Zanah chuan ka chhungte nen kan in bia a, ka zirna chungchang te kan sawi luam, rei fê kan in biak hnu chuan kan dah ve thei hram, ka chhungte bula ka awm lai kha chuan an naute kha ka nia, tunah an bulah ka awm lo a, nula ka lo ni ve ta der a, ka nui sak, ka phoneah message alo luh chuan ka en vat, Bawiha a lo ni 'i mu tawh em?' tih tê mai hi, 'ka mumangah ka cheng mek' tia ka reply chuan 'i daw thei altra' emoji nui vak vak lai nen hian alo thawn, 'ka bulah i awm tam lutuk a i tawngtam vek' ka va tih chuan 'ka lo ru nghal dawn che' alo ti ve leh, 'mu rawh lalngo' ka va tih leh chuan 'a thing altra' alo ti ve leh zat, thu ho mai mai a in hnial chuan rei fê kan in bia. Zingah chuan Bawiha chuan min lo call an ina ka len tur chu thulh rih mai ang alo ti, Delhi an an kal tur thu leh hna thil anih thu te , kar 2 vel an cham tur thu te a rawn sawi chuan ka mood a chhe vek, nileng chuan ka mood a fuh theilo, Bawiha lah zing a min biak bak kha abiak leh theih tawh loh a, Zuala'n 'Puipuii nen an kalin ka hria' atih phei chuan hlauhthawnna ka nei nghal ringawt. Ni hnih lai aliam tawh, Bawiha'n min lo be lo a, biak ka tum lahin a tlang thei bawk silo, ngaihtha lo zet chuan ka awm.
Zanah chuan ka phone ah massage alo lut a, whatsapp atangin ani, ka en chuan Bawiha a lo nia, ka open nghal, mahse ka message dawn vang chuan ka phone chu ka en vung vung, ka in rin hmain ka biangah mittui alo luang nghal, ka thiante chuan min lo hmuh chuan min lo pan nghal vat, Sawmi chuan ka phone chu ala a, a en nghal 'Zawnga mai mai chuh' ti hmuk hian min lo kuah, kei erawh tap hreh si, mittui dang zo chuang silo chuan ka hmui ka pet fan fan, Rini leh Seni te pawh chuan kan phone chu an en a, Rini chuan 'awi ava han chhe tak, hetiang a backspin hi ka chak'tih pahin boruak te chu a han hnek a, Sawmi chuan 'backspin anih loh kha, hnek anih kha' alo ti ve hmuk, rilru na viau e tilo chuan ka tah nuih hawk, ka thiante bulah hi chuan tum loh deuh a nuih vak a awl. Seni chuan 'aho em mai, a aia tha an tam lutuk, naktukah Rini kawngsir chicks te kan en nghal ang' nui chung hian alo ti ve leh, Sawmi pawh chuan 'ni e, Rini hian mistiri babes a nei teuh alawm, bazar piahah khian an tam lutuk' nui uarh uarh hian alo ti ve leh, Rini chuan 'tap suh, Zawng i ang lutuk' alo tih chuan rum fê hian ka melh , Sawmi chuan 'Zawng i hmu tawh mi?' atih chuan Seni chuan 'Awi, Zawng nilo Hahuk a ang' alo tih chuan thinrim deuh si, nuihza tho bawk siin ka awm, Rini lah chuan 'enge Hahuk chu?, Sawmi enge chu chu?' alo ti ve leh, a hriat thiam loh hmel ngang mai, Sawmi chuan 'Hahuk chu maw, nangmah ang deuh' atih leh chuan Rini chuan 'i ninawwmm,,' alo ti vak, an nui leh vak vak. Bathroon lam pan chuan ka kal a, an bula ka awm reng chuan fiamthu nan min hmang leh reng palh ang. Bathroomah chuan ka ding reng a, ka message dawn kha ka rilru ah lo lang nghal, 'in then ang midang duh ka nei' tih leh Puipui nen a dawra an chawl lai thlalak ani, an thlalakah kha chuan hlim hmel zetin an in en anih kha, ka mittui hru in 'kha tiang mihring rilru nghet lo lutuk vang khan ka na nawn lo vang' tiin bathroom ah chuan mahni ka in fuih mawlh mawlh.
Bathroom atanga ka chhuah chuan ka thiante chuan sahuan chungchang an lo la sawi, Sawmi chuan min hmuh rualin 'M-i hei Rini hian sahuanah ka awm duh ati nih chu' nui chung hian alo ti , 'nga ti nge?' bo zet hian ka lo ti ve vat, Seni chuan 'Hahuk nen an in ang kan tia' atih ve leh chuan ka nui vak, Rini chuan 'awihawm loh lutuk, chutiang anilo, ka hmu duh ka ti ringawt alawm' alo ti ve leh, an in hnial leh vak vak, an la bengchheng em em zui. Ka thiante vang chuan Bawiha pawh ka hre chang tawh lo, nilo ka hre duh lo anih mah zawk. Hun akal a, karkhat lai aliam leh tawh, Bawiha chu a reh hmak a, thil awmzia va zawh chian ka tumlo a, block pawh ka tum lo, 'duh a thlang a akal ani mai ' tiin ka in hnem thin. Zantin deuh thaw ti hian ka ngaihtuah a, ka naupanlai nu leh pate bula ka awm lai kha chuan ka duh ka neih theih nan nasa taka tapin ka dil thin kha nia, tunah chuan ka duh ber theihnghilh nan zantin ka tap thin ania. Ka hun tawn danglam ta lutuk chu ka pawm thiamlo ani ber, kan naupanlai, nu leh pate bula kan harsatna leh natna kan hrilh thin a, an niin min lo kuaha min lo hnem thin lai kha ka ngai vawng vawng, tunah chuan mahniin ka tuar tlawk tlawk a, tap mah ila midang hmuhah ka lantir arem lo a, pawnlam dam em em si hian chhungrilah na a awm tlat a. Ring tak takin nui mah ila ka nuih zawh rualin chhungril natna te khan min lo tuam leh thin, dam reng si hian ka damlo ani ber.
Class kan ban chuan kan thian ho chuan ice cream lei ang u tiin ice cream dawr kawtah chuan kan ding thap, an duh zawng kan sawi sap sap lai chuan 'ice cream leh bawk maw?' ka bula lo ding pah hian mi pakhat hian alo ti a, ka en chuan Zuala alo ni 'i dam maw? Kan va in hmu khat em em?' nui suk hian alo ti a, 'nia, i in duh em a' ka lo ti ve vat, thu tak deuh zawk hian 'Bawiha nen in chanchin ka lo hria a, mahse i hriat loh thil a awm a, amah hmu la, sawifel rawh u' atih chuan 'ka buai , ka hmanlo' ka lo ti hmak, ice cream chu la in ' ka kal ange, anih phawt' tiin ka kalsan. Zanah chuan 'i hlim maw' tih massage hi Bawiha hnen atangin ka dawng a,'i hlim chuan ti nge ka hlim loh bik ang' ka va ti ve ngat, 'ka hlim i ring ami?' alo tih leh chuan 'i duh ber i nei a, i la hlim lo anih chuan i duham mah mah' ka va ti ve leh. 'ka duh ber ka chan a, ti chuan i duh ber i nei min ti maw?' alo tih leh chuan 'nih mai lohin, engtin nge ka sawi vak anga?' ka ti ve leh, 'i bialpa thar chuan tawngkam mak deuh deuh hman aphal tawhlo ami?' alo tih chuan, 'lo buai suh' tih ringawtin ka reply. Engtin mah min lo chhang let tawh lo.
Zingah chuan class kal turin kan in zui chhuak leh a, kawngah chuan Seni chuan 'M-i saw, Zoremtluanga' atih chuan a sawina lam chu kan hawi thap, dawr atang chuan alo chhuak a, paper bag lian ve deuh hi akhai bawk, Sawmi chuan 'a bialnu gift tur alei aniang' alo ti vat, ka rin dan ve tho ani, alo chhuahna kha hmeichhe thawmhnaw dawr ani miau a. Chutia kan en thap lai chuan kan lam chu alo hawi, rang zet chuan ' kal ang u' ka ti a, ka kal nghal, 'Bawihi' ka bana chelh pah hian alo ti sup, ka thian te chuan 'hei' tih pahin ka ban leh lam ve ve ah chuan an lo chelh nghal, Bawiha chu rum zet hian an melh thap bawk. Bawiha chuan ' in thiannu hi biak lok ka duh mai ania' a ti va nghut. Seni chuan 'i dawt sawi ngai thla mai mai tur chuan kan thiannu hi kan phal bik lo' alo ti ve hmak. An hlaulo lutuk chuan ka nuih ati za zawk, Bawiha pawh chuan tih vak ngaihna ahre lo aniang ' a reilo ang, ei tur ka lei sak vek ang che u, Car ka lo keng a, class thleng ka thlah ang che u' atih takah chuan ka thiante chuan min en thap, an mit meng chuan 'engtin nge ni ang?' a ti ni berin ka hria, 'a tha lawm' ka lo tih ve takah chuan min thlah ve hram, Sawmi chuan ' han tina leh vaih teh ka chhir khawk vek ang che' alo ti ve kha kha, Rini pawh chuan ' kan beng hrep ang che' alo ti ve leh, Bawiha pawh chu anui suk ringawt. Kan piah deuh a kawngsirah chuan kan in zui phei a, ka thiante nen pawh kan la in hmu pha, kan tawng erawh an hre pha lo ang. ' enge sawi vat rawh' ka tih chuan 'vawin ka nu birthday ania, zanah ka rula a lawm naa kal turin ka duh che' a tih chuan 'eng vangin ? Ti nge i bialnu i hruai mai loh' ka tih chuan ' kan inthen tawh hi' awlsam zet hian alo ti, 'kei nilo, Delhi a i hruai zawk kha nia ka tih, kei aia i thlan zawk kha' hmui i sawi zeuh a ka tih chuan 'enge awmzia' mak tih hmel zet hian alo ti, 'hrelo der suh, chuan ka hmanlo bawk, tumah an bialpa hlui nu te birthday lawm naah an kal daw daw duh lo ang, an zak theilo hle anih loh chuan' ti hmak in kalsan mai ka tum a, ka banah lo main 'Delhi chungchang kha ka sawifiah thei, mahse min then chhan kha sawifiah hmasa rawh' alo tih leh chuan awih lo fê hian ka en ngawt ngawt. Thinrim zet hian 'zahna hi i ke phah hnuaiah hian i rap bet bik nge, an sem lai khan i dawn thelh zawk? Nge zak taka min siam hi i chal ve hrim hrim, lo ngaithla rawh, kei nilo nangman in then i rawt hmasa zawk' thinrim zet chuan ka ti nghal par par, ka thinrim lutuk chu ka sa vek in ka hria. Thaw hawk hian ' nangman anih kha ' tih Pahin a phone alo phawrha a hmet ngal nuap nuap. Ka phone phawrh ve in message lo thawn chu ka en tir ve nghal, a phone min en tir rual a ka thil hmuh chuan min thawng lutuk, a phone chu ka en chiang nghal, ani pawh chuan ka phone chu ala ve nghal, mak ti zet hian kan in en top. Ka message dawn ang tho kha ka hnen atangin hian alo dawng ve a, min be tawh lo tura ka tihna leh bialpa dang ka neih thu te, mipa pakhat nena kan thlalak te ani, mahse chiang takin ka hre thei, thlalak a hmeichhia chu keimah ka nilo. Thaw chhuak hawk hian 'ka tih anilo' tiin Bawiha chu ka en, ani pawh chuan 'keipawh ka nilo' alo ti ve leh, anih chuan tu tih nge ni ang?.
