How to flirt with the final boss 2

Arc 10 part 15

        Yoko သည် ပူပြင်း‌လောင်မြိုက်နေသော နေရောင်အောက်၌ ချွေးတဒီးဒီးကျနေ၏။ ကမ္ဘာပျက်ကပ်တွင် ဖုတ်ကောင်ကို ရှောင်လွဲမရသလို ရာသီဥတုဖောက်ပြန်မှုကိုလည်း မလွဲမသွေကြုံတွေ့ရမည်ဖြစ်သည်။ ကမ္ဘာပျက်ကပ်အစပိုင်း၌ ရှားပါးလွန်းသော စွမ်းအားရှင်များကို အစုလိုက် ချောက်ကမ်းပါးထဲတွင် ခြေရာခံမိကြောင်း system က သတိပေးလာချိန်တွင် Yoko မှာ အပျော်လွန်သွားပြီး ဦးနှောက်က အလုပ်လုပ်တော့‌ဘဲ ခုန်ချလိုက်မိ၏။ သို့နှင့် လွယ်ကူသောအလုပ်မှာ နေ့တစ်ဝက်ကြာအောင် တစ်ယောက်ချင်း ထမ်းပိုးကာ ချောက်နက်ထဲမှ ပြေးတက်ပြီး ကယ်ဆယ်ခဲ့ရသည်။

    ခေါင်းဆောင်ဟု ယူဆရသည့် လှပသောအမျိုးသမီးကို ကယ်ဆယ်ပြီးချိန်တွင် သူ့တွင် လက်တစ်ချောင်းစာလှုပ်ရန် အားအင်ပင် မကျန်တော့ချေ။ သို့နှင့် မီးလိုပူနေသော ကတ္တရာခင်းလမ်းမပေါ်တွင် အသက်ကို မနည်းလုရှူရင်း စွမ်းအားများ ပြန်ပြည့်ဝလာမည်ကို စောင့်နေရ၏။

      ထိုစဉ် မျက်နှာတစ်ခြမ်းရှုံ့ပိန့်နေသည့် ဇွန်ဘီကောင်က သူ့အနားကို ချည်းကပ်လာသည်။ ဇွန်ဘီဖြစ်ပြီးမှ ကားတိုက်ခံလိုက်ရပုံပေါ်သည်။ တစ်ကိုယ်လုံး ခွေယိုင်စွာဖြင့် အကောင်းပတိအတိုင်း ရှိနေသည့်နေရာလည်း ညာဘက်လက်တစ်ဖက်သာရှိသည်။ ထိုဇွန်ဘီက မျက်စိရှေ့ရှိ မောပန်းလွန်း၍ ခြေကုန်လက်ပန်းကျနေသော Yoko ကို စားသုံးကာ ဆာလောင်မှုကို ဖြည့်တင်းချင်နေပုံပေါ်သည်။

     ရုတ်တရက်မို့ system ကလည်း သူ့ကို ချက်ချင်း စွမ်းအား မမြှင့်တင်ပေးနိုင်‌လိုက်ပင်။ စွမ်းရည်များကို လစ်မစ်ကျော်သည်အထိ ထုတ်သုံးထားရသောကြောင့် လက်ရှိတွင် Yoko ၏ခန္ဓာကိုယ်မှာ ပြောင်သလင်းခါနေအောင် နှိုက်ထုတ်ထားခြင်းခံထားရသလို ဖြစ်နေ၏။ ဇွန်ဘီက သူ့ဆီမှ အာရုံပြောင်းသွားစေရန် ကိုယ်ယောင်ဖျောက်လို့မရသလို အမြန်ထပြေးဖို့လည်း မတတ်နိုင်ပေ။

     ငယ်စဉ်ကတည်းက အပြေးအားကစားသမားဖြစ်ချင်ခဲ့သော လူငယ်လေး Yoko သည် system နှင့်ချိတ်ဆက်ပြီး ကူးပြောင်းသူဖြစ်လာသည့်တိုင် တစ်စစီဆွဲဖြဲကာ စားသုံးခံရသည့် အဆုံးသတ်မျိုးက ကြိုဆိုနေလိမ့်မည်မှန်း မမျှော်လင့်ထားမိပေ။ ရုတ်တရက်ကြီး အိမ်ပြန် အိပ်ချင်လာသည်။