قدر مراهقة 2

الجزء 04

#قدر_مراهقة2
#ميرال_مجد
#بقلم_فريال
الجزء 04
في بالك لافامي تاعو غايضهم حالكم بالعكس راهم غير يستشفاو وحتى من عماماتك عاجبهم الحال عمتك لكبيرة ڨبيل كي تلاقات بعجوزتك (عجوزتي جات للعرس عرضوهم دارنا وهي جات عادي قالتلنا بيناتكم مندخلش انت بنتي ماشفت منك كان لخير وعمرك قستيني وهو وليدي تاني، وتاني من قبل جات لعندي قداش من مرة تخاول تقنعني قالتلي ولدي وعارفاتو عصبي ويدو سابقاتو وانا تاني لمتو وعاتبتو ماخليت مانقولو كي رفع يدو عليك وضربك والشي الي ديريه فيه حلال عليك يستاهل باش يتربى وعمرو يزيد يرفد يدو عليك بصح يابنتي متخليش كبدتك اي طفلة صغيرة معندها حتى ذنب في الشي الي صرا جيبيها لعندك وشديها حتى يفرج ربي ويتحل كلش ويتصافاو لقلوب)، عمتك ماخلات ماحكات فيك اي طفلة هاملة ومهيش تاع مسؤولية ومن نهار لول علاه تخطبوها ولوكان جيتو ليا نمدلكم بنتي شاطرة وكبيرة وجاملة عقلها خير من البز هذيك تاع ميرال حبة بيض متعرفش تقليها وفوقها رمات بنتها هنا تعرفي بلي مفيهاش فايدة زي امها سلالة وحدة مايصلحو كان للعطاية والتزوقيل ولحد الان مفاتش الحال ومطفرتش خلي ولدك مجد يطلقها يتهنى منها 6 شهر وهو متجرجر وراها بلا فايدة خليه يطلقها واذا بيك على بنتو كاين الي تربيها من غدوا ارواحي اخطبي بنتي ونمدهالك تربيلك حفيدتك وتقوم بولدك وتفرجو وتعمرلو دار بلولاد ومتخافيش بنتي متظلمش الطفلة صغيرة راح تحطها في عينيها اي تربيتي هذيك عاقلة بزاف كلمة عيب ماتقولهاش. ايه مليح خلي تلصق بنتها فيه وش يهمني من طول عمرها تغير من ماما ومنا وتحوس على الفضلة تاعنا _ اقعدي هكا حتى تسمعي بعرسهم ولثم ابقاي تندبي على زهرك لمسود وحتى من بنتك يدوهالك، كي قالتلي حتى بنتك يدوهالك منعرف بواش حسيت دقيقة هذيك خفت انعم هيه خفت مجرد تخمام انو ممكن نخسر بنتي وتديها وحدة خلاف وتربيها خلا الخوف يتسلل لمخي علبالي مجد ميديرهاش ومستحيل يتزوج عليا بصح عارفة عماماتي واعرين واذا دارو حاجة في راسهم مايرتاحوش حتى يطبقوها، من قبل صح بنتي بعيدة عليا بصح كنت عارفة بلي راهي مع باباها برك وذوك كي قالتلي خالتي لكلام هذاك وانو ممكن تجي وحدة وتربيها في بلاصتي وترجع تعيطلها ماما خلعت وقررت نخمم ونحاول نلقى حل من قبل ماكنتش خايفة وكنت شبه متأكدة بلي مجد تاعي ومستحيل يبدلني يالوكان يعطوه مال الدنيا ثقتي فيه وفي حبو ثقة عمية لوكان يقولي ارمي روحك في نار نرمي روحي بكل بساطة لانو واثقة فيه بلي مستحيل يضرني ينضر هو ومننضرش انا بصح ذوك كي حسيت بلي كاين طرف ثالث حاب يدخل في نص ورايح يخرب علاقتنا الي اصلا مخروبة قررت ننفض لغبار على روحي واول خطوة نديرها هي اني نحكي مع طبيبة تاعي ونتأكد بلي رتحت خلاص مع انو هي آكدتلي بلي رتحت من شهرين بصح انا مصدقتهاش وكنت ناوية نبدل طبيبة باش نعرف اذا الاكتئاب راحلي ولا مزال باش نقدر نرجع لحياتي السابقة ولبنتي وراجلي.
#فريال