قدر مراهقة 2

الجزء 05

#قدر_مراهقة2
#ميرال_مجد
#بقلم_فريال
الجزء 05
ناضت خالتي خرجت وخلاتمي وحدي بعد ماشعلت فيا نار لغيرة ايواك هيه نار لغيرة انا نعتارف ونقولهالكم انا غرت ومش من بنت عمتي لا وانما غرت على صوالحي بما انو عمتي حكات مع ام مجد على بنتها تسمى باين بلي بنتها راهي حاطة عينها عليه وتظل تكحل وتشوف فيه معليش انا نربيها ونخليها تعيا ترفد راسها قدام ناس وين ماتشوفني تبدل طريقها (وهذاك الي كان رجعت تشوفني تهرب مني الشي الي درتو فيها مكانتش متوقعاتو اطلاقا). تسطحت شوي من تعب هذاك ولعيا غمضت عينيا بصح مرقدتش فات شوي وقت حتى نسمع في حس رنيم بسلامتها كي تجي ماشية ولا رايحة دير فوضى كبيرة تقول ضرب زلزال وفيل الي يمشي مش عبد، دخلت حطت لجين بنتي قدامي في الفوتاي الي جاي في شومبرة وغطاتنا وراحت انا لعبتها راقدة ومغمضة عينيا حتى خرجت باش فتحتهم لقيتها قدامي راقدة وياربي شحال توحشتها صح موالفة نشوفها فليفوطو (كان مجد كل يوم يبعثلي فيديوات تاعها وفوطواتها طول 6شهر وهو يبعث صح منحكيش معاه بصح محرمنيش من شوفة بنتي وتفاصيلها خلاني نشوف كلش كأنو كنت معاها بصح مكنتش نبين لأي واحد بلي راني مهتمة بيها ولا بتفاصيلها ولا حتى اني نشوفها ولا نبوسها نحضنها نرقدها عندي )،مرات يجيبهالي مجد بصح منقربلهاش قدامهم نخليهم حتى يخرجو ونهزها ونبوس فيها ونحاول نشبع منها بصح مقدرتش شكون فينا يقدر يشبع من بنتو كبدتو قطعة منو. هزيتها وطحت عليها بالبوس  توحشتها بزاف السمانة هذي مقدرتش نقعد معاها وحدي كان يجيبها وين مانجي نقعد معاها تجي وحدة وتقابلني وخصوصا الكلبة هذيك تاع بنت عمتي في كل دورة نلقاها رافدتها مكنتش حاطة معاها بصح ذوك فهمت علاه كانت دير هكاك باش تبين شطارتها وتقدر تتقرب من مجد. بقيت عڨاب لجين حتى ناضت لابسة غوب بلونش تاع صغارات ومع هي مطبزة ومكعبرة تتاكل جات تهبل نبوس فيها ونقول الله يبارك ماشاء الله (العين حق حتى ونكون يماها بصح ممكن نضربها بعين). قعدت تلاغي وتلاحت حضنتني وانا تاني محضنتها كيما موالفة تلوح يدها داخل صدري وتحط راسها عليا باش ترقد (خدايم باباها هكا كان يدير من قبل)، كي شبعت منها شوي رقدتها ووقفت باش نخرج باش واحد مايشك فيا (هوما ماعندهم مادخلهم فيا نهزها ولا نقعد بصح انا كنت نكابر حابة نبينلهم بلي نقدر نعيش بلا بيها ومش راح يشدوني بيها ويفرضو عليا قراراتهم منخليلهم حتى فرصة باش يوجعوني).
#فريال