في عرين الاسد

في عرين الاسد 11

#في_عرين_الاسد
#بقلمي  :  #مشاعر_مبعثره
الحلقه  (11)

انا ضبطت المنبه وصحيت بدري عشان ارتب البيت
وهو لمن صحى لقى الشاي جاهز وكمان معاه كيك بس مشى عمل شاي براه وما اكل من الكيك ولا حتى علق على اي حاجه الانسان دا انا خلاص كرهتو وطلع لي من نفسي ما عارفه فهمو شنو نفسي ادخل جوا راسو واعرف هو بفكر في شنو وناوي لي على شنو وليه ما عاوز يطلقني ولا يخليني اعيش بحريه ذي باقي الناس خليتو بعد طلع شلت الكيك ومشيت بيت ليلى الحمدلله لقيتا قاعده اديتو لها في صحن بعد سلمنا على بعض وسألتني من العرس
عملت الكيك دا وطلع كتير اديه للأولاد مع الشاي  :  انا ما عندي اولاد يا سمر لكن بناكلو انا وبدرالدين  : اسفه ما كنت عارفه والله ربنا يقسم لك  :  انشاءالله  :  مشيتو لدكتور قبل كدا  :  مشينا مره واحده بس طلع العيب فيني وهو رفض نرجع تاني بجيب لي علاج بلدي بس   :  حاولي اقنعيه  : انشاءالله يداب فهمت هي له متمسكه بابو جيقه جيقه حقا دا كدا ليه انا ما قدرت اقعد معاها كتير وطوالي رجعت بالمساء الزبير جاء ومعاه صاحبو ما وراني زاتو لانو ما عندي تلفون ما كنت محضره اي شي قال لي معقول يعني ولا حاجه ساي ما عملتيها قلت له ما هو انت لو ما كان شلت
تلفوني وكسرتو كان اتصلت وخليتني اعمل حسابي بدل سواد الوش دا قال لي جبت معاي كم حاجه بس اعملي شاي وعصير بعد العشاء  صاحبو دا اسمو طبعا زول طيبان شديد ووناس عكسو قال له مرتك انصار سنه ولا شنو ما جات سلمت علي  :  لالا  : طيب مالك داسيها مني شنو الحركات دي  : يا زول حركات شنو اسي بناديها لك وقام ماشي قال له ما تناديها من هنا ولا ما عاوزني اعرفك بتناديها كيف  : حيوان جاء ناداني لبست توب وجيت طالعه
سمر صح؟  : ايوا  :  كيف حالك يا زوله  : تمام الحمدلله  :  نصيب الاسد طوالي حمر له قال له ما تحمر لي يا زول وهارشه كدا مالك اوعك تخافي منو يا زوله دا ما بمشي بالمسكنه  : والله كويس اخرب البيت واقعد كمان جابت لها تحاريش  : بهاظر ساي هوي ما تسمعي كلامي انا بعد شويه بمشي وبخليك تواجهي براك اقعدي واقفه مالك  : الشاي في النار  : ملحوق الشاي اقعدي اقعدي انا فتحي صاحب راجلك لك غيري ما عندو اصلا  : والله اتفضلت علي  : ما تصدقي برضو اسف بالمناسبه لازم تجونا الوالده زعلانه لانو ما عزمتوها العرس وعازماكم لو ما جيتو اشك انها
تسامحكم تاني  : انشاءالله  : اعتبر دا وعد؟  هزا راسو قال له هدي سمر شاهده والراجل بمسكوه من لسانو المهم قعد معانا لبليل وظريف ظرافه مشغله للزبير شديد وهو شكلو بعزو وما بزعل من تحريكاتو دي شرب معاه الشاي والعصير انا لمن نمت خليتهم قاعدين بتونسو ما عارفاه مشى متين زاتو الصباح لقيت المطبخ نضيييف والعده في مكانا شكلهم ظبطو الوضع بعد خلصو هاجر جاتني قيلت معاي وكانت جايبه لي اخبار صادمه  يا بنت الناس دي كلها بتتكلم من امس قالو مشى لأهلا عديل وحايعرسا فيك شكلهم كانو مخططين من بدري سندس قالت لي حتى  الصاله حجزوها  : هو الزبير بحضر حفلات؟ : البنت القادره دي بتعرف تمشيه لازم تتصرفي اوعك تسمحي له يعرس فيك انشاءالله يطلقك زاتو.  : مافارق معاي يا هاجر يعرس يموت هو حر : انتي مجنونة؟  ولا فاكراها لعبه  انتي عروس لك شهرين يداب وراجلك حايعرس فيك الناس يقولو شنو  : يقولو الاقولوه ما غرضي بالقوالات  : ابوي زاتو ما راضي امس كان معانا ابوي ناداه واتكلم معاه اتخيلي راجلك الما محترم رد لابوي الكلمه بالكلمه وقال له حياتي مافي زول يتدخل فيها ابوي قال له معناها طلق لي بنتي  قال ما بطلق  لاقاك انسان اناني كدا دا عاوز
يعذبك العمر كلو احسن لك خلي له البيت دا وارحعي بيت لبوك احسن  : بيت ابوي الانطردت منو تفتكري ابوي عاوز كدا بالجد؟  طردني منو زمان واسي تفتكري حايرحب بي عزباء  : هو كان زعلان  منك بس اسي ندم على قرارو المتسرع وعاوزك ترجعي  :  وانا مستحيل ارجع بيتكم دا تاني حاولت كتير تقنعني بس انا زعلي كان اكبر وما قادره انسى العملوه معاي لمن كنت ضعيفه  شديد ومحتاجاهم لو مشيت بيتنا ما حارتاح انا مستعده لاي حاجه تحصل لي اتعودت خلاص
لمن جاء من الشغل قلت له انت ليه ما وريتني انك عاوز تتزوج عبير فاكرني حازعل يعني؟ عاين لي ومشى لحقتو قلت له انا بالجد ما زعلانه وما مستنكره يعني بعد العملتو معاي انك تعرس فيني عشان توجعني حاجه سطحيه اطمن ما بتأثر علي  : مبسوطه صح؟ عاوزه تطلقي وترجعي بيت اهلك صح؟  : انا ما طلبت الطلاق  : يا سلام ما طلبتيه وما وريتي ابوك برضو؟ بس دافي احلامكم ما بطلقك لو تموتي فاهمه البيت دا قدرك وما حاتطلعي منو الا جثه الزواج دا مدتو مدى الحياه يا انتي متي او انا اموت حتى تتحرري ختي الكلام دا قدامك قبل تفكري ولا تخطي اي خطوه
ومشى خلاني كلامو كان ذي السهم في قلبي انا فعلا اتعودت على اسلوبو بس برضو كل مره بنوجع منو كل ما اقول ما بتأثر برجع انكسر ودموعي تجري سندس اتصلت بي بتلفون الزبير تكاوي فيني