سلف و دين بقلم /لولو_محمد

الحلقه ٤٢

(((((((( سلف و دين ))))))))
#لولو_محمد
الحلقه ٤٢
فى شقه منال
منال تفتح الباب على شايل حاجات كتير
منال / ايه ده كلو يا على هو انت كل مره يابنى تعمل كدا هات عنك هات
على / لا عنى ايه افتحى بس انا هدخلهم
منال توسع على يدخل فى نفس ذات اللحظه الاسانسير يوصل و يتفتح و نور تطلع منه و هى بتعيط تفتح باب شقتها و ترزع الباب
منال / نور مالك يا بنتى نور نور
.......................
منال تخبط على الباب نور ما تردش على يطلع من جوه
على / فى ايه
منال / والله يابنى ما عارفه نور جت من بره معيطه دخلت و قفلت عليها
منال تخبط على الباب و الجرس تانى نور تفتح الباب عنيها حمره دم
نور / ايوه يا طنط
منال / مالك يا بنتى
نور / مفيش تعبانه شويه و عاوزه انام
منال / طب ما تيجى تقعدى معايا شويه
نور / عشان خاطرى يا طنط سبينى شويه و انا هبقى كويسه
منال/ اللى تشوفيه يا بنتى
نور / عن اذنك
نور تقفل الباب
على / ما كانش المفروض تسبيها لوحدها كنتى دخلتى قعدتى معاها
منال / والله يابنى ما عارفه البت دى مالها مش مكتوب لها الفرحه ابدا انا هدخل اكلم امها تيجى تبص عليها
على / ماشى تعالى
على و منال يدخلوا جوه و يقفلوا الباب
...............................
فى شقه عمر
عمر يدخل شايل كيس مليان حلويات و ايسكريم
سمر / حمد الله على السلامه اغرفلك
عمر / أية عامله ايه
سمر / كلت لقمتين بالعافيه و دخلت تنام
عمر / طب اغرفيلنا و انا هدخلها
سمر / ماشى
عمر يدخل بالراحه يلاقى أية نايمه يحط الكيس على الارض و ينام جنبها تصحى ياخدها فى حضنه
عمر / كدا يا أية ينفع
أية / والله السؤال الخامس
عمر / بلا خامس بلا سادس طظ انا بتكلم ينفع تعيطى كدا ينفع ايه يعنى امتحان و عدى و انا قولتلك انتى عملتى اللى عليكى خلاص
أية / كان نفسى تبقى فرحان بيا
عمر / و هى النتيجه بانت تعوضيها فى الماده الجايه تصدقى يا بت ما كنتش اعرف انك نكديه
أية / انا ؟؟؟
عمر / اه لازم تعملى حسابك انا بحب الست الفرفوشه اه ما ليش انا فى العياط و الغم ده شبعنا منه ااااااااااااااخ بخصوص شبعنا انا واقع من الجوع
أية / اغرفلك
عمر / هتاكلى معايا
أية/ انا كلت
عمر / خلاص هاكل لوحدى و احلى بكيس الحلويات ده كلو لوحدى
عمر يرفع الكيس من على الارض أية تبتسم
عمر / انسى الماده دى خلاص و نركز فى اللى جاى اتفقنا
أية تهز راسها و تقوم هى و عمر يطلعوا بره
.........................
فى شقه نور
نور بتلم هدومها فى شنطه و تقفلها جرس الباب يضرب تروح تفتح تلاقى نهاد
نور / ايه البجاحه دى انتى بانهى عين تيجى لحد هنا
نهاد / انا مقدره موقفك
نور  / انا ما ليش كلام معاكى
نور تحاول تقفل الباب نهاد تمنعها و صوتهم الاتنين يعلى
نور / هى بلطجه يعنى هو انا ما اقدرش ازقك و ارزع الباب فى وشك
نهاد / عاوزه تزقينى و انا حامل عاوزه تسقطينى
نور / حامل
نهاد / و انا اللى كنت فكراكى هتفرحى دا ايه الانانيه اللى فيكى دى يا شيخه
منال تفتح الباب
نور / اقسم بالله لو ما مشيتى من وشى السعادى لكون مفرجه عليكى امه لا اله الا الله انتى فاهمه و لا لا غورى
باب الاسانسير يتفتح و مروان يخرج منه
مروان / تعالى نتكلم جوه يا نور بلاش فضايح
نور / انت لسه شوفت فضايح و بعدين طول ما انا فى البيت ده بنت الكلب دى ما تدخلش بيتى انت فاهم و لا لا
مروان / اولا هى مراتى زيها زيك بالظبط
نور / انت كمان بتساويها بيا
نهاد / ليكى حق ما انتى كنتى من شويه عاوزه تزقينى تسقطينى
مروان / نور انتى اتجننتى
نور / اتفوا عليكوا زباله ولاد كلب
مروان يضربها بالقلم تقع فى الارض منال تجرى عليها
منال / هو فى حد بيعمل كدا تعالى يا نور تعالى
مروان / و انتى مال امك انتى
على يطلع من جوه و يمسك مروان و يوقعه فى الارض و ينزل فيه ضرب و منال عماله تصرخ و تحوش هى و انور اللى طلع على الصوت و يشدوا على و نور و يدخلوا جوه ويقفلوا الباب
مروان / يلا يا ولاد الكلب انتوا فاكرينها سايبه كتكوا القرف
نهاد / بينا على القسم نعمل فيهم محضر
مروان يروح يخبط على الباب جامد على يروح عشان يفتح انور يمنعه و نور قاعده بتعيط فى حضن منال
مروان / عنك ما فتحتى خليكى جوه انتى اصلا ما تلزمنيش لا انتى و لا البلطجيه بتوعك انتى طالق سمعانى طالق
مروان يقفل باب الشقه و ياخد نهاد و ينزل و نور عماله تعيط
على / انتى بتعيطى ليه دا حيوان دا انتى ربنا نجاكى منه
نور / و انت مالك اعيط و لا ما اعيطش انت مالك هو انت ايه شريكى انت ايه حكايتك اصلا كل مره تحصل فى حياتى مشكله بلاقيك واقف كل مره بتكون موجود ليه مالك و مالى يا اخى عاوز منى ايه ما ترحمنى بقى ما ترحمونى كلكوا
منال / نور
نور تقوم و تفتح الباب و تركب الاسانسير و تنزل
انور / ما تزعلش منها يا على هى برده مش فى وعيها
على / عارف عن اذنكوا انا لازم امشى
منال / احسن برده ابعد الفتره دى و ما تجيش هنا الا بتليفون
على يبص لمنال
انور / انا رايى كدا برده يابنى احنا لما هنلاقى الدنيا هديت هنقولك تعال
على يمشى
...........................
فى شقه ندى
حسام قاعد بيشتغل على اللاب تليفونه يرن يكنسل و يتصل هو
حسام / ازيك يا اروى
اروى / ازيك يا حسام عامل ايه
حسام / الحمد لله كويس انتى اخبارك ايه و اخبار عمتى و العيله
اروى / والله يا حسام اخبار ما تسرش خالص
حسام / فى ايه خير
اروى / عمتى معاك اهى
امانى / ايوه يا حسام شوفت اخره عمايلك
حسام / فى ايه يا ماما قلقتونى فى ايه اللى حصل
امانى / الكلب ابن الكلاب طلع متجوز من الزفته نهاد اختك كان معاها حق شوفت اللى جيت دافعت عنه شوفت ابن الحرام عمل ايه و فى الاخر طلق اختك و ضربها قدام الناس
حسام / نور عامله ايه دلوقت
امانى / قافله على نفسها الباب و ما فصلتش عياط و الله و الله ما انا سيباه
حسام / بصى خليكى جنبها و انسى مروان ده خالص ماشى
امانى / سبتك تتصرف قبل كدا انا قولت البت تطلق قولت نحل و فى الاخر ما نابنا غير انه يضرب اختك بالقلم
حسام / اسمعى الكلام انا عارف انا بعمل ايه و ما تقلقيش القلم ده هيتردله عشرين و احنا فى مكانا خليكى بس جنب نور و سيبى الباقى عليا
امانى / انت هتنزل تانى
اروى تشد منها الموبايل
اروى / انت هتنزل بجد يا حسام
حسام / لا طبعا مش هينفع انزل دلوقت خالص بس خليها تعمل زى ما قولتلها بلاش اى مشاكل مع مروان و انسوه خالص و ان جه ما حدش يحتك بيه
اروى / حاضر اللى تشوفه
حسام/ سلام دلوقت
اروى / سلام
اروى تقفل
امانى / قالك ايه هينزل امتى
اروى / مش هينزل بس قال ما لناش دعوه خالص و نبعد و هو هيتصرف من هناك
امانى / اه يابن الكلاب انا بنتى تنضرب
اروى / ما تخافيش يا عمتى حسام عمره ما هيخلى الموضوع ده يعدى على خير
................................
فى شقه ندى
ندى تطلع من الاوضه تبص على حسام و هو بيتكلم فى التليفون حسام يقفل و يتصل بحد تانى
حسام / ازيك يا ياسر صرفت الفلوس اللى بعتهالك و لا لسه ..... لا طبعا مش هاخدها تانى انا بسال ان كنت عاوز زيهم .... بالظبط كفايه عليه كدا وصل الورق لحسين بيه .... يكون على مكتبه بكره الصبح انت فاهمنى .... كلمنى و قولى الاخبار خلصت على ايه عشان ابعتلك الفلوس ..... سلام
حسام يقفل
ندى / فى ايه
حسام / مروان طلق نور
ندى / انا هروح اكلمها
حسام / ندى
ندى / نعم
حسام / كنتى بتقولى ده حقك ربنا بيخلصه فى نور مش كدا
ندى / نور تبقى اختى يا حسام ما لهاش ذنب
حسام / انا اسف
ندى / عن اذنك
ندى تدخل اوضتها و تقفل الباب
...................................
فى شقه عمر
عمر / يوم لذيذ من اوله الصراحه
على / مش وقت هزار على فكره انا بجد مخنوق اوى
عمر / يابنى اكيد كلمتين قالتهم فى وقت نرفزه ما تقصدش
على / من زمان و انا بسال نفسى السؤال ده يا عمر من زمان و انا بقول هو انا نحس للدرجادى
عمر / و انت مالك يابنى
على / كل اللى حصل فى حياتنا و بتقول و انا مالى
عمر / ايوه انت مالك بكل ده
على / و امى و امك و عبير و ندى و انت و كمان نور كل دول
عمر / مالنا ما كلنا فى حياتنا مشاكل و انت يعنى حياتك سالكه اوى يابنى ما تحملش نفسك فوق طاقتها
على / عمر انا فى حاجه مخبيها عليك
عمر / ايه انا مش اخوك لقتونى قدام المعبد اليهودى
على  / بتكلم جد
عمر / اسف اتفضل
على / يوم فرح ندى انا روحت لبابا المحل
عمر يبصله
على / يوميها اتخانقت معاه كنت مخنوق منه اوى ما كنتش فى وعيى يوميها قالى انه عرف الحقيقه و انه مستعد يصلح غلطه و يلمنا فى حضنه تانى قالى اجيبك و ارجع البيت قالى انه اسف و ندمان
عمر / و بعدين
على / سبته و مشيت و لا كانى سمعت حاجه كان بيحاول يوصلك فى الكليه عشان يعرف طريقنا و يراضينا كان بيحاول يراضينا بس انا ما دتلوش فرصه قهرتى من جواز ندى ....
عمر يحضن على اللى بدا يعيط
على / انا اسف يمكن لو .... يمكن كنت اديتك فرصه انك تكون جنبه فى لحظاته الاخيره .... انا اسف
عمر / الله يرحمه
على/ الله يرحمه
عمر / لو هلومك يبقى لازم الوم غاده اللى وزعته لما جه يسال عنى كلو مقدر و مكتوب كلو نصيب لا انت و لا انا و لا حتى بابا الله يرحمه كنا مخططتين ان دى تبقى حياتنا ما تشيليش نفسك هم فوق همك انت عملت اللى عليك وزياده حاولت و انا حاولت بس هو نصيبنا كدا نعمل ايه
تليفون على يرن على يطلعه يلاقى مدام نور
عمر / اوبااااااا
على يبص لعمر
عمر / رد يابنى مستنى ايه
على / هقولها ايه
عمر / ما تقولش اسمع هى هتقولك ايه
على  / ماشى
على يقوم يطلع البلكونه و يرد
على / الو
نور / انا اسفه اوى
على / على ايه
نور / ما اعرفش انا ازاى كلمتك كدا انت ما لكش اى ذنب ما اعرفش انا قولتلك كدا ليه
نور تعيط
على / عادى على فكره انا مقدر و نوعا ما انتى معاكى حق
نور / لا طبعا
على / هههههههههههههههه ما انتى لما هتعرفينى هتتاكدى انى كائن النحس فعادى اوى مش بعيد اكون انا اللى نحستك
نور / انت ما كنتش دخلت حياتى اصلا لما بدات تبوظ
على / انتى عامله ايه دلوقت
نور / عادى
على / كويس ما طولتيش فى التعبانه و مخنوقه و الدنيا سوده فى عنيا و كدا
نور / انت بتقول ايه
على / والدتك عامله ايه
نور / ما اعرفش انا دخلت قفلت عليا الباب مش قادره اتكلم مع حد زمانها ماسكه التليفون و تتصل بطوب الارض تحكيلهم
على / و اخوكي
نور / اخويا سافر الله يعينه بجد لو ماما قالتله ينزل مش عارفه مراته تعبانه بره و مصاريف رايح جاى اصلا ما عدش له لزمه نزوله كل واحد يروح لحاله و كدا احسن كتير
على / انا شايف كدا برضه
نور / انا بجد اسفه اوى انا ما كانش المفروض اكلمك
على / لا ليه عادى تقدرى تكلمينى فى اى وقت و لو عوزتى اى حاجه
نور / انا مش قصدى انا قصدى هناك عند طنط منال ما كانش المفروض اتعصب عليك كدا
على / هههههههههههههههههه تانى ...يا ستى و لا يهمك وقت ما تبقى مخنوقه رنيلى بس و انا تحت امرك فى اى وقت
نور / انت بتقول ايه
على / المهم بس نفسيتك تبقى مرتاحه
نور / انا طولت اوى و اكيد معطلاك عن شغلك
على / ابدا خالص
نور / انا لازم اقفل سلام و بعتزر تانى
على / مع السلامه
نور تقفل و على يلف يلاقى عمر واقف رافع حاجبه
على / فى ايه
عمر / انا عاوز واحده تهزانى تهزانى تهزانى
على / امشى يلا
عمر يضحك على يحضنه
عمر / و يقولك البنات هبله بتتراضى بكلمه دا احنا غلابه يعم
على / الله يعينها يابنى والله صعبانه عليا اوى
عمر / ما يصعبش عليك غالى بقولك ايه ما تيجى ننزل نجيب شويه حاجات
على / تعال
.......................................
فى شقه نهاد
نهاد / انت زعلان اوى كدا ليه
مروان / انتى ليكى عين تتكلمى اصلا ما انتى السبب فى كل ده
نهاد / والله دلوقت بقيت انا السبب فى كل ده
مراون / ايه اللى وداكى عندها ايه اللى وداكى عند امى اصلا مش كان فى بينا اتفاق
نهاد / فكرنى معلش ايه هو الاتفاق تانى انى ابقى زوجه وقت فراغك اقبل باللى تديهونى انت اتجوزتنى ليه هاه كنت واخدنى تسليه اهو انام معاها و انبسط و مفيش عليا مسؤليات نزوه فى حياتك رد عليا
مروان يبصلها
نهاد / ازاى ما اخدتش بالى حتى من رده فعلك لما عرفت انى حامل طول الوقت بتشتكى بتشتكى بتشتكى و الكل غلطان قولى انا غلطت فى ايه انا اتجوزتك من غير لا شبكه و لا مهر و لا فرح و لا حتى شقه اتجوزتك عشان شوفت فيك الراجل الحنين اللى بالرغم من ان مراته ما بتخلفش و منكده عليه و اهلها بيئه و بتوع مشاكل مستحمل و مكمل قولت انك هتحسسنى بالامان و تعوضنى
مروان / و فى الاخر اكتشفتى ايه يا ست الكل
نهاد / اسمع يا مروان انا عملت اللى عليا معاك للاخر و ما طلبتش منك اى حاجه و سبت شغلى عشانك و ضحيت بمستقبلى بس كرامتى لا يا مروان مش هسمح لحد يمد ايده عليا انت فاهم
مروان / و هو انا سكت ما انا طلقتها
نهاد / حافظ على بيتك ده كمان يا مروان بيتك ده مش مجرد زوجه ده ولادك يا مروان مستعد تخسر ابنك اللى حلمت بيه سنين مستعد يا مروان
مروان يبصلها
نهاد / انت مقهور على فراقها و لا خايف من اهلها زى كل مره انا ما عدتش فهماك مدام بتحبها اوى كدا اتجوزت عليها ليه
مروان / عشان بحبك انتى كمان
نهاد / اخيرا قولتها يا مروان اخيرا نطقت كلمه حلوه من ساعه ما جينا
مروان / بس انتى عمرك ما هتفهمى بكره تشوفى و اه انا بحب نور بس فى نفس الوقت مفيش حد عارف اخوها قدى
نهاد / اعلى ما فى خيله يركبه بص اسمع روحلها روح لنور و اتكلم معاها مره اخيره و ان صممت اديها حقوقها كامله و انهى الموضوع بالمعروف و خلى الغلط من عندهم
مروان / انتى بتهزرى
نهاد / لا طبعا ما بهزرش هى ليها عندك ايه مؤخر و شبكه اديهملها
مروان / منين يا نهاد منين
نهاد / بيع الارض و بالباقى افتح مشروع او حاجه ليك
مروان / قولتلك قبل كدا ما اقدرش ابيع الارض امى بتاكل منها
نهاد / ما المشروع ده هيوفر دخل لوالدتك هو انا قولتلك ارميها دى امى يا مروان و فى عنيا
مروان / مش بالبساطه دى برده
نهاد / هتخسر ايه جرب خد والدتك و روحوا
مروان / امى عمرها ما هترضى تيجي معايا امها لسانها طويل و ممكن تجرح امى و انا ما اقبلش على امى حاجه زى دى
نهاد / بالله عليك دى عيله يتبكى عليها يا راجل فكها بقى اقولك تعال نروح بكره نكشف عند دكتور النسا و لما هتسمع النبض بتاع البيبى هتنسى نور و عيله نور كلها مش بعيد تنسانى انا شخصيا و تنسى نفسك كمان يا مروان ده الحلم اللى اتمنيته سنين خلاص هانت كلها شهور و يتحقق
مروان يهز راسه و يحط ايده على خده
.......................
فى شقه نور
محمد / انت بانهى وش جاى تانى
مروان / زى ما دخلنا بالمعروف نخرج بالمعروف
محمد / انا مش هسيب قشايه من حق بنتى
مروان / و انا مش ناوى اكل عليها حقها
امانى / و حق القلم اللى اديتهولها قدام الناس يا سى مروان
مروان / هى اللى ابتدت
محمد / بكره الصبح هجيب المحامى و نستلم عفش بنتى و مؤخرها
امانى / و هو العشر تلاف اللى انت كاتبلهملها دول مؤخر
مروان / هو انا ممكن اتكلم مع نور مره اخيره
محمد / ما افتكرش فى كلام ممكن يكون بينك و بين بنتى و نورت اتفضل
مروان / هستنى حضرتك بكره عن اذنك
مروان يمشى
امانى / ادى اخره ان ما حدش بيسمع كلامى
......................................
بعد فتره
فى محل فساتين
سمر / انا شايفه ان ده احلى يا أية
أية / بس دا غالى اوى يا ماما
سمر / الغالى يرخصلك يا قلب امك هو انتى بتتجوزى كل يوم
البياعه / على فكره بيبقى حلو اوى فى اللبس
سمر / انا عاجبنى خشى قيسيه
أية / ايه رايك يا عمر
عمر / قيسيه
أية / ماشى
أية تاخد الفستان و تروح مع البياعه و هى مبسوطه على الاخر
سمر / ههههههههههههههههههههههه ربنا يديم عليكى الفرحه يا بنتى حقه يا عمر لو خلصنا الفستان نطلع على الكوافير و نحجز عشان ننجز
عمر / هتحجزى الكوافير ازاى و احنا لسه ما حجزناش القاعه
سمر / يووووه نسيت و انت مستنى ايه يا عمر الله
عمر / باذن الله بكره و لا بعده اخد على و نلف
سمر / لا لا لا ما تاخذنيش يا عمر المفروض فى مشوار زى ده تاخد أية معاك الله مش هى العروسه و لا ايه
عمر / ربنا يسهل
سمر / على فكره لو الفستان غالى بناقصه على فكره
عمر / اللى يعجب أية هشتريهولها
سمر / يخليك ليها يا جوز بنتى
أية تطلع زى الملايكه
أية / ايه رايك
عمر / حلو اوى بكام ده
سمر / بخمس تلاف بس
عمر / ماشى هناخده
البياعه / معاد الفرح امتى
عمر / لسه ما اتحددش
البياعه / امال هتحجزه على اساس ايه
أية / هو ده مش بيع
البياعه / لا ده سعر الايجار بس فى منه للبيع
سمر / ايوه هو ده بكام بقى
البياعه / بخمسه و عشرين الف
...........................