حسن: اقول بس امش معي الدكان جدي يحترينا
وفي بيت ابو فارسّ الليل —————————————-
ابو فارسّ على العشاء : فارسّ وانا ابوك تراني بكره اباخذ حمد على الشاص اعلمه السواقه ويمسك بنا خط الين ناصل يعني لا ترتاع لا تأخرنا معليه
فارسّ وهو يضحك: ابشر
حمد غصت اللقمه في حلقه
حسن كاتم الضحكه : امسك امسك الماء
حمد : يبه انت ماقلت انه بتعلمني لا وصلنا عند الابل على اساس ان الطريق شرح ولا ني بسايق
ابو فارسّ: لا وصلنا وانا اللي اسوق بتعب من الخط وغيره انا ابيك اتعلم السواقه في الخط وبس لا اسمع لك حس بكره اتشكى عندي ما ابي اسوق وانت يا فارسّ
فارسّ : لبيه
ابو فارسّ: اسمع ترا انت وحسن وغلا ونوف العنود والجوهره في سيارة وحده
حسن فز بوناسه : ابشششر
ابو فارسّ : انثبر ماني بحتسي عليك
فارسّ:ابشر
أبو فارسّ: وأنت يا زياد بتسوق بجدانك وأمك
زياد : ابشر
ابو فارسّ قام من العشاء : اخلصو تعشو وامسو ترا بكره ورانا مسراح
كلهم : ابشر
يوم تاكدو ان ابوهم راح فز حسن يعلم نوف
وزياد يطبطب على ظهر حمد
حمد : وجع مب عدل ابي اروح معكم
فارسّ: ابد ازهل لا رجعنا بخليك تجي معنا وحسن يسوق ب ابوي
حسن دخل على نوف والجوهره وغلا وهو يرقص
الجوهره: يمه وش جاه اخوي انهبل
نوف خذت المويه وبدت تحط في يدها وترش وتحط وترش: اللهم ان كان سحراً فا ابطله
حسن قرر يروعها وصاح ونوف وغلا والجوهره قامو يصيحون وقام حسن يقول كلام ما ينفهم ويلخبط في الكلام ويهبد برجلينه الارض ويتقدم صوبهم وهم انحشرو في الزاويه والجوهره تصيح وتقرا ايّه الكرسي
وحسن صار يعدي صوبهم بسرعه وتوه واصلهم وهم بغو يموتون من الخوف الا الحصى في رأسه
حسن حس انه ابوه وطاح على البنات على اساس ان ابوه عوره جدا
ام فارسّ بخوف : يوووه يا ويلي على وادي انا وش سويت به
فارسّ اللي جاء على صوتهم و شاف حسن طايح والبنات خايفين
وراح لحسن يشيله بسرعه ويوم شاله فتح عين وحده حسن وغمز له وسكرها
فارسّ كتم الضحكه والتفت على امه : يمه وش انتي مسويه به
ام فارسّ بخوف : بس رميته بالحصى
فارسّ: ماعليه طيب بس بوديه المجلس وبخليه واكيد انه شي بسيط
ام فارسّ: زين
وشاله فارسّ و اول ما دخلو المجلس ضحك حسن الين مات وقعد يعلم فارسّ وضحكو ويوم حسو ان امهم رقدت راحو للبنات يعلمونهم ودخل حسن اول عليهم وبعده فارسّ وصاحو البنات اما نوف قامت تبي تطقه بعد ما استوعبت انه كان يكذب ومسكها حسن
: اسمعيني يابنت الحلال عندي لك بشاره
نوف وقفت وهي تحب العلوم : نعم وش عندك
دخل فارسّ: ترا بكره بنروح للبر على سياره وحده
نوف : وش الجديد
حسن : الجديد ان اللي بسياره انا وانتي وفارسّ والعنود وغلا والجوهره
الجوهره : انا عن نفسي انسحب مالي خلق ازعاج الطريق
نوف : ايه انتي اصلاً من يومك جوك الشيبان
غلا : الله يعني بنشغل اغاني ونستانس
نوف: انا بروح العنود تحترينا امشو يابنات السمره
حسن : لا والله بتسمرون بدونا ؟!!
فارسّ: يا ابن الحلال خلهم في حالهم
حسن : جيبو لي عيشه معكم
نوف : يصير خير
في سطح الجد عايض —————————————-
العنود كان مجهزه كل شي وحاطه برقعها جنبها احتياط اذا طب عليهم حسن
دخلت نوف مستانسه و وراها البنات :العنود عندي خبر حصريييي
العنود : بسم الله طيب سلمي اول !!
نوف : تبييينه ولا لا ؟؟!!
العنود : اي هجل!!
نوف: بكرا أنا وأنتي وفارس وحسن وغلا بسياره وحده !!
العنود : احلفي!!
غلا : الله بنستانس ونشغل أغاني
الجوهره الحمد الله اني ماني برايحه معكم صجه
العنود : الصدق الود ودي أنا مع جدتي أريح لي
نوف : و لييه هاذي فرصه من ذهب ما تنتفوت !!
غلا : صدق العنود وأخواني حسبت اخوانك
الجوهره: لأول مره اتفق مع غلا
العنود: زين زين بشوف
الجوهره : بنات !!
نوف : وش ؟!!
العنود :يا حبك للعلوم يا يمه من ذا البنيه !!
نوف: وش دخلك اسلمي جوهرتي وش عندك ؟؟
الجوهره وهي كان بتقول لهم كلام جدتها بس تراجعت : عشان جوهرتي ماني بقايله
نوف : ياسمجك
غلا : بنات صدق لازم نخطط وش نسوي بكره
نوف : اول شي لازم نسويه نطرد حسن
نوف مسكت فمها بسرعه
وغلا ماتت ضحك
العنود : وش جاك ؟؟!!
الجوهره بحده : والله لو ادري يا نويفان انك حسون مب رايح معكم بكره والله ماتشوفين مني خير
نوف : أصلا مالت عليك أنتي وحسونك أنتي وش الله محببك فيه يع
الجوهره : والله انه وش حليله وقلبه رهيف بس انتو ماتصدقوني
نوف : ماسمعت زين من الحليل حسن الله يخلف على امي بس
العنود : بنات الساعه شوي وتجي ١٠:٤٠ وحنا مارقدنا ورانا طريق قومو يالله
نوف : العنود أنتي صايره تتقمصين امي نوير ؟؟
الجوهر وهي تقوم : وهي صادقه قومي خل نرقد
غلا : حتى أنا فيني نوم
نوف : ياسمجكم
اليوم الثاني ————————————-
الجد عايض كان راكب قدام مع زياد والعجز ام فارسّ والجده نوير
و الجوهره اللي كانت تقول قصص وسوالف وكانو على جمس
وفي السياره الثانيه الشاص كان عليه ابو فارسّ يعلم حمد سواقه الشاص وطبعاً اغلب الوقت كان هواش
وفي الجمس الثاني اللي كان اغلبه محمل اغراض كانو فيه نوف والعنود اللي جت عقب مرحله إقناع طويله من نوف وغلا وحسن واللي يسوق فارس وكان هاذي اول مره يروحون سوا بنفس السيارة
حسن : نوف والله لا اكسر لك يدك لاعاد تغيرين الغنيه
نوف: مب على كيفك تحط اللي تبي وحنا لا
فارسّ : بس انت وياه لاعاد تشغلوني
غلا: بس فارسّ والله ظلم من صبح وهو يشغل اللي يبي
فارسّ: الله لا يشغل مسلم الا بطاعته يالله شغلو اللي تبون
وانت فكنا شرك
في سياره ابو فارسّ —————————————-
ابو فارسّ صفق حمد على راسه : اظغط كلج هم عشق ثاني
حمد : يبه تكفى ابشر بس لا تطق راسي
ابو فارسّ: اسكت مابقى الا تطقني عجل الحق اخوك نتغداء معه
حمد : ابشر
في سياره الجد عايض —————————————-
الجوهره بضحك : الله يعين حميد بيدوخ على طق ابوي له
الجد عايض: يستاهل الي في عمره قدهم يسوقون الوايت والمواتر الكبار ماعاد هو ببزر
زياد اللي كان شايل هم ومتوتر واثقل ما عليه ذا الخط وصدره ممتلي ضيقه
ام فارسّ اللي كانت ملاحظة توتر زياد و ضيقته : زياد يمك تبي ماء
زياد : اي يمه ولا عليك امر
الجوهره حست انه عارف بموضوع الخطبه وتوقعت امها قالت له
في سياره فارسّ —————————————-
فارسّ اتصل على جده : الو يبه ترا بوقف عند محطه عشان اخذ غدانا وماء انتو اسبقوني وجنبو من الخط شوي وانا بلحقكم بالغداء
الجد عايض: زين بس لا توخر
فارسّ: ابشر
فارسّ وقف عند المحطه وجنبها مطعم
فارسّ: امسك خذ الدراهم ورح جب الغداء دجاجتين
حسن : اجيب معها شي ولاش
فارسّ: وشهو ؟؟
حسن : بارد؟؟
فارسّ: ايه جبه
حسن حب راسه وهو كان متشفق للببسي من صبح فارسّ التفت على البنات
فارسّ: هاه تبون شيء
غلا: فارسّ جب ماء بااارد
فارسّ: نوف وش تبين
نوف : جب بساكيت و بطاطس
فارسّ : وانتي
العنود : بس حليب فراوله
فارسّ راح وجلسو البنات مع بعض
نوف: العنود
العنود : هلا
نوف : اذا جينا هناك لا تقصرين في ساره تكفين انت اقدحنا كلنا
العنود : ابشري ولا همك ازهليها علي
غلا : ياحليلها وعد
نوف فزت بسرعه: ايه تكفون بنات سجيت لا اقول لكم
العنود فزت من محلها : يمه في علم ماسكته من امس ولا قلتيه لي قولي كلي اذان صاغيه
نوف : صراحه العلم حلو شين
غلا : وشو اخلصي
نوف : حنا رايحين نخطب وعد لزياد
العنود شهقت: حرااام احس زياد يبي وحده متعلمه ولاهي مافيها شيء الا تهبببل مدري كيف سبحان الله حطها هي وساره خوات
غلا: بالعكس احس عادي مافيها شي لو خذاها
نوف: هو مافيه شيء بس هو مايبيها
غلا: على اي اساس قلتو كذا وبعدين من وين جبتي العلم
نوف : سمعت امي والجوهره يتكلمون عن الموضوع ذا والجوهره رافضه ذا الشيء مررره
فارسّ دخل السيار : العنود ترا مالقيت حليب فراوله وجبت شكلاطه وفانيليا
العنود : كان ماجبت عادي
نوف : ماتبينها اجل بشربها انا
غلا وهي تعطي الكيس العنود : اكله خذيه يالعنود لا تشربه الساحوت
نوف : وش دعوه ما هي بشاربه اثنين
فارسّ طلع برا السياره : حسن عجل
جا حسن ومشو و وقفو عند الجد عايض وبعدهم بشوي جاء حمد
ابو فارسّ نزل من السياره ونزل حمد وبعد مانزلو بشوي دحدرت السياره
أبو فارسّ وهو يعدي ورا الشاص : جعل حميد أملعفن
وانطلقو كلهم زياد وحمد و فارسّ وحسن
زياد كان سريع و وصلها وطب ودخل الغماره وسحب جلنطها ووقفت
رجع فارسّ يعدي معصب يلحق حمد وحمد انحاش
فارسّ: تعال يالكلب نعنبو غيرك ماتعرف تسحب جلنط يا حمار وقف قبل والله لا امسط العقال على ضهرك ولد!!!
حمد وهو يعدي : انا ماقلت على الله اخلص من ابوي تكفى
وانخش ورا جدته : تكفين ياجده اني في وجهك
الجده نوير وهي متقطعه من الضحك : في وجهي يا فارسّ في وجهي يا امك
فارسّ: الخلا لارحم الله ذا الوجه والله لولا امي نوير انك ما تعين خير
الجد عايض بضحك : حسن جب الغداء وانا ابوك خلنا نتغداء ونوصل قبل لاتظهر روح أبوك
