[ ✓ ] SITUATIONSHIP

⚘ once upon a mistake

Tuna ka bula mu mek chu ka han en a, kum tam tak liam taa a hmel chu a la pu reng a, tlêmin a lo upa ve ta deuh tih mai loh chu. Khang kum chhûng zawng khan vawi 1 tê mah ka theihnghilh ngai lo a, beiseina nen ka tawn leh ka ring tlat thin kha ania. Kan tâna Pathian ruat hi zawng a mak mang e, khâng hun te kha theihnghilh tuma ke ka pen lai mêkin min han tawntir leh chu ania. Engpawh ni se, Pathianin hmangaihna dik tak min hriattir nâna rei lo tê min lâksak hi ka tâna tha tur zawka a ruahmanna a lo ni reng a, tunah chuan kan hun liam tawhte theihnghilhin hlim takin bul kan tan that theih phah a, Pathian ruat engkim mai hi malsawmna vek a lo ni. 🫶🏻

── ⋆⋅☆⋅⋆ ──

Victoria P.O.V

Zingkar hma takah ka tho a, ka phur hle mai. Vawiin hi higher ka kal tan ni tur a ni a, pawl 11 lai ka lo ni ve ta reng mai, hun hi a kal chak mang e.

Class kal turin in atangin ka chhuak a, a la hma deuh vangin ka thiannu ka sawm kawi a, class kan han thleng chu zam a na duh ngei mai, new comer ang maiin kan ti dûk a. Mahse kan zirtirtuin ka hming lama thil ti tura min tih chuan tlêmin min ti thlamuangin min ti confi deuh a. Class kal tirh atangin ka zak lutuk chuan mipa rêng rêng ka lo en lo a. Short break kan neih lai chuan kan chhuak sang sang hlawm a, kan class atang ngei chuan mipa 2 hi an rawn chhuak ve a, 1 zawk chuan ka mit a la ta zar mai, a vun rawng pawh tawk chiah, hmel pawh chhe em em lo, pian inphut mawi tâwk tak mai a ni, amah tawp chu ka duh chi a ni tawp mai. Ka en reng lai chuan min rawn en lêt ve a, mahse zah avangin ka hawi sawn nghal a.

A ni ngei chu nakin lawka ka nun la chawk buaitu tur a ni tih rêng ka hre si lo.

. ⪩⪨ .

Hun a kal ve zel a, thian pawh a hma aia tam ka nei ve zel a, school pawh nuam ka tih vanglai tak a ni ang tih turah chuan exam a hnai tih an sawi leh ta mai, hlim loh nghâlna tham a ni.
Thian ngah ve tawh viau mah ila mipa ka kawm tehchiam lova, min rawn biak châng erawh chuan tha deuhin ka chhang thung. Ka mizia hi mak ve deuh tak a ni a, ka thian hnaivai takte bulah chuan ka extrovert êm êm a, ka kawm vak ngai lohte bulah erawh ka introvert thung a. A awmzia berah chuan 'ambivert' ka ni tihna nih chu.

School kan kal rei ve deuh tâkah chuan khapa, kumtir lama min attract deuh tu kha a hming te, a nungchang te ka hrechiang chho a, a hming chu Jordan a lo ni a, a thiamthei pâwl a ni ve chuan ka hria, a nungchang pawh a tha hrih viau a, a rûk tak chuan ka crush ve hle a. Biak erawh vawi khat mah kan la inbe lo thung. Ka thian kawm thinte tumah erawh ka crush tih thu ka hrilh ngai chuang lo a. Mi inngaitlawm tak ka nih rual hian mahni tâwka inla ve tak ka ni a, crush ka lo nei a nih pawhin an hriat hi ka duh lo bur, chumai bâkah bialpa neih hi ka la ngaihtuah loh hrim hrim vangin hre lo law law se tha ka ti thin hrim hrim bawk a.

A thiamthei pawl ka nih ve avang chuan miin min ngaisang der ve hle a, topper tur tia min chhaih tawk pawh an awm nual. Mipa ho chuan a khât tâwkin kan zirlai te chu min zawt deuh reng hlawm bawk a. Mipaa ka kawm ve deuh ber Jeremy chu a fail ka hlauh êm avangin kan zirlai te chu ka hrilh uluk êm êm a, dik tak chuan ka thiante tân hi chuan ka hlu ve ngawt mai. A lawm thiam ve thei hle a, amah hi thiam thei zir tha peih lo kan tih ang chi kha a ni a. Eng emaw ti zâwng tak chuan kei zirlai ringawt ngaihsaka, intih thawvenna hun takngial pawh insiam ve ngai lo tân chuan a nun chu a awhawm hle a, class-9 ka zawh atang phei kha chuan ka zirlai avangin ka thiamthil, drawing te, crafting te, story ziah te lam ka bansan vek tawh a, ka ngainat êm êm lehkhabu chhiar tura library-a kal tur takngial pawn hun ka nei tawh mang lo. Keimah ang lo takin ka thianpa chuan a thiamthil chu a hrechiang a, bansan ve mai mai a tum ngai lo thung, thiamthil a ngah reuh êm êm a, drawing ngat phei chu a thiam hle a, ka mi tawn tawha talented ber a la ni hial ang. Amahah hian zir tur tam tak ka nei tih pawh ka hrechiang hle.

Ka thianpa ka zirtir mawlh mawlh lai chuan kan hmaa thu Dominic chuan min rawn zâwt ve a, tha deuh deuh chuan ka chhâng a, a bul chiaha thu Jordan chu ka mitsir chuan ka en leh zeuh thin a. Chutah beisei loh tak mai chuan min rawn en ve kur a, ka hawisawn chiang hle. Chutah "Victoria" a rawn ti thut! Ka phu chiang lutuk chu, thla chu nei ila ka thlawk thei hial ang tih tur a ni.
"Min lo hrilh ve teh," a rawn tih leh thut phei chu mak ti lutukin ka en nghal a, "Awle" ka ti bah deuh nawk a. Ka zirtir lai chuan min en char char a, a hunlai phei kha chuan ka pumah hian butterfly a thlawk chum chumin ka hre hial a ni.
Uluk fahranin a ngaithla a, ngaihsak loh hmel takin awm mah ila a rûk tak chuan ka hlim a ni.
Ka zirtir zawh hnua ka thutna hmuna ka kal leh pawh chuan ka thil tih zawh chiah chu hrechhuakin ka khi vur vur a. Ka zirlai ka chhiar melh melh lai chuan min lo la en reng tih ka va hmu a, ka va en phei chuan nui chung hian, "I lehkha zir kha i hmuhnawm lutuk, i lehkha zir en tur ringawt pawh khan in ina lo kal ka châk," a rawn ti ta mai a, ka nui suk duh chauh a, a mawiah "I over hle mai," ka ti lêt ve a.
Chumi tûk atang chuan study leave te kan nei a, kan chawl ta char char a, exam kan tan ni chu kan inhmuh leh hmasak ber a ni.
Exam tha taka ti turin duhsakna min hlan a, chu chuan chakna thar min pe ni mai hian ka hria, ka awmdan erawh hi chu a hriat ka duh hauh lo.

Chu chu a ni kan pahnih inkar bul kan tanna chu.