في جنوب العراق وتحديدا في محافظة البصرة
الساعة ٢ ظهرا
نزلت من الكية قريب على منطقتنا ضليت امشي تقريب ال ١٠ دقايق واوصل للبيت والدنيا تسلك وصلت للبيت واني سايحة من الحر
دفعت الباب بدفعة وحدة نفتحت ريحة الاكل تفتح النفس طبخ امي ماكو منه حالتنا المادية ضعيفة بيتنا إيجار ابوية يشتغل حداد تعب هواي حتى يعيشنا من غير الديون العليه شكد حاول اخوية الجبير يبطلني بس بابا جان واكف بظهري فميكدر يسوي شي
اول ما دخلت للهول لكيت بوجهي وسام الي هو ابن خالي دائما يمنا يبو شكد لزكة
وسام :- اخيرا اجيتي واني اكول ليش البيت منور كاعد انتظرج تأخرتي
باوعتله صفح عفته مجاوبته
يمه يمه وينج
اجه وكف كدامي
وسام :- امج ماهيه قبل لتجين طلعت للفاتحه هيه وامي بعدين مو داحجي وياج على شنو شايلة خشمج متردين
ياقوت :- خييير شتريد
وسام :- لسانج لزمي ولتنترين بوجهي صوج ابوج مخليج تداومين محد طلع عينج غيره صار لسانج اطول منج محد يكدر عليج
ياقوت :- وانته منو حضرتك وتدخل وخر من كدامي
وسام :- يجي يوم واكصه للسانج وين تروحين مني
ابن ابوك وسويها شوف شسوي بيك خزرته ورحت طبيت جوا واني اسمعه يغلط ويفشر عشتو بعد عليه وسام الارعن لو يبقه بس هو ماخذه هو هم حظي وين ماكو واحد زايحته الكاع يجي عليه
دخلت لغرفتي متنرفزة قفلت الباب بدلت ملابس ميته من تعب شمرتهن ع الكرسي مابيه حيل بعدين اغسلهن جوعانة حيل بس ماريد اطلع لان هذا العار هنا ماريد اشوف وجهه وانغث ماكو احد بلبيت بابا هيج وقت بالشغل مرات يجي يتغدا هو و ميثاق ويرجعون للشغل ومرات يضل لليل سوده عليه كلت خلي انام العصر اكعد اكل بالي يم امي كولش تعبانة ووضعنا للأسوء خايفة على اهلي هاي السنة الأخيرة الي ماضل ٣ أشهر واخلص بلكي الكه شغل اعين ابوية واساعدة
صح ما عرفتكم عليه لسة اني اسمي ياقوت رحمن من محافظة البصرة ادرس هندسة حاسبات اني البنية الوحيدة لاهلي عندي اخوان اثنين اخوية الجبير ميثاق خريج سادس يشتغل ويا ابوية ما كمل دراسة كمل سادس وتزوج بنت خالي اسمها نور الي هيه اخت الزكة وسام وكحه ودور المشاكل فااني دائما اتجنبها واخوية الثاني علي خامس اعدادي صارله سنتين ومديطلع من الخامس ودائما كل ما يكول اريد ابطل تجي رزالة من الوالد من هاي التعجبكم ويرجع يداوم خوفا من ابوية
امي فقيرة كولش ومرض السكر حيل متعبها وبابا كذلك مريض ويشتغل والدنيا كلها تطلبه الدنيا حيل متعبة ومترحم حته مصروف ماأخذ منه بس على كد كروة الكية احرم نفسي من كولشي حتى ما اثكل على ابوية اويلي ع الفقير ماكول غير الحمدلله من عدنا بيت كاعدين بي وساترنا حتلو اجار
