قدر مراهقة 2

الجزء 11

#قدر_مراهقة2
#ميرال_مجد
#بقلم_فريال
الجزء 11
كيما كان لحال رقدنا ليلة هذيك ف3 رنيم حطيناها في نص خايفين طيح ولا نقولو هي خافت طيح لانو تتحرك بزاف فليل كل رجل في جيهة، ليلة كاملة وهي تضرب فيا قلقتني وين مانغفى تصلحلي ركل ولا بونية شبعتني مخبط نضت على سعدي ووعدي فرشت فلرض وخليتها تتخبط وحدها، فقت وقت لفجر صليت ورجعت لبلاصتي طار نعاس شفت لجيهة رنيم لقتيها راقدة ولا على بالها جات في بالي فكرة شيطانية قولت نبرد قلبي فيها شوي نضت جبت قرعة ما وفرغتها تحتها وبليتلها شوي بيجامتها ورجعت بلعقل لبلاصتي وستنيتها تفيق والو جبت قريب نص ساعة وانا نتقلب في فراشي نستناها تنوض باش نشوف ردة فعلها والو زي الميت ماكان عليا غير نروح لعندها ونوضها، قربت قدام راسها وعيطتلها رنيم رنييييم نوضي وش الما هذا الي تحتك راح تولدي ازربي فيقي نديوك لسبيطار رنييييم، فاقت مخلوعة تشوف من ومن من بعد كأنو حست بواش تحتها لاحت يدها لقات بلاصتها مبلولة دارت ليا قالتلي وش هذا لما منين جا بولت تحتي _ لا هذا مش بول يمكن ما تاع الراس هبط لازم ندوك لسبيطار قبل مايقوى سطر عليك _ وينى سبيطار وولادة كيفاه هذي _ تصرا بزاف كاين الي يولدو قبل لوقت هيا بالخف نوضي لا قدر الله كشما يصرا للبيبي، مع نقولها هكا وتنوض تعيط ايييييييييي وااااااائل امااااااااا اجرييييلي راح نولد واااااااااااائل راح نموت تعيط بالصوت انا خلعت كنت حابة نلعب معاها بصح هي صدقت صح وناضت تعيط بالصوت حتى سمعنا صوت ماما جاية ومعاها خالتي وجدة فتحو لباب لقاوها تعيط وتبكي وانا واقفة فوق راسها. ماما تخلعت وجات تجري قالتلي شبيك وش صرا مرت خوك وش بيها، انا سكت مالقيت مانقول ورنيم مابغات تسكت تبكي بالصوت وتقولها راح نولد اماما (تعيطلها ماما زينا تعاند فيا اللصقة هذي) ايييي كرشي راح نموت _ اسكتي بلا عياط فهميني اسع عندك سطر ولا نو _ لا مكانش _ وعلاه راكي تندبي امالا على صباح ربي _ ها شوفي لما تاع راس هبط وهي قالتلي ممكن تولدي _ وينى ما وش هذا، لاحت يدها قاست الما الي فلفراش وكي شغل فهمت القالب دارت ليا ديراكت قرصتني من يدي عيطت _شبيك تقرصي فيا وش درتلك _ يديرلك ربي دقة على راسك ياواحد الكلبة عىاه تخلعي فيها علاه متحشميش ناس عندنا وانت نوضتيهم _خليهم ينوضو باش يصلو الفجر خير مايرقدو بلا فايدة، نطقت رنيم قالتلها اماما راح نولد عيطي لوائل يجيني _ هذاك الهامل او بايت عند دار عمو منين نيجبهولك ذوك انا وزيد ماراحش تولدي كشما شفتي وحدة تولد على 4شهر ونص ياالحابسة تقول ماقريتو ماشفتو ارقدو ذوك نسمع حسكم نعدمكم _ ايه  صاي انا اصلا مدرت والو هي ناضت تندب على راسي بلاك كي فاقت فليل تشرب لما سيحاتو على روحها، رنيم مزالها مدوخة من رقاد صدقتني ورجعت ترقد اما نبع الحنان زادت قرصتني وخرجت قالتلي حسابك من بعد كي يروحو ناس قولتلها كي تلقايني _ وين تروحي _ نهمل وندي على راسي (تقول حسيت بلي رايحة نهمل ونروح صح).
#فريال