#عڪد_الهـوى
1
اتصنت لحجي حبوبتي والسيد كالتله بحس ناصي
ـ بعدك هاويها يمه؟
تمدد ململم جسمه وحط راسه بحضنها كالها بصوت بيه رجفه
ـ علوية تساليني وانتي اكثر الناس تعرفين شلون عاشكها ولو يصح بيدي ابيع الدنيه واشريها
سكت دقيقة وكمل حجية، اول مرة اسمع كلمة يمه من السيد دائما يكول علوية حتى احنا ما يندهلنا بـ اسمائنا دائماً ينطق علوية بدال الاسم
- يمه اريدها حتى لو بس ساعة وحده اشبكها لصدري بالحلال وبعد حتى لو الله ياخذ امانته ما تفرق عندي المهم اروي الشوگ واكتل سنين الصبر
ـ خايب شمالك صاير رجيج وانت سبع السادة
ـ من توصل السالفة الها ادوهن وحك داحي الباب مايضل سبع حيلي كله يرجف
ـ نروح باجر انه واخياتك نخطبها الك؟
طفر كعد على حيله سألها بخوف ولهفة
ـ وشرايج توافق؟
ـ وليش ما توافق؟
دنك راسة سحب نفس قوي لصدرة وزفرة بهدوء كالها
ـ تكسبين بيه صدقة جاريه ليوم الدين، بس خايف ترفض بسبب الماضي اللي بينا ...
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
2
واكفة اخبز وعيني على السيد واكف كبال المراية والمغسلة يرتب بـ لحيته لابس دشداشة بيضه كل ما يلبس هذا اللون حبوبتي تكول له
ـ ولك يمه يمتى اشوفك عريس خايفه عيوني تعمى
ندك الجرس طلع ايهاب يشوف منو واني نصيت التنور وتكترت على صوب
دخلوا جهال عمه سكينه وهي وراهم ايهاب سد الباب وحضن عمتي يسلم عليها
السيد غسل اديه ووجها نشف بالخاولي الي يمه وابتسامته نطبعت على ثغرة من سمع حسها وحس جهالها
الجهال كلهم حضنو فرد حضنه وهو دنك باسهم واحد واحد ويحاجيهم كانما يحجي ويا اكبار
طلع من بيناتهم فتح اديه وهو يتقدم لعمتي ويكول بصوت يدغدغ الگلب من حنيته
حيدرة :- هلا بيج خوية يوم أجيتي
ودكِ كواريكج بـ بيتي، ولخاطرج لرهن لحيتي
هلا بيج ياعمة جهالي
حضنته عمتي وهي تكول
ـ من اندار سبع فدوات الك ولجهالك نذر عليه اترس العگد جكليت يوم الي تعرس وتفرح گلوبنا الشيبت بشيب راسك
حضنته تبوس بوجه، اخذها جوا ذراعه تقدم بيها ناحيتي تدنيت سلمت عليها بشوق ...
،،،،،،،،،،،،،،،،،،،،،،،،،،،،،،،،،،،،،،،،،،،،،،،
أنت تقرأ
عكد الهوى
Romanceرغم زحام المكان لا انظر لاحد سواك لا أعلم لماذا أو لمَ هذا الحب وهل هذا يسمى حب إم ماذا ؟؟ أعلم إنه شغفاً ان اتبسم لمجرد رؤيتك وان تتغير ملامحي لمجرد ان اراك منزعجاً لن أجد تفسيراً مقنعا لهذا ابدا ـــــــــــــــــــــــــــــــــــــــــ♡♡♡♡♡ ڪطائ...
