အာဏာရှင်ကြီး၏ ချစ်လှစွာသော ဧကရီ (ခေတ္တမျှ ရပ်နား)

အခန်း (၁၅)

Unicode
.
.
ယဲ့ကျင့်ရှိ လက်ဖက်ရည်ဆိုင်တစ်ဆိုင်သည် လွန်ခဲ့သည့်ရက်အနည်းငယ်အတွင်း၌ အတော်လေး စည်ကားလာခဲ့သည်။ အောက်ထပ်တွင် ဧည့်သည်များဖြင့် ပြည့်နေပြီး အပေါ်ထပ်ကိုတော့ ပုံပြင်ဆရာတစ်ယောက်က အပိုင်စီးထားကာ သူ၏ ပုံပြင်ဇာတ်ကြောင်းကို တံထွေးစင်မတတ် ပြောပြနေလေ၏။

နားထောင်သူများပြားလာသည်နှင့်အမျှ ပုံပြင်ပြောသူက စားပွဲကို တစ်ချက်ခေါက်ကာ စတင်လေတော့သည်။

"ဒါက နေဝင်ရီတရောအချိန် လူတွေနဲ့စည်ကားနေတဲ့ ယုံလဲ့လမ်းမှာ ဖြစ်ပွားခဲ့တာ။ ခပ်ဝေးဝေးကနေ စစ်မြင်းကြီးတစ်ကောင် ရောက်လာပြီးတော့ အဲဒီစစ်မြင်းကြီးပေါ်မှာ လူနှစ်ယောက် ရှိနေတယ်တဲ့။ တစ်ယောက်က ထင်ရှားကျော်ကြားပြီး ဩဇာအာဏာကြီးတဲ့သူ ဖြစ်ပြီး နောက်တစ်ယောက်ကတော့ ဖန်အန်းရဲ့ ဂုဏ်သရေဆောင် တစ်ယောက်တဲ့လေ... "

ပုံပြင်ပြောသူက သူ့ပရိသတ်များအား ပြန်မေးလိုက်သည်။

"သူတို့က ဘယ်သူတွေဖြစ်မလဲဆိုတာ မင်းတို့ ပြောပြနိုင်လား"

"အဲဒါက မြောက်ပိုင်းစစ်ဘုရင်နဲ့ သူရဲ့ ထိမ်းမြားခါစ အသစ်စက်စက် ဝမ်ဖေးကလွဲလို့ ဘယ်သူများ ဖြစ်နိုင်ပါ့မလဲ"

"ဒီဝမ်ဖေးဟာ အမျိုးသမီးတစ်ယောက်ရဲ့ အလှတရားထက် သုံးဆလောက် ပိုလှတဲ့ အမျိုးသားတစ်ယောက်လို့လဲ ဆိုကြတယ်။ ပြောကြတာတော့ မြောက်ပိုင်းစစ်ဘုရင်က သူ့ကို ပထမဆုံးအကြိမ် စတွေ့တုန်းက ညှို့ယူဖမ်းစားခံလိုက်ရပြီးတော့ သူ့ရဲ့ ဝမ်ဖေးအတွက် တန်ဖိုးရှိတဲ့အရာအားလုံးကို အကုန်အကျ ခံခဲ့တာတဲ့လေ။ ဒါပေမဲ့ ဝမ်ဖေးက ယောကျ်ားတစ်ယောက် မဟုတ်လား။ ဒါက ယုတ္တိရှိပါ့မလား..."

ပုံပြင်ပြောသူက သူ၏ဇာတ်လမ်းကို ဆက်ပြောနေသော်လည်း အောက်ဘက်မှ သဘောမကျသည့် အသံတစ်သံ ထွက်ပေါ်လာခဲ့သည်။

"ပုံပြင်ဆရာရဲ့စကားက အဓိပ္ပာယ်မရှိလိုက်တာ။ မြောက်ပိုင်းစစ်ဘုရင်ရဲ့ ဝမ်ဖေးက သေသွားတာကြာပြီ မဟုတ်ဘူးလား။ ပြောကြတာကတော့ သူတို့ ထိမ်းမြားပြီး ဒုတိယနေ့မှာပဲ သူ့ကို မြို့ထဲက တိတ်တိတ်လေး ဆွဲထုတ်သွားကြပြီးတော့ မြေမြှုပ်လိုက်ကြတယ်တဲ့"