"أثر الهناء حلم يا حمد"

البارت السابع والثلاثين

بالوقت اللي كانو رجال الديرة يزينون المخيم لزواج تركي وتحت رش المطر كان رايد مع العمال يجدد البيت المهجور ويزينه ويوسع في وحده من الدرايش المُطله على حوش ابو متعب وهو مبتسم ابتسامة الانتصار ويناظر العمال تارة وعيال الديرة خصوصًا عيال ابو متعب تارة ، وصقر في بيتهم كان معه ثلاث عمال يضبطون الحوش ويشرف على كل شيء بنفسه وشعوره متلخبط وهو يدور بالبيت ناظر صورة ابوه المعلقة فوق التلفزيون وصحى على نفسه واللي قاعد يسويه وبدأ يذكر نفسه أنها دعوى انتقام واخذ بالثأر لا أكثر "ما وده يغرق وهو بالبداية"

شريفه طلعت من غرفة صقر بعد ما عطرت الفراش وشيكت عليها للمره الاخيره وقفلت الباب:الله يتمم فرحتك يا صقر ويوفقك ويبني بيتك يا يمه .. كل شيء صار جاهز لاتدخلها إلا بعد شهر العسل زين؟
صقر ابتسم: اي عسل واي بطيخ يا يمه؟ تبيني اترك تجهيزتس وتعبتس شهر كامل ثم اشوفه؟ والله ماتمسي غير بهالغرفة
شريفه صنمت مكانها:شتقول؟
صقر ابتسم لأمه : بشوف العمال برا يمه .. اجهزي قبل يدخلون ابيهم يفرشون البيت والحوش بالزل
سكتت شريفه وهي ماتدري وش يدور براس صقر لكن تتمنى ان شايع ماله يد بالموضوع وراحت تتروش عشان يمديها تجهز معروف الشتاء نهاره قصير وينقضي بسرعه وفعلاً مر بسرعه على الكل وصار وقت المغرب وبدو الطقاقات يجتمعون ويطقون بمقر الحريم وبنات اخت حمدان طالعين من بيتهم وبنات الطايل طالعين واتجهوا للمقر مع بعض وعذبه طول الطريق تناظر خاتم حمد بيدها وتتحسسه وتتذكر خطوبتها البارحه ويطير قلبها من مكانه ، جاهلة اللي يناظر خطواتها من البيت المهجور والي يراقب فرحتها وخجلها
وضحى: يا ليت فيه مرايه مدري وش زيني من شيني ماشيكت قبل اطلع
مزون:متأكده انتس تاخذين العقل
سلمى:اقول وين سوير ما جت معكم؟
وضحى التفتت بين البنات تدور زول ساره بما ان الكل عليهم عبايات وبراقع
الهنوف وهي رافعه عباتها تحت يدها:تحضر وعرسها بكره! منتب صاحيييييه! من متى ؟
سلمى:اييييه نسيت نسيت
وضحى بهمس لهيا ومزون:متأكدين ذا السبب؟
هيا:وش تحترين يكون الجواب يا وضحى؟ واضح ولا يبي له مير الله يجبر قليبها ويعوضها باللي يصونها ويقول بها هه يا دهينه لاتنكتين
وضحى ومزون: امينننننننننن
-وصلو البنات للمخيم الحريم وبدأت مراسم الزواج وساره قعدت بالبيت تلم شناطها واغراضها الاخيره وهي تمسك نفسها ماتطلع المقلط وتقفل الانوار وتراقب عذاري وهي تاخذ تركي منها ، ودها تشهد لحظة موتها ولا تشهد منظر عذاري وهم يزفونها لتركي حبيب الطفولة ، حاولت تشغل نفسها وترجع ترتب المطبخ من جديد وكل البيت والحوش وتسقي الزرع  وتسوي كل شيء-
-بالعرس-
شريفه لأم متعب:وين العروس ما اشوفها معكم
ام متعب:هذاتس قلتيها عروس وتبين تشوفينها بكره ان شاء الله
شريفه ابتسمت:الله يتمم عليهم فرحتهم ويبارك لهم ياكريم
نوير بهمس:ما دريتو؟يقولون شايع السياف حضر عرس ولده!
الهنوف التفتت هي وشريفه وقالت هيا:وشهههو؟
مزون:شايع!!! من متى؟
نوير:ارقي الجدر وشوفي بعينتس
شريفه صدت وهي مستغربه وكاتمة السر بقلبها
حصه كانت تناظر عذبه طول الوقت وهي تناظر خاتم حمد وتبتسم له
رغد:اقول عذوبه الرجال كلش ما يسمعون طقكم؟ اشوفهم قريبين
عذبه صحت على نفسها: لالا ما يسمعون يتهيأ لتس قرب المسافه ولا هم بعيدين شوي
رغد ناظرت مكان الرجال وسكتت
عذبه ضحكت:يازقنتس زقنااااه بس لايكون تغارين على فليح؟ يووووووههههههه يووووه يا رغد ترى كل بنات الديرة يشوفونه اخوهم الكبير الودج على قولتس يعني طمني قليبتس.. الموت حمد بس دام ذي اعرست فما فيه اسعد مني الليله
رغد:ههههههههههههههههههههههههههههههههه مايندرى واكيد بغار على فلوحي هو بعد ابو عيالي ، ودام المطيور خطبج فخلاص حطي يدينج بماي بارد
عذبه:يلا يلا عن الغلط! ما المطيور الا رجلتس
وضحى قامت تجلس بينهم:ضحككم حمسني اقعد معكم وش تسولفون عنه
عذبه غمزت لرغد:الضعيفه تنشد عن مخيم الرجال تخاف احد يخطف عنها فليح!
وضحى:يا حلييييلتس! فلاح؟ فلاح حسبة ابونا ترى يازينه بس
رغد ناظرت وضح بتعجب:وتقولينه بوجهيَ ؟
وضحى ضحكت من نطق رغد الثقيل والمميز:وشهو اللي قلته بوجهيَتس؟
رغد:تغازلين زوجي!
عذبه ووضحى:ههههههههههههههههههههههههههههههههههههههههههههه
رغد:خوش والله وتضحكون! تبين امردغج بهالمكان! زين يا وضحى زين بس ذكريني اردها لا طحتي بچبد المقرود المستقبلي
وضحى:ههههههههههههههههههههههههههههههههه ما ندمت والله اني قمت عندكم يازين سوالفها، اقولتس فلاح حسبة ابوي العود تقولين اغازله؟ انشديه عني وتشوفين وش يقول انا من بناته
رغد ابتسمت: اي بس مو عود توه بريعان شبابه يعله دوم الدوم ويايه
وضحى:الله يهني سعيد بسعيده اجل شقول بعد
عذبه:هههههههههههههههههههههههههههههههههههههههههههه ياكبر الفرق كبراااه
الهنوف لهيا:اقول هيا ذا من جده حاضر؟الظاهر مانبي نطول بالعرس
-عند الرجال-
كانو العيال قايمين بالعرس ومعاونين تركي اللي ملّك بالعصر ورجع يكمل التجهيزات مع العيال في المخيم ويده بيد منصور وفوز بالبيت تشيل وتحط وتنقل لمخيم الحريم لحالها ثم عاونوها باقي البنات وعلى المغرب دخل شايع ببشته ورايد معه اللي صار طيب من بعد الطعنه وهم مبتسمين ودخلو يباركون ويقفون مع تركي"مجاملة" لا أكثر بس كان مقصد شايع من جيته أنه ينبه المعنييّن أن البركان على وشك الأنفجار وأن خطته صارت على مشارف البداية وحب يدخل بدخول قوي
ابو متعب ناظر عياله:ماتقولون مقاطعه ولا عزمه !!!!!
متعب:والله يا يبه انه هرجه! وحالنا من حالك
حمد همس لسعود:اشوف عمك ساكت له ايام ولا انصدم من شوفة شايع السياف والتبن اللي معه!
سعود:اتركه عنك وتركي ضعيف لاتنكد عليه تجاهل يا حمد لين نروح بيتنا
ابو جابر لابو متعب وابو فلاح:اقول سلمتو على ابو تركي؟
شايع بصوت مسموع رغم العرضه القائمة والسيوف المتعاليه بالسماء: ما سلم علي إلا الرجال وغيرهم من الناس ماضربت له حساب يا ابو جابر
فز ابو متعب بغضب:الحشيمه للجماعه ولا انت ماتقلط على الفضله حتى ولا لك محل بين الرجال كله عشان الغليم اللي وراك لا يتنكد عرسه ولا محدٍ نايشك من محبه -أشر لعياله بغضب كبير مرتسم على ملامحه وطلعو سويه وركان يمشي ويلتفت وراه ويناظر تركي اللي يناظرهم بنظرات قهر ومنصور نفس الحكايه-
عمر لفارس:نلحق خالي؟وش نقعد نسوي
ابو فلاح:تلحقه وش تسوي !!! انثبر مكانك
فارس:المكان اللي ما يحشم خالي سيف مالنا قعدة فيه يا خالي والمفروض انك قبلنا! امش يا مشعل -طلعو عيال دلال ورا خالهم سيف وعياله وبقى فايز وفلاح وهزاع-
هزاع كان يناظر ثم قام بيلحقهم وقال فايز بغضب:اقععععد!
هزاع:بطلع يبه معهم !!
فايز:طلعت روحك اقعععد اقول مابقى الا هي تعصيني وتلحقهم يا الامعه، قلدهم على الاقل وشف وين ابوك قاعد واقعد معه
فلاح انتظر الوقت يمر شوي بحدود عشر دقايق ثم همس لأبوه باذنه ويده على فمه: يبه السياف شملك بالمهونه مع عمي سيف! شلون نقعد والجماعه شافو وسمعو وش بيقولون عننا!!! تكفى يبه فكر فيها بمنطق وخلنا نطلع هذا اهان رجولتنا ولا حشمنا مع الرياجيل ولا قدرّنا !
ابو فلاح: لأن حنا الغلطانين! المفروض قمنا نسلم عليه ونبارك له بعرس ولده وشوله نقعد تقل أمراء ننتظره يسلم على اكتافنا
انصعق فلاح من رد ابوه وطارت عيونه فيه وهو يحاول يصدّق ويكذّب اللي سمعه!
حمد وقف عند مقر الحريم وبدأ يصوّت: يا الطايل يا الطاااايييلللل
وقفت الهنوف وهي متوقعة الاحداث وطلعت لحمد : بنرجع؟
حمد بغضب:قشي اهلي كلهم واطلعو .. وبنات عمتس بعد
الهنوف:اكيد نبي نطلع كلنا مالنا قعدة وشايع حاضر
حمد ناظر الهنوف وهو مستغرب متى امداهم يعرفون الحاصل بس سبقهم للبيت اللي كان ابو متعب قاعد في المشب وهو غضبان وساره اللي ماقدرت تمسك نفسها وطلعت المقلط قفلت الانوار والباب وفتحت الدريشه نص وشافت عرس تركي اللي المفروض تكون هي مكان عذاري والمفروض يغني لها نهاية العرس "بلا خوف بنلتقي وبلا حيرة بنلتقي" ويصدُق في وعده وعهده بس يا للأسف! بنص هواجيسها شافت ابوها فز وهو يتكلم مع شايع السياف ثم طلع هو واخوانها واتجهوا للبيت وفزت بسرعه تقفل الدريشه وتطلع من المقلط وتنزل بسرعه تفتح الباب لابوها الغاضب
-بالمشب-
ساره:يبه علامك جاي بدري! قضى العرس؟
متعب: اطلعي يا ساره واتركينا مع ابوي
ساره:زين.. اسوي عشاء ولا متعشين بالعرس ولو انه بدري
سعود:سوي عشاء
-طلعت ساره متجهه للمطبخ بس سمعت متعب يتكلم ووقفت تسمعهم من برا-
متعب: اذا هذا هرجه في عرس ولده اللي مقاطعه وش بيقول بكره في عرس ولد ضاري اللي مربيه! اكيد بيحضر ، يبه معنا فرصه
ابو متعب:فرصة لويش!!!!! تبيني اجبره يطلق اختك قبل عرسها بليله؟؟؟ تبي الناس تاكلنا بالكلام؟؟؟ بعدين ولد ضاري ماله ومال المشاكل وشايع خاصه وش يجيبه له!
متعب:من باب الحرص ماشفت ولد ضاري الثاني معه!اكيد بيجي مع الاول و ما ودي خاطرك يضيق
سعود:ان سكتنا الحين فهو عشانك وعشان خاطر تركي المسكين ولا هرجه ما ينسكت اجل حنا مب رجال ! يعقب ويخسي
ساره ضاق صدرها من حظ تركي اللي ما قام حتى بعرسه ومن حظها المرتبط فيه من كل الجهات
تنهدت وراحت للمطبخ تسوي العشاء وبعدها دخل حمد بغضب وراح للمشب ودخلو وراه عيال دلال الثلاث
حمد التفت حوالينه :وين عمي وعياله؟
فارس دخل ورا حمد وقال :بالعرس
ابو متعب ناظر فارس وهو وده يكذب عيونه وسمعه
حمد:وشهوووو؟؟؟؟؟؟؟ شلون له وجه يقعد عقب اللي سمعه!!!! -التفت يناظر سعود وسعود ناظر متعب-
متعب:اقعد يا حمد! وش عليك منه؟
ابو متعب:وشهو اللي وش عليه منه!! هذا عمكم ان لقيتوه على خطأ فبينوه له وان لقيتوه على صواب فانتو في جنبه ومعه !!! قم له يا ركان قل ابوي يزهمك
فز ركان وهو للحين نظرات تركي ومنصور بقلبه وعجز يتجاوزها كان وده يرقصون سويه مثل ما سوو بزواج فلاح ومتعب ودهم يستمتعون بعض .. وصل للمخيم وعجز يدخل! عيت رجلينه تدخله والناس تشوفه فقام ينادي هزاع من برا وطلع له هزاع بحزن من رفض ابوه ما يلحقهم
ركان:هزاع قل لعمي ابوي يزهمه الحين ويبيه
هزاع:ابوي معيي علينا نعود البيت معكم و بنحضر العرس ياركان ماظنتي بيروح لعمي
ركان طارت عيونه من اللي يسمعه: ابوك صاحي!!!! الكلب شاتمنا كلنا ويقعد ويكمل العرس طبيعي!!!
هزاع : احشم عمرك ولسانك تراه ابوي مهما كان ، تبي شيء ادخل كلمه
-دخل هزاع للمخيم وهو مقهور من ابوه ومقهور عليه بنفس الوقت مهما كان يبقى ابوه ولايرضى عليه-
رجع ركان للبيت ونادى متعب بصوت خافت وطلع له:متعب
متعب اخذ نفس قبل يسمع رد ركان وهو اللي بدأ يصدع من كبر المسؤولية اللي يحسها: سم يابوي؟
ركان:متعب عمي مايبي يجي وبيحضر العرس طبيعي!!!
متعب ربت على كتف ركان وسكت وهو يفكر وش بيقول لأبوه! وش يبرر لعمه الحين!! شلون يتصرف؟ هيا وعذبه وش بيكون مصيرهم بهالسالفة!!
دخلو الحريم البيت وهم مستغربين اللي حصل واذن العشاء وطلعو عيال سيف ودلال للمسجد مع ابو متعب يصلون وباقي رجال الجماعه صلو جماعه في المخيم بمكانهم
مزون وهيا وعذبه وكل البنات ركضو للمطبخ عند ساره وعباياتهم عليهم للحين
هيا:سوير سمعتي شيء؟
الهنوف:حمد وجهه مقلوب الظاهر صار شيء بالعرس وهو من الله كبريت
ساره:اسمعهم يطرون شايع السياف بس مدري وش حصل، انتم وش ردكم؟
عذبه:حمد صوت لنا نرجع ، وين اخواني؟
ساره:محد جاء غير اخواني وعيال عمتي دليل
الجازي:من بقى! ابوي وفليح وهزاع شدعوه اكيد رجعو ولا شفتيهم
هيا:مايبي لها اكيد وش يقعدهم لحالهم هناك
ساره:ارقوا للمقلط وشوفو ، اطلعو مني بكشن الايدام لأبوي اخاف تمسك فيكم وانتم كاشخين
مزون فكت عبايتها:اي كشخه يابنت الحلال! على اساس بنرجع! عطيني اعاونك بس
هيا اخذت البراد تمليه ماء:وانا بزين قهوه ونقعد لابو هالعرس واللي له امحققق ليل عندهم
رغد: بروح انزل التراشي والمعاضد وابدل دراعتي واجي اساعدكم
البنات كلهم التفتو على رغد وهي مقفيه قاصدة بيت ابو فلاح وابتسمو في قفاها للهجتها وحبها ودخولها السريع بينهم ، وبدو يتوزعون الشغل ويسوون عشاء لكل اهل البيت دامهم طلعو بدري ولا تعشو ويجهزون قهوتهم والشاهي وشيء عليه