အာဏာရှင်ကြီး၏ ချစ်လှစွာသော ဧကရီ (ခေတ္တမျှ ရပ်နား)

အခန်း (၄၁)

Unicode
.
.
ဤဆောင်းရာသီ၌ မီးသွေးဈေးသည် ယဲ့ကျင့်ပြည်သူများအတွက် ဆွံ့အဖွယ်ကောင်းလောက်အောင်ပင် မြင့်မားလွန်းနေခဲ့သည်။ သို့သော်လည်း ယဲ့ကျင့်တွင် ကြွယ်ဝချမ်းသာသော မိသားစုများစွာ ရှိပေသည်။ သူတို့သည် သူတို့၏ ကြွယ်ဝချမ်းသာမှုကို မည်သည့်အခါကမှ ကောင်းစွာ အသုံးမချရသေးပေ။

ဤအခြေအနေတွင် ယဲ့ကျင့်ကို *"ကျူးမန်၏ အသားနဲ့ သေရည်များက နံစော်နေပြီး လမ်းများပေါ်တွင်တော့ အရိုးခြောက်များမှာ အေးခဲနေသည်" ဟူသောစကားဖြင့် တိကျစွာ ဖော်ပြနိုင်ပေသည်။

*"ဆင်းရဲနွမ်းပါးသူများ လမ်းပေါ်၌ သေဆုံးနေချိန်တွင် ကြွယ်ဝချမ်းသာသူများက အစားအသောက်များကို ဖြုန်းတီးပစ်ရန် တတ်နိုင်ကြသည်ဟု ဖော်ပြထားသောကဗျာမှ ကောက်နုတ်ချက်ဖြစ်သည်"

သာမန်မိသားစုများက ပြင်းထန်သောဆောင်းရာသီတွင် ရှင်သန်ရန်အတွက် ရုန်းကန်နေကြရချိန်တွင် ကြွယ်ဝချမ်းသာသော မိသားစုများကတော့ တန်ဖိုးကြီးသော ကျောက်မီးသွေးများ ဝယ်ရန် ပြေးလွှားနေကြသည်။ ထို့အပြင် မီးသွေးများသည် ရှားပါးသော ကုန်ပစ္စည်းဖြစ်လာသည့်အတွက်ကြောင့် လုံလုံလောက်လောက် သိုလှောင်နိုင်ခဲ့ကြသော မိသားစုများသည် မီးပွဲတော်ကျင်းပခြင်းကို နှစ်သက်လာခဲ့ကြပေသည်။

မီးပွဲတော်ကျင်းပခြင်းဟု အမည်တွင်သည်မှာ ကြွယ်ဝချမ်းသာသူများ၏ ဥယျာဉ်တွင် ကျောက်မီးသွေးနှင့် ပြည့်နေသောမီးဖိုကြီးတစ်ဝိုက်တွင် ကျင်းပသောပွဲကို ရည်ညွှန်းပေသည်။ ဧည့်သည်တော်များက အနွေးဓာတ်ရရန်အတွက် မီးဖိုဘေးတွင် ထိုင်ပြီး ဆီးနှင်းဖြူများ ကျဆင်းနေသောရှုခင်းကို ဇီးသီးဝိုင်ကို သောက်ကာ ခံစားကြည့်ရှုနေကြချိန်တွင် လေဒဏ်နှင့် နှင်းများ၏ဒဏ်မှ ကာကွယ်ရန် ထူထဲသော ကန့်လန့်ကာများ တပ်ဆင်ထားကြသည်။ ဤနည်းအားဖြင့် ထိုမိသားစုများက သူတို့၏ ဘဏ္ဍာရေးအင်အား တောင့်တင်းမှုကို ကြီးကြီးမားမား ပြသကြခြင်း ဖြစ်ပေသည်။

အန်းချန်ချင်းသည် စာရင်းစာအုပ်များထဲမှ ကိန်းဂဏန်းများကို ကြည့်ပြီး သက်ပြင်းချလိုက်မိ၏။