_فتحت بالباب وأنا بقول بحماس: صباح الخير.
_ صباح الفل.
_ الحمدلله باين إنك أحسن انهارده
_ فعلاً الحمدلله والفضل يرجع ليكِ
_ لأ، الفضل يرجع لربنا أنا مجرد سبب، ها قولي بقا بما إن انهارده أخر يوم ليك هنا تحب نعمل اى؟
_ اى رأيك نخرج نتمشى.
_ حلو حديقة المستشفى جميلة أوي، وكمان أنا المشرفة عليها.
_ غريبة يعني ليه؟
_ بحب الورد والخضرة والطبيعة، فحبيت أهتم بيها، يلا بقا عشان تشوفها.
_ ضحك وقال: ماشي يلا بينا.
.. نزلوا الحديقه وكانت لطيفه بشكل مريح أوي وجابوا قهوة وقعدوا على الارض.
_ حلوة أوي بجد يارؤى ذوقك جميل.
_ شكرُا شكرًا دى أقل حاجه عندي أصلاً
_ طب ياست الكاريزما عرفنا.
_ ماشي هعديها لأنه أخر يوم بس، المهم بقا تحب تتكلم في اى؟
_ مش عارف، مش حاسس إني عايز أتكلم في حاجه كأن كل الكلام اللي كان جوايا خلص وحاسس إني بقيت مرتاح.
_ طب الحمدلله دا حلو أوي، بس السؤال هنا بقا إنت عرفت اى كان سبب تعبك من الأول؟
_ بصراحه مش عارف فكرت كتير ومعرفتش أوصل لإجابة بس أنا مبسوط إني مرتاح.
_ حلو، سبب تعبك ياسليم من الأول كان نفسك قبل اللي حواليك، إنت كتوم بشكل مؤذي ليك إنت مش لحد تاني ويمكن دى صفة منقدرش نغيرها لكن برده نقدر نتحكم فيها.
_ ازاى؟
_ إنك تعرف امتى تحكي وامتى تسكت، تختار الوقت الصح والشخص الصح اللي تحكيله، اللي تبقى عارف ومتأكد إنه هيساعدك وهيخفف عنك، مش هيزود تعبك، واحكي لربنا طول الوقت مش لازم وإنت بتصلي بس، إنت ممكن تبص للسما بس وتحكي بقلبك، دا ربنا غيّر القبلة من الأقصى للكعبة بنظرة من سيدنا محمد صل الله عليه وسلم للسماء وقلب صادق بيدعي وهو واثق فى ربنا، أوقات الكتمان بيبقى حل صح وأوقات بيبقى مضر، إنت بقا عليك إنك تحدد امتى يبقى صح وامتى يبقى مضر، فاهمني يا سليم؟
_ اه تمام فهمت.
_ تاني نقطة بقى، اتعود إنك تشوف الموقف من جميع الاتجاهات، متسمعش من طرف واحد بس وتحكم على الطرف التاني من وجهه نظر الأول، ومش كل حاجه تسمعها أو تشوفها تصدقها، لأننا غالبًا مش بنشوف الصورة كاملة ولا بنسمع الحقيقة كاملة، اوعى تحكم على حد أبدًا ًا من غير ما تسمعه عشان متظلموش.
_ تمام أنا بقى عايز أسألك سؤال.
_ اتفضل.
_ هو أنا ليه دايمًا بحس إنك بتقولي الكلام لنفسك الأول؟
_ اتنهدت وقولت: عشان أنا شبهك يا سليم، أول مرة أشوف حد بنفس مشاكلي وعقدي الغريبة دي، والغريب إني لما سمعتك عرفت أحلها، فهو فعلاً معظم مشاكلنا حلولها جوانا، إحنا اللي لازم نحاول نشوفها بجد، مش نعيش في وهم إننا تعبانين ومحدش حاسس بينا.
_ بجد شكرًا إنك كنتِ موجودة واستحملتيني، استحملتي مشاكلي وتعبي، حتى النوبات اللي كانت بتجيلي، واللي كنت هموتك بسببها في مرة، ومع ذلك إنتِ متخلتيش عني وكملتِ معايا لحد ما بقيت كويس شكرًا بجد.
_ لا شكر على واجب ياهندسه، افتكر إني قولتلك إنك شبهي، وأنا متعودش أسيب حد محتاجني من غير ما أقف جنبه، المهم عايزاك تخرج من هنا تركز على مستقبلك وعايزة أحضر افتتاح شركتك قريب، وأنا واثقه إنك تقدر تعمل كدا، وبالنسبه للي كانوا السبب إنك جيت هنا من الأول فجزاؤهم عند ربنا، وهما لما يشوفوك واقف على رجليك من تاني هيتحرقوا من غلهم وإنت كدا هيبقى حقك رجعلك، كملت بصوت خافت كأني بقول سر: وبالمناسبه يعنى، نصهم في السجن دلوقتي والنص الباقي عليك إنت بقى.
_ عينه وسعت بدهشة وقال: عملتيها ازاى؟
_ لا دا سر المهنة بقى الدور الباقي عليك، يلا بقى عشان تحضّر شنطتك عشان المفروض تمشي دلوقتي، رقمي معاك وقت لما تحتاجني كلمني ، يلا أشوف وشك بخير.
_ إن شاء الله تشوفيني قريب وزى ما إنتِ عايزة، أستودعك الله سلام.
_ سلام.
مِشي وأنا روحت أكمل شغلي، كدا سليم خلاص رجع زي الأول ويمكن أحسن وأنا فخورة بجد إني قدرت أساعده ولو بجزء قليل .
.............................
كلنا عندنا سليم في حياتنا، وكلنا عندنا رؤى، وكلنا عندنا الناس المؤذية اللي اتسببوا في أذى سليم، لكن رحمة ربنا موجودة دايمًا، ربنا بيبعتنا لبعض رحمات، زى ما بعت رؤى وسليم لبعض وكانوا فعلاً رحمة لبعض.
أكيد ربنا بيجهزلك رحمة ولطف من نوع مختلف ومش لازم شخص ممكن تبقى نسمة هوا تخفف عنك، رحمات ربنا متنوعة وبتيجي لكل شخص على حسب حاجته مش على حسب هو عايز اى، لأن أوقات اللي احنا بنبقى عايزينه بيبقى شر لينا، فخليك واثق في رحمة ربنا وسلم له كل أمورك.
............................
كدا تبقى انتهت أول سلسلة من حكاوي رؤى وسليم،
يا ربّ تكون أثرت بشكل إيجابي في أى حد هنا.🤎
#حكاوي_رؤى_وسليم
#السلسلة_الأولى.
أنت تقرأ
حكاوي رؤى وسليم.
Acakوكما كانت جدتي تروي لي القصص كلما ذهبتُ إليها، سأروي لك.. سأروي لك قصصي، فتعجب أنها عنك، معك، قصص تخيلتها معك قبل أن تأتي، وقبل أن أعلم بك. تنظر لي وتبتسم على مشاكستي الدائمة لك، وتغضب عندما أصنع منك شخصًا لا علاقة لك به. سآخذ يدك في جولة عني وعنك...
