صبح الصباح بنهار جديد
فاقت البطلة ديالنا فنفس الوقت كالمعتاد على صوت آذان الفجر، ناضت دخلات للطواليط،توضات،خرجات لبسات عباية و دارت شالها، جبدات السجادة وحطاتها وبدات فالصلاة(البارح ماصلاتش حيت كانت غيݣلي)،صلات وسالات وناضت لخدمتها،دخلات لبسات عليها وخرجات قاصدة الشركة مخلية كولشي ناعس كيف العادة.
فالطريق دوزات أبيل .
المتصل:ألو
نجمة:شنو؟
المتصل:كولشي هو هداك يلا بغيتي نسيفط ليك الوثائق ولا تجي تشوفيهم؟
نجمة:5 دقائق نكون تما نلقا كولشي واجد ماتعطلش ثانية واحدة.وقطعات وبدلات الوجهة ديالها من الشركة لبلاصة أخرى.
فمكان آخر
نزل من طونوبيلتو بجسمو الضخم داير يديه فجيابو وكايتمشى بهيبة وبرود غادي فاتجاه الشركة وتابعينو الرجال ديالو (Body guards)
دخل كانت الشركة مازالا خاوية مافيهاش العمال،داخل وكايدور راسو يمين وشمال كايدقق فالشكل والنقاوة...إلخ
كمل الدوران لمدة دقائق وتم خارج.
دخل للطونوبيل دوز أبيل
المتصل:ألو سيدي
هو:شنو درتو؟
المتصل:كولشي واجد أسيدي
هو:دقائق ونكون تما ،
وقطع
دقائق حتى وصل ، نزل ودخل لواحد القاعة مديكوريا مزيان بطريقة كلاس،عامرة بالطبالي،ومنصة أونفاص للباب،باين أن المكان مجهز لحفلة. جا عندو السيد لي مكلف بالتجهيزات ديال الحفلة، سلم عليه و وقف حداه
الرجل:سي الإدريسي مرحبا بيك
الإدريسي:الله يبارك فيك،تبارك الله عليك
الرجل: الله يبارك فيك،البوڤيت حتى يقربو يجيو الحضور عاد نجيبوه
الإدريسي:آه نتا تعرف
تسالمو وناض قاصد الباب وخرج
عند نجمة،وصلات للشركة ،دخلات تلاقاتها السكرتيرة فالباب لقات التحية و وقفات باش تهضر معاها
السكرتيرة:مادام نجمة راه الدعوة وصلات
نجمة:صافي
وتمشات قاصدة الأسانسور باش طلع للمكتب،طلعات دخلات وݣلسات بدات الخدمة, داز شوية ديال الوقت سمعات الدقان فالباب
نجمة:دخل
أيمن:صباح الخييير
نجمة ماعلاتش راسها فيه مزال خدامة: صباح النور
أيمن: حيدي من يدك دكشي و هاكي شوفي هادو
ومد ليها شي ملفات
هزات راسها وشدات من عندو داكشي
بتاسمات جنب من بعد ما قرات داكشي وتمتمات بينها وبين نفسها:إذن نتا هو وبتاسمات ابتسامة شريرة
أيمن:شحاال هدا ما شفنا الضحكة على وجهك،كنت عارف هادشي غايعجبك
نجمة:ماعندي مانسالك،بانليا السيد هنا مجهد وعاطي الشحط،كي درتي جمعتي هادشي،واياك يكونو عاقو بيك
أيمن: وا الحݣرة بعينيها هادي، واش حسابليك كانلعبو هنا
نجمة:ماحݣرك حد غا سد فمك،راني عارفة أش مربية
أيمن:فايتاني ب 3 سنين وليتي مربياني
نجمة ماجاوباتوش،دار يشوف فيها لقاها مخرجة عينيها فالورقة بصدمة من بعد ما كملات القراية حطات الورقة بهدوء وهي فنفس الحالة من الصدمة.
أيمن : مالك ياك لاباس أش قريتي؟؟
نجمة: واش قريتي هادشي قبل ما تجيبو ليا؟
أيمن:لا,علاش اش فيه؟
نجمة ناضت وردخات فالمكتب بالجهد ، عينيها ولاو بركة من الدماء و عروقاتها خارجين بالأعصاب:شكووون كلفتيه يجيب هاد المعلومات؟؟؟دوييي شكون
أيمن باقي مصدوم فيها عمرو شاف ختو فهاد الحالة
نجمة عاودات خبطات المكتب بجهد حتى فيقاتو من الصدمة ديالو: واااااش غانبقاااااو هناااااا؟؟؟؟ نططق شكوووون؟؟؟
أيمن قاليها سميت الراجل لي كلف
نجمة دوزات أبيل :
المتصل : أ لو ، آمري
نجمة بعصبية عطاتو سمية الراجل: دابااا بغيت الأتر ديالو يتمحى ولا نمحيك نتا ويااه من على وجه الأرض سمعتيننيي؟؟
المتصل:أوامرك مد.....
مازال ماكملش هدرتو قطعات وݣلسات شادة فراسها
نجمة:خرج
أيمن: ما محركش من هنا تا نعرف مالك وشنو لي خلاك توصلي لهاد الحالة
نجمة: ما عندك ما تعرف ، خرج
أيمن: غانعرف بطريقتي
وتم خارج
نجمة:حبسس
دار عندها أيمن شيراتلو باش يݣلس ، جا ݣلس حداها وبدات كاتݣوليه,فالنهاية كايبقا خوها ويدها اليمنى وهو الوحيد لي كاتعول عليه بلا ما تخاف
أيمن تصدم من داكشي لي عاوداتلو وبقا غير كايشوف فيها
أيمن: إدن هادا هو السبب
نجمة بدون جواب ناضت تقابلات مع الجدار الزجاجي كاطل على برا،بقات شوية وقالتلو: ياك عرفتي،خرج
أيمن: واخا أنا غانمشي للدار،ماتنسايش راه الحفلة اليوم
نجمة ماجاوباتوش،خرج وخلاها هي و أفكارها لي كل وحدة كاتلوحها للأخرى،رجعات للمكتب ودوزات يديها على راسها و تنهدات وكملات خدمتها
