Chawhma class kan kal a, chawhnu lam erawh teacher te an buai deuh a vangin kan chawl a, naktuk inrinni a ni bawk a tiin hostela let nghal lo in bazar kan tum a. Ka thianten 'MC -ah kal ang u' an tih avangin kan in zui phei leh. MC kawt kan thlen chuan ka thiante chuan 'tah hian thu ang u' an tia pawnah chuan kan thu thap, 'ava ho ve' ka tih chuan Rini chuan 'phun phun suh' min la ti zêk zui, Sawmi chuan 'eng nge kan tih ang?' a tih chuan Rini chuan 'ka hrelo' alo ti ve leh, hahthlak ti zet chuan ka thaw hak, 'helai thleng thleng min hruai a,tih tur ber in hre leh silo, ninawm lutuk' ka ti hlar, Rini chuan 'saw, enteh, hmahni a hau vak tu che kha' atih chuan a en lam chu ka en ve vat, kan piah ah chuan kha pa hmeltha thinchhia-a kha alo ding ,abulah chuan dawra kan hmuh hmeichhe chapo zet pawh kha alo ding ve, Sawmi chuan 'saw nu saw, dawra kan inhnialpui kha ani em?' alo ti ve zat. Rini chuan 'awii a va han nasa saw nu saw chu, ahmai te saw a vuah nasa si' alo ti ve leh, Sawmi chuan 'a vuah anilo, ahnawih an ti' alo ti ve leh, thinrim viau e tilo chuan kan nui leh rih, hahthlak thei ania. Sawmi chuan 'kal ang u, saw tiang ka hmu peih lo' tih pahin a tho a, MC lamah chuan a kal nghal , a hnungah kan zui ve nghal bawk. Tih vak tur hre lo in Mc chhungah chuan kan tei kual mai mai a, rei fê kan kal kual hnuah chuan 'haw ang u' ka thiante chuan an ti ve ta hram, haw tura kan in zui chhuak nghal.
Haw kawngah chuan ka thiante chuan 'an in ngaizawng aniang a' tiin nichina kan mi hmuhte chanchin an sawi thla char char, ka rilru chuan 'in ngaizawng lo se' ka lo ti ve char char. Hostel kan thlen chuan in tifaiin assignment te kan ti leh a, kan zawh fel meuh chuan chaw ei ahun leh der tawh. 'hun lah hi ka ning, ninawm' Rini'n ati chuan Sawmi chuan 'hunte chu a ninawm ami, i hman dan a ninawm vang mai mai anih kha' alo ti ve leh, an in chhang tawk thei sia, hahthlak.'takin, Seni hi engtikah nge alo haw dawn?' Sawmi bawk chuan alo ti leh, 'ka hre teuh lo mai, i awm naah tho anih hi ka awm' Rini chuan alo ti ve hmak, Sawmi chuan 'i awm lo ka tia mi? Kawmthlangah i awm ka tia mi?' alo ti ve leh 'in ninawm, in hnial reng su, in tawngthei lutuk' ka lo ti hlak, engah mah chuan an ngai chuanglo, an la in hnial char char tho. Dam chuan hun a kal ve zung zung a kha pa thinchhe deuh hmeltha tho si pawh kha thla khat lai ka hmu tawh lo, rilru chuan ka hmu thut mai thei tiin ka hawi kual a mahse hmuh tur a vang khawp mai, Zawlkhawpui hi a zau mah mah anih hi ka ti rilru vawng vawng. Class bana ka mu chu ka phone ri chuan min lo ti harh, min lo call tu pawh en lo chuan ka chhang ve mai, mumang nen ka la awm ni berin ka hria, peih lo deuh a 'âww,,' ka tih chuan hmeichhia nutling aw tih hriat zet hian 'M-i, M-i i ni ti raw?' mangan hmel zet hian alo ti a, 'aw, aw , ni e, tu nge aw?' ka tih chuan 'i nu mapuii Vanlaiphai ami ka nia' alo ti ve nghal, 'anih chu enge ni ta?' ka lo ti let ve vat, 'i pa Mawia Civil hospital-ah khan a awm a, zaninah doctor-in zai angai atia, Sangtei nen chiah an lo kal a, awmpui tu tur dang an awm silo a, khawngaihin lo han awmpui mai teh, zanin chiah chu, Sangtei lah ala naupang sia, amah ringawt chu kan ring zo silo a' alo ti nghal char char, a aw riah chuan kal hram tura min duh zia ka hre thei, 'aaa,, aw, ka insiam anga, ka han kal dawn nia' ka ti ve mai, lawm thu te sawiin a awmna te leh thil tihdan tur te min hrilh mawlh mawlh hnuah phone a dah ta hram. Peih lo zetin khum atang chuan ka tho a, ka tho pawh nilo ka tleng thla ani mah zawk, ka thiante hnenah chuan ka kalna tur te sawiin ka in siam nghal mawlh mawlh. Dik tak chuan ka peihlo, peihlo tak ka ni, ka naupanlai atangin damdawiin leh thlanmual hi ka hmun ngainat loh ber an nia, chhun khaw en lai pawh nise mahni hian ka kal ngam ngailo, tunah pawh a tulna vang leh min mamawh tu an awm vang mai ania, ka ai kal tur awm se ka ti khawp mai.
Damdawiin ka thlen chuan Sangtei chu ka call a, gate-a duty te chuan enge ka tih dawn min lo zawt vat, ka tih tur leh ka kal chhan ka sawi chuan min luh tir ve mai. An awmna ka thlen chuan Sangtei chu ka Ni te in lama chhuk turin ka ti a, ala naupang bawk nen Aizawl a vawikhat kalna ani bawk a, khua athim tawh bawk nen 'mahni chuan ka ngamlo' a ti deuh tlat, damlo amah a kalsan ngawt lah chu thil ni thei niin ka hre bawk silo. Chu tia tih dan tur ngaihtuah a kan din reng lai chuan, toilet a tang hian nu pakhat hmeltha deuh hi alo chhuak a, kan awmna lamah chuan alo kal a, ka awmna bula putar chu 'ka pa i ril atam em?' alo ti sap, putar pawh chuan a lu alo bu ve nghat nghat, kan lam lo hawi leh in, 'damlo in awmpui ve ami?' nui sang hian alo ti a, kan awmpui thu leh Sangtei thlah lawk ka ngaih thu te, damlo kalsan kan hreh thu te chu ka hrilh nghal mawlh mawlh, nui sang chung hian ' aww,, chungte chu hei ka awm hi, i nau chu zuk thlah la, in kal chhung chu ka lo awmpui pah ang' alo ti hlauh, lawmthu sawi mawlh mawlh in ka Ni te in lam pan tur chuan kan in zui chhuak nghal, damdawiin kan chhuah san chiah tih chuan kan hmaa lo kal vang chuan ka ding chawt, ani pawh chuan min hmu ve tih hriat zetin a ding nghal, chiang zetin kan in en a, ka bula mi chu a en leh, engmah sawilo chuan min kal pel a, gate duty te chu a va be nghal, min en zui miah lo chuan damdawiin chhungah chuan alut nghal daih. Sangtei chuan 'U M, i hre ngai ami? A van hmeltha em em' alo ti ve sep, ' hre chiah lo, ahma khan min hau hrep tawh a' ka tih chuan min hauh chhan leh kan in tawn dan vel chu min zawt pah mawlh mawlh.
