How to flirt with the final boss 2

Arc 10 part 24

      ပြန်လည်ထူထောင်ရေး လုပ်ငန်းစဉ်က ထင်ထားသည်ထက် အချိန်ပိုကြာသွားခဲ့သည်။ အကြောင်းမှာ စွမ်းအင်မြှင့်တင်ရေးဆေးရည်၏ ဘေးထွက်ဆိုးကျိုးတွေကို ခံစားနေရသောကြောင့်ပင်။ စွမ်းအင်အသုံးပြုသူတွေ၏ခန္ဓာကိုယ်မှာ လူသာမာန်များထက် ပိုသန်မာသည်ဆိုသော်ငြား ယခုအဖျားမှာ ရိုးရိုးဖျားနာခြင်းမဟုတ်လေရာ အလွန်ဒုက္ခရောက်ရသည်။

     Misaki ၏ကြိုတင်ပြင်ဆင်မှုများက အသုံးဝင်လာခဲ့သည်။ အစိုးရအထက်ပိုင်းနှင့်လည်း ချိတ်ဆက်နိုင်ခဲ့ပြီး နည်းပညာအကူအညီတွေလည်း ရလာခဲ့၏။ အိပ်စရာ စားစရာရှိပြီး ဇွန်ဘီရန်ဘေးကိုလည်း ကြောက်စရာမလိုတော့လေရာ အခြေစိုက်စခန်းမှလူများသည် စိတ်လက်အေးချမ်းချမ်းသာနေကြ၏။

    မျက်လုံးနီဇွန်ဘီများက လုံးဝချုပ်ငြိမ်းသွားကြပြီဖြစ်သည်။ Robert သည်လည်း ဒီကမ္ဘာမြေမှ နှင်ထုတ်ခံလိုက်ရပြီဖြစ်ကာ နောက်တစ်ခါ ထွက်ပေါ်လာဖို့ မဖြစ်နိုင်တော့ပေ။ သို့တိုင်အောင် အဆင့်နိမ့်ဇွန်ဘီများက နေရောင်ကို ရှောင်လျက် လမ်းကြိုလမ်းကြားများ၌ ပုန်းခိုလျက် သားကောင်ဖမ်းရန် စောင့်ဆိုင်းနေကြဆဲပင်။ ထို့အတွက်လည်း ရှင်းလင်းရေးက မဖြစ်မနေလုပ်ရန် လိုလာသည်။

    ကားပေါ်မှ ခုန်ဆင်းလာသော အမျိုးသားသည် အရင်ကလို အပျော်အပါးမက်သည့် ကောင်ငယ်လေးမဟုတ်တော့ပါ။ သေခြင်းနှင့်ရှင်ခြင်းတို့ကို မျက်စိရှေ့တွင် ထပ်ခါထပ်ခါကြုံဆုံပြီးနောက် duke သည် အရွယ်ရောက်ရင့်ကျက်လာခဲ့ပြီဖြစ်သည်။ မဟုတ်လျှင် သူ့ထက် အတွေ့အကြုံနည်းပါးသည့်လူတွေကို ဦးဆောင်ကာ ဇွန်ဘီရှင်းလင်းရေးကို ဆောင်ရွက်နိုင်လိမ့်မည်မဟုတ်ပါ။

   Jack က Duke ကို မြင်သွားချိန်တွင် လက်ကိုဝေ့ရမ်းကာ သူ့ဆီလာဖို့ လှမ်းခေါ်လိုက်၏။ သန်မာသည့်အဘွားက လယ်ကွင်းထဲတွင် အခြားသူများကို ရှေ့ဆောင်လမ်းပြကာ အလုပ်လုပ်နေသည်။ ကမ္ဘာဦးခေတ်အစကို ပြန်ရောက်သွားသည်နှင့်ဆင်တူနေသော်လည်း ကမ္လာပျက်ကပ်၏ဒုက္ခသုခအလုံးစုံကို ခံစားတွေ့ကြုံခဲ့ရသူများအဖို့ ဒီလောက်ပင်ပန်းရခြင်းက စာမဖွဲ့လောက်တော့ပါ။ ရေဒီယိုအသံလွှင်သည့်အမျိုးသမီးက နှစ်လသားအရွယ် ကလေးလေးကို ပွေ့ပိုက်ထားရင်းမှ သူမ ကြားရသည့်သတင်းတို့ကို Jack တို့အား ပြန်ပြောပြနေသည်။