( ديار مهيّب - صباح اليوم الثاني )
عقد حواجبه يناظرهم للحين نايمين : لا صلاه ولاعباده !
سلطان : قايمين قايمين ياجدي
مهيّب : ومتى قايمين اصبحنا وراقدين !
طلع سهم بغضب لانه ماقام لصلاة الفجر قعدو سامرين وخذاهم النوم طلع وكلهم متجمعين بالحوش
مهيّب بعصبيه : لمتى بقول لك البيت له حرمه !
سهم صد واثنينهم عصبيتهم ماتنطاق : اروح ؟
الجده : روح يمه روح
سحب فزاع لحافه وهو متجهه لبيتهم أشر عليه محمد : عانه يبه بيهج
مهيّب : البعير الثاني ؟
فهد بضحكه : يالغالي علامك عليهم !
مهيّب : والله ماتعلموا الرباده الا منك
فهد تمدد على رجل جهير - الجده - : تمون ياطويل العمر
طلع مهيّب يسفل بفزاع وسهم ، لف هذال على فهد : ابوي معصب !
فهد : بغير جوه شوي
محمد : هاذي مو عند ابوي
العنود بضحكه : خلوه والله يونسنا !
ام سلطان : سلطان قوم اخوك عزام قبل يرجع مهيّب !
هذال : خليه يهاوشه
ام سلطان وهي تركض ترد على الجوال : هلا يمه منيره
عبدالرحمن ( زوج منيره ) بفرحه : الحمدالله ياخالتي منيره ولدت !
ام سلطان بصدمه : وشو !
عبدالرحمن : اي وتوهم مطلعينها من العمليه
ام سلطان : ماشاءالله ماشاءالله طلعت بسلامه ؟
عبدالرحمن : اي الحمدالله طيبه وجابت بنوته
ام سلطان باستعجال : يالله يالله جايين
طلعت مستعجله وهي تدور هذال : بشاره بشاره !
هذال : وشو ؟
ام سلطان : منيره ولدت جبت عباتي يلا مشينا
هذال بفرحه : وش جابت وش ؟
ام سلطان : بنت بنت
صرخوا البنات بفرحه وام فزاع والعنود والكل مستانسه لمنيره والجده
دخل مهيّب بعصبيه : وش تصارخون عليه !
الجده : مبروك مبروك يامهيّب جاتنا حفيده !
العنود : ماشاءالله الحمدالله انها جت بنت
ساره : الله يقّر عيونها فيها
الجده : عقبالك ساره ان شاءالله تعبون البيت بنات وعيال
عذيه : لا وش نبي في العيال ! نبي بناااات
سهم بابتسامه عريضه : منيره جابت بنت !
هذال : اي الحمدالله ماشين لها يلا
سهم وهو يفز : انا انا بوديكم
سلطان : افطر انت خلني اوديهم
سهم وهو يفتح السياره : ماعليك بفطر هناك
مهيّب : يلا بنلحق عليكم
عديّ من المجلس : بالله خذ لي طريق
فزاع : ابشر ابشر بس بنت اختك جابت بنت
عديّ : منيره ؟
فزاع : اي مستانسين اول حفيده
عديّ: الله يبارك لهم ويقّر عيونهم
فزاع : يلا بجيب فطور ونلحق عليهم ، يماه
ام فزاع : هلا يمه
فزاع : عديّ بالمجلس ادخلوا داخل وعطونا فطور
محمد : والله نسيناه
فزاع : توه قايم
عذيه : اقعدي خالتي انا بسوي له مع عزام
ام فزاع : يعطيك العافيه
ليالي : انتظريني بساعدك
ابتسم فزاع وهو يميزها دخل المجلس وإبتسامته واضحه ويلعب بالمسبحه ، عديّ: الله يديمها
فزاع : امين
عديّ وهو يتكي جنبه : معقول محد يلاحظك ؟
تلاشت إبتسامته بـ هدوء : على ايش ؟
عديّ : التبوسم ذا وش وراه
فهد دخل وهو يسمعهم : وراه كسِر خشوم
فزاع : ابعد بس انا مو سهم !
عديّ : والله من الشعر وانا غاسل ايدي
فهد تنهد بمزح : مخك تعبان وانا عمك
قام فزاع بضحك : بروح اشوف الفطور
