يا غلطة ظلم باكت لذة العشرين

بارت٢

السلام عليكم
*********

# بقلم / الكاتبه سانسا
***************

حسيت على أعياط بابا وكلت شو هم نزل من
الدوام اشجابه ونزلت ابسرعه واسمعه يكول بابا
اي انتي تطلعين ابكيفج ماخذه راحتج
من اني ماموجود ممنوع تطلعين بدون علمي
وفوكاها ماخذه الجهال وماخذه ضحى اتفرفرين
بيها
واني
كلت ابكلبي شنو حرام نطلع
مدرسه وحرمتني منها
هم الطلعه على كرايبنه ممنوع
نطلع شنو هل حكم
شنو هل عقلياات
وامي كل هذا لعياط ساكته بس اتكوله صار وحاضر وتأمر وبعد متتكرر
والله ما اعرف ماما اشلون متحملته كل هاي السنين
لو اني ابكانها جان هم سكتت اخاف اجاوبه أو أرده
هههه
بابا من النوع المتحكم ومعقدنه ابحكمه وامقيدنه
ابكلشي عبالك يطبق علينه شغله امعيشنه ابسجن
وخاصتآ اني اهواي حرمني من شغلات ومن احلامي
جان حلمي الوحيد اكمل دراسه بس بابا أخذها حجه
بمرض ماما
حتى ابطفولتي مااتذكر منه أي حنان
ومن جان عمري 10 سنوات جنت العب بل
حديقه مالتنه وطلعت بره بل شارع
اول مره اطلع وبابا موجود يمه عموهمام
يصير ابن عم بابا عنده شغل يم بابا
وملفات وكعدو يحجون عن الشغل
واني استغليتها فرصه اليه لان بابا
ملتهي ويه عمو همام وطلعت
بلشارع لعبت وحدي لان حتى صديقات
ماعندي ميقبل بابا اصادق بنات جوارينه
وحتى ماما مانعها من الجوارين بس للضروره
مثل واجب وبس
واني حافيه لعبت تكي واكمز وحسيت رجلي
اشتعلت نار واشوفها دم بلكاع واني اخاف
وكمت ابجي وضليت واكفه ما اتحركت
لان برجلي كزازه وبسرعه صرخت ماما
ومحد يمي ومشيت على تك رجل
مثل الأكمز ووصلت البيت
وفتحت الباب على كيفي حتى ميحس بابا
وطبيت الحديقه قريبه عل مطبخ وكعدت
بلكاع اخاف ادخل ويشوفني بابا
وره اشويه طلع
بابا وعمو همام بس ماشافوا النقاط الدم البشارع
ولا شافوني بل حديقه وراح عمو همام
وبابا طب جوه وبقيت اني بل حديقه وكمت
لان هيج وقت بابا ينام الظهر
ومشيت اشويه وسمعت دكت الباب مارحت
خفت من بابا يطلع بس همزين ماما طلعت
وفتحت الباب وطلع عمو همام وكالتله
ماما اتفضل كاللها نسيت تليفوني
واني صحت ماما والتفتت عليه واجتني
تركض لان شافتني ابجي وعمو همام هم اجه
وماما شافت الدم من رجلي وكامت اتصيح عليه
اشبيج اشصايرلج امنين اجاج هذا الدم
واني ابجي من الألم لبرجلي وهيه ما اعطتني مجال
وكال عمو همام شو من رخصتج خل افتهم منها
وكلي اشبيج اشبيها رجلج وكتله عمو اتعورت
بره جنت العب
وكلي غير تنتبهين ضحاوي ورفع رجلي
وشاف الكزازه وكال الماما جيبي تعقيم وكطن
حتى اعقمها بسرعه قبل لتتلوث رجلها
وراحت ماما
وكلي لتخافين ضحاوي هسه اعقمها
ويروح الألم لتخافين سباعيه انتي
واجتي ماما جايبه تعقيم وكطن ووصله
وانطته موبايله لان ناسي
واول شي رش على رجلي تعقيم وبعدها
سحب الكزازه احس ابحراره ابرجلي
وعضيت على ايدي حتى ماعيط ويجي
بابا وهم عقمها وحط كطن وشدها بل
وصله وكمل
هذا لو بابا جان ما اهتم بيه ولاخاف
عليه لان موحنين علينه
لو شايفني متعوره وفوكاها طالعه بل شارع
فوك ظيم الالم لبرجلي ضيم عقابه لان
طلعت بره احسه متعمق ابشغله
امي ضلت تبجي وكالت ليش تطلعين وحدج كتلها
ماما مليت من البيت اريد اطلع وكال
عمو همام ثاني مره انتبهي ياوكحه كتله
عمو انا مو وكحه بس احب العب
ضحك وكال تعاي اشتريلج ضحاوي الحلوة
ضحكت عليه بس كتله ماكدر امشي عمو
كال اشيلج يابعد عمج شالني وخذني
أشترالي ورجعني البيت وهوه
راح ودخلت بل مطبخ على كيف اكدر امشي
على رجلي المتعوره على روس اصابعي
ورحت الغرفتي وحطيت علاكت الحلويات
بلكاع اشترالي اليه والأخواني وطلعت غسلت
وجهي ورجعت بدلت ولبست جواريب حتى
متنشاف رجلي المتعوره
لان اذا شافها بابا وفوكاها طالعه وكاسره كلامه
يعاقبني عقوبه متخطر على بالي
ومشه يومي متجنبه امشي يم بابا أو
اتواجد ابمكان واحد
وتعدى يومي على خير وثاني يوم الصبح
كعدت وكملت الريوك وكملت المواعين وماما عقمت
رجلي ورتبت البيت ويه ماما
بابا طالع ويه أصدقائه هنياله هههه
اتذكر ايام المدرسه وصديقاتي ألي بس من انروح للمدرسه نفس الطريق انروح سوى
عندي صديقات أهواي ويجن عليه من الصبح
علمود نروح للمدرسه سوه بل طريق
ولج زهراء ماحافظه أشلون
وهسه ست سعاد أطيح حظي
كتلها منو كلج لاتحفظين وظليتي بس تلعبين
اوف هسه شسوي
كليلهم مريضه ورجعي احسن متنكتلين
من ست سعاد ضليت اضحك عليها لأن اني حافظه
ودخلنه الأمتحان وجاوبت وطبعآ هيه مامتئكده
من الجواب وكملت وطلعنه من المدرسه وكفت
بل باب أدم هو يرجعني من المدرسه طلعت من
المدرسة اريد امشي لكيته واكف أكبالي كلي
يلا عيني امشي وشنو هاي الصدريه الابسته
ماتستحين أمبين جسمج كله
كتله اول شي صدريتي مابيه شي بس تريد تحجي
كال والله ألسانج طولان يرادله كص
كتله ووووو هو انا ماأخلص منك حته بالمدرسه الاحكني شتريد انا ارجع للبيت وحدي
وكال لاوالله وأخليج ترجعين والشباب
كله أتباوع عليج هيج والله ماأعوفج وأضل
كاعد على قلبج كل يوميه اجي أخذج من المدرسه فهمتي لو لا
كتله أوووف
ومشه وأني أمشي وراه وبل طريق أجه ابن عمي
وياي بل مدرسه اني وياه أبنفس العمر
كلي ضحى تعاي وياي البيتنه لأن أهلج عدنه يتغدون كتله يلا نروح
شو لزمني أدم من أيدي
وكلي أني أوصلكم
طبعآ مصطفى ابن عمي وكله لا محاجه اني أوصلها
هو هذا بيتنه
سكت أدم ماحجه
بس بينت عليه العصبيه وضليت أضحك
ورحت البيت عمامي جنت كولش أتونس
من اروح البيت عمامي أو بيت خوالي والمدرسه
واني وصديقاتي نلعب ونتونس لأن أبيتنه أبويه ميخليني أطلع وبل أمتحانات نهايه السنه
الي هوه الصف الثاني أمي حامل وهيه كولش تعبانه وكلوله أله تتركد حالتها تعبانه
وبقيت اقره وأداريها وأبويه كلي
أبقي يم أمج لا أداومين المدرسه قابل وين توصلين
واحنه ماعدنه بنات يطلعن ويطبآ
وأمج تعبانه هذا حدج المهم تعرفين تقرين وتكتبين
وكتله لابابا حباب كلشي ولا مدرستي حباب بابا خل أكمل لتحرمني الله يخليك والله ماما أداريها واهتم بأخواني والبيت كله عليه بس لتحرمني من مدرستي وطموحي هذا مستقبلي الله يخليك
وكلي
شنو جاي اتعارضين كلمتي كلت ماكو مدرسه
يعني ماكو
كتله لابابا ما أعارض كلامك على عيني وراسي
بس أني شاطره
وكلي ماكو مدرسه انسد النقاش
وطلع بابا باوعت على ماما واني ابجي
كتلها ماما شفتي بابا شيسوي ليش هيج بابا ليش يتعامل ويايا مو مثل أخوانه
اشلون يخلون بناتهم يكملآ
بس اني وكمت أعيط ليش جبتيني ليش
عل ضيم عل قهر
عل حرمان عل ظلم كل هذا ليش
وعفت ماما وضليت أبغرفتي ماطلعت منها
وضليت ابجي واني من أبجي أصير حمره واختنك صعب أتنفس طولت ماطلعت منها
لحد ما اجه أخويه لصغير كال ماما أتريدج
ورحت غسلت ورحت على ماما وكتلها شتريدين
كالتلي يمه لتقهرين نفسج ميخالف يبعد أمج
والله أني أشبيدي عليج والله حجيت وياا قبل ليطلع للدوام
حجيت وياا بس ماكو فايده كال شنو يعني راح أتصير دكتورة خلي أتضل بلبيت يمج ويم أخوتها ماعندي بنات يطلعن
واني كلش أنقهرت وضليت ابجي واني اشوف صديقاتي يداومن واني لا
وضليت انضف بلبيت واشتغل منا المن جابت امي
واني اكو غصه أبداخلي
لأن ماخلاني أمتحن نهاية السنه
وأخلص من الصف الثاني
ومن جابت امي بل سلامه كلتله ماما
خلي ترجع ضحى للمدرسه اني مابيه شي الحمد الله
خليها اتعيد السنه الجايه لتحرمها من دراستها
لان احس أني ابسببي
وكال بابا لا خلي اتساعدج بلبيت ماريد بنتي أتضل طالعه وطابه
أبوكتها اني كولش أنهاريت وضليت بس ابجي
وحابسه نفسي بل غرفه بس من يجي بابا
تجي ماما اتطلعني كوه من الغرفه
علمود بابا ويشوفني بس اني ابكتها من اشوف صديقاتي يروحن للأمتحانات
اباوعلهن من الشباك وأكول جان هسه
أني طالعه وياهن وأضل ابجي
وخلصت الأمتحانات وجابن الشهايد
ناجحات ومتت من القهر
واكول لو امخليني اكمل جان طلعت من الأوائل
لأن اني كلش شاطره وهنه يادوب امشيات نفسهن بس اني اتعب على نفسي بل دراسه اذا مو درجه كامله اكوم ابجي وهيج طلعني ابويه من المدرسه وكسر حلمي
بس شكول عليك بعد

حساب التيك توك للواتباد : asio621

لتنسون تابعوني

وصوتو وعلقو

حتئ تصعد الروايه

للحكايه بقيه

لتحكمون ع الروايه من بدايتها

لتنسون التصويت⭐ والتعليقات🌹

اتركو أثرآ جميلآ