Rebirth As Khattar (ခတ္တာအဖြစ်ပြန်လည်မွေးဖွားခြင်း)Completed

အပိုင်း ၁၀

''အားပါပါထုစမ်းပါကိုအတာရယ်အားမရလိုက်တာယဥ်ယဥ်ပဲလုပ်ပေးပါမယ်ဆိုမှ''

''ဟဲ့အရမ်းကြမ်းရင် ကျိန်းလို့အရည်တွေပါထွက်လာပြီဒီမှာကြည့်''

''အို ...နီနေပြီပဲ''

ခတ္တာအိမ်ကြီးသန့်ရှင်းရေးလုပ်ပြီးပြီးချင်းအရီးစုံတို့ဟင်းချက်နေတာကိုဝိုင်းကူချင်သည့်အတွက်ယဥ်ယဥ်ထောင်းနေသည့်ငရုတ်စုံအားလု၍ ဝင်ထောင်းလိုက်သည်။ ပထမတော့ဟုတ်မလိုလိုနှင့်ကြက်သွန်နီရဲ့အပူကြောင့်မျက်လုံးကတအားကျိန်းစပ်ပြီး မျက်ရည်တွေပါကျလာ၏။

''ငါ မရတော့ဘူး နင်ပဲဆက်လုပ်တော့''

''ဒါနဲ့များ သူများငရုတ်စုံကိုဝင်လုနေသေးတယ်''

''ဟဲ့ကျုပ်သားကကိုကူချင်လို့နေမှာပေါ့ သူမလုပ်နိုင်ညည်းလုပ်လိုက် လျှာကိုရှည်တယ် တကယ်တည်း''

ယဥ်ယဥ်ကအရီးစုံနှင့်ခတ္တာကိုတလှည့်စီကြည့်၍မျက်စောင်းထိုး၏။ခတ္တာ ကျေနပ်အားရစွာရယ်လိုက်တော့ အရီးစုံကပါတ ဟားဟားနှင့်ရယ်တော့သည်။ ဒီရက်တွေတွင်းအရီးစုံနှင့်ခတ္တာဟာတကယ့်သားအမိအရင်းချာတွေလိုပင်။အရီးစုံက 'သား'ဟုတစ်ခါတစ်ခါခေါ်တိုင်းရင်ထဲနွေးထွေးသလို အမေ့ကိုလဲသတိရမိ၏။

ကြက်သွန်နီကြောင့် စပ်နေသောမျက်လုံးနှစ်ဖက်ကြောင့်ခတ္တာနေရာမှထလာပြီးအုတ်ရေကန်ဆီအမြန်သွားရသည်။လက်တွေကိုသေချာဆေးပြီးမှ မျက်လုံးကိုရေနှင့်ဆေးလိုက်သည်။မိနစ်အနည်းငယ်လောက်နေတော့ မျက်လုံးပိတ်ရဖွင့်ရအဆင်ပြေသွားပြီးပုဆိုးစကိုဖြေ၍ ရေစိုနေသည့်မျက်နှာကိုခပ်ကြမ်းကြမ်းသုတ်ပစ်လိုက်၏။

''လူလေး...အိမ်ကြီးရှေ့မှာထားထားတဲ့ပစ္စည်းအိတ်တွေသွားသယ်ပြီး အနောက်ဖက်ပို့ထားလိုက်ဦး ဧည့်သည်တွေလာမှာမလို့ ရှုပ်နေရင်အမြင်မသင့်ဘူး''

''အခုပဲသွားရွေ့လိုက်မယ်ဘထွေး''

''အေးအေး''

ခတ္တာပုဆိုးကိုပြင်ဝတ်လိုက်ပြီးအိမ်ကြီးဘက်လျှောက်လာခဲ့သည်။အိမ်ကြီးရှေ့ရောက်သည့်အခါအတွင်းမှ တယောသံလွင်လွင်ကိုကြားရသည်။ဦးမျိုးဆက်ထင် စိတ်ကြည်နေတဲ့အချိန်ဆို ဓာတ်စက်နှင့် တယောသံခပ်အေးအေး ပါသည့်ဓာတ်ပြားကိုဖွင့်တတ်သည်ကိုခတ္တာသိနေပြီဖြစ်သည်။