Can you translate my heart?
" ဒီနေ့ ဘေးအိမ်ကို မိသားစုအသစ်ပြောင်းလာတယ်တဲ့ ေမကြီး "
အဖေက အမေ့ကို လှမ်းပြောလိုက်တဲ့စကားကို ဆူဘင်း ကြားလိုက်ပေမယ့် စိတ်မဝင်စားဟန်ပြုရင်း အိမ်အပေါ်ထပ်က သူ့အခန်းဆီ တက်လာခဲ့သည်။ အိမ်နီးချင်းရယ်လို့ဖြစ်လာရင် အချိန်ကြာရင် သိကျွမ်းလာရမယ့်သူတွေပဲမို့ တကူးတက အာရုံထဲမထည့်ချင်တာလည်း ပါတာပေါ့။
အခန်းထဲ ရောက်တော့ မသိစိတ်က တစ်ဖက်ခြံထဲ လှမ်းကြည့်မိသည်။ အာရုံထဲမထည့်ချင်ဘူးပြောပေမယ့် စပ်စုချင်စိတ်ကတော့ ရှိသေးသည်။ တော်ကြာ စရိုက်မတူတဲ့သူတွေ ပြောင်းလာတာဖြစ်နေရင် ရေရှည်အိမ်နီးချင်းကောင်းဖြစ်ဖို့ ခက်ခဲမယ် မဟုတ်လား။
သို့သော် ဝရံတာဘက်ထွက်သည့် တံခါးမှန်ချပ်မှတစ်ဆင့် လှမ်းမြင်နေရတဲ့ တစ်ဖက်အိမ်မြင်ကွင်းမှာ လူရိပ်မတွေ့ရသေး။ သူ့အခန်းကလှမ်းကြည့်လျှင် တစ်ဖက်ခြံက အိမ်အပေါ်ထပ်အခန်းကို တန်းခနဲမြင်ရသည်မို့ အခုလို ဘယ်သူမှမတွေ့ရတာ သူဘဝင်မကျမိ။
တစ်ဖက်ခြံဘက်ကို တံခါးမှန်ကတစ်ဆင့်ချောင်းကြည့်ရတာ အားမရတော့၍ ဆူဘင်း တံခါးဖွင့်ပြီး ဝရံတာဘက်ထွက်လာခဲ့သည်။ သူ့အခန်းက ဝရံတာက တစ်ဖက်ခြံက အပေါ်ထပ်အခန်းနှင့်ဆို ၅ပေလောက်သာ ကွာဝေးတော့သည်မို့ အတော်လေး အနီးကပ် ကြည့်လို့ရသည်လေ။
သူဝရံတာဘက်ထွက်လိုက်တော့ တစ်ဖက်အိမ်ပြတင်းပေါ် လိုက်ကာစလေးက အနည်းငယ် လှုပ်ရှားသွားသည်။ ပြီးတော့ တဖြည်းဖြည်းပွင့်ဟလာတဲ့ လိုက်ကာစလေး...လိုက်ကာစ ဖယ်ရှားလိုက်ခြင်းနှင့်အတူ မျက်မှန်အောက်က မျက်ဝန်းလှလှလေးများဖြင့် ကောင်လေး...။
ရုတ်တရက်မို့ သူခိုးလူမိသလိုဖြစ်သွားသော ဆူဘင်းမှာ ကြောင်နေပြီး ဘာစကားမှမပြောမိ။ ဘယ်နှယ့် ဝရံတာဘက် ပေါ်တင်ထွက်ချောင်းကာမှ တစ်ဖက်အခန်းကကောင်လေး လိုက်ကာစ ဆွဲဖွင့်တာနဲ့ တိုးရတယ်လို့...။
သို့သော်လည်း သူကပဲ ကြောင်နေသည်မဟုတ် တစ်ဖက်အိမ်ကကောင်လေးကလည်း ရုတ်တရက် သူ့အခန်းကိုလှမ်းချောင်းနေတဲ့ ဆူဘင်းကို တွေ့လိုက်ရ၍ ကြောင်နေပုံရသည်။ အနည်းငယ် ထူသည်ထင်ရသော နှုတ်ခမ်းလေးက အံ့ဩမှုဖြင့် မသိမသာစူပြီး မျက်မှန်အောက်က မျက်လုံးလှလှလေးတွေနဲ့ပေါင်းစပ်ကာ ခြုံငုံကြည့်လျှင် ပိုရိုရိုကာတွန်းဇာတ်ကောင်လေးနှင့်ပင်တူသည်။
YOU ARE READING
Can You Translate My Heart
RandomMoonlight Chicken Seriesထဲက Second Coupleဖြစ်တဲ့ Limingနဲ့ Heart ဇာတ်ကောင်တွေရဲ့ ကာရိုက်တာကိူ Inspireယူပြီး ဒီဇာတ်လမ်းကို ဖန်တီးထားပါတယ်။ Soojun Vibe ရအောင် Plotကို ဆန်းသစ်ထားပြီး အပိုင်းနည်းနည်းပဲရှိပါမယ်
