كتمان [ مكتملة ]

الحلقة 57

شافتهم مدخلينو... زادت هبلت مقدرتش تأمن.. حب حياتها لي تعذبت على جالو... لي كانت قادرة تمدلو كلشي مات وخلاها.... عرسهم كلشي راح... على الأقل كان أمل بنو حي ويجي نهار يرجعلها وتسامحو اما درك مكانش أمل يرجع.... بلال مات

ناضت ومشات ليه وطلقت عيطة من قلبها... ونسا راحو يحكمو فيها....وهي في فمها غير اسمو
".... نتا كذاااااااب هئ هئ خدعتني... قلتي نزوجو ونجيبو لولاد... وينهم وينك علاه رحت وخليتني.... هئ هئ يا بلال انا مسامحتك غير نوض... والله ما نزيد نلبس هاديك العباية... تحب غدوة نلبس جلباب غير نوض... متخلينيش عندي غير نتا بلال... بلاااال اطلقوني خليونيييي نوضو... بلاااال "

دمرت... مخلاتهمش يخرجوه ولا يحركوه حاكمتو وتمسحلو في وجهو وعينيه.... راح الغالي..... راح روحها وقلبها.... الموت خطفتلها كلشي....
♣️♣️♣️♣️♣️

كان يدوش..... حس بنغزة في قلبو وفمو تعبا دم .. بزقو وغسل فمو...
فتون كانت تقرأ في كتاب حتى سمعت تليفونو يصوني فلول محبتش تقيسو مبعد ناضت.... لقاتو مكتوب معتز... عرفتو خوه.. خافت تهز عليه ... ومبعد سنات لقاتو مزال مخرجش هزت عليه ويديها يرجفو، دوب ريبوندات سمعت صوتو يعيط

"... شوف علاء.... متكوبيش عليا اسمع انسا كلشي وأرواح للدار... علابالي بيك بارد ومتحبناش اما أرواح على الاقل في جنازة خوك.... علاء بلال مات... يما ماهيش مليحة والعائلة كامل حازنة... مسحقينك بيناتنا علاء... دير جاست وأرواح... الو الو راك معايا..."

كوبات بزربة... وهي مصدومة كيفاه رايحة تقولو خبر كيما هادا.. شافتو خرج راحت ليه مرعوبة...
بلا ما يشوف معاها نطق...
"... وش كاين؟؟ شكون لي عيط وريبوندا عليك.... "

حاجة ما تخفا عليه... هبطت عيينها وقالت بصوت واطي..
"... خخخخوك مات... "

جمد للحظة يستوعب وش قالت... بقا يدور في راسو وش نطقت درك... حكمها من يدها وعينيه غماقو...

"... فتون متهبلينش شكون لي عيط..؟؟"
".. خوك معتز...قالك بنو بللللال مااااا مات "
".... كيفاه ؟؟؟"
راح يجري للتليفون يعيطلو... وقلبو يخبط فالألف مزال مأمنش... كيفاه بلال مات؟؟ خوه مات وين وكيفاه؟؟؟
"... الو...."
".... شكون لي مات... ولكان لعبة درتوها بش تجي غير احلم... الدار هاديك منزيذش نجي."
"....بلال مات افهم خونا راح... لقاوه ميت فالبحر..... يما مريضة.... أنا عيطتلك بش نعلمك بوش صرا وانت دير وش يخرج عليك..وراح ندفنوه مورا العصر..."

"....عندكم تدفنوه قبل ما نجي.... "
كوبا عليه.... ويديه يرجفو طاح قاعد على الكرسي وحاط يديه على راسو....
قاعدة تراقب حالتو وهي تبكي... تسنا فيه يفرغ قلبو ولو مرة... تسنا فيه يبكي ويخرج الامو لي مسيطرة عليه..... قربت ليه وحطت يديها على وجهو.... بعدها عليه وناض هز مفتاح الطموبيل....
حكمتلو يدو
".... نروح معاك... متخلينيش وحدي.."
لبست سباطها بسيف ولحقتو... مداو معاهم حتى حاجة... لمهم يوصل قبل ما يدفنوه...

كمل يسوق وعينيه فارغين... جثة جامدة... وفي راسو خوه....