(حيدات لغطا على رجليها و خرجات من فراشها ، وتمشات
جيهت داك لبالكو لي قدامها بعدما لبسات فرجليها ، محسات
براسها تا هزات طيليفونها وركبات واحد نمرة على أمل تسمع
صوتو او تهدن)
هو : (بصوت تقيل او باين فيه نعاس جاوبها) لغالية
لغالية كتفات برنة صوتو ملي نطق سميتها من فمو حسات
بحالا كتسمعها لأول مرة ، تبورشة لي حسات بيها او قلبها لي
رجع كينبض كتر من لول غا هاد لمرة كان نبضو مختالف اشد
لإختلاف على النبض تاع قبيلة
هو : (عرفها ماشي تالهيه من سكاتها دكشي علاش بغا يخفف
عليها) ماجاك نعاس على فراقي دكشي علاش صونيتي
لغالية : (دوات بتوتر بحالي اول مرة تدوي معاه) نجوم
مضوية ضلام سما ونتا مضوي حياة لغالية
هو : آخ ألغالية عييت معاك ماتقوليش بحال هاد لهضور ملي
منكونش حداك
لغالية : (بتاسمات) فيقتك من نعاس ياك ؟
هو : سيري تكاي فراشك عاود او حطي طيلي حدا راسك
لغالية : واخة (مشات رجعات تخشات فراشها وتكات على
جنبها ليمن او حطات طيلي حدا راسها)
هو : تكيتي ؟
لغالية : واه
ملي سمع جوابها بدا كيجود لقرآن بصوت مخشع او كيريح
نفس و يحيد لهم ولغم ، مخلي لغالية كترخا وترخا تا غفلاتها
عينها ونعسات ، فحين هوا بقا مكمل تجويدو تاتقطع صوتها
عاد قطع تا هو ورجع لنعاسو .
صباح جديد جا او شمس تدفي لجو او باشعتها تفيق
لي ناعس من نعاسو ، فنفس لبيت لي كان ليلها هاز دموع
الضعيف او لمجروح كان صباحها فرح علقلوب او جمع بين
لحباب ، تسمع صوت دقان شي لي خلى بنتنا لغالية تفيق من
عز نعاسها .
لغالية : بصوت ناعس جاوبات هاني جاية
(تكسلات او تجمعات شعرها لي كان طويل واصل نص فدهرها
او بلون لقهوي ، عاد لبسات عليها پينوارها وخرجات من
لفراش متوجهة لباب باش تحلو)
لخدامة : (سميتها كريمة) لالة صباح لخير
لغالية : صباح نور اكريمة ماجيتيش ليومة شوية بكري
كريمة : ليومة غترجع لالة صباح من سفر او خاصني نجمع ليها
بيتها او نقاد لفطور
لغالية : ضربات راسها بيديها آخ نسيت ݣاع واش ليوم ،
صافي سيري نتي لشغلك انا غنغسل او نزل عندك
كريمة : واخة الالة
آه قبل منسا راه صوناو من لبلاد هاد
صباح قالو بلي لعشية غيكونو هنا باش ايشوفو لالة صباح
لغالية : (خسرات سيفتها) اخ على بنادم ما يعلم ما يشاور ،
كاينة أبعدا سلعة ولا خاص لي يجيبها عاود
