تحت سيادة القانون

هنا تبدأ الحكاية

الساعة ٩ صباحاً / يوم السبت

كعدت على صوت الفون المزعج  و على الصداع القوي الي مو ناوي يفاركني
باوعت ع الفون رقم غريب يتصل بيه
تجاهلته لان عرفت هم من الدوام واني مالي مزاج اجاوب هسه و بعدين هذا يوم اوفي شنو هالازعاج!

كمت من سريري رتبته ورحت اشوف غرفة اطفالي بعدهم نايمين!
رجع ورا ١٠ دقائق اتصل بيه نفس الرقم تجاهلته كالعادة

رتبت البيت ع السريع و سويت ريوك قبل لا يكعدون الاطفال
اخذت الفون من الشحن و كعدت اتريك واشوف مسلسلتي الجديدة
بهاي الاثناء رجع اتصل الرقم نفسه
تنهدت و قررت افتح خط
- السلام عليكم حضرتج نور مهند؟
-عليكم السلام اي افضل منو؟
-اني احمد من دائرة صحة بغداد حبيت ابلغج ان طلع اسمج تنسيب لوزارة الدفاع طبابة عسكرية لمدة ستة اشهر.
صدمة خلتني اضحك بدون وعي بحيث خليت الشخص الي ديحجي وياي مستغرب استوعب الي كال و رديت
- يا استاذ اكيد انت غلطان اني ما مقدمة على اي تنسيب لغير وزارة!
-اعرف الاختيار صار عشوائي بدون اي تحديد وحتى تعرفين اكثر راجعي دائرتج وهم يفهموج عن الاجراءات الباقية
رديت بعصيبة
-يا اجراءات انت خبل.
سديت الفون ع السريع واعصابي نار صارت شلون!  شنو هالحجي
يا تنسيب شديصير بالدنيا!

ع السريع بدلت ملابسي و كعدت اطفالي وديتهم بالحضانة ورحت على مكان عملي
اول  ما وصلت لكيت صديقتي تنتظرني بالاستعلامات  فكرت ان هي مو دوامها اليوم ليش جاية؟
بعدين استوعب ان يمكن صار وياها نفس الي صار وياي
رحت عليها بسرعة
- اسو شكو ليش هنا انتِ؟
باوعت عليها والدمعة بطرف عليها
-وانتِ ليش هنا؟
- جاية اشوف المصيبة الي اني بيها واحد خبل اتصل بية
قبل ما اكمل صرخت
- شننننو انتِ هم اتصل بيج وكلج علمود التنسيب؟
- اي ، لا تكليلي انتِ هم طلع اسمج
ردت و نطتني امر اداري وكالت
- شوفي اسمي و اسمج و مها ويانة هم
رديت ابقي هنا رايحة اشوف شنو الي صار
رحت دخلت للمكان واني النار تطلع من عيني
رحت على المسؤول مالتنا وكلت
- خير استاذ محمود شنو هذا الامر الاداري وليش بس احنه؟
شافني عصيبة نطاني بطل مي وكلي كعدي خل افهمج
-اني هم ماعندي علم بكل هذا الي صار
بس السالفة وما بيها ان هذة عملية مشتركة بين وزارة الصحة و وزارة الدفاع لان عدهم مهمة تطهير اراضي غير مطهرة من العبوات ، وان الاسماء الي اختارت هي عشوائية من كل مكان اختاروا ثلاث اسماء تنسيب لمدة ستة اشهر تمام وصلت الفكرة؟
سألني وصلت الفكرة
يا فكرة تحجي عنها هو غير لو اني دا اسوعب الي ديصير مستحيل
رديت بعصيبة
- مستحيل اني ارفض التنسيب اني بحياتي الوظيفية كلها ما لازمة خفارة
تريد اروح للطبابة العسكرية و بمكان خطورته ١٠٠٪؜
مستحيل
رد بعصيبة وكال
- شوفي نور ترا تعبت واني افهمجن ان الشغلة مو بيدي ما عاجبج قدمي استقالة ولا دوخن راسي بعد
ضرب الميز وطلع من المكان
ضليت اني حايرة شلون راح اصرف و شنو ممكن اسوي
فكرت باطفالي شلون راح اعوفهم ...