🌺عبق ياسمين 🌺 (طور التنزيل )

part43

عبق الياسمين 🥀
🖋️ نور آية 🖋️
بارت...43🍂
صباح جديد على ابطالناااا اللي كيحسبو فالدقايق فين يتجمعوو فيما يرضي الله صبحات ياسمين جابدة عليها و حتى مها مفيقاتهاش واخا استغربات بحيت مولفة كتفيق بكري....
محمد فاق تريض و فطر عاد خرج مشا للمحلات و قرر يتغدا فالرياض داز بعدا عند الحلاق حسن شعرو من الجناب والتحت ديگرادي و خلا الفوق طويل شوية و خفف اللحية موراها داز خدا ليه الحوايج اللي غيلبس....
كانو عبارة على كوستيم كحل مع شوميز بيضة داهم للدار عاد مشا للرياض مع الدخلة لقا صداع اميمة و شيماء فوجهو اللي ملي جات وهي دايرا عليهم قايدة تأمر و تنهي دخل مكره منهم لقا السلام و سلم على مو و عمتو و جداه سلام حار عاد جلس تيتعاود معاهم و الدار كتنغل بعائلة حفيظة نغيل و الدراري ولاد خواتاتها تيبغيو يجروه فالهضرة و يجبدو معاه الحتيت ولكن هو طالعين ليه فراسو...
حتى دخلات خالتو و ولادها سلم عليهم و بقا كيضحك مع ولادها حتى ناض طالع للبيت فجأة وقفات قدامو اميمة بطلتها المعتادة و صدرها اللي ديما مدفق برا...
اميمة:(بصوت مق**ن) على السلامة امولاي السلطان
محمد:(بصوت غاضب طلعات ليه فصحتو بتصرفاتها) حيديي من قدامييي
اميمة:(قربات ليه كثر و حطات يدها على كتفو) برد الحبيب ديالي ممزيانينش لك الاعصاب و نتا عريس و الليلة ليلتك
محمد:(بملامح مشمئزة عينيه رجعو حمرين بالاعصاب نتر ليها يدها بالزربة و زير ليها عليها حتى تجمع فيها الدم) اخر مرة باقا تحطي عليا يدك الموسخة و داك التق**ن ديالك ديريه فقنت اخر طلعتي ليا فكر ك*ري
دفعها بقوة حتى تضرب ظهرها مع الحيط...
طلع و خلاها مصدومة بملامح متألمة كانت هادي اول مرة غيخرج فيها هكا و يتعامل معاها بعنف و للحظة ندمات تا وقفات فطريقو ولكن سرعان ما رجعات رغبتها فيه بحيت كل ما كيرفضها و مكيخضعش ليها كتزيد تجري وراه و تحاول تفوز فالتحدي....
على عكس راجلها اللي لاصق فيها و جاري موراها الشيء اللي كيخلي غرورها يزيد و تكبرها و كتزيد تكرهو هو قدات حوايجها و شافت فيدها لقاتها حمرة مجموع فيها الدم هبطات مكرهة يله جلسات دوات شيماء و هوما ينوضوها بيناتهم فحين هو طلع معصب لبيتو كيزفر بصوت عالي طلعو ليه تصرفاتها فالراس فكل مرة كتبدا تحلون عليه كيكره و يحقد و اللي كان شافع ليها علاقتو مع خوه اللي كان خايف تخسر اما دابا مابقا عندو لاش يسكت لا على خوه اللي اصلا مدايرش ليه قيمة ولا على تصرفاتها اللي كتقييه و تخليه يكرهها و يكره جميع النسا بحالها قرر انه ماباقي غيسكت لحتى واحد فالدار...
نرجعو عند ياسمين اللي فاقت من النعاس حتى ل12 عينيها منفوخين و حناكها حمرين بملامح منزعجة منعساتش بزيان فالليل جاتها ليغيگل و نغسات عليها النعاس بالوجه خصوصا ان وجعها قاصح و هاد المرة جاتها قبل الوقت بالخلعة و التوتر بقات كتنعس و تفيق حتى تشاد عليها و ناضت شربات دوليبران همداتو عليها شوية ولكن مع ناضت عاود جاها حتى رجليها مقادراش تحركهم باغا تبكي....
دخلات لطواليط بدلات و هبطات كتعكز لقاتهم جالسين كاملين دخلات عليهم هكاك تخلعو عليها ماعرفو اش بيها..
ثورية:(قفزات ملي شافتها عرقانة و شعرها لاصق عليها بلا عينيها المدمعين و ملامح وجها اللي كيدلو على الالم) امالك ابنتييي شنو عندك المصران عاوتاني
ياسمين:(شدات فيها بالسيف باش كتمشى حتى جلسات و قالت بزز) حق الشهر اماما ايييي
دعاء:(بملامح حزينة) الله ياختي مالقات ايمتا تجيك غتكون غير بالخلعة و كتمحنك..
زوهرة:(دارت عند بنتها اللي كانت كتشوف فياسمين بشفقة بقات فيها) سيري اهاجر تبخي ليها الخزامة ايلا كاينة ديرها..
ثورية: اه كاينة ابنتي راها فالبلاكار ديال العطرية و العشوب (دارت عند دعاء مخاطباها) فين داك القرد ديال خليل يمشي يجيب ليها الكينة..
دعاء: كوراه فالبلاي انا غنمشي نجيبها
مشات دعاء تجيب ليها الكينة ديال الوجع فحين هي مرسات على حتى جيهة مرة تكا مرة توقف مرة تجلس عرقانة و حاسة بذاتها سخونة مشات مريم وجدات ليها الفطور تاكلو قبل ما تشرب الكينة مقدراتش تاكل اكتفت بكرواصة بزز و كاس ديال الحليب شربوها الخزامة سخونة همدت عليها الوجع للحظة و شوية عاود شدها حتى شربات الكينة اللي بقات شي نص ساعة عاد بدات كتعطي المفعول ديالها و ملي مشا ارتاحت و جاتها واحد النعسة حلوة طلعات ظلمات البيت و نعسات...
مخلية التيلي كيصوني حتى طاب و تشغل بالو ممولفاش ليها تردد بزاف عاد دوز لابيل لدعاء اللي كان طلب نمرتها من عند ياسمين فمرة من المرات كان وقع فيها بحال هكا صونا شوية و تقطع بحيت كانت كتغدا تسنا شوية عاد صونا تاني و جاوبات معارفاش النمرة ديالمن....
📱محمد:الو السلام عليكم
📱دعاء:(عقدات حواجبها باستغراب ملي جاها صوت راجل غير هو الصوت كان مألوف) وعليكم السلام شكون معايا
📱محمد: انا محمد اختي دعاء
📱دعاء: اههههه كنقول الصوت مغريبش عليا كيف داير اخويا لاباس عليك
📱محمد: الحمد الله اختي الله يطول عمرك و نتي لاباس عليك راجلك و ولدك كولشي بيخير (الصواب عاطيه عشرة لضس ههههه)
📱دعاء:(عجبها بصوابو و ظرافتو كيدير بلاصتو دغيا) جمع كولشي و قول الحمد لله ياك مكاين باس اخويا
📱محمد: سمحي ليا اختي صدعتك ولكن من الصباح و انا كنصوني لياسمين مجاوباتنيش خفت تكون عندها شي حاجة
📱دعاء:(شربات البلان والا لاش غيكون مصوني ليها مثلا ضحكات بشقاوة و غمزات مها و خالاتها اما حتى باها تغدا بوحدو فالكوزينة مخليهم واخدين راحتهم) ااه ماشي مشكل اخويا غير مفاقتش بكري و ناضت عيانة شوية و رجعات نعسات..
📱محمد:(قفز مورا مسمع عيانة و قال بصوت مرتافع) كيفاش عيانة مالها شنو عندها واش بزااف نجي نديها للطبيب
📱دعاء:(قفزات على صوتو المرتافع يالاه كان مزيان حبساتها الضحكة و كملات) لا لا ماشي شي حاجة (بتقزدير ماعندها علاش تحشم) غير البيريود و كتجيها قاصحة شوية ديما هكاك
📱محمد:(حشم هو فبلاصتها مقدرش يهضر معاها فالموضوع ولكن فنفس الوقت مخلوع عليها) و شربات الدوا....... ولا مشات لسبيطار...... نجي نديها......ولا نجيب ليها شي حاجة
📱دعاء:(مقدراتش تحبس الضحكة ولوخرين غير تيشوفو فيها) لا لا مكاين لاش شربات الدوا و ولات بيخير دابا غير تهدن
📱محمد: سمحي ليا قويت عليك اختي هانتي ايلا كانت شي حاجة صوني وجه الله اختي انا شوية و نعاود نصوني
📱دعاء: واخا اخويا كون هاني فعينيا
📱محمد:الله يحفظك اختي يله في امان الله...
قطعات عليه و طلقاتها بواحد الضحكة عالية ديال الشيخات حتى بقاو غير معجبين فيها..
هاجر: امالك اختي تيهروك ملايكتك
دعاء: لهلا يوريكم شكون دوا معايا دابا هههههههههه....
#يتبع ❤️❤️
تخلع 🙂🙂