"ثم يرزقك الله بمن يُصلح شتات قلبك 🤎"
_
مش يمكن إنتَ اللي كنت غلط!
_ ازاى يعني؟
_ مش عارفه بس يمكن تكون غلط فى تقديراتك، رؤيتك للأمور والتركيز في تفاصيلها بشكل مرهق ليك قبل غيرك، كتمانك لوجعك وإنك بس بتعيشه لوحدك، مش يمكن كل دا غلط !
_ يمكن معاكِ حق لكن فكرة إني ممكن أكون تقيل على حد بتقتلني، إني أكون سبب في وجع حد حتى لو موجوع عشاني مش مني مبحبهاش فبالتالى كنت بسكت، أتقنت مهارة إني أعرف أخبي كل وجعي ودموع عيني اللي بتحاربني عشان تنزل بابتسامة وضحكة مش طالعه من القلب، أما بالنسبة لتركيزي في التفاصيل فدي حاجه مش عارف أغيرها لأنها ببساطة مبتتغيرش، مش هصحى في يوم وليلة أقولك إني مركزتش في نبرة صوت عالية مكنش ليها داعي فى موقف معين أو إني مركزتش في ريأكشن وش حد معين وهو بيكلمني فقفل لي يومي لمجرد إنه مكنش مناسب مع الموقف، وعارف إنك هتقوليلي إنت مش عارف كل ظروف الناس هقولك ان المشكلة مش فيهم المشكله فيا أنا، أنا اللي بدى الحاجه أكبر من حجمها أنا بقعد أفكر بعدها هما اضايقوا مني ولا لأ، طب هو المفروض كنت أقول كدا ولا لأ، كمية تفكير مرهق بشكل محدش يقدر يتخيله بس عادى بقيت بحاول اتأقلم.
_ طب ما تحاول تطرد كل الافكار دى وتحكي
_ متخيله إني معملتش كدا، عملت كدا بس بعد كل مرة بحكي فيها جزء ولو بسيط من حاجه مخبيها، عارفه اى اللي كان بيحصل؟
_ اى؟
_ كمية جلد ذات مش طبيعية، اللى هو إنت ازاى اتجرأت وحكيت، تحسي إن نفسي بتعاقبني !
_ طب ما تجرب تحكى لربنا هو أحسن من الكل.
_ أنا مبحكيش إلا لربنا لكن اوقات من كتر الوجع الكلام مش بيبقى عايز يطلع فبرده بسكت بس اللي بيطمنى إن ربنا عالم بكل اللي جوايا اكتر مني، هو مش هيخلقني بالطباع دى من فراغ اكيد دا لسبب هعرفه بعدين صح؟
_ قالت بصوت حاولت تطلعه طبيعي: صح يا سليم صح. تعرف انا بحسدك
_ بصلها باستغراب اللي هو دا وقت حسد.
_ ضحكت وقالت قصدى بغبطك على القوة اللي إنت فيها، إنك قادر تتحمل وجعك لوحدك من غير ما تحسس بيه حد دى قوة مش كتير يقدروا يملكوها، بس عايزاك تتأكد من حاجه إني دايما جانبك.
_ ابتسم وقال كلهم قالوا كدا بس أتمنى إنك تبقى غيرهم لأني عايز أصدق إنك غيرهم.
_ وقفت بحركه مسرحيه وقالت تمام يافندم.
وقتها بس ضحك وهى حست انها انتصرت مش بس فأول حاله ليها فى الشغل لكن قلبها حس ان هو اللى انتصر بالضحكه دى
_ رؤى ! اسف دكتورة رؤى
_ رؤى أحسن مش لازم تعتبر إني دكتورة وإنت تعبان احنا هنا اصدقاء اتفقنا.
_ ابتسم وقال: اتفقنا وشكرًا ليكِ.
_ الشكر لله، أنا لازم أمشي دلوقتي وهرجعلك تاني لسه قدامنا حاجات كتير نرغي فيها أستودعك الله سلام.
_ سلام.
#حكاوي_رؤى_وسليم
#السلسلة_الأولى.
أنت تقرأ
حكاوي رؤى وسليم.
Randomوكما كانت جدتي تروي لي القصص كلما ذهبتُ إليها، سأروي لك.. سأروي لك قصصي، فتعجب أنها عنك، معك، قصص تخيلتها معك قبل أن تأتي، وقبل أن أعلم بك. تنظر لي وتبتسم على مشاكستي الدائمة لك، وتغضب عندما أصنع منك شخصًا لا علاقة لك به. سآخذ يدك في جولة عني وعنك...
