم الطلبه رجعو لانو اجازه الا البعيدين يعني حاناخد راحتنا ودي فوائد السكن الخاص اصلا مافي
زول فاضي لزول في اولاد بجيبو بنات ويبيتو معاهم ويطلعو الصباح في قدامنا زول بسألهم مافي خلي انتي مرتي  :  ما حصل دخلت سكن طلاب  : والله هو اقرب لفندق ولا شقق عرسان عرفتي عماره سيدا مؤجرا للطلبه المقتدرين وعددنا ما كبير عرفتي اصلا اغلبهم سافرو لاهلهم  : وانت اهلك ما طلبو منك تجي؟  : لا قلت لهم دي السنه الاخيره وعاوز اجتهد فترة الاجازه دي عشان ما اربت تاني  : انشاءالله تنجح يا مازن اصلا ما رجعنا لورا الا رسبوك دا  : يعني بقيت انا السبب؟  : لا حبيبي وانا حاساعدك في المزاكره  : تسلمي لي انتي
دا الحصل معاي انا سمر بنت من اسره محترمه هاديه شديد عكس اخواتي ما حصل عملت مشاكل لاهلي ولا في البيت ولا الحي ولا في المدرسه من كنت صغيره مسالمه ماحصل زول شكا مني اهلي واثقين فيني شديد لو قلت ماشه لاخر الدنيا ما بخافو علي لانهم واثقين مني بس خزلتهم في النهايه بعد بقيت واعيه وكبيره واتخرجت من الجامعه من دون اخواني انا البقولو علي عاقله عملت اكبر غلط في حياتي واتزوجت في السر ومن واحد طالب لسه كان زميلي مولود ومتربي في السعوديه بجو في الاجازات بس ولمن
امتحن الشهاده نزلوه السودان يقرا الجامعه وسجلو له في سكن خاص ماخد راحتو للأخر كان بحبني في السنوات الاخيره وانا دايما بصدو لانو الحب أخر اهتماماتي الزمن داك كنت بحتقر تصرفات اخواتي وحتى اخواني كلام بالتلفون لانصاص الليالي ومقابلات لحدي ما اتزوجو وانا الكنت بغطي عليهم بس ما حصل غلطو حتى هاجر اختي الصغيره مع اني بشاكلا طوالي بس لمن لقيت انها ما بتقدر بدون الشي دا وكل زمايلي واخواني لقيت اني عايشه غريبة اطوار وفكرت انو لازم اجرب الحب دا واشوف الحلو فيه في البدايه كانت رغبتي في واحد جادي ونيتو الزواج بس ما صادفت ذي النوع دا كل العرفتهم عاوزين يتسلو عشان كدا ما كانت عندي علاقه بتستمر اكتر من اسبوع ايوا بالضبط دا اختي الاكبر مني كانت معاي في الجامعه اتزوجت دكتورا كدا ببساطه وقبلها اخوي اتزوج بنت جيرانا عاش معاها قصة حب حلوه اتتوجت بالزواج طيب وانا ليه ما بتحصل معاي زي الحاجات دي وبديت اتنازل شويه مازن اول واحد طلع في وشي عشنا قصة حب عنيفه كنت وكنت متأكده انو ما حانستمر كل يوم بنتناقش ونعلي اصواتنا ننفصل ونرجع هو الكان بصالحني كان متحملني كتير بس برضو بضغط علي في
حاجات بقت عادي عند بعض الناس او ما بتخلو علاقات الحب منها انا ما قادره اتقبلا وكنت برفض حتى امو يمسك يدي لدرجة اني بقيت ما بسلم عليه وهو كل يوم بضغط علي وانا بعاند لحدي ما اتخرجت شويه شويه بقيت اتنازل وبدل ما كنت بغطي لهاجر هي البغت تغطي علي لمن مرات بتزهج وفي النهايه وصلت للأنا فيه اسي دا طلعت من البيت نص الليل بعد ما قررو يعرسوني لود عمي ومشيت لمازن حبيبي حتى هاجر ما وريتا وهي اتفاجأت باني ما موجوده اتصلت بي وما رديت لها كانت خايفه شديد ومتوتره حتى امي لاحظت لها بس ما اتكلمت ما اتوقعت اني طلعت نهائي ومشيت اتزوجت مازن في السر كانت فاكراه جاء يشوفني وانا طلعت له برا عشان كدا حاولت تطلع تناديني ولحدي الصباح كان عندها امل ارجع وما حصل انا ما قدرت انوم الليل كلو حاضنه رجولي وخايفه دموعي كانت حاضره ما عارفه اتصرف كيف واهلي حايعملو شنو الصباح والمكان الغريب الانا فيه دا غير الخوف من مازن خايفه نفسو تسمح له يعمل فيني حاجه اول ما سمعت  اذان الصبح حسيت بشوية اطمئنان عاوزه اقوم اصلي اتذكرت انو مازن برا وهنا مافي ولا حمام ولا مصلايه غمضت عيوني شالتني
نومه طويله صحيت خايفه شديد ولقيت مازن قدامي
قولي بسم الله  : مازن؟  :  صباح الخير حبيبي  : انت دخلت كيف  : عندي مفتاح قلقت عليك لانك طولتي في النومه الشمس لمن طلعت : ما قدرت انوم الا الصباح  : ليه حبيبتي كنتي تصحيني مدام ما جاك نوم  : ما حبيت اقلقك : يلا قومي جبت لك فرشه اتسوكي وصلي عشان نفطر  : حاضر : يلا بسرعه جعت وانا منتظرك
في الوقت دا بيتنا كان مقلوب وهاجر ما قدرت تقول لهم انو انا طلعت من امس ومشيت الاقي حبيبي غير كدا خافت يكون حصل لي شي عشان كدا ما جيت + هي ما بتعرف حاجه عن مازن ولا عندا رقمو اوي كان قلقان شديد لمن ضغطو ارتفع
دي نهاية الدلع يا عمي شايف العملتو بنتك؟  في بنت ناس بتبيت برا بدون علم اهلا؟  ولا عارفنها مشت وين للصباح  : انت مصر يعني؟ اختي ما بتعملا انا واثق
فيها اكيد حصل لها شي هدي حاجاتا كلها قاعده ما شالت اي شي  : والتلفون  : ويعني شنو التلفون ما موجود امكن اتسرق : انت بتتكلم كيف بعدين عادي تكون ملابسا قاعده  : اسكتو خلاص وامشو فتشو البنت دي بدل الكلام الفارغ البتعملو فيه دا  : انا بحذرك يا الزبير اوعا اسمعك تقول كلام ذي دا تاني عن بنتي عشان تدعم رفضك لها اصلا الموضوع كلو كان هظار انا بنتي ما سلعه عشان اعرضا لك  : انا اكتر واحد متمني يكون كلامك صاح طبعا هو يداب انتبه لكلام ابوي انو كان بغشوه وحس بغضب اكتر اما امي كانت بتبكي وما قادره تتمالك نفسا كانت متأكده اني اتخطفت
جيبو لي بنتي يا الفاتح جيبوها لي الزمن الانتو بتضيعوه في الكلام دا محسوب على سلامتا دي سمر دي سمر ما غيرا دي المستحيل تغلط اكيد اتخطفت ابوي زاتو ما قدر يمسك نفسو قرب ينهار بس برضو طلع يفتش وكلهم بقو شغالين تفتيش ويسألو
هاجر اتصلت باصحابي وللأسف مافي زول عارف حاجه حتى انهم مشو الاقسام والمستشفيات اخواني كانو
حريصين انو مافي زول من الاهل والجيران والاصحاب يعرف بالحصل حتى لمن سألوهم كان بطريقه غير مباشره ما ادوهم فرصه يفهمو المشكله اليوم عدا من غير ما اظهر وابوي فتح بلاغ هاجر فكرت تنشر صوري في القروبات بس اخواني ما خلوها لانو فضيحه كل ما تحاول تكلمهم ما بتقدر دخلت صفحة مازن ورسلت له قال لها ما عارف ومثل انو قلقان الزبير شكوكو بدت تتلاشى وحاسي بالمسؤوليه شويه غضب لانو سفرو اتأجل وعطل شغلو بسببي وامي بتلوم فيهم ومحملاهم المسؤوليه لانو كذبو علي قالت لهم اكيد طلعت من البيت بسبب كذبكم ولانها ما عاوزه تتزوج الزبير  : مهما كان السبب سمر عاقله ما بتتصرف كدا  : الله اعلم  : اكيد قاعده عند واحده من صحباتا انا حامشي لهم بيوتهم واحده واحده وبسوق هاجر معاي  : كوثر  : مافي حل تاني ما بخليهم يشكو اطمن والله العظيم ما بحسسهم بشي خليني اعمل كدا عليك الله
وفعلا امي ساقت هاجر واحمد اخوي وبقو يلفو على صحباتي نظام جايين زياره ويعزموهم لتخريج هاجر بس اغلبهم ما عارفين حاجه عني وعلاقتنا انتهت مع التخريج حتى انهم كانو بسالو هاجر عن حالي وبقولو
لها اختك بياعه انا طبعا من حبيت مازن فصلت الناس كلها واتفرغت له هو مع الاسف وفي الوقت الكانو فيه اهلي قلقانين وببكو انا كنت عايشه احلى لحظات مع مازن مشينا السوق واشترى لي ملابس بعدها مشينا السكن كنت خايفه شديد زول يشوفني بس ما حصل كانت مغامره حلوه بالنسبه لي وبديت اضحك بهستريه لمن دخلنا الغرفه وبدون ما اقيف لمن هو استغرب قال لي سمر انتي واعيه؟  : واعيه : كدي قوي : مازن انا كويسه والله بس اول مره في حياتي اعمل كدا ولا اخاف للدرجه دي  : بعد الضحك دا خايفه؟ والله انتي مجنونه يلا قومي خلينا ناكل : تمام : حاتقعدي بالعبايه دي كتير نحنا اشترينا ملابس كتيره : الحمام بوين اشر لي عليه دخلت استحميت ولبست جلباب وتوب طلعت لقيتو بصلي بعد خلص صليت انا وكان مجهز الاكل قلت له حاتفضل تدلعني كدا بعد نتزوج ولا حاتتغير؟ : بعد نتزوج دي شنو ما نحنا اصلا متزوجين امس ما عقدنا؟ : في السر : في السر في العلن نحن متزوجين وانتي حلالي ولو ما كدا قاعدين مع بعض على اساس : خلاص بطل نقاش : ودا رأيي برضو وطلعي التوب العاوز يرميك دا عشان تقدري تتحركي بحريه في بيتك : مازن : ما مازن : بتبالغ ياخ يعني عاوزني اقعد
من غير توب؟ : ايوا لانك مرتي حاتخجلي من راجلك يعني؟ وانا اصلا وعدتك ما اقرب عليك حاليا ما تخافي مع انو طمني بس ما قدرت اقلع التوب وفضلت به المشكله كانت انو قاعدين بس في غرفه واحده وفيها سريرين
اسف حبيبتي مضطرين ننوم مع بعض بس اوعدك انو ما ازعجك ابدا من سريري دا ما بتحرك وخلي النور شغال لو خايفه  في البدايه خفت بس اضطريت سلمت للأمر الواقع ضميري كان مؤنبني شديد دا شنو الانا عملتو في نفسي دا والجابرني على كدا شنو واهلي الحاصل فيهم شنو ابوي عندو ضغط وامكن ما يتحمل فجاءة اتذكرت انو تلفوني ما معاي دموعي بدت تجري وخوفي ذاد حسيت بثقل في السرير والملايه بتتسحب مني
يتبع