حب شيخ العشيره 🔞🔞

"وتَّظن أنها النهاية ثم يُصلحَ الله كُل شيء"

هلو اسمي جواهر
احنى 5 بنات  (رقيه _زينب_اني _ فاطمه _ رغد)
الله ما رزق امي و ابوي ولد بس بنات
  وابوي اعترض على امر الله يريد ولد حتى يشيل اسمه و يورثه طبعاً ابوي چان كلش يحب اخواتي بس ما يحبني...
لان اشبه امي بس امي چانت كلش تحبني
امي توفت من چان عمري 6 سنين بحادث سياره و ابوي چان يكره امي لان چان يحب اخت
امي بس صار الي صار و بابا اخذ امي مو برضاه لان جدو جبره يتزوجها
من ماتت امي ابوي فرح كلش و راح تزوج اخت امي اسمها نور الي چان يحبها
من هنا تبدي معاناتي ويا اهلي...
.
.
.
چنه گاعدين بالبيت رقيه هيه الچبيره چانت كلش تحبني لان تشوف معاملت ابويه ليه و بابا الوحيد
الي يضربني من بين كل اخواتي
چان كل ما يضربني تجي مرته و تضحك
تگوله عوفها ما تستاهل تحرگ اعصابك على هيچ شكول و تروح
طبعا ضليت على هيچ حاله چنت كلش احلم اروح للجنوب و ازور البصره
لان اسمع بنات يحچن عليها و يگولن حلوه و صارت بنفسي اروحلها و اشوفه
            
             ____________________

تزوجت رقيه و عمرها 21 من ابن عمي اسمه حسين چان كلش زين وياها و هوه چان يحبها من چانت رقيه عمرها 17 وهيه هم تحبه و تزوجها و راحو للجنوب  و كذالك زينب ابوي زوجها ابن صديقه و هيه عمرها 19 و سافرو زوجها وزينب خارج العراق چنت كلش حزينه لان ما عندي بعد احد وياي و يسعدني و يحميني من بعدهن.
.
.

چان بابا و مرته گاعدين بالصاله و يسولفون و اني چنت بالمطبخ اسمعهم و بابا چان يگول المرته
على شيخ العشيره انو شيخ العشيره من يموت ابنه راح يصير شيخ العشيره
اني الي سمعته ابنه اسمه سليمان و عمره 30 سنه ما متزوج و چان جدي كلش يحبه لان راح يصير شيخ العشيره و يدورله  بنيه حتى يزوجها اله
بس هوه رافض فكرة الزواج بحجة ماكو بنيه تعجبه
فا اجتي مرة ابويه
نور: بسرعه سوي اكل گبل لا يجن اخواتچ من الدوام
خطيه هسه يجن جوعانات
جواهر: ستوني غسلت المواعين انتِ سوي الاكل
نور: شنووو ليش تصيحين عليه هااا؟
جواهر: اني ما صيحت بس گلتلچ انتِ سوي الاكل
شفت عيونها صارن يطلعن شرار
نور: اصبري هسه تشوفين شراح اسوي بيچ
اجت و گامت تبچي و وگعت تفسها بالگاع و گامت تصيح و ابويه اجه يركض
ابويه: بعصبيه هاي شنو شصار
نور: تبچي و تشاهك ما سويتلها شي بس گتلها سوي الاكل لان اني كلش تعبانه و اجتي صيحت عليه
و ضربتني و وگعتني
اجه ابويه عليه ركض و گام يكتلني و زورك جسمي
من الضرب
ابويه: اي كلمه تگولها نور تسمعين كلامها و تسوينها
لو تگلچ اشمري روحچ بالشط تشمريها
كسر جسمي تكسير چان تجي نور تمسح دموع التماسيح و تروح
.
.
.
اجيت حضرت الاكل و جني وفاطمه و رغد من المدرسه طبعا بابا بطلني من المدرسه گال مدام
تعرفين تقرين و تكتبين ما يحتاج بعد تدرسين و هيه چذب بس حتى اساعد مرته بشغل البيت
صبيتلهن الاكل و رحت للغرفه گمت ابچي من وجع جسمي و اشوف الزراگ الي بجسمي
طبعا اني چنت كلش حلوه عيوني چانت اخضر فاتح
و شعري اشگر و كلش طويل و بشرتي بيضه و ضعيفه و عندي خصر على امي بس ما اعرف ليش هلگت بابا
حاقد عليه و على امي على الرغم امي چانت احلى
من خالتي نور بهواييييي
بس هذا الي ما عاجبه العجب يضل يتبطر
صار عمري 20 سنه و ابوي گال جدي يريد يشوفنه
وهاي چانت اول مره بحياتي اشوف بابا خايف و يرجف من الخوف
اني كلش فرحت لان هاي اول مره بحياتي اطلع من البيت حتى ملابس العيد مرته تجيبهن ليه لان جدي بالجنوب
حضرنه غراضنه و رحنه للجنوب چان الطريق كلش طويل و متعب و حاره طبعا بابا چان هوه الوحيد
الي مو بالجنوب
لان جدي عنده مزرعه بديالى فخله بابا هناك
المهم وصلنه على بيت جدو ونزلنه من السياره اني
ضليت صافنه على البيت لان چان كلش چبيررر
طبينه شفت عماتي و بناتهن واكفات يباوعن علينه
بابا راح للديوان بس للرجال و احنى طبينه من الباب
الثاني و عماتي يسلمن علينه
شفت رقيه هناك و ركضت عليه و حضنتها
كلش فرحت من شفتها حسيتها امي الثانيه هيه
گعدنه و اجني بنات عماتي عليه و يمدحن بيه و على
جمالي و يضحكن وياي كلش حبيتهن
و شفت مرة ابويه و هيه تخزرني غارت مني لان بنات عماتي اجن يمي وما جني يم بناتها وره اسبوع
اجه جدي و صاح عليه يريدني و اني كلش استحيت
لان الديوان مليان عماني و ولدهم
اجيت لبست شالي و جيت يم جدو خلاني بصفه
و حضني
جدي: الله بيچ ريحه المرحومه شگد مشتاقلها
ابويه: اي والله چانت ونعم الزوجه چانت ليه الله يرحمها و يجعل الها جنات النعيم.
اني باوعت على بابا و شلون يكرها بس ادري بي
بس على مود الورث هيچ يحچي
جدي: والله جواهر انتِ كلش حلوه و محترمه وعندچ معزه چبيره يمي فا قررت اخذچ السليمان
لان تدرين بي راح يصير شيخ العشيره و ميصير ما متزوج بهاذا العمر شدگولين بنيتي
اني كلش فرحت لان راح اعيش بالجنوب و احقق حلمي ردت اجاوبه چان يحچي بابا
ابويه: حجي ليش ما تزوج فاطمه ال سليمان
الديوان كله صار هدووووء و كلهم صافنين
سليمان: لا اني گلت للحجي اريد يزوجني جواهر
ابويه: ح. حاضر الي تريده يصير
جدي: ها شگلتي جواهر موافقه على سليمان لو لا؟
ابويه: اي طبعا توافق ليش ما توافق لو حتى
ما توافق غصبا عنها توافق 
جدي: بعد لا تدخل ما ردت جوابك مفهوم!!
سليمان: جواهر موافقه تزوجيني لو لا؟