اتجوزت وحش

الفصل الثامن

الفصل الثامن

مليكة

دخلت واخذت شاور والحمام صراحه كان ظريف وفي جاكوزي يعني عامل زي بيتنا بس طبعا اكبر من بيتنا شويه.
لفت نظري اني على الحيطان كان فيه ديكور قديم وكان في صور قديمه.
ومن ضمن الصور ديى كان صور للعيله جدي وجدتي اللي انا اتحرمت انى اشوفهم وده طبعا كان بسبب عمي، بس الملفت في الامر بقى ان الصوره كان فيها عمي وبابا الله يرحمه.

يعني معنى كده اني على الاقل ان فعلا عمى زي ما قال ان هو كان بيحب بابا. وقفت لحظه كده وانا بفكر وطبعا كنت ساعتها طلعت من الشاور وكنت لفه حوالين جسمي فوطه بشكير وجسمى لسه مبلول وشعري مبلول وكنت رافعاه لفوق .

وقفت و سرحت افكر شويه 'هل فعلا عمي كان ندمان؟ وهل فعلا عمي لما كان السبب ان بابا يتحرم من ميراثه و ان هو يتطرد من بيت العيله و يقاطعوه كان فعلا لان ماما بتشتغل رقاصه زي ما هو بيقول؟ ولا كان بيتبلى عليها؟'
ده اصلا لوحده كان سؤال في دماغي وكنت مصممه ان انا اعرف الحقيقه حتى لو رحت دورت على الماضي بتاع ماما كله وجبت شجره العيله بتاعتها اللي انا عمري ما شفتها طول عمري.

وتقريبا سرحت شويه كده وما خدتش بالي ولقيت حد بيخبط وفجاه الباب اتفتح بصيت لقيت مازن في وشي صرخت لدرجه ان الفوطه كانت هتقع من ايدي.

قلت له "اطلع بره "
وهو قفل الباب بسرعه وطلع بره وكلمني من بره قال لي "انا اسف انا اسف انا قلقت عليكى."

لقيت نفسي جسمي بيرتعش اول مره حد يشوفني لابسه كده انا اصلا ما كنتش بلبس لبس مكشوف ولا عريان يعني كان لبسي دايما معتدل. جسمي كان فعلا بيرتعش .حسيت ان انا جسمي بارد .

فجاه مشيت بالراحه على صوابعي لغايه ما قدرت اوصل لغايه السرير وقعدت على الطرف واخذت النفس كده بعمق .

وبعدين هو اتكلم معايا ثاني من ورا الباب قال لي "انتى كويسه انت كويسه؟"

بس انا ما كنتش برد فراح مخبط عليا وصوته بدا يعلى "انت يا بنتي كويسه حصل لك حاجه ؟"

قررت ان انا اخيرا ارد عليه والا هيفتح الباب تاني قلت له "ايوه انا كويسه بس لو سمحت ما تعملش الحركه دي تاني عشان انا اتخضيت وخفت وعمري ما حد شافني كده."

فقال لي "طيب خلاص ماشي انا بس افتكرت ان انتى قلتي لي هتاخدي الدوا بتاعك. افتكرت ان انت جالك غيبوبه ولا وقعتي ولا اغمى عليكى. فقلت اطمن عليك بنفسي ."

لقيت نفسي بضحك من جوه كده بصوت واطي وبعدين قلت له "هو انت مازن ولا انت حد ثاني ؟"

بصراحه مش مصدقه .معقوله يكون بيعمل كده عشان بس يكسب الرهان قدام  مثلا اخوه الثاني اللي هو واضح ان هو مش بيحبه ده ؟؟؟!! اصل مازن ده من اول ما قابلته وهو قليل ذوق وقليل ادب ولسانه طويل وشكاك ومش بيأمن للبنات ومش بيأمن للستات. معقوله يعني مازن هيكون جواه انسان كده حنون فجاه؟! وبعدين هو نفسه اللي قال لي انا ما عنديش استعداد اتجوز واحده مريضه وعندها السكر !! ازاي يعني هيقلق عليا؟؟؟ ولا يمكن هو اصلا كان كان متضايق ان اني باباه هيغصبه على الجواز من واحده هو ما بيحبهاش ويمكن هو فعلا يكون طيب من جوه؟!!