قدر مراهقة 2

الجزء 12

#قدر_مراهقة2
#ميرال_مجد
#بقلم_فريال
الجزء 12
انا طار عليا نعاس كيما حاولت عيت نرجع نرقد نضت لقيت جداتي وخالاتي وعماماتي نايضين صبحت عليهم وفت وجدت لفطور حطيتلهم فطرنا كامل مع بعض انا غير ساكتة وهوما يحكيو فلانة لبست هكا دارت هكا ولوخرا مجاتش وشتي لوخرا مسلمتش على سلفتها وباين بيناتهم مشاكل وايا وتقلع الرادار تاع عمتي لكبيرة (علبالها بكلش عاسة ناس تعرف كل صغيرة وكبيرة عليهم اما باش تعس بناتها متقدرش) بدات ترويلهم وتحكي سبب لمشكل الي هو ولد سلفتهم حب يخطب بنتها ولوخرا بغاتو يدي بنتها ايا وتعاركو (سبب تافه زي الانسان الي راهو يحكي عليه)، انا كي قلقوني نضت جيت خارجة عيطتلي عمتي اييي وين بيها اقعدي هنا توجدي لفطور لبناتي ذوك ينوضو هوما يحبو يفطرو بالبيض والخيار وطماطم والفرماج مش قهوة وحليب وفوت ومذابيك لخيار متقشريهش خليه هكاك بنتي متبغيهش مقشر وزيدي ديريلهم جو تاع لفراز يحبو الي مخدوم في دار. انا درت يدي على خصري وبقيت نسمع لطلباتها كل ماتسكت نقولها اهيه زيدي كشما نسيتي اهيه كملي، خليتها حتى كملت طلباتها كامل وتشراطها ونقلعلها بناتك الشارفات مهمش مكسرين من يديهم واذا غاضوك نوضي ديريلهم يفطرو انت مش تجي لعند لعباد وفوقها تبقاي تشرطي وتطلبي منهم يخدمو بناتك ويوجدولهم كلش ويوصلوه لفمهم خص غير نزيدو ندوهم يبولو ونغسلوهم هذا الي بقى، تقول مازوت ورميتي فيه نار شعلت ضربة وحدة فيا يالهاملة الكلبة الرخيسة تعيطي عليا انا في دار خويا منيش في دارك ولوكان مش هو والله مانجي لدار هذي ضيف متقيموهش هذا شويتح فطور خسرتوه في بناتي والله مانقعدها وتحرم عليا دار هذي _روحي طولتي لباب قدامك ارفدي بناتك وقودي _ وياااااااخويا اجري تسمع بنتك الكلبة تحاوز فيا سمعتوها ياناس راهي تحاوز فيا القحبة الرخيسة الي رماها راجلها وقعدت تتلوهط الي رمات كبدتها وخلاتها وبقات للعطاية يا الي مكيش متربية تردي الهدرة لكبار، مخلات ماقالت الي كانو راقدين كامل ناضو جاو يجريو خرجت للكولواغ وتعيط حتى تلمو كامل عليها مام بناتها قعدت تندب وتبكي جا بابا وائل ماما كامل راحت لبابا قالتلو بنتك حاوزتني وسبتني وقالتلي طماعة ومتسوايش وقودي من دارنا ميشرفنيش تقعدي عندنا هذا كامل كي قولتلها علاه مترجعيش لدار راجلك وتلمي بنتك خير ماراكي قاعدة هنا واحد مايدوملك من غير راجلك ناضت كلاتني بلا ملح تسب وتعاير فيا ترضاها ياوليد ما وبابا ترضاها لختك تنهان في دارك، بدات تخبط في فخاضها ووجها تندب ودمع قتلت روحها بالعياط الي يشوفها يقول صح مظلومة وانا ظلمتها.
#فريال