حكاوي رؤى وسليم.

حكاية ٣

_ بقولك اى يا سليم ما تيجي نبطل كلام في المشاكل شوية ونتكلم في حاجة تانية.
_ قال بزعل: إنتِ زهقتِ مني إنتِ كمان.
_ لا مزهقتش والله أنا داخله المهنة دى أصلاً عشان بحب الرغي، كل الحكاية إني بقول نخرج نفسنا من دايرة المشاكل عشان دماغك ترتاح وتفصل شوية بس.
_ ماشي يستي ظلمتك حقك عليا، ها هنرغي في اى؟
_ دايمًا كدا ظالمني، بس يلا عفوت عنك.
_ بصلي بقرف شوية وسِكت.
_ خلاص خلاص نتكلم جد شوية بقا، حابب تحكي في اى انهارده؟
_ بصلى بريبه وقال: ممكن يعني نعكس الأدوار انهارده.
_ ازاى؟
_ يعني إنتِ اللي تحكي كأني أنا الدكتور وإنتِ المريضة.
_ مع إننا متفقين إننا هنا أصدقاء بس ماشي هعديها دى، بس تمام تحب أحكيلك عن اى؟
_ احكي اللي تعبك.
_ اتنهدت وقولت: هو أنا ممكن أسألك سؤال ؟
_ هو مش المفروض إننا عكسنا الأدوار ولا اى ؟
_ ما هو السؤال دا بداية الحدوتة
_ تمام اسألِ.
_ هو ازاى الشخص اللي ابقى مدياله كل الحب اللي في الدنيا يتغير معايا فجاءة كدا من غير أى مبررات؟
_ ببساطه عشان هو ميستاهلش الحب دا وميستحقش نزعل عليه زى ما قولتيلي المرة اللي فاتت.
_ معاك حق بس أنا بزعل على نفسي مش عليه وكل الفكرة إني ببقى محتاجه أفهم اى اللي حصل لكل دا، يعنى ليه يتغير معايا من غير ما يوضح لي سبب التغيير، ليه يبين لي إنه شخص حلو من الأول، ما كان ممكن ميدخلش حياتي طالما هو عارف إنه هيغدر بيا في الأخر.
_ مش كل الناس بالطيبة دى يا رؤى ومش كل الناس بتفكر بنفس الطريقة.
_ أنا عارفه دا لكن هو إحنا ليه بنتسبب في أذى غيرنا؟
_ عشان إتأذينا مثلاً.
_ افتكر إني قولتلك إن اللي بيعمل كدا بيبقى شخص مش سوى وميعرفش حاجه عن ربنا.
_ تمام خلاص كملي.
_ اللي عايزة أفهمه هو إحنا بنبنى اختيارنا على اى لما بنيجى نختار الشخص الغلط ؟
_ قلبك اللي بيتعلق الأول قبل عقلك عشان كدا بيبقى فى معركه جواكِ وفي أغلب الأحيان بتمشي ورا قلبك وترجعي تعيطي في الأخر وعقلك بيبصلك بصه اللي هو أحسن عشان مسمعتيش الكلام من الأول ، لأن ببساطه لو فكرنا شويه صغيرين أوي وجمعنا كل المواقف اللي كانت بتحصل واحنا بنعديها بمزاجنا كنا فعلا لحقنا نفسنا من الأول وعرفنا إن في مهزلة بتحصل المفروض تقف.
_ اتنهدت وقولت: معاك حق.
_ اللي عايزك تعرفيه إن محدش يستاهل نزعل عشانه لو هو فعلاً ميستاهلش واظن دا كلامك، وكمان إن الأفضل إننا منعلقش قلوبنا بحد غير ربنا عشان محدش دايم لينا الا هو، أما نحب ربنا بجد مش هنحتاج حد تاني معانا لأننا هنبقى مكتفين بيه عن الكل فهماني.
_ اه فهماك شكرًا جدًا.
_ أى خدمة تعالي كل يوم، وبعدين تعالي هنا هو دا اللي بلاش نحكي في مشاكل عشان تفصل شويه.
_ الاه هو مش إنت اللي قولتلي احكي اللي تعبك، وبعدين خلاص يعني مش من مرة.
_ خلاص خلاص بس أنا اللي عايز أشكرك لأن حكايتك دى كانت جزء من مشكلة عندى وفعلا أنا لقيت الحل جوايا شكرًا بجد .
_ هو دا اللي كنت عايزة أوصله ليك يا سليم إن حلول معظم مشاكلنا جوانا احنا اللي مش بنبقى عارفين نشوفها من كمية الضغوط اللي بتبقى محوطانا، فكنت دايمًا بقول حاول تطلع نفسك من المشكلة وتخيل حد تاني مكانك وإنت هتلاقي الحل علطول، طبعًا دا بعد ما توكل أمرك لربنا وتبقى على يقين إنه بإيده يحل ليك مشكلتك في اقل من الثانية، لكن ربنا بيبقى عايز يستخلص حاجه جواك ، والحاجه دى بتعرفها في الوقت اللي إنت هتعرف تقدرها فيه،
وأظن أنا دلوقتي لازم أمشي عشان يومي لسه طويل، هجيلك تاني إن شاء الله، سلام.
_ شكرًا على الكلام اللطيف دا، وأنا فعلاً دماغي هديت بجد،
سلام، هستناكِ.
#حكاوي_رؤى_وسليم
#السلسلة_الأولى.